อรรถกถาเล่มที่ ๕๐ ภาษาบาลี อักษรไทย
อป.อ.๒ (วิสุทฺธ.๒)
หน้าที่ ๒๓๗.

ตตฺถ ติสฺสํ สินฺธุวารินทิยํ สปฺปภาสํ ปภาย สหิตํ สุทสฺสนํ สุนฺทรรูปํ
ปรโมปสเม ยุตฺตํ อุตฺตเม อุปสเม ยุตฺตํ สมงฺคีภูตํ วีตราคํ อหํ อทฺทสนฺติ อตฺโถ.
ทิสฺวาหํ วิมฺหิตาสโยติ "เอวรูปํ ภยานกํ หิมวนฺตํ กถํ สมฺปตฺโต"ติ
วิมฺหิตอชฺฌาสโย อจฺฉริยพฺภุตจิตฺโตติ อตฺโถ. อาลุวํ ตสฺส ปาทาสินฺติ ตสฺส
อรหโต อหํ ปสนฺนมานโส อาลุวกนฺทํ ปาทาสึ อาทเรน อทาสินฺติ อตฺโถ.
                   นวมทสมาปทานานิ อุตฺตานาเนวาติ.
                     อฏฺฐวีสติมวคฺควณฺณนา นิฏฺฐิตา.
                            ---------
                       ๒๙. ปณฺณทายกวคฺควณฺณนา
                  ๒๘๓. ๑. ปณฺณทายกตฺเถราปทานวณฺณนา
     [๑-๒] เอกูนตึสติเม วคฺเค ปฐมาปทาเน ปณฺณโภชนโภชโนติ
ขีรปณฺณาทิโภชนสฺส ภุญฺชนตฺถาย ปณฺณสาลาย นิสินฺโน อมฺหิ ภวามีติ อตฺโถ.
อุปวิฏฺฐญฺจ มํ สนฺตนฺติ ปณฺณสาลายํ อุปวิฏฺฐํ สนฺตํ วิชฺชมานํ มํ. อุปาคจฺฉิ
มหาอิสีติ มหนฺเต สีลาทิขนฺเธ เอสนโต มหาอิสิ. โลกปชฺโชโต โลกปทีโป
สิทฺธตฺโถ ภควา อุปคจฺฉิ, มม สมีปํ อคมาสีติ อตฺโถ. นิสินฺนสฺส ปณฺณสนฺถเรติ
อุปคนฺตฺวา ปณฺณสนฺถเร นิสินฺนสฺส ขาทนตฺถาย เสทิตํ ปณฺณํ มยา ทินฺนนฺติ
สมฺพนฺโธ.
                  ๒๘๔. ๒. ผลทายกตฺเถราปทานวณฺณนา
     [๕-๗] ทุติยาปทาเน สิเนรุสมสนฺโตโส ธรณีสมสาทิโส สิทฺธตฺโถ
ภควาติ สมฺพนฺโธ. วุฏฺฐหิตฺวา สมาธิมฺหาติ นิโรธสมาปตฺติโต วุฏฺฐหิตฺวา วิสุํ
หุตฺวาติ อตฺโถ. ภิกฺขาย มมุปฏฺฐิโตติ ภิกฺขาจารเวลาย "อชฺช มม โย โกจิ


เนื้อความอรรถกถาฉบับภาษาบาลี อักษรไทย เล่มที่ ๕๐ หน้าที่ ๒๓๗.
http://84000.org/tipitaka/read/attha_page.php?book=50&page=237&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=50&A=5061&modeTY=2&pagebreak=1
http://84000.org/tipitaka/atthapali/th_line.php?B=50&A=5061&modeTY=2&pagebreak=1#p237