พระไตรปิฎกเล่มที่ ๑ ภาษาบาลี อักษรไทย
พระวินัยปิฎกเล่มที่ ๑ วินย. มหาวิภงฺโค (๑)

     [๒๐๓]   อนาปตฺติ   อสญฺจิจฺจ   อชานนฺตสฺส   นมรณาธิปฺปายสฺส
อุมฺมตฺตกสฺส ขิตฺตจิตฺตสฺส ๑- เวทนฏฺฏสฺส ๒- อาทิกมฺมิกสฺสาติ ฯ
            มนุสฺสวิคฺคหปาราชิกมฺหิ ปฐมภาณวารํ นิฏฺฐิตํ ฯ
     [๒๐๔]   สํวณฺณนา นิสีทนฺโต          มุสโลทุกฺขเลน จ
           วุฑฺฒปพฺพชิตา สนฺโต            ลคฺคํ มํสํ วิเสนปิ ๓-
           ตโย จ วตฺถุกมฺเมหิ                อิฏฺฐกาหิปเร ตโย
           วาสี โคปานสี เจว                  อฏฺฏโกตรณํ ปติ
           เสทนตฺถุญฺจ สมฺพาโห            นหาปนาพฺภญฺชเนน จ
           อุฏฺฐาเปนฺโต นิปาเตนฺโต         อนฺนปาเนน มารณํ
           ชารคพฺโภ สปตฺตี จ                มาตาปุตฺตํ อุโภ วธิ
@เชิงอรรถ: ๑-๒ อิเม เทฺว ปาฐา ยุโรปิยมรมฺมโปตฺถเกสุ น ทิสฺสนฺติ ฯ
@๓ วุฑฺฒปพฺพชิตาภิสนฺโน อคฺคํ วิมํสนา วิสนฺติ เตสุ โปตฺถเกสุ
@อาคตํ ฯ
           อุโภ น มิยฺยเร มทฺทา              ตาปํ วญฺฌา วิชายินี
           ปโตทํ นิคฺคเห ยกฺโข               วาฬยกฺขญฺจ ปาหิณิ
           ตํ มญฺญมาโน ปหริ                สคฺคญฺจ นิรยํ ภเณ
           อาฬวิยา ตโย รุกฺขา               ทาเยหิ อปเร ตโย
           มา กิลเมสิ น ตุยฺหํ                 ตกฺกํ โสจิรเกน ๑- จาติ ฯ
     [๒๐๕]   เตน  โข  ปน  สมเยน  อญฺญตโร  ภิกฺขุ คิลาโน โหติ ฯ
ตสฺส    ภิกฺขู    การุญฺเญน    มรณวณฺณํ   สํวณฺเณสุํ   ฯ   โส   ภิกฺขุ
กาลมกาสิ   ฯ   เตสํ   กุกฺกุจฺจํ  อโหสิ  กจฺจิ  นุ  โข  มยํ  ปาราชิกํ
อาปตฺตึ    อาปนฺนาติ   ฯ   อถโข   เต   ภิกฺขู   ภควโต   เอตมตฺถํ
อาโรเจสุํ ฯ อาปตฺตึ ตุเมฺห ภิกฺขเว อาปนฺนา ปาราชิกนฺติ ฯ
     [๒๐๖]   เตน   โข  ปน  สมเยน  อญฺญตโร  ปิณฺฑจาริโก  ภิกฺขุ
ปีฐเก  ปิโลติกาย  ปฏิจฺฉนฺนํ  ทารกํ  นิสีทนฺโต  โอตฺถริตฺวา  มาเรสิ  ฯ
