อรรถกถาเล่มที่ ๓๖ หน้าที่ ๑๘๙.

หตฺถปาเท โลเลนฺตา นจฺจิมฺห ฯ อคายิมฺหาติ มุขํ วิวริตฺวา อายตเกน สเรน คายิมฺห ฯ รุทิมฺห จาติ ปุน วิปฺปฏิสาริโน เอวรูปํ นาม อมฺเหหิ กตนฺติ โรทิมฺห ฯ ทิฏฺฐา นาหุมฺห วานราติ เอวรูปํ สญฺญาวินาสนโต วิสญฺญิกรณึ สุรํ ปิวิตฺวา เอตเทว สาธุ ยํ วานรา นาหุมฺหาติ เอวํ เต อตฺตโน อคุเณ กเถสุํ ฯ โพธิสตฺโต ครุสํวาสรหิตานํ นาม เอวรูปํ โหติเยวาติ เต ตาปเส ครหิตฺวา ปุน เอวรูปํ มา กริตฺถาติ เตสํ โอวาทํ ทตฺวา อปริหีนชฺฌาโน พฺรหฺมโลกปรายโน อโหสิ ฯ สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ฯ อิโต ปฏฺฐาย หิ อนุสนฺธึ ฆเฏตฺวาติ อิทมฺปิ น วกฺขาม ฯ ตทา อิสิคณา พุทฺธปริสา อเหสุํ คณสตฺถา ปน อหเมวาติ ฯ สุราปานชาตกํ ปฐมํ ฯ ------------ ๒. มิตฺตวินฺทชาตกํ อติกฺกมฺม รมณกนฺติ อิทํ สตฺถา เชตวเน วิหรนฺโต เอกํ ทุพฺพจภิกฺขุํ อารพฺภ กเถสิ ฯ อิมสฺส ปน ชาตกสฺส กสฺสปสมฺมา- สมฺพุทฺธกาลิกํ วตฺถุํ ทสนิปาเต มหามิตฺตวินฺทชาตเก อาวิภวิสฺสติ ฯ ตทา ปน โพธิสตฺโต อิมํ คาถมาห อติกฺกมฺม รมณกํ สทามตฺตญฺจ ทูภกํ สฺวาสิ ปาสาณมาสีโน ยสฺมา ชีวํ น โมกฺขสีติ ฯ

เนื้อความอรรถกถาฉบับภาษาบาลี อักษรไทย เล่มที่ ๓๖ หน้าที่ ๑๘๙. http://84000.org/tipitaka/read/attha_page.php?book=36&page=189&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=36&A=3809&modeTY=2&pagebreak=1 http://84000.org/tipitaka/atthapali/th_line.php?B=36&A=3809&modeTY=2&pagebreak=1#p189