อรรถกถาเล่มที่ ๒๖ หน้าที่ ๓๑๖.

ปฐนฺติ, วุตฺตนเยน ยตฺถ กตฺถจิ คมเน ปกฺกมเน สตีติ อตฺโถ. อยญฺจ อตฺโถ "น อนฺตลิกฺเข น สมุทฺทมชฺเฌ ฯเปฯ ปาปกมฺมา"ติ ^๑- อิมาย คาถาย ทีเปตพฺโพ. จตุตฺถสุตฺตวณฺณนา นิฏฺฐิตา. --------------- ๕. อุโปสถสุตฺตวณฺณนา [๔๕] ปญฺจเม ตทหูติ ตสฺมึ อหนิ ตสฺมึ ทิวเส. อุโปสเถติ เอตฺถ อุปวสนฺติ เอตฺถาติ อุโปสโถ, อุปวสนฺตีติ สีเลน วา อนสเนน วา อุเปตา หุตฺวา วสนฺตีติ อตฺโถ. อยํ หิ อุโปสถสทฺโท "อฏฺฐงฺคสมนฺนาคตํ อุโปสถํ อุปวสามี"ติอาทีสุ ^๒- สีเล อาคโต. "อุโปสโถ วา ปวารณา วา"ติอาทีสุ ^๓- ปาติโมกฺขุทฺเทสาทิวินยกมฺเม. "โคปาลกูโปสโถ นิคณฺฐูโปสโถ"ติอาทีสุ ^๔- อุปวาเส. "อุโปสโถ นาม นาคราชา"ติอาทีสุ ^๕- ปญฺญตฺติยํ. "อชฺชุโปสโถ ปณฺณรโส"ติอาทีสุ ^๖- ทิวเส. อิธาปิ ทิวเสเยว ทฏฺฐพฺโพ, ตสฺมา "ตทหุโปสเถ"ติ ตสฺมึ อุโปสถทิวสภูเต อหนีติ อตฺโถ. นิสินฺโน โหตีติ มหาภิกฺขุสํฆปริวุโต โอวาทปาติโมกฺขํ อุทฺทิสิตุํ นิสินฺโน โหติ. นิสชฺช ปน ภิกฺขูนํ จิตฺตานิ โอโลเกนฺโต เอกํ ทุสฺสีลปุคฺคลํ ทิสฺวา "สจาหํ อิมสฺมึ ปุคฺคเล อิธ นิสินฺเนเยว ปาติโมกฺขํ อุทฺทิสิสฺสามิ, สตฺตธาสฺส มุทฺธา ผลิสฺสตี"ติ ตสฺมึ อนุกมฺปาย ตุณฺหีเยว อโหสิ. @เชิงอรรถ: ^๑ ขุ.ธ. ๒๕/๑๒๗/๓๙ @^๒ องฺ. ติก. ๒๐/๗๑/๒๐๗, องฺ. ทสก. ๒๔/๔๖/๖๖ @^๓ วิ. มหา. ๔/๑๕๕/๑๖๓ ^๔ องฺ. ติก. ๒๐/๗๑/๒๐๐ @^๕ ที. มหา. ๑๐/๒๔๖/๑๕๑ ^๖ วิ. มหา. ๔/๑๖๘/๑๗๕

เนื้อความอรรถกถาฉบับภาษาบาลี อักษรไทย เล่มที่ ๒๖ หน้าที่ ๓๑๖. http://84000.org/tipitaka/read/attha_page.php?book=26&page=316&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=26&A=7071&modeTY=2&pagebreak=1 http://84000.org/tipitaka/atthapali/th_line.php?B=26&A=7071&modeTY=2&pagebreak=1#p316