อรรถกถาเล่มที่ ๓๘ หน้าที่ ๒๑๘.

ตสฺสตฺโถ ยํ วเน ชาโต กปิ วเน ชาตสฺส กปิโน วญฺจนํ กเรยฺย ตํ ตยา สทิโส ทหโรปิ วานโร น สทฺทเหยฺย มาทิโสปิ ชิณฺโณ ชรากปิ มหลฺลกมกฺกโฏ น หิ สทฺทเหยฺย สตฺตกฺขตฺตุมฺปิ ภณนฺตสฺส ตุมฺหาทิสสฺส น สทฺทหิ หิมวนฺตปฺปเทเส สพฺพผลาผลํ วสฺเสน กิลินฺนํ ปติตํ ปุน ตว อิทํ ฐานํ นตฺถิ คจฺฉาติ ฯ โส ตโตว ปกฺกามิ ฯ สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา ขุทฺทกมกฺกโฏ เนวาสิโก อโหสิ กาฬมหามกฺกโฏ อาคนฺตุกภิกฺขุ รุกฺขเทวตา ปน อหเมวาติ ฯ อุทุมฺพรชาตกํ อฏฺฐมํ ---------- โกมาริยปุตฺตชาตกํ ปุเร ตุวนฺติ อิทํ สตฺถา ปุพฺพาราเม วิหรนฺโต เกฬิสีลเก ภิกฺขู อารพฺภ กเถสิ ฯ เต กิร ภิกฺขู สตฺถริ อุปริปาสาเท วิหรนฺเต เหฏฺฐาปาสาเท ทิฏฺฐสุตาทีนิ กเถนฺตา เกฬิญฺจ ปริหาสญฺจ กโรนฺตา นิสีทึสุ ฯ สตฺถา มหาโมคฺคลฺลานํ อามนฺเตตฺวา เอเต ภิกฺขู สํเวเชหีติ อาห ฯ เถโร อากาเส อุปฺปติตฺวา ปาทงฺคุฏฺฐเกน ปาสาทถูปิกํ ปหริตฺวา ยาว อุทกปริยนฺตา ปาสาทํ กมฺเปสิ ฯ เต ภิกฺขู มรณภยภีตา นิกฺขมิตฺวา พหิ อฏฺฐํสุ ฯ เตสํ โส เกฬิสีลภาโว ภิกฺขูสุ ปากโฏ ชาโต ฯ อเถกทิวสํ ภิกฺขู ธมฺมสภายํ กถํ

เนื้อความอรรถกถาฉบับภาษาบาลี อักษรไทย เล่มที่ ๓๘ หน้าที่ ๒๑๘. http://84000.org/tipitaka/read/attha_page.php?book=38&page=218&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=38&A=4535&modeTY=2&pagebreak=1 http://84000.org/tipitaka/atthapali/th_line.php?B=38&A=4535&modeTY=2&pagebreak=1#p218