romanATTHA book 55 Page 442.

Sahajātatthipaccayena paccayo hoti. Tesampi tisamuṭṭhānikarūpaṃ ekaṃ mahābhūtaṃ tiṇṇannaṃ mahābhūtānaṃ, tīṇi ekassa, dve dvinnaṃ, mahābhūtā upādārūpānanti evaṃ sahajātatthi- paccayena paccayo hoti. Purejātatthipaccayo pana vatthupurejātaārammaṇapurejātavasena duvidho hoti, so duvidhopi heṭṭhā purejātapaccaye vuttanayeneva yojetvā gahetabbo. Āhāratthipaccayopi heṭṭhā kabaḷiṅkārāhārapaccaye yojitanayeneva yojetabbo. Idha panesa attano aniruddhakkhaṇe paccayabhāvena atthipaccayoti vutto. Rūpa- jīvitindriyampi heṭṭhā indriyapaccaye rūpajīvitindriyayojanāyaṃ vuttanayeneva gahetabbaṃ. ^1- Idha panetampi attano aniruddhakkhaṇeyeva paccayabhāvena atthipaccayoti vuttanti evamettha paccayuppannatopi viññātabbo vinicchayoti. Atthipaccayaniddesavaṇṇanā niṭṭhitā. ------------ 22. Natthipaccayaniddesavaṇṇanā [22] Natthipaccayaniddese samanantaraniruddhāti aññena cittuppādena anantarikā hutvā samanantaraṃ niruddhā. Paṭuppannānanti paccuppannānaṃ. Iminā natthipaccayassa okāsadānaṭṭhena natthipaccayabhāvaṃ sādheti. Purimesu hi nirodhavasena pacchimānaṃ pavattanokāsaṃ adentesu tesaṃ paṭuppannabhāvo na siyāti ayamettha pālivaṇṇanā. Sesaṃ sabbaṃ anantarapaccaye vuttanayeneva veditabbaṃ. Paccaya- lakkhaṇameva hettha nānaṃ, paccayānaṃ pana paccayuppannānañca nānākaraṇaṃ natthi. Kevalaṃ pana tattha "cakkhuviññāṇadhātu taṃsampayuttakā ca dhammā manodhātuyā"ti- ādinā nayena paccayā ca paccayuppannā ca sarūpato dassitā. Idha pana "samanantaraniruddhā cittacetasikā dhammā paṭuppannānaṃ cittacetasikānaṃ dhammānan"ti sabbepi te nirodhuppādavasena sāmaññato dassitāti. Natthipaccayaniddesavaṇṇanā niṭṭhitā. ------------ @Footnote: ¹ cha.Ma. yojetabbaṃ

The Pali Atthakatha in Roman Character Volume 55 Page 442. http://84000.org/tipitaka/read/attha_page.php?book=55&page=442&pages=1&edition=roman ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_rm.php?B=55&A=9981&pagebreak=1 http://84000.org/tipitaka/atthapali/rm_line.php?B=55&A=9981&pagebreak=1#p442