อรรถกถาเล่มที่ ๓๘ หน้าที่ ๔๕๐.

พลสมฺปนฺนมฺปิ วารณํ อิเม จตฺตาโร ชนา เอกโต หุตฺวา ชีวิตกฺขยํ ปาเปสุนฺติ กากญฺจ ปสฺส ลฏุกิกํ มณฺฑูกํ นีลมกฺขิกํ เอเต นาคํ อฆาเตสุํ ปสฺส เวรสฺส เวรินํ ตสฺมา หิ เวรํ น กยิราถ อปฺปิเยนปิ เกนจีติ อิมํ อภิสมฺพุทฺธคาถํ วตฺวา ชาตกํ สโมธาเนสิ ฯ ตตฺถ ปสฺสาติ อนิยามิตาลปนเมตํ ฯ ภิกฺขู ปน สนฺธาย วุตฺตตฺตา ปสฺสถ ภิกฺขเวติ วุตฺตํ โหติ ฯ เอเตติ เอเต จตฺตาโร เอกโต หุตฺวา ฯ อฆาเตสุนฺติ ตํ วธึสุ ฯ ปสฺส เวรสฺส เวรินนฺติ ปสฺสถ เวริกานํ เวรสฺส คตินฺติ อตฺโถ ฯ ตทา เอกจาริหตฺถี เทวทตฺโต อโหสิ ฯ ยูถปติ ปน อหเมวาติ ฯ ลฏุกิกชาตกํ สตฺตมํ ----------- จุลฺลธมฺมปาลชาตกํ อหเมว ทูสิยา ภูนหตาติ อิทํ สตฺถา เวฬุวเน วิหรนฺโต เทวทตฺตสฺส วธาย ปริสกฺกนํ อารพฺภ กเถสิ ฯ อญฺเญสุ ชาตเกสุ เทวทตฺโต โพธิสตฺตสฺส ตาสมตฺตมฺปิ กาตุํ นาสกฺขิ ฯ อิมสฺมึ ปน จุลฺลธมฺมปาลชาตเก โพธิสตฺตสฺส สตฺตมาสิกกาเล หตฺถปาเท จ สีสญฺจ ฉินฺทาเปตฺวา อสิมาลกํ นาม กาเรสิ ฯ ททฺทรชาตเก คีวํ วตฺเตตฺวา ^๑- มาเรตฺวา อุทฺธเน มํสํ ปจิตฺวา ขาทิ ฯ @เชิงอรรถ: ^๑ วลิตฺวา ฯ

เนื้อความอรรถกถาฉบับภาษาบาลี อักษรไทย เล่มที่ ๓๘ หน้าที่ ๔๕๐. http://84000.org/tipitaka/read/attha_page.php?book=38&page=450&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=38&A=9338&modeTY=2&pagebreak=1 http://84000.org/tipitaka/atthapali/th_line.php?B=38&A=9338&modeTY=2&pagebreak=1#p450