อรรถกถาเล่มที่ ๓๙ หน้าที่ ๓๒๒.

กสิณปริกมฺมํ กตฺวา นฏฺฐชฺฌานํ ปฏิปากติกํ อกาสิ ฯ สรภงฺโค ตสฺส ตตฺถ วสิตุํ อทตฺวา อาทาย อตฺตโน อสฺสมํ คโต ฯ สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ สโมธาเนสิ สจฺจปริโยสาเน อุกฺกณฺฐิตภิกฺขุ โสตาปตฺติผเล ปติฏฺฐหิ ฯ ตทา นารโท อุกฺกณฺฐิตภิกฺขุ อโหสิ สาลิสฺสโร สารีปุตฺโต เมณฺฑิสฺสโร กสฺสโป ปพฺพโต อนุรุทฺโธ กาฬเทวิโล กจฺจายโน อนุสิสฺโส อานนฺโท กิสวจฺโฉ โมคฺคลฺลาโน สรภงฺโค ปน อหเมวาติ ฯ อินฺทฺริยชาตกํ สตฺตมํ ฯ อาทิตฺตชาตกํ อาทิตฺตสฺมินฺติ อิทํ สตฺถา เชตวเน วิหรนฺโต อสทิสทานํ อารพฺภ กเถสิ ฯ อสทิสทานํ มหาโควินฺทสุตฺตวณฺณนาโต วิตฺถาเรตฺวา กเถตพฺพํ ฯ ตสฺส ปน ทินฺนทิวสโต ทุติยทิวเส ธมฺมสภายํ กถํ สมุฏฺฐาเปสุํ อาวุโส โกสลราชา วิจินิตฺวา วรกฺเขตฺตํ ญตฺวา พุทฺธปฺปมุขสฺส อริยสงฺฆสฺส มหาทานํ อทาสีติ ฯ สตฺถา อาคนฺตฺวา กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต อนจฺฉริยํ ภิกฺขเว รญฺโญ วิจินิตฺวา อนุตฺตเร ปุญฺญกฺเขตฺเต ทานปติฏฺฐาปนํ โปราณกปณฺฑิตา วิจินิตฺวาว มหาทานํ อทํสูติ วตฺวา อตีตํ อาหริ

เนื้อความอรรถกถาฉบับภาษาบาลี อักษรไทย เล่มที่ ๓๙ หน้าที่ ๓๒๒. http://84000.org/tipitaka/read/attha_page.php?book=39&page=322&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=39&A=6484&modeTY=2&pagebreak=1 http://84000.org/tipitaka/atthapali/th_line.php?B=39&A=6484&modeTY=2&pagebreak=1#p322