ตสฺส   กุกฺกุจฺจํ   อโหสิ   กจฺจิ   นุ   โข   อหํ   ปาราชิกํ   อาปตฺตึ
อาปนฺโนติ   ฯ   อถโข   โส  ภิกฺขุ  ภควโต  เอตมตฺถํ  อาโรเจสิ  ฯ
อนาปตฺติ    ภิกฺขุ    ปาราชิกสฺส   น   จ   ภิกฺขเว   อปฺปฏิเวกฺขิตฺวา
อาสเน นิสีทิตพฺพํ โย นิสีเทยฺย อาปตฺติ ทุกฺกฏสฺสาติ ฯ
     [๒๐๗]   เตน  โข  ปน สมเยน อญฺญตโร ภิกฺขุ ภตฺตคฺเค อนฺตรฆเร
อาสนํ  ปญฺญาเปนฺโต  มุสเล  อุสฺสิเต  เอกํ  มุสลํ  อคฺคเหสิ  ฯ  ทุติโย
มุสโล    ปริปติตฺวา   อญฺญตรสฺส   ทารกสฺส   มตฺถเก   อวตฺถาสิ   ฯ
@เชิงอรรถ: ๑ ยุ. ม. ตกฺกสุวีรเกน ฯ รา. ตกฺกํ โสวิรเกน ฯ
โส   กาลมกาสิ   ฯ   ตสฺส   กุกฺกุจฺจํ   อโหสิ   ฯเปฯ  กึจิตฺโต  ตฺวํ
ภิกฺขูติ  ฯ  อสญฺจิจฺโจ  อหํ  ภควาติ  ฯ  อนาปตฺติ  ภิกฺขุ  อสญฺจิจฺจาติ ฯ
เตน   โข  ปน  สมเยน  อญฺญตโร  ภิกฺขุ  ภตฺตคฺเค  อนฺตรฆเร  อาสนํ
ปญฺญาเปนฺโต   อุทุกฺขลภณฺฑิกํ   อกฺกมิตฺวา   ปวฏฺเฏสิ   อญฺญตรํ   ทารกํ
โอตฺถริตฺวา   มาเรสิ   ฯ   ตสฺส   กุกฺกุจฺจํ   อโหสิ  ฯเปฯ  อนาปตฺติ
ภิกฺขุ อสญฺจิจฺจาติ ฯ
     [๒๐๘]   เตน   โข  ปน  สมเยน  ปิตาปตฺตา  ภิกฺขูสุ  ปพฺพชิตา
โหนฺติ   ฯ   กาเล  อาโรจิเต  ปุตฺโต  ปิตรํ  เอตทโวจ  คจฺฉ  ภนฺเต
สงฺโฆ   ตํ  ปฏิมาเนตีติ  ปิฏฺฐิยํ  คเหตฺวา  ปณาเมสิ  ฯ  โส  ปปติตฺวา
กาลมกาสิ   ฯ  ตสฺส  กุกฺกุจฺจํ  อโหสิ  ฯเปฯ  กึจิตฺโต  ตฺวํ  ภิกฺขูติ  ฯ
นาหํ ภควา มรณาธิปฺปาโยติ ฯ อนาปตฺติ ภิกฺขุ นมรณาธิปฺปายสฺสาติ ฯ
     {๒๐๘.๑}   เตน  โข  ปน  สมเยน  ปิตาปุตฺตา  ภิกฺขูสุ  ปพฺพชิตา
โหนฺติ  ฯ  กาเล  อาโรจิเต  ปุตฺโต  ปิตรํ เอตทโวจ คจฺฉ ภนฺเต สงฺโฆ
ตํ   ปฏิมาเนตีติ   มรณาธิปฺปาโย   ปิฏฺฐยํ  คเหตฺวา  ปณาเมสิ  ฯ  โส
ปปติตฺวา   กาลมกาสิ   ฯ  ตสฺส  กุกฺกุจฺจํ  อโหสิ  ฯเปฯ  อาปตฺตึ  ตฺวํ
ภิกฺขุ อาปนฺโน ปาราชิกนฺติ ฯ
     {๒๐๘.๒}   เตน  โข  ปน  สมเยน  ปิตาปุตฺตา  ภิกฺขูสุ  ปพฺพชิตา
โหนฺติ  ฯ  กาเล  อาโรจิเต  ปุตฺโต  ปิตรํ เอตทโวจ คจฺฉ ภนฺเต สงฺโฆ
