อรรถกถาเล่มที่ ๕๓ หน้าที่ ๒๐๘.

สพฺเพสมฺปิ เวทนาทิปทานํ นิทฺเทเส สาตาสาตสุขทุกฺขปฏิกฺเขปวเสน เทสนํ กตฺวา อทุกฺขมสุขเวทนา กถิตา, ตสฺสา มชฺฌตฺตลกฺขเณ อินฺทตฺตกรณวเสน ^๑- อุเปกฺขินฺทฺริยภาโว เวทิตพฺโพ. ปทปฏิปาฏิยา จ เอกสฺมึ ฐาเน ปีติ ปริหีนาว, ตสฺมา จิตฺตงฺควเสน ปาลึ อารุฬฺหา ปญฺจปณฺณาส ธมฺมา โหนฺติ. เตสํ วเสน สพฺพโกฏฺฐาเสสุ สพฺพวาเรสุ จ วินิจฺฉโย เวทิตพฺโพ. ปญฺจมจิตฺตํ นิฏฺฐิตํ. ----------- ฉฏฺฐจิตฺตาทิวณฺณนา [๑๕๖-๑๕๙] ฉฏฺฐสตฺตมอฏฺฐมานิ ทุติยตติยจตุตฺเถสุ วุตฺตนเยเนว เวทิตพฺพานิ. เกวลญฺหิ อิเมสุ เวทนาปริวตฺตนญฺเจว ปีติปริหานญฺจ โหติ, เสสํ สทฺธึ อุปฺปตฺตินเยน ตาทิสเมว. กรุณามุทิตา ปริกมฺมกาเลปิ หิ อิเมสํ อุปฺปตฺติ มหาอฏฺฐกถายํ อนุญฺญาตาเอว. อิมานิ อฏฺฐ กามาวจรกุสลจิตฺตานิ นาม. ปุญฺญกิริยาวตฺถาทิกถา ตานิ สพฺพานิปิ ทสหิ ปุญฺญกิริยาวตฺถูหิ ทีเปตพฺพานิ. กถํ? ทานมยํ ปุญฺญกิริยาวตฺถุ, สีลมยํ, ภาวนามยํ, อปจิติสหคตํ, เวยฺยาวจฺจสหคตํ, ปตฺตานุปฺปทานํ, อพฺภานุโมทนํ, เทสนามยํ, สวนมยํ, ทิฏฺฐุชุกมฺมปุญฺญกิริยาวตฺถูติ อิมานิ ทส ปุญฺญกิริยาวตฺถูนิ นาม. ตตฺถ ทานเมว ทานมยํ. ปุญฺญกิริยา จ สา เตสํ เตสํ อานิสํสานํ วตฺถุ จาติ ปุญฺญกิริยาวตฺถุ นาม. เสเสสุปิ เอเสว นโย. ตตฺถ จีวราทีสุ จตูสุ ปจฺจเยสุ รูปาทีสุ วา ฉสุ อารมฺมเณสุ อนฺนาทีสุ วา ทสสุ ทานวตฺถูสุ ตํ ตํ เทนฺตสฺส เตสํ เตสํ อุปฺปาทนโต ปฏฺฐาย ปุพฺพภาเค, ปริจฺจาคกาเล, ปจฺฉา โสมนสฺสจิตฺเตน อนุสฺสรเณ ^๒- จาติ ตีสุ กาเลสุ ปวตฺตา เจตนา ทานมยํ ปุญฺญกิริยาวตฺถุ นาม. @เชิงอรรถ: ^๑ สี. อินฺทฏฺฐการณวเสน ^๒ ฉ. อนุสฺสรณกาเล

เนื้อความอรรถกถาฉบับภาษาบาลี อักษรไทย เล่มที่ ๕๓ หน้าที่ ๒๐๘. http://84000.org/tipitaka/read/attha_page.php?book=53&page=208&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=53&A=5209&modeTY=2&pagebreak=1 http://84000.org/tipitaka/atthapali/th_line.php?B=53&A=5209&modeTY=2&pagebreak=1#p208