อรรถกถาเล่มที่ ๓๐ ภาษาบาลี อักษรไทย
วิมาน.อ. (ปรมตฺถที.)
หน้าที่ ๓๒.

     [๓๐]       อกฺขามิ เต ภิกฺขุ มหานุภาว
                มนุสฺสภูตา ยมกาสิ ปุญฺญํ
                เตนมฺหิ เอวญฺชลิตานุภาวา
                วณฺโณ จ เม สพฺพทิสา ปภาสตี"ติ.
     เอตฺถาปิ หิ นีลวตฺเถน อตฺถริตฺวา ปีฐสฺส ทินฺนตฺตา อิมิสฺสาปิ วิมานํ
เวฬุริยมยํ นิพฺพตฺตํ, เตเนเวตฺถ "ปีฐํ เต เวฬุริยมยนฺ"ติ อาทิโต อาคตํ. เสสํ
ตติยสทิสเมวาติ ตตฺถ วุตฺตนเยเนว อตฺโถ เวทิตพฺโพ.
                     จตุตฺถปีฐวิมานวณฺณนา  นิฏฺฐิตา.
                         ---------------
                        ๕.  กุญฺชรวิมานวณฺณนา
     กุญฺชโร เต วราโรโหติ กุญฺชรวิมานํ. ตสฺส กา อุปฺปตฺติ? ภควา
ราชคเห วิหรติ เวฬุวเน กลนฺทกนิวาเป. อเถกทิวสํ ราชคหนคเร นกฺขตฺตํ
โฆสิตํ, นาครา วีถิโย โสเธตฺวา วาลุกํ โอกิริตฺวา ลาชปญฺจมกานิ ปุปฺผานิ
วิปฺปกิรึสุ, เคหทฺวาเร เคหทฺวาเร กทลิโย จ ปุณฺณฆเฏ จ ฐเปสุํ, ยถาวิภวํ
นานาวิราควณฺณวิจิตฺตา ธชปฏากาทโย อุสฺสาเปสุํ, สพฺโพ ชโน อตฺตโน อตฺตโน
วิภวานุรูปํ สุมณฺฑิตปสาธิโต นกฺขตฺตกีฬํ กีฬิ, ๑- สกลนครํ เทวนครํ วิย
อลงฺกตปฏิยตฺตํ อโหสิ. อถ พิมฺพิสารมหาราชา ปุพฺพจาริตฺตวเสน มหาชนสฺส
จิตฺตานุรกฺขณตฺถญฺจ อตฺตโน ราชภวนโต นิกฺขมิตฺวา มหนฺเตน ปริวาเรน มหตา
ราชานุภาเวน โอฬาเรน สิริโสภคฺเคน นครํ ปทกฺขิณํ กโรติ.
     เตน จ สมเยน ราชคหวาสินี เอกา กุลธีตา รญฺโญ ตํ วิภวสมฺปตฺตึ
@เชิงอรรถ: ๑ สี. กีฬติ


เนื้อความอรรถกถาฉบับภาษาบาลี อักษรไทย เล่มที่ ๓๐ หน้าที่ ๓๒.
http://84000.org/tipitaka/read/attha_page.php?book=30&page=32&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=30&A=686&modeTY=2&pagebreak=1
http://84000.org/tipitaka/atthapali/th_line.php?B=30&A=686&modeTY=2&pagebreak=1#p32