ATTHAKATHA Book 31 : PALI ROMAN
Peta.A. (paramatthadī.)
Page 289.

Vihāro kāritoti upāsakassa vasena āgataṃ, idha pana upāsikāyāti ayameva
viseso. Sesaṃ vatthusmiṃ gāthāsu ca apubbaṃ natthi.
                      Gūthakhādakapetivatthuvaṇṇanā niṭṭhitā.
                         ---------------
                     130. 10. Gaṇapetavatthuvaṇṇanā
     naggā dubbaṇṇarūpātthāti idaṃ satthari jetavane viharante sambahule pete
ārabbha vuttaṃ.
     Sāvatthiyaṃ kira sambahulā manussā gaṇabhūtā assaddhā appasannā
maccheramalapariyuṭṭhitacittā dānādisucaritavimukhā hutvā ciraṃ jīvitvā kāyassa bhedā
nagarassa samīpe petayoniyaṃ nibbattiṃsu. Athekadivasaṃ āyasmā mahāmoggallāno
sāvatthiyaṃ piṇḍāya gacchanto antarāmagge pete disvā:-
         [782] "naggā dubbaṇṇarūpāttha       kisā dhamanisanthatā
               upphāsulikā kisikā          ke nu tumhettha mārisā"ti
gāthāya pucchi.
     Tattha dubbaṇṇarūpātthāti dubbaṇṇasarīrā hotha. Ke nu  tumhetthāti tumhe
ke nu nāma bhavatha. Mārisāti te attano sāruppavasena ālapati.
     Taṃ sutvā petā:-
         [783] "mayaṃ bhadante petamhā       duggatā yamalokikā
               pāpakammaṃ karitvāna          petalokaṃ ito gatā"ti
gāthāya attano petabhāvaṃ pakāsetvā puna therena:-
         [784] "kiṃ nu kāyena vācāya       manasā dukkaṭaṃ kataṃ
               kissakammavipākena           petalokaṃ ito gatā"ti
gāthāya katakammaṃ pucchitā:-


The Pali Atthakatha in Roman Character Volume 31 Page 289.
http://84000.org/tipitaka/read/attha_page.php?book=31&page=289&pages=1&edition=roman
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_rm.php?B=31&A=6405&pagebreak=1
http://84000.org/tipitaka/atthapali/rm_line.php?B=31&A=6405&pagebreak=1#p289