อรรถกถาเล่มที่ ๖ หน้าที่ ๒๐๒.

จุติปฏิสนฺธิฉาทกํ ตมํ วิชฺฌติ, ตญฺจ วิทิตํ กโรตีติ วิชฺชา. อาสวานํ ขเย ญาณํ จตุสจฺจฉาทกํ ตมํ วิชฺฌติ, จตุสจฺจธมฺมญฺจ วิทิตํ กโรตีติ วิชฺชา. (๕๘) วิหาเรสุ อฏฺฐ สมาปตฺติโย ทิพฺโพ วิหาโร. จตสฺโส อปฺปมญฺญา พฺรหฺมวิหาโร. ผลสมาปตฺติ อริโย วิหาโร. (๕๙) ปาฏิหาริยานิ เกวฏฺฏสุตฺเต วิตฺถาริตาเนว. (๖๐) "อิเม โข อาวุโส"ติ อาทีสุ วุตฺตนเยเนว โยเชตพฺพํ. อิติ สมสฏฺฐิยา ติกานํ วเสน อสีติสตํ ปเญฺห กเถนฺโต เถโร สามคฺคีรสํ ทสฺเสสีติ. ติกวณฺณนา นิฏฺฐิตา. ------------ จตุกฺกวณฺณนา [๓๐๖] อิติ ติกวเสน สามคฺคีรสํ ทสฺเสตฺวา อิทานิ จตุกฺกวเสน ทสฺเสตุํ ปุน เทสนํ อารภิ. ตตฺถ "สติปฏฺฐานจตุกฺกํ"ปุพฺเพ วิตฺถาริตเมว. (๑) สมฺมปฺปธานจตุกฺเก ฉนฺทํ ชเนตีติ "โย ฉนฺโท ฉนฺทีกตา กตฺตุกมฺยตา กุสโล ธมฺมจฺฉนฺโท"ติ เอวํ วุตฺตํ กตฺตุกมฺยตํ ชเนติ. วายมตีติ วายามํ กโรติ. วีริยํ อารภตีติ วีริยํ ชเนติ. จิตฺตํ ปคฺคณฺหตีติ จิตฺตํ อุปตฺถมฺเภติ. อยเมตฺถ สงฺเขโป, วิตฺถาโร ปน สมฺมปฺปธานวิภงฺเค อาคโตเยว. (๒) อิทฺธิปาเทสุ ฉนฺทํ นิสฺสาย ปวตฺโต สมาธิ ฉนฺทสมาธิ. ปธานภูตา สงฺขารา ปธานสงฺขารา. สมนฺนาคตนฺติ เตหิ ธมฺเมหิ อุเปตํ. อิทฺธิยา ปาทํ, อิทฺธิภูตํ วา ปาทนฺติ อิทฺธิปาทํ. เสเสสุปิ เอเสว นโย. อยเมตฺถ สงฺเขโป, วิตฺถาโร ปน อิทฺธิปาทวิภงฺเค อาคโตเอว. วิสุทฺธิมคฺเค ปนสฺส อตฺโถ ทีปิโต. ฌานกถาปิ วิสุทฺธิมคฺเค วิตฺถาริตาว. (๓-๔) [๓๐๗] ทิฏฺฐธมฺมสุขวิหารายาติ อิมสฺมึเยว อตฺตภาเว สุขวิหารตฺถาย. อิธ ผลสมาปตฺติชฺฌานานิ, ขีณาสวสฺส อปรภาเค นิพฺพตฺติตชฺฌานานิ จ กถิตานิ. (๕-๑)

เนื้อความอรรถกถาฉบับภาษาบาลี อักษรไทย เล่มที่ ๖ หน้าที่ ๒๐๒. http://84000.org/tipitaka/read/attha_page.php?book=6&page=202&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=6&A=5117&modeTY=2&pagebreak=1 http://84000.org/tipitaka/atthapali/th_line.php?B=6&A=5117&modeTY=2&pagebreak=1#p202