ATTHAKATHA Book 29 : PALI ROMAN
Sutta.A.2 (paramattha.2)
Page 452.

Sabbā viññāṇaṭṭhitiyo abhijānanto tathāgato. Tiṭṭhantamenaṃ jānātīti
kammābhisaṅkhāravasena tiṭṭhantametaṃ puggalaṃ jānāti "āyatiṃ ayaṃ evaṃgatiko
bhavissatī"ti. Vimuttanti ākiñcaññāyatanādīsu adhimuttaṃ. Tapparāyananti tammayaṃ.
      [1122] Ākiñcaññasambhavaṃ ñatvāti ākiñcaññāyatanajanakakammābhisaṅkhāraṃ
ñatvā "kinti palibodho ayan"ti. Nandī saññojanaṃ itīti yā ca tattha arūparāga-
saṅkhātā 1- nandī, tañca saṃyojanaṃ iti ñatvā. Tato tattha vipassatīti tato 2-
ākiñcaññāyatanasamāpattito vuṭṭhahitvā taṃ samāpattiṃ aniccādivasena vipassati.
Evaṃ 3- ñāṇaṃ tathaṃ tassāti etaṃ tassa puggalassa evaṃ vipassato anukkameneva
uppannaṃ arahattañāṇaṃ aviparītaṃ. Vusīmatoti vusitavantassa. Sesaṃ sabbattha
pākaṭameva.
      Evaṃ bhagavā idampi suttaṃ arahattanikūṭeneva desesi, desanāpariyosāne
ca pubbasadiso eva dhammābhisamayo ahosīti.
                     Paramatthajotikāya khuddakaṭṭhakathāya
                          suttanipātaṭṭhakathāya
                      posālasuttavaṇṇanā niṭṭhitā.
                         --------------
                       15. Mogharājasuttavaṇṇanā
      [1123] Dvāhaṃ sakkanti mogharājasuttaṃ. Tattha dvāhanti dve vāre
ahaṃ. So hi pubbe ajitasuttassa ca tissametteyyasuttassa ca avasāne dvikkhattuṃ
bhagavantaṃ pucchi, bhagavā panassa indriyaparipākaṃ āgamayamāno na byākāsi.
@Footnote: 1 ka. arūparāgasaṅkhyā  2 ka. atha tattha  3 cha.Ma. etaṃ


The Pali Atthakatha in Roman Character Volume 29 Page 452.
http://84000.org/tipitaka/read/attha_page.php?book=29&page=452&pages=1&edition=roman
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_rm.php?B=29&A=10160&pagebreak=1
http://84000.org/tipitaka/atthapali/rm_line.php?B=29&A=10160&pagebreak=1#p452