อรรถกถาเล่มที่ ๓๔ ภาษาบาลี อักษรไทย
เถรี.อ. (ปรมตฺถที.)
หน้าที่ ๒๐๑.

              อโยฆนหตสฺเสว               ชลโต ชาตเวทโส ๑-
              อนุปุพฺพูปสนฺตสฺส               ยถา น ญายเต คติ.
              เอวํ สมฺมา วิมุตฺตานํ           กามพนฺโธฆตารินํ
              ปญฺญาเปตุํ คติ นตฺถิ            ปตฺตานํ อจลํ ปทํ. ๒-
              อตฺตทีปา ตโต โหถ            สติปฏฺฐานโคจรา
              ภาเวตฺวา สตฺตโพชฺฌงฺเค        ทุกฺขสฺสนฺตํ กริสฺสถา"ติ.
      อิตฺถํ สุทํ มหาปชาปติโคตมี ภิกฺขุนี อิมา คาถาโย อภาสิตฺถาติ.
                 มหาปชาปติโคตมีเถรีคาถาวณฺณนา นิฏฺฐิตา.
                       -------------------
                    ๔๕๗. ๗. คุตฺตาเถรีคาถาวณฺณนา
      คุตฺเต ยทตฺถํ ปพฺพชฺชาติอาทิกา คุตฺตาย เถริยา คาถา.
      อยมฺปิ ปุริมพุทฺเธสุ กตาธิการา ตตฺถ ตตฺถ ภเว วิวฏฺฏูปนิสฺสยํ กุสลํ
อุปจินนฺตี อนุกฺกเมน สมฺภตวิโมกฺขสมฺภารา หุตฺวา ปริปกฺกกุสลมูลา สุคตีสุเยว
สํสรนฺตี อิมสฺมึ พุทฺธุปฺปาเท สาวตฺถิยํ พฺราหฺมณมหาสาลกุเล ๓- นิพฺพตฺตา,
คุตฺตาติสฺสา นามํ อโหสิ. สา วิญฺญุตํ ปตฺวา อุปนิสฺสยสมฺปตฺติยา โจทิยมานา
ฆราวาสํ ชิคุจฺฉนฺตี มาตาปิตโร อนุชานาเปตฺวา มหาปชาปติโคตมิยา สนฺติเก
ปพฺพชิ. ปพฺพชิตฺวา จ วิปสฺสนํ ปฏฺฐเปตฺวา ภาวนํ อนุยุญฺชนฺติยา ตสฺสา จิตฺตํ
จิรกาลํ ปริจเยน พหิทฺธารมฺมเณ วิธาวติ, เอกคฺคํ นาโหสิ. สตฺถา ทิสฺวา ตํ
อนุคฺคณฺหนฺโต คนฺธกุฏิยํ ยถา นิสินฺโนว โอภาสํ ผริตฺวา ตสฺสา อาสนฺเน อากาเส
นิสินฺนํ วิย อตฺตานํ ทสฺเสตฺวา โอวทนฺโต:-
@เชิงอรรถ: ๑ ฉ.ม. ชาตเวทสฺส  ๒ ฉ.ม. สุขํ  ๓ ฉ.ม. พฺราหฺมณกุเล


เนื้อความอรรถกถาฉบับภาษาบาลี อักษรไทย เล่มที่ ๓๔ หน้าที่ ๒๐๑.
http://84000.org/tipitaka/read/attha_page.php?book=34&page=201&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=34&A=4319&modeTY=2&pagebreak=1
http://84000.org/tipitaka/atthapali/th_line.php?B=34&A=4319&modeTY=2&pagebreak=1#p201