อรรถกถาเล่มที่ ๓๒ หน้าที่ ๑๗๘.

"กุกฺกุฬา"ติอาทิ วุตฺตํ. ตสฺสตฺโถ:- อโหรตฺตํ อาทิตฺตํ วิย หุตฺวา ฑหนฏฺเฐน กุกฺกุฬนิรยสทิสตฺตา กุกฺกุฬา คิหิภาวา อนุกมฺปนฺติยา มยา อุพฺภโต อุทฺธโต ตาต สานุ กุกฺกุฬํ ปติตุํ อิจฺฉสิ ปติตุกาโมสีติ. ตํ สุตฺวา สานุสามเณโร สํเวคชาโต หุตฺวา วิปสฺสนํ ปฏฺฐเปตฺวา ^๑- น จิรสฺเสว อรหตฺตํ ปาปุณิ. เตน วุตฺตํ อปทาเน ^๒- :- "ภุญฺชนฺตํ สมณํ ทิสฺวา วิปฺปสนฺนมนาวิลํ ฆเฏโนทกมาทาย สิทฺธตฺถสฺส อทาสหํ. นิมฺมเลหิ กุเล สฺวาชฺช ^๓- วิมโล ขีณสํสโย ภเว นิพฺพตฺตมานสฺส ผลํ นิพฺพตฺตเต สุภํ. ^๔- จตุนวุติโต ^๕- กปฺเป อุทกํ ยํ อทาสหํ ^๖- ทุคฺคตึ นาภิชานามิ ทกทานสฺสิทํ ผลํ. เอกสฏฺฐิมฺหิโต กปฺเป เอโกว วิมโล อหุ สตฺตรตนสมฺปนฺโน จกฺกวตฺตี มหพฺพโล. กิเลสา ฌาปิตา มยฺหํ ฯเปฯ กตํ พุทฺธสฺส สาสนนฺ"ติ. อรหตฺตํ ปน ปตฺวา เถโร อิมิสฺสา คาถาย วเสน "มยฺหํ วิปสฺสนารมฺโภ อรหตฺตปฺปตฺติ จ ชาตา"ติ อุทานวเสน ตเมว คาถํ ปจฺจุทาหาสิ. สานุตฺเถรคาถาวณฺณนา นิฏฺฐิตา. ----------- @เชิงอรรถ: ^๑ สี. วฑฺเฒตฺวา ^๒ ขุ. อป. ๓๒/๒๕/๒๘๑ อุทกทายกตฺเถราปทาน @^๓ ฉ.ม. นิมฺมโล โหมหํ อชฺช, สี., ม. นิมฺมเลหิ คุเณหิชฺช ^๔ ปาลิ. มม ^๕ ฉ.ม. @ จตุนฺนวุติโต ^๖ ม. อุทกํ ยมทาสหํ, อิ. อุทกํ ยํ ตทา อหํ, ปาลิ. อุทกํ อททึ ตทา

เนื้อความอรรถกถาฉบับภาษาบาลี อักษรไทย เล่มที่ ๓๒ หน้าที่ ๑๗๘. http://84000.org/tipitaka/read/attha_page.php?book=32&page=178&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=32&A=4002&modeTY=2&pagebreak=1 http://84000.org/tipitaka/atthapali/th_line.php?B=32&A=4002&modeTY=2&pagebreak=1#p178