ตํ   ปฏิมาเนตีติ   มรณาธิปฺปาโย   ปิฏฺฐิยํ  คเหตฺวา  ปณาเมสิ  ฯ  โส
ปปติตฺวา  น  กาลมกาสิ  ฯ  ตสฺส  กุกฺกุจฺจํ  อโหสิ ฯเปฯ อนาปตฺติ ภิกฺขุ
ปาราชิกสฺส อาปตฺติ ถุลฺลจฺจยสฺสาติ ฯ
     [๒๐๙]   เตน  โข  ปน  สมเยน  อญฺญตรสฺส  ภิกฺขุโน  ภุญฺชนฺตสฺส
มํสํ   กณฺเฐ   วิลคฺคํ  โหติ  ฯ  อญฺญตโร  ภิกฺขุ  ตสฺส  ภิกฺขุโน  คีวายํ
ปหารํ  อทาสิ  ฯ  สโลหิตํ  มํสํ  ปติ  ฯ  โส  ภิกฺขุ  กาลมกาสิ ฯ ตสฺส
กุกฺกุจฺจํ   อโหสิ   ฯเปฯ   อนาปตฺติ   ภิกฺขุ   นมรณาธิปฺปายสฺสาติ   ฯ
เตน   โข   ปน  สมเยน  อญฺญตรสฺส  ภิกฺขุโน  ภุญฺชนฺตสฺส  มํสํ  กณฺเฐ
วิลคฺคํ  โหติ  ฯ  อญฺญตโร  ภิกฺขุ  มรณาธิปฺปาโย  ตสฺส  ภิกฺขุโน  คีวายํ
ปหารํ  อทาสิ  ฯ  สโลหิตํ  มํสํ  ปติ  ฯ  โส  ภิกฺขุ  กาลมกาสิ ฯ ตสฺส
กุกฺกุจฺจํ อโหสิ ฯเปฯ อาปตฺตึ ตฺวํ ภิกฺขุ อาปนฺโน ปาราชิกนฺติ ฯ
     {๒๐๙.๑}   เตน  โข  ปน  สมเยน  อญฺญตรสฺส ภิกฺขุโน ภุญฺชนฺตสฺส
มํสํ   กณฺเฐ   วิลคฺคํ   โหติ  ฯ  อญฺญตโร  ภิกฺขุ  มรณาธิปฺปาโย  ตสฺส
ภิกฺขุโน คีวายํ ปหารํ อทาสิ ฯ สโลหิตํ มํสํ ปติ ฯ โส ภิกฺขุ น กาลมกาสิ ฯ
ตสฺส   กุกฺกุจฺจํ   อโหสิ   ฯเปฯ  อนาปตฺติ  ภิกฺขุ  ปาราชิกสฺส  อาปตฺติ
ถุลฺลจฺจยสฺสาติ ฯ
     [๒๑๐]   เตน   โข  ปน  สมเยน  อญฺญตโร  ปิณฺฑจาริโก  ภิกฺขุ
วิสคตํ   ปิณฺฑปาตํ   ลภิตฺวา   ปฏิกฺกมนํ   หริตฺวา   ภิกฺขูนํ   อคฺคการิกํ
อทาสิ  ฯ  เต  ภิกฺขู  กาลมกํสุ  ฯ  ตสฺส  กุกฺกุจฺจํ อโหสิ ฯเปฯ กึจิตฺโต
ตฺวํ ภิกฺขูติ ฯ นาหํ ภควา ชานามีติ ฯ อนาปตฺติ ภิกฺขุ อชานนฺตสฺสาติ ฯ
     {๒๑๐.๑}   เตน    โข    ปน    สมเยน   อญฺญตโร   ภิกฺขุ
วีมํสาธิปฺปาโย   อญฺญตรสฺส   ภิกฺขุโน   วิสํ   อทาสิ   ฯ   โส   ภิกฺขุ
กาลมกาสิ    ฯ    ตสฺส    กุกฺกุจฺจํ   อโหสิ   ฯเปฯ   กึจิตฺโต   ตฺวํ
ภิกฺขูติ    ฯ    วีมํสาธิปฺปาโย   อหํ   ภควาติ   ฯ   อนาปตฺติ   ภิกฺขุ
ปาราชิกสฺส อาปตฺติ ถุลฺลจฺจยสฺสาติ ฯ
