อรรถกถาเล่มที่ ๓๖ หน้าที่ ๕๐.

๒. จูฬชนกชาตกํ วายเมเถว ปุริโสติ อิทํ สตฺถา เชตวเน วิหรนฺโต โอสฺสฏฺฐวิริยเมว อารพฺภ กเถสิ ฯ ตตฺถ ยํ วตฺตพฺพํ ตํ สพฺพํ มหาชนกชาตเก อาวิภวิสฺสติ ฯ ราชา ปน เสตจฺฉตฺตสฺส เหฏฺฐา นิสินฺโน อิมํ คาถมาห วายเมเถว ปุริโส น นิพฺพินฺเทยฺย ปณฺฑิโต ปสฺสามิ โวหํ อตฺตานํ อุทกา ถลมุพฺภตนฺติ ฯ ตตฺถ วายเมเถวาติ วายามํ กโรเถว ฯ อุทกา ถลมุพฺภตนฺติ อุทกโต ถลมุตฺติณฺณํ ถเล ปติฏฺฐิตํ อตฺตานํ ปสฺสามีติ ฯ อิทานิ โอสฺสฏฺฐวิริโย ภิกฺขุ อรหตฺตํ ปตฺโต ชนกราชา สมฺมาสมฺพุทฺโธ อโหสีติ ฯ จูฬชนกชาตกํ ทุติยํ ฯ ------------ ๓. ปุณฺณปาติชาตกํ ตเถว ปุณฺณปาติโยติ อิทํ สตฺถา เชตวเน วิหรนฺโต วิสวารุณึ อารพฺภ กเถสิ ฯ เอกํ สมยํ สาวตฺถิยํ สุราธุตฺตา สนฺนิปติตฺวา มนฺตยึสุ สุรามูลํ โน ขีณํ กหํ นุ โข ลภิสฺสามาติ ฯ อเถโก กกฺขฬธุตฺโต อาห มา จินฺตยิตฺถ อตฺเถโก อุปาโยติ ฯ กตโร อุปาโย นามาติ ฯ

เนื้อความอรรถกถาฉบับภาษาบาลี อักษรไทย เล่มที่ ๓๖ หน้าที่ ๕๐. http://84000.org/tipitaka/read/attha_page.php?book=36&page=50&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=36&A=981&modeTY=2&pagebreak=1 http://84000.org/tipitaka/atthapali/th_line.php?B=36&A=981&modeTY=2&pagebreak=1#p50