อรรถกถาเล่มที่ ๔๕ ภาษาบาลี อักษรไทย
นิทฺ.อ.๑ (สทฺธมฺมปชฺ.)
หน้าที่ ๔๔๔.

                     ๑๖. สาริปุตฺตสุตฺตนิทฺเทสวณฺณนา
    [๑๙๐] โสฬสเม น เม ทิฏฺโฐติ สาริปุตฺตสุตฺตนิทฺเทโส. ตตฺถ อิโต ปุพฺเพติ
อิโต สงฺกสฺสนคเร โอตรณโต ปุพฺเพ. วคฺคุวโทติ สุนฺทรวโท. ตุสิตา คณิมาคโตติ
ตุสิตา กายา จวิตฺวา มาตุกุจฺฉึ อาคตตฺตา ตุสิตา อาคโต. คณาจริยตฺตา คณี.
สนฺตุฏฺฐฏฺเฐน วา ตุสิตสงฺขาตา เทวโลกา คณึ อาคโต, ตุสิตานํ วา อรหนฺตานํ
คณึ อาคโตติ.
    อิมินา จกฺขุนาติ อิมินา อตฺตภาวปริยาปนฺเนน ปกติมํสจกฺขุนา. อิมินา
อตฺตภาเวนาติ อิมินา ปจฺฉิเมน อตฺตภาเวน. ตาวตึสภวเนติ ตาวตึสเทวโลเก.
ปาริจฺฉตฺตกมูเลติ โกวิฬารรุกฺขสฺส เหฏฺฐา. ปณฺฑุกมฺพลสิลายนฺติ รตฺตกมฺพลสทิส-
ปาสาณปิฏฺเฐ. วสฺสํ วุฏฺโฐติ วุฏฺฐวสฺโส. เทวคณปริวุโตติ เทวสงฺเฆน ปริวาริโต.
โอติณฺโณติ อวติณฺโณ. อิมํ ทสฺสนํ ปุพฺเพติ อญฺญตฺร อิมมฺหา ทสฺสนา ปุพฺเพ.
น ทิฏฺโฐติ อญฺญทา น ทิฏฺฐปุพฺโพ.
    ขตฺติยสฺส วาติ ขตฺติยสฺส วทนฺตสฺส น สุโต. พฺราหฺมณาทีสุปิ เอเสว นโย.
    มธุรวโทติอาทีสุ พฺยญฺชนสมฺปนฺนํ มธุรํ วทตีติ มธุรวโท. เปมชนกํ เปมารหํ
วทตีติ เปมนียวโท. หทยงฺคมจิตฺเต ฐปนโยคฺยํ ๑- วทตีติ หทยงฺคมวโท.
กรวีกสกุณสทฺโท วิย มธุรโฆโส อสฺสาติ กรวีกรุตมญฺชุโฆโส. วิสฺสฏฺโฐ จาติ
อปลิพุทฺโธ ตตฺถ ตตฺถ อลคฺคมาโน. ๒- วิญฺเญยฺโย จาติ สุวิชาเนยฺโย จ. มญฺชุ จาติ
มธุโร จ. สวนีโย จาติ กณฺณสุโข จ. พินฺทุ จาติ ฆโน จ. อวิสารี จาติ น ปตฺถโฏ
จ. คมฺภีโร จาติ น อุตฺตาโน จ. นินฺนาทิ จาติ โฆสวนฺโต จ. อสฺสาติ อสฺส
สตฺถุโน. พหิทฺธา ปริสายาติ ปริสโต พหิ. น นิจฺฉรตีติ น นิกฺขมติ. กึการณา?
เอวรูโป มธุรสทฺโท นิกฺการณา มา วินสฺสตูติ. พฺรหฺมสฺสโรติ อญฺเญ ฉินฺนสฺสราปิ
@เชิงอรรถ: ๑ ก. ปวิสน......  ๒ สี.,ฉ.ม. อปกฺขลโน


เนื้อความอรรถกถาฉบับภาษาบาลี อักษรไทย เล่มที่ ๔๕ หน้าที่ ๔๔๔.
http://84000.org/tipitaka/read/attha_page.php?book=45&page=444&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=45&A=10208&modeTY=2&pagebreak=1
http://84000.org/tipitaka/atthapali/th_line.php?B=45&A=10208&modeTY=2&pagebreak=1#p444