     [๒๑๑]   เตน  โข  ปน  สมเยน  อาฬวิกา  ๑-  ภิกฺขู วิหารวตฺถุํ
กโรนฺติ   ฯ   อญฺญตโร   ภิกฺขุ   เหฏฺฐา   หุตฺวา  สิลํ  อุจฺจาเรสิ  ฯ
อุปริเมน   ภิกฺขุนา   ทุคฺคหิตา   สิลา   เหฏฺฐิมสฺส   ภิกฺขุโน   มตฺถเก
อวตฺถาสิ   ฯ   โส   ภิกฺขุ   กาลมกาสิ   ฯ   ตสฺส   กุกฺกุจฺจํ  อโหสิ
ฯเปฯ อนาปตฺติ ภิกฺขุ อสญฺจิจฺจาติ ฯ
     {๒๑๑.๑}   เตน โข ปน สมเยน อาฬวิกา ภิกฺขู วิหารวตฺถุํ กโรนฺติ ฯ
อญฺญตโร   ภิกฺขุ   เหฏฺฐา   หุตฺวา  สิลํ  อุจฺจาเรสิ  ฯ  อุปริโม  ภิกฺขุ
มรณาธิปฺปาโย   เหฏฺฐิมสฺส  ภิกฺขุโน  มตฺถเก  สิลํ  มุญฺจิ  ฯ  โส  ภิกฺขุ
กาลมกาสิ  ฯ  ตสฺส  กุกฺกุจฺจํ  อโหสิ  ฯเปฯ  อาปตฺตึ ตฺวํ ภิกฺขุ อาปนฺโน
ปาราชิกนฺติ ฯ
     {๒๑๑.๒}   เตน โข ปน สมเยน อาฬวิกา ภิกฺขู วิหารวตฺถุํ กโรนฺติ ฯ
อญฺญตโร   ภิกฺขุ   เหฏฺฐา   หุตฺวา  สิลํ  อุจฺจาเรสิ  ฯ  อุปริโม  ภิกฺขุ
มรณาธิปฺปาโย   เหฏฺฐิมสฺส  ภิกฺขุโน  มตฺถเก  สิลํ  มุญฺจิ  ฯ  โส  ภิกฺขุ
น   กาลมกาสิ   ฯ   ตสฺส   กุกฺกุจฺจํ   อโหสิ  ฯเปฯ  อนาปตฺติ  ภิกฺขุ
ปาราชิกสฺส   อาปตฺติ   ถุลฺลจฺจยสฺสาติ   ฯ   เตน   โข  ปน  สมเยน
อาฬวิกา    ภิกฺขู    วิหารสฺส    กุฑฺฑํ    อุฏฺฐาเปนฺติ   ฯ   อญฺญตโร
@เชิงอรรถ: ๑ ยุ. ม. อาฬวกา ฯ
ภิกฺขุ   เหฏฺฐา   หุตฺวา   อิฏฺฐกํ   อุจฺจาเรสิ   ฯ   อุปริเมน  ภิกฺขุนา
ทุคฺคหิตา   อิฏฺฐกา   เหฏฺฐิมสฺส   ภิกฺขุโน   มตฺถเก  อวตฺถาสิ  ฯ  โส
ภิกฺขุ    กาลมกาสิ   ฯ   ตสฺส   กุกฺกุจฺจํ   อโหสิ   ฯเปฯ   อนาปตฺติ
ภิกฺขุ อสญฺจิจฺจาติ ฯ
     {๒๑๑.๓}   เตน  โข  ปน  สมเยน  อาฬวิกา ภิกฺขู วิหารสฺส กุฑฺฑํ
อุฏฺฐาเปนฺติ  ฯ  อญฺญตโร  ภิกฺขุ  เหฏฺฐา  หุตฺวา  อิฏฺฐกํ  อุจฺจาเรสิ  ฯ
อุปริโม   ภิกฺขุ   มรณาธิปฺปาโย   เหฏฺฐิมสฺส   ภิกฺขุโน  มตฺถเก  อิฏฺฐกํ
มุญฺจิ  ฯ  โส  ภิกฺขุ  กาลมกาสิ  ฯเปฯ  โส  ภิกฺขุ น กาลมกาสิ ฯ ตสฺส
กุกฺกุจฺจํ    อโหสิ    ฯเปฯ    อนาปตฺติ   ภิกฺขุ  ปาราชิกสฺส   อาปตฺติ
ถุลฺลจฺจยสฺสาติ ฯ
