อรรถกถาเล่มที่ ๓๖ หน้าที่ ๑๙๐.

ตตฺถ รมณกนฺติ ตสฺมึ กาเล ผลิกสฺส นามํ ผลิกปฺปาสาทญฺจ อติกฺกนฺโตสีติ ทีเปติ ฯ สทามตฺตญฺจาติ รชตสฺส นามํ รชตปฺปาสาทญฺจ อติกฺกนฺโตสีติ ทีเปติ ฯ ทูภกนฺติ มณิโน นามํ มณิปฺปาสาทญฺจ อติกฺกนฺโตสีติ ทีเปติ ฯ สฺวาสีติ โส อสิ ตฺวํ ฯ ปาสาณมาสีโนติ อุรจกฺกํ นาม ปาสาณมยํ วา โหติ มณิมยํ วา ตมฺปน ปาสาณมยํ โส จ เตน อาสีโน อภินิวิฏฺโฐ อชฺโฌตฺถโต ตสฺมา ปาสาเณ อาสีนตฺตา ปาสาณาสีโนติ วตฺตพฺเพ พฺยญฺชนสนฺธิวเสน มการํ อาทาย ปาสาณมาสีโนติ วุตฺตํ ฯ ปาสาณํ วา อาสีโน ตํ อุรจกฺกํ อาสชฺช ปาปุณิตฺวา ฐิโตติ อตฺโถ ฯ ยสฺมา ชีวํ น โมกฺขสีติ ยมฺหา อุรจกฺกา ยาว เต ปาปํ น ขียติ ตาว ชีวนฺโตเยว น มุจฺจิสฺสสิ ตํ อาสีโนสีติ ฯ อิมํ คาถํ วตฺวา โพธิสตฺโต อตฺตโน เทวฏฺฐานํเยว คโต ฯ มิตฺตวินฺทโกปิ อุรจกฺกํ อุกฺขิปิตฺวา มหาทุกฺขํ อนุภวมาโน ปาปกมฺเม ปริกฺขีเณ ยถากมฺมํ คโต ฯ สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา มิตฺตวินฺทโก ทุพฺพจภิกฺขุ อโหสิ เทวราชา ปน อหเมว สมฺมาสมฺพุทฺโธติ ฯ มิตฺตวินฺทชาตกํ ทุติยํ ฯ ---------

เนื้อความอรรถกถาฉบับภาษาบาลี อักษรไทย เล่มที่ ๓๖ หน้าที่ ๑๙๐. http://84000.org/tipitaka/read/attha_page.php?book=36&page=190&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=36&A=3829&modeTY=2&pagebreak=1 http://84000.org/tipitaka/atthapali/th_line.php?B=36&A=3829&modeTY=2&pagebreak=1#p190