อรรถกถาเล่มที่ ๓๘ หน้าที่ ๑๖๐.

โอหาย ฉฑฺเฑตฺวา สีลสํยมํ อุปคโต ปพฺพชิโต ปพฺพชิตฺวา จปน ฌานํ อุปฺปาเทตฺวา อปริหีนชฺฌาโน พฺรหฺมโลเก อุปฺปนฺโนติ ฯ สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา โจรราชา อานนฺโท อโหสิ พาราณสีราชา ปน อหเมวาติ ฯ เสยฺยชาตกํ ทุติยํ ---------- วฑฺฒกิสูกรชาตกํ วรํ วรํ ตฺวนฺติ อิทํ สตฺถา เชตวเน วิหรนฺโต ธนุคฺคหติสฺสตฺเถรํ นาม อารพฺภ กเถสิ ฯ ปสฺเสนทิโกสลรญฺโญ ปิตา มหาโกสโล พิมฺพิสารรญฺโญ ธีตรํ โกสลเทวึ ททมาโน ตสฺสา นฺหานจุณฺณมูลเมว สตสหสฺสุฏฺฐานํ กาสิกคามํ อทาสิ ฯ อชาตสตฺตุนา ปน ปิตริ มาริเต โกสลเทวีปิ โสกาภิภูตา กาลมกาสิ ฯ ตโต ปสฺเสนทิโกสลราชา จินฺเตสิ อชาตสตฺตุนา ปิตา มาริโต ภคินีปิ เม สามิเก กาลกเต โสเกน กาลกตา ปิตุฆาตกสฺส โจรสฺส กาสิกคามํ น ทสฺสามีติ ฯ โส ตํ อชาตสตฺตุสฺส น อทาสิ ฯ ตํ คามํ นิสฺสาย เตสํ ทฺวินฺนมฺปิ กาเลน กาลํ ยุทฺธํ โหติ ฯ อชาตสตฺตุ ตรุโณ สมตฺโถ ฯ ปสฺเสนทิโกสโล มหลฺลโกเยว ฯ โส อภิกฺขณํ ปราเชติ ฯ มหาโกสลสฺสาปิ มนุสฺสา เยภุยฺเยน ปราชิตา ฯ อถ ราชา เตน มยํ อภิณฺหํ ปราชิตา กินฺนุโข กาตพฺพนฺติ อมจฺเจ ปุจฺฉิ ฯ เทว อยฺยา นาม มนฺตจฺเฉกา โหนฺติ เชตวนมหาวิหาเร ภิกฺขูนํ กถํ โสตุํ วฏฺฏตีติ ฯ

เนื้อความอรรถกถาฉบับภาษาบาลี อักษรไทย เล่มที่ ๓๘ หน้าที่ ๑๖๐. http://84000.org/tipitaka/read/attha_page.php?book=38&page=160&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=38&A=3329&modeTY=2&pagebreak=1 http://84000.org/tipitaka/atthapali/th_line.php?B=38&A=3329&modeTY=2&pagebreak=1#p160