     {๒๑๑.๔}   เตน  โข ปน สมเยน อาฬวิกา ภิกฺขู นวกมฺมํ กโรนฺติ ฯ
อญฺญตโร  ภิกฺขุ  เหฏฺฐา  หุตฺวา  วาสึ  อุจฺจาเรสิ  ฯ  อุปริเมน ภิกฺขุนา
ทุคฺคหิตา   วาสี  เหฏฺฐิมสฺส  ภิกฺขุโน  มตฺถเก  อวตฺถาสิ  ฯ  โส  ภิกฺขุ
กาลมกาสิ ฯ ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ อสญฺจิจฺจาติ ฯ
     {๒๑๑.๕}   เตน  โข ปน สมเยน อาฬวิกา ภิกฺขู นวกมฺมํ กโรนฺติ ฯ
อญฺญตโร   ภิกฺขุ   เหฏฺฐา  หุตฺวา  วาสึ  อุจฺจาเรสิ  ฯ  อุปริโม  ภิกฺขุ
มรณาธิปฺปาโย  เหฏฺฐิมสฺส  ภิกฺขุโน  มตฺถเก  วาสึ  มุญฺจิ  ฯ  โส  ภิกฺขุ
กาลมกาสิ  ฯเปฯ  โส  ภิกฺขุ  น  กาลมกาสิ  ฯ  ตสฺส  กุกฺกุจฺจํ  อโหสิ
ฯเปฯ   อนาปตฺติ   ภิกฺขุ   ปาราชิกสฺส   อาปตฺติ   ถุลฺลจฺจยสฺสาติ   ฯ
เตน  โข  ปน  สมเยน  อาฬวิกา ภิกฺขู นวกมฺมํ กโรนฺติ ฯ อญฺญตโร ภิกฺขุ
เหฏฺฐา   หุตฺวา  โคปานสึ  อุจฺจาเรสิ  ฯ  อุปริเมน  ภิกฺขุนา  ทุคฺคหิตา
โคปานสี   เหฏฺฐิมสฺส   ภิกฺขุโน   มตฺถเก   อวตฺถาสิ   ฯ   โส  ภิกฺขุ
กาลมกาสิ    ฯ   ตสฺส   กุกฺกุจฺจํ   อโหสิ   ฯเปฯ   อนาปตฺติ   ภิกฺขุ
อสญฺจิจฺจาติ ฯ
     {๒๑๑.๖}   เตน   โข   ปน  สมเยน  อาฬวิกา  ภิกฺขู  นวกมฺมํ
กโรนฺติ   ฯ  อญฺญตโร  ภิกฺขุ  เหฏฺฐา  หุตฺวา  โคปานสึ  อุจฺจาเรสิ  ฯ
อุปริโม    ภิกฺขุ    มรณาธิปฺปาโย    เหฏฺฐิมสฺส    ภิกฺขุโน    มตฺถเก
โคปานสึ   มุญฺจิ   ฯ   โส   ภิกฺขุ   กาลมกาสิ  ฯเปฯ  โส  ภิกฺขุ  น
กาลมกาสิ    ฯ   ตสฺส   กุกฺกุจฺจํ   อโหสิ   ฯเปฯ   อนาปตฺติ   ภิกฺขุ
ปาราชิกสฺส อาปตฺติ ถุลฺลจฺจยสฺสาติ ฯ
     {๒๑๑.๗}   เตน  โข  ปน สมเยน อาฬวิกา ภิกฺขู นวกมฺมํ กโรนฺตา
อฏฺฏกํ  พนฺธนฺติ  ฯ  อญฺญตโร  ภิกฺขุ  อญฺญตรํ  ภิกฺขุํ  เอตทโวจ  อาวุโส
อตฺร  ฐิโต  พนฺธาหีติ  ฯ โส ตตฺร ฐิโต พนฺธนฺโต ปริปติตฺวา กาลมกาสิ ฯ
ตสฺส   กุกฺกุจฺจํ   อโหสิ  ฯเปฯ  กึจิตฺโต  ตฺวํ  ภิกฺขูติ  ฯ  นาหํ  ภควา
มรณาธิปฺปาโยติ ฯ อนาปตฺติ ภิกฺขุ นมรณาธิปฺปายสฺสาติ ฯ
