อรรถกถาเล่มที่ ๓๒ หน้าที่ ๑๑๐.

[๑๙] ตตฺถ อุทกํ หีติ หิสทฺโท นิปาตมตฺตํ. นยนฺตีติ ปฐวิยา ตํ ตํ ถลฏฺฐานํ ขนิตฺวา นินฺนฏฺฐานํ ปูเรตฺวา มาติกํ วา กตฺวา รุกฺขโทณึ ^๑- วา ฐเปตฺวา อตฺตโน อิจฺฉิติจฺฉิตฏฺฐานํ เนนฺติ. ตถา เต เนนฺตีติ เนตฺติกา. เตชนนฺติ กณฺฑํ. อิทํ วุตฺตํ โหติ:- เนตฺติกา อตฺตโน รุจิยา อิจฺฉิติจฺฉิตฏฺฐานํ อุทกํ นยนฺติ, อุสุการาปิ ตาเปตฺวา เตชนํ นมยนฺติ ^๒- อุชุํ กโรนฺติ. นมนวเสน ^๓- ตจฺฉกา เนมิอาทีนํ อตฺถาย ตจฺฉนฺตา ทารุํ นมยนฺติ อตฺตโน รุจิยา อุชุํ วา วงฺกํ วา กโรนฺติ. ^๔- เอวํ เอตฺตกํ อารมฺมณํ กตฺวา สุพฺพตา ยถาสมาทินฺเนน สีลาทินา สุนฺทรวตา ธีรา โสตาปตฺติมคฺคาทีนิ อุปฺปาเทนฺตา อตฺตานํ ทมยนฺติ, ^๕- อรหตฺตํ ปน ปตฺเตสุ เอกทนฺตา ^๖- นาม โหนฺตีติ. กุฬตฺเถรคาถาวณฺณนา นิฏฺฐิตา. ------------- ๑๕๗. ๑๐. อชิตตฺเถรคาถาวณฺณนา มรเณ เม ภยํ นตฺถีติ อายสฺมโต อชิตตฺเถรสฺส คาถา. กา อุปฺปตฺติ? โส กิร เอกนวุเต กปฺเป วิปสฺสึ ภควนฺตํ ปสฺสิตฺวา ปสนฺนจิตฺโต กปิตฺถผลํ ^๗- อทาสิ. ตโต ปรมฺปิ ตํ ตํ ปุญฺญํ กตฺวา เทวมนุสฺเสสุ สํสรนฺโต อิมสฺมึ กปฺเป อนุปฺปนฺเนเอว อมฺหากํ สตฺถริ สาวตฺถิยํ มหาโกสลรญฺโญ อคฺคาสนิยสฺส พฺราหฺมณสฺส ปุตฺโต หุตฺวา นิพฺพตฺติ. ตสฺส อชิโตติ นามํ อโหสิ. ตสฺมึ จ สมเย สาวตฺถิวาสี พาวรี นาม พฺราหฺมโณ ตีหิ มหาปุริสลกฺขเณหิ สมนฺนาคโต ติณฺณํ เวทานํ ปารคู สาวตฺถิโต นิกฺขมิตฺวา ตาปสปพฺพชฺชํ ปพฺพชิตฺวา @เชิงอรรถ: ^๑ สี. รุกฺขโทณิโย ^๒ ม. ทมยนฺติ ^๓ ม. ทมนวเสน ^๔ สี. อุชุกํ วา กโรนฺติ @^๕ ฉ.ม. ทเมนฺติ ^๖ ฉ.ม. เอกนฺตทนฺตา ^๗ ก. กปิฏฺฐ... เอวมุปริปิ

เนื้อความอรรถกถาฉบับภาษาบาลี อักษรไทย เล่มที่ ๓๒ หน้าที่ ๑๑๐. http://84000.org/tipitaka/read/attha_page.php?book=32&page=110&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=32&A=2499&modeTY=2&pagebreak=1 http://84000.org/tipitaka/atthapali/th_line.php?B=32&A=2499&modeTY=2&pagebreak=1#p110