อรรถกถาเล่มที่ ๓๔ ภาษาบาลี อักษรไทย
เถรี.อ. (ปรมตฺถที.)
หน้าที่ ๒๖.

อาจริยุปชฺฌายานํ วตฺตํ ทสฺเสตฺวา อตฺตโน ทิวาฏฺฐาเน ปาเท โธวิตฺวา รโห
นิสินฺนา สทตฺถํ มตฺถกํ ปาเปสิ, ตสฺมา ตตฺถ อญฺเญปิ นิโยเชนฺตี อโวจ.
                    วิสาขาเถรีคาถาวณฺณนา นิฏฺฐิตา.
                       -------------------
                    ๔๑๕. ๑๔. สุมนาเถรีคาถาวณฺณนา
      ธาตุโย ทุกฺขโต ทิสฺวาติอาทิกา สุมนาย เถริยา คาถา.
      ตสฺสา วตฺถุ ติสฺสาเถริยา วตฺถุสทิสํ. อิมิสฺสาปิ หิ สตฺถา โอภาสํ
วิสฺสชฺเชตฺวา ปุรโต นิสินฺโน วิย อตฺตานํ ทสฺเสตฺวา:-
       [๑๔] "ธาตุโย ทุกฺขโต ทิสฺวา     มา ชาตึ ปุนราคมิ
             ภเว ฉนฺทํ วิราเชตฺวา     อุปสนฺตา จริสฺสสี"ติ
อิมํ คาถมาห. สา คาถา ปริโยสาเน อรหตฺตํ ปาปุณิ.
      ตตฺถ ธาตุโย ทุกฺขโต ทิสฺวาติ สนฺตติปริยาปนฺนา ๑- จกฺขาทิธาตุโย อิตราปิ
จ อุทยพฺพยปฏิปีฬนาทินา "ทุกฺขา"ติ ญาณจกฺขุนา ทิสฺวา. มา ชาตึ ปุนราคมีติ
ปุน ชาตึ อายตึ ๒- ปุนพฺภวํ มา อุปคจฺฉิ. ภเว ฉนฺทํ วิราเชตฺวาติ กามภวาทิเก
สพฺพสฺมึ ภเว ตณฺหาฉนฺทํ วิราคสงฺขาเตน มคฺเคน ปชหิตฺวา. อุปสนฺตา จริสฺสสีติ
สพฺพโส ปหีนกิเลสตาย นิพฺพุตา วิหริสฺสสิ.
      เอตฺถ จ "ธาตุโย ทุกฺขโต ทิสฺวา"ติ อิมินา ทุกฺขานุปสฺสนามุเขน วิปสฺสนา
ทสฺสิตา. "ภเว ฉนฺทํ วิราเชตฺวา"ติ อิมินา มคฺโค, "อุปสนฺตา จริสฺสสี"ติ อิมินา
สอุปาทิเสสา นิพฺพานธาตุ, "มา ชาตึ ปุนราคมี"ติ อิมินา อนุปาทิเสสา นิพฺพานธาตุ
ทสฺสิตาติ ทฏฺฐพฺพํ.
                     สุมนาเถรีคาถาวณฺณนา นิฏฺฐิตา.
@เชิงอรรถ: ๑ ฉ.ม. สสนฺตติปริยาปนฺนา  ๒ สี.,อิ. อายติ


เนื้อความอรรถกถาฉบับภาษาบาลี อักษรไทย เล่มที่ ๓๔ หน้าที่ ๒๖.
http://84000.org/tipitaka/read/attha_page.php?book=34&page=26&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=34&A=553&modeTY=2&pagebreak=1
http://84000.org/tipitaka/atthapali/th_line.php?B=34&A=553&modeTY=2&pagebreak=1#p26