อรรถกถาเล่มที่ ๕๕ หน้าที่ ๒๙๕.

ทกฺขิณํ วิโสเธตุํ สมตฺถาติ อตฺโถ. ทกฺขิณํ อาราเธนฺตีติ สมฺปาเทนฺติ, อปฺปมตฺติกายปิ ทกฺขิณาย มหนฺตํ ผลํ ปาปุณนฺตีติ อตฺโถ. เสสํ เหฏฺฐา วุตฺตนยเมวาติ. นวตฺตพฺพํสํโฆทกฺขิณํวิโสเธตีติกถาวณฺณนา นิฏฺฐิตา. ----------- ๘. นวตฺตพฺพํสํโฆภุญฺชตีติกถาวณฺณนา [๗๙๕-๗๙๖] อิทานิ น วตฺตพฺพํ สํโฆ ภุญฺชตีติกถา นาม โหติ. ตตฺราปิ "มคฺคผลาเนว สํโฆ นาม, น จ ตานิ กิญฺจิ ภุญฺชนฺติ, ตสฺมา น วตฺตพฺพํ สํโฆ ภุญฺชติ, ปิวติ, ขาทติ, สายตี"ติ เยสํ ลทฺธิ เสยฺยถาปิ เตสญฺเญว, เต สนฺธาย ปุจฺฉา สกวาทิสฺส, ปฏิญฺญา อิตรสฺส. อถ นํ "ยทิ เต สํโฆ น ภุญฺเชยฺย, สํฆภตฺตาทิกรณํ นิรตฺถกํ ภเวยฺยา"ติ โจเทตุํ นนุ อตฺถิ เกจิ สํฆภตฺตานิ กโรนฺตีติอาทิมาห. คณโภชนนฺติอาทิ "ยทิ สํโฆ น ภุญฺเชยฺย, กสฺส คณโภชนาทีนิ สิยุนฺ"ติ โจทนตฺถํ วุตฺตํ. อฏฺฐ ปานานีติ อิทํ ^๑- "ยทิ สํโฆ น ปิเวยฺย, กสฺเสตานิ ปานานิ สตฺถา อนุชาเนยฺยา"ติ โจทนตฺถํ วุตฺตํ. เสสมิทมฺปิ ^๒- เหฏฺฐา วุตฺตนเยเนว เวทิตพฺพนฺติ. นวตฺตพฺพํสํโฆภุญฺชตีติกถาวณฺณนา นิฏฺฐิตา. ------------ ๙. นวตฺตพฺพํสํฆสฺสทินฺนํมหปฺผลนฺติกถาวณฺณนา [๗๙๗-๗๙๘] อิทานิ น วตฺตพฺพํ สํฆสฺส ทินฺนํ มหปฺผลนฺติกถา นาม โหติ. ตตฺราปิ "มคฺคผลาเนว สํโฆ นาม, น จ สกฺกา เตสํ กิญฺจิ ทาตุํ, น จ เตหิ ปฏิคฺคณฺหิตุํ, น จ เตสํ ทาเนน โกจิ อุปกาโร อิชฺฌติ, ตสฺมา น วตฺตพฺพํ สํฆสฺส ทินฺนํ มหปฺผลนฺ"ติ เยสํ ลทฺธิ เสยฺยถาปิ เตสญฺเญว, @เชิงอรรถ: ^๑ ฉ.ม. อิทมฺปิ ^๒ ฉ.ม. เสสมิธาปิ

เนื้อความอรรถกถาฉบับภาษาบาลี อักษรไทย เล่มที่ ๕๕ หน้าที่ ๒๙๕. http://84000.org/tipitaka/read/attha_page.php?book=55&page=295&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=55&A=6643&modeTY=2&pagebreak=1 http://84000.org/tipitaka/atthapali/th_line.php?B=55&A=6643&modeTY=2&pagebreak=1#p295