อรรถกถาเล่มที่ ๕๔ หน้าที่ ๕๐๒.

๑๗. ขุทฺทกวตฺถุวิภงฺค ๑. เอกกมาติกาทิวณฺณนา [๘๓๒] อิทานิ ตทนนฺตเร ขุทฺทกวตฺถุวิภงฺเคปิ ปฐมํ มาติกํ ฐเปตฺวา นิกฺขิตฺตปทานุกฺกเมน นิทฺเทโส กโต. ตตฺรายํ นิกฺเขปปริจฺเฉโท, อาทิโต ตาว ชาติมโทติอาทโย เตสตฺตติ เอกกา นิกฺขิตฺตา, ตโต โกโธ จ อุปนาโห จาติอาทโย อฏฺฐารส ทุกา, อกุสลมูลาทโย ปญฺจตึส ติกา, อาสวจตุกฺกาทโย จุทฺทส จตุกฺกา, โอรมฺภาคิยสํโยชนาทโย ปนฺนรส ปญฺจกา, วิวาทมูลาทโย จุทฺทส ฉกฺกา, อนุสยาทโย สตฺต สตฺตกา, กิเลสวตฺถุอาทโย อฏฺฐ อฏฺฐกา, อาฆาตวตฺถุอาทโย นว นวกา, กิเลสวตฺถุอาทโย สตฺต ทสกา, อชฺฌตฺติกสฺส อุปาทาย อฏฺฐารส ตณฺหาวิจริตานีติอาทโย ฉ อฏฺฐารสกาติ สพฺพานิปิ เอตานิ อฏฺฐกิเลสตานิ นิกฺขิตฺตานีติ เวทิตพฺพานิ. อยนฺตาว นิกฺเขปปริจฺเฉโท. ๑. เอกกนิทฺเทสวณฺณนา [๘๔๓-๔] อิทานิ ยถานิกฺขิตฺตาย มาติกาย ตตฺถ กตโม ชาติมโทติอาทินา นเยน อารทฺเธ นิทฺเทสวาเร ชาตึ ปฏิจฺจาติ ชาตึ นิสฺสาย. เอตฺถ จ อตฺถิปฏิจฺจํ นาม กถิตํ, ตสฺมา ชาติยา สตีติ อยเมตฺถ อตฺโถ. โคตฺตํ ปฏิจฺจาติอาทีสุปิ เอเสว นโย. มทนวเสน มโท. มชฺชนากาโร มชฺชนา. มชฺชิตภาโว มชฺชิตตฺตํ. มาโน มญฺญนาติอาทีนิ เหฏฺฐา ธมฺมสงฺคหฏฺฐกถายํ ^๑- วุตฺตตฺถาเนว. อยํ วุจฺจตีติ อยํ เอวํ ชาติยา สติ ตํ ชาตึ นิสฺสาย อุปฺปนฺโน มชฺชนาการปฺปตฺโต มาโน ชาติมโทติ วุจฺจติ. สฺวายํ ขตฺติยาทีนํ จตุนฺนมฺปิ วณฺณานํ อุปฺปชฺชติ. ชาติสมฺปนฺโน หิ ขตฺติโย "มาทิโส อญฺโญ นตฺถิ, อวเสสา อนฺตรา อุฏฺฐาย ขตฺติยา @เชิงอรรถ: ^๑ สงฺคณี.อ. ๑/๑๑๒๑/๔๓๐

เนื้อความอรรถกถาฉบับภาษาบาลี อักษรไทย เล่มที่ ๕๔ หน้าที่ ๕๐๒. http://84000.org/tipitaka/read/attha_page.php?book=54&page=502&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=54&A=11816&modeTY=2&pagebreak=1 http://84000.org/tipitaka/atthapali/th_line.php?B=54&A=11816&modeTY=2&pagebreak=1#p502