อรรถกถาเล่มที่ ๓๕ ภาษาบาลี อักษรไทย
ชา.อ.๑ เอกนิปาต(๑)
หน้าที่ ๑๗๕.

สตสหสฺสคฺฆนิกํ สุวณฺณปาตึ ลภิตฺวา ตสฺสา คหณตฺถาย วิริยํ
อกตฺวา ตโต ปริหีโน อนุตปฺปิ เอวเมว ตฺวํปิ อิมสฺมึ สาสเน
ปฏิยตฺตสุวณฺณปาติสทิสํ อริยมคฺคํ โอสฺสฏฺฐวิริยตาย อนธิคจฺฉนฺโต
ตโต ปริหีโน ทีฆรตฺตํ อนุตปฺเปสฺสสิ สเจ ปน วิริยํ น โอสฺสชฺชิสฺสสิ
ปณฺฑิตวาณิโช สุวณฺณปาตึ ปฏิลภติ วิย มม สาสเน นววิธํปิ
โลกุตฺตรธมฺมํ ปฏิลภิสฺสสีติ ฯ
     เอวมสฺส สตฺถา อรหตฺเตน กูฏํ คณฺหนฺโต อิมํ ธมฺมเทสนํ
ทสฺเสตฺวา จตฺตาริ สจฺจานิ ปกาเสสิ ฯ สจฺจปริโยสาเน โอสฺสฏฺฐวิริโย
ภิกฺขุ อคฺคผเล อรหตฺเต ปติฏฺฐาสิ ฯ สตฺถาปิ เทฺว วตฺถูนิ กเถตฺวา
อนุสนฺธึ ฆเฏตฺวา ชาตกํ สโมธาเนสิ ตทา พาลวาณิโช เทวทตฺโต
อโหสิ ปณฺฑิตวาณิโช อหเมว อโหสีติ เทสนํ นิฏฺฐาเปสิ ฯ
                  เสริววาณิชชาตกํ ตติยํ ฯ
                  ------------------
                    ๔ จุลฺลกเสฏฺฐิชาตกํ
     อปฺปเกนปิ เมธาวีติ อิทํ ธมฺมเทสนํ ภควา ราชคหํ อุปนิสฺสาย
ชีวกมฺพวเน วิหรนฺโต จุลฺลปนฺถกตฺเถรํ อารพฺภ กเถสิ ฯ ตสฺส
อมฺพวเน จุลฺลปนฺถกสฺส ตาว อุปฺปตฺติ จ ปพฺพชฺชา จ กเถตพฺพา ฯ
อยํ อนุปพฺพิกถา ฯ
     ราชคเห กิร มหาธนเสฏฺฐิกุลสฺส ธีตา อตฺตโน ทาเสเนว
สทฺธึ สนฺถวํ กตฺวา อญฺเญปิ เม อิมํ กมฺมํ ชาเนยฺยุนฺติ ภีตา


เนื้อความอรรถกถาฉบับภาษาบาลี อักษรไทย เล่มที่ ๓๕ หน้าที่ ๑๗๕.
http://84000.org/tipitaka/read/attha_page.php?book=35&page=175&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=35&A=3662&modeTY=2&pagebreak=1
http://84000.org/tipitaka/atthapali/th_line.php?B=35&A=3662&modeTY=2&pagebreak=1#p175