romanATTHA book 54 Page 309.

Sabbampi nayasahassaṃ hoti. Tathā vedanānupassanādīsu suddhikasatipaṭṭhāne cāti sotāpattimagge pañca nayassa sahassāni. Yathā ca sotāpattimagge, evaṃ sesamaggesupīti kusale vīsati nayasahassāni. Suññatāpaṇihitānimittabhedena ^1- pana tato tiguṇe vipāke saṭṭhī nayasahassānīti evameva sakiccasādhakānañceva saṃsiddhikakiccānañca kusalavipākasatipaṭṭhānānaṃ niddesavasena duvidho kāyānupassanādivasena ca suddhikavasena ca kusale pañcannaṃ vipāke pañcannanti dasannaṃ niddesavārānaṃ vasena dasappabhedo asītinayasahassapaṭimaṇḍito abhidhammabhājanīyaniddeso. Abhidhammabhājanīyavaṇṇanā niṭṭhitā. ------------ 3. Pañhāpucchakavaṇṇanā [386] Pañhāpucchake pālianusāreneva satipaṭṭhānānaṃ kusalādibhāvo veditabbo. Ārammaṇattikesu pana sabbānipi etāni appamāṇaṃ nibbānaṃ ārabbha pavattanato appamāṇārammaṇāneva, na maggārammaṇāni. Sahajātahetuvasena pana maggahetukāni, viriyaṃ vā vīmaṃsaṃ vā jeṭṭhakaṃ katvā maggabhāvanākāle maggādhipatīni, chandacittajeṭṭhakāya maggabhāvanāya navattabbāni maggādhipatīnīti phalakālepi navattabbāneva. Atītādīsu ekārammaṇabhāvenapi navattabbāni. Nibbānassa pana bahiddhādhammattā bahiddhārammaṇāni nāma hontīti evametasmiṃ pañhāpucchake nibbattitalokuttarāneva satipaṭṭhānāni ^2- kathitāni. Sammāsambuddhena hi suttantabhājanīyasmiṃyeva lokiyalokuttaramissakā satipaṭṭhānā kathitā, abhidhammabhājanīyapañhāpucchakesu pana lokuttarāyevāti evamayaṃ satipaṭṭhānavibhaṅgopi teparivaṭṭaṃ nīharitvāva bhājetvā dassitoti. Pañhāpucchakavaṇṇanā niṭṭhitā. Sammohavinodaniyā vibhaṅgaṭṭhakathāya satipaṭṭhānavibhaṅgavaṇṇanā niṭṭhitā. @Footnote: ¹ cha.Ma.....nimittādibhedesu ³ Ma. satipaṭṭhānāti

The Pali Atthakatha in Roman Character Volume 54 Page 309. http://84000.org/tipitaka/read/attha_page.php?book=54&page=309&pages=1&edition=roman ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_rm.php?B=54&A=7332&pagebreak=1 http://84000.org/tipitaka/atthapali/rm_line.php?B=54&A=7332&pagebreak=1#p309