อรรถกถาเล่มที่ ๕๒ หน้าที่ ๒๑๕.

ตตฺถ สงฺคํ เฉตฺวาน มจฺจุโนติ มจฺจุมารสฺส สหการิการณภูตตฺตา สนฺตกํ ราคโทสโมหสงฺคํ วิกฺขมฺภนวเสน ฉินฺทิตฺวา อุโภปิ ปพฺพชิตาติ. ตทา มาตาปิตโร มหาราชกุลานิ อเหสุํ, ยุธิฏฺฐิลกุมาโร อานนฺทตฺเถโร, ยุธญฺชโย โลกนาโถ. ตสฺส ปพฺพชฺชโต ปุพฺเพ ปวตฺติตมหาทานานิ เจว รชฺชาทิปริจฺจาโค จ ทานปารมี, กายวจีสํวโร สีลปารมี, ปพฺพชฺชา จ ฌานาธิคโม จ เนกฺขมฺมปารมี, อนิจฺจโต มนสิการํ อาทึ กตฺวา อภิญฺญาธิคมปริโยสานา ปญฺญา ทานาทีนํ อุปการานุปการธมฺมปริคฺคณฺหนปญฺญา จ ปญฺญาปารมี, สพฺพตฺถ ตทตฺถสาธนํ วีริยํ วีริยปารมี, ญาณนฺติ อธิวาสนขนฺติ จ ขนฺติปารมี, ปฏิญฺญาย อวิสํวาทนํ สจฺจปารมี, สพฺพตฺถ อจลสมาทานาธิฏฺฐานํ อธิฏฺฐานปารมี, สพฺพสตฺเตสุ หิตจิตฺตตาย เมตฺตาพฺรหฺมวิหารวเสน จ เมตฺตาปารมี, สตฺตสงฺขารกตวิปฺปการอุเปกฺขนวเสน อุเปกฺขาพฺรหฺมวิหารวเสน จ อุเปกฺขาปารมีติ ทส ปารมิโย ลพฺภนฺติ. วิเสสโต ปน เนกฺขมฺมปารมีติ เวทิตพฺพา. ตถา อกิตฺติจริยายํ ^๑- วิย อิธาปิ มหาปุริสสฺส อจฺฉริยคุณา ยถารหํ นิทฺธาเรตพฺพา. เตน วุจฺจติ "เอวํ อจฺฉริยา เหเต, อพฺภุตา จ มเหสิโน ฯเปฯ ธมฺมสฺส อนุธมฺมโต"ติ. ยุธญฺชยจริยาวณฺณนา นิฏฺฐิตา. -------------- ๒. โสมนสฺสจริยาวณฺณนา [๗] ปุนาปรํ ยทา โหมิ อินฺทปตฺเถ ^๒- ปุรุตฺตเม กามิโต ทยิโต ปุตฺโต โสมนสฺโสติ วิสฺสุโต. [๘] สีลวา คุณสมฺปนฺโน กลฺยาณปฏิภานวา วุฑฺฒาปจายี หิริมา ^๓- สงฺคเหสุ จ โกวิโท. @เชิงอรรถ: ^๑ ขุ.จริยา. ๓๓/๑-๑๐/๕๘๒-๓ ^๒ สี.อินฺทปตฺเต, เอวมุปริปิ ^๓ ฉ.ม. หิรีมา, @เอวมุปริปิ

เนื้อความอรรถกถาฉบับภาษาบาลี อักษรไทย เล่มที่ ๕๒ หน้าที่ ๒๑๕. http://84000.org/tipitaka/read/attha_page.php?book=52&page=215&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=52&A=4744&modeTY=2&pagebreak=1 http://84000.org/tipitaka/atthapali/th_line.php?B=52&A=4744&modeTY=2&pagebreak=1#p215