     {๒๑๑.๘}   เตน  โข  ปน สมเยน อาฬวิกา ภิกฺขู นวกมฺมํ กโรนฺตา
อฏฺฏกํ   พนฺธนฺติ   ฯ   อญฺญตโร   ภิกฺขุ  มรณาธิปฺปาโย  อญฺญตรํ  ภิกฺขุํ
เอตทโวจ  อาวุโส  อตฺร  ฐิโต  พนฺธาหีติ  ฯ  โส  ตตฺร ฐิโต พนฺธนฺโต
ปริปติตฺวา   กาลมกาสิ   ฯเปฯ   ปริปติตฺวา   น  กาลมกาสิ  ฯ  ตสฺส
กุกฺกุจฺจํ    อโหสิ    ฯเปฯ   อนาปตฺติ    ภิกฺขุ   ปาราชิกสฺส  อาปตฺติ
ถุลฺลจฺจยสฺสาติ ฯ
     [๒๑๒]   เตน  โข  ปน  สมเยน  อญฺญตโร ภิกฺขุ วิหารํ ฉาเทตฺวา
โอตรติ   ฯ   อญฺญตโร   ภิกฺขุ   ตํ   ภิกฺขุํ  เอตทโวจ  อาวุโส  อิโต
โอตราหีติ   ฯ  โส  เตน  โอตรนฺโต  ปริปติตฺวา  กาลมกาสิ  ฯ  ตสฺส
กุกฺกุจฺจํ อโหสิ ฯเปฯ อนาปตฺติ ภิกฺขุ นมรณาธิปฺปายสฺสาติ ฯ
     {๒๑๒.๑}   เตน  โข  ปน สมเยน อญฺญตโร ภิกฺขุ วิหารํ ฉาเทตฺวา
โอตรติ  ฯ  อญฺญตโร  ภิกฺขุ  มรณาธิปฺปาโย  ตํ  ภิกฺขุํ เอตทโวจ อาวุโส
อิโต  โอตราหีติ  ฯ  โส  เตน  โอตรนฺโต  ปริปติตฺวา กาลมกาสิ ฯเปฯ
ปริปติตฺวา   น  กาลมกาสิ  ฯ  ตสฺส  กุกฺกุจฺจํ  อโหสิ  ฯเปฯ  อนาปตฺติ
ภิกฺขุ ปาราชิกสฺส อาปตฺติ ถุลฺลจฺจยสฺสาติ ฯ
     [๒๑๓]   เตน   โข   ปน  สมเยน  อญฺญตโร  ภิกฺขุ  อนภิรติยา
ปีฬิโต   คิชฺฌกูฏํ   อภิรูหิตฺวา   ปปาเต   ปปตนฺโต   อญฺญตรํ  วิลีวการํ
โอตฺถริตฺวา   มาเรสิ   ฯ   ตสฺส   กุกฺกุจฺจํ   อโหสิ  ฯเปฯ  อนาปตฺติ
ภิกฺขุ   ปาราชิกสฺส  น  จ  ภิกฺขเว  อตฺตานํ  ปาเตตพฺพํ  โย  ปาเตยฺย
อาปตฺติ ทุกฺกฏสฺสาติ ฯ
     {๒๑๓.๑}   เตน   โข  ปน  สมเยน  ฉพฺพคฺคิยา  ภิกฺขู  คิชฺฌกูฏํ
ปพฺพตํ   อภิรูหิตฺวา   ทวาย   สิลํ   ปวิชฺฌึสุ   ฯ   สา   ๑-  อญฺญตรํ
โคปาลกํ   โอตฺถริตฺวา   มาเรสิ   ๒-   ฯ   เตสํ   กุกฺกุจฺจํ   อโหสิ
ฯเปฯ   อนาปตฺติ   ภิกฺขเว   ปาราชิกสฺส   น   จ   ภิกฺขเว   ทวาย
สิลา ปวิชฺฌิตพฺพา โย ปวิชฺเฌยฺย อาปตฺติ ทุกฺกฏสฺสาติ ฯ
     [๒๑๔]   เตน   โข   ปน   สมเยน   อญฺญตโร  ภิกฺขุ  คิลาโน
@เชิงอรรถ: ๑ ยุโรปิยมรