Taṃ tesaṃ micchā, na hi ahaṃ rūpamattena avamantabbo, ghosamattena vā na bahuṃ
mantabbo, tasmā chandarāgavasūpetā, na maṃ jānanti te janāti te duvidhāpi
janā 1- chandarāgassa vasaṃ upetā appahīnachandarāgā sabbaso pahīnachandarāgaṃ maṃ
na jānanti.
Avisayo tesaṃ mādiso ajjhattaṃ bahiddhā ca apariññātavatthutāyāti dassetuṃ
"ajjhattan"tiādi vuttaṃ. Ajjhattanti attano santāne khandhāyatanādidhammaṃ.
Bahiddhāti parasantāne. Athavā ajjhattanti mama abbhantare asekkhasīlakkhandhādiṃ.
Bahiddhāti mameva ākappasampattiyādiyuttaṃ bahiddhā rūpadhammappavattiṃ cakkhuviññāṇā-
dippavattiṃ ca. Samantāvaraṇoti evaṃ ajjhattañca bahiddhā ca ajānanena samantato
āvaraṇayutto āvaṭañāṇagatiko. Sa ve ghosena vuyhatīti so paraneyyabuddhiko
bālo ghosena paresaṃ vacanena vuyhati niyyati ākaḍḍhiyati.
Bahiddhā ca vipassatīti yo ca vuttanayena ajjhattaṃ na jānāti, bahiddhā pana
sutānusārena ākappasampattiādiupadhāraṇena vā visesato passati. "guṇavisesayutto
siyā"ti maññati, sopi bahiddhā phaladassāvī nayaggāhena phalamattaṃ gaṇhanto vuttanayena
ghosena vuyhati, sopi mādise na jānātīti attho.
Yo pana ajjhattañca khīṇāsavassa abbhantare asekkhasīlakkhandhādiguṇaṃ jānāti,
bahiddhā cassa paṭipattisallakkhaṇena visesato guṇavisesayogaṃ passati. Anāvaraṇadassāvī
kenaci anāvaṭo hutvā ariyānaṃ guṇe daṭṭhuṃ ñātuṃ samattho, na so ghosamattena
vuyhati yāthāvato dassanatoti
lakuṇṭakabhaddiyattheragāthāvaṇṇanā niṭṭhitā.
@Footnote: 1 Sī.,i. maṃ jānantīti te duvidhāpi
The Pali Atthakatha in Roman Character Volume 33 Page 146.
http://84000.org/tipitaka/read/attha_page.php?book=33&page=146&pages=1&edition=roman
ศึกษาพระสูตร (เนื้อความ) นี้แยกตามสารบัญ :-
http://84000.org/tipitaka/pitaka_item/read_rm.php?B=33&A=3344&pagebreak=1
http://84000.org/tipitaka/atthapali/rm_line.php?B=33&A=3344&pagebreak=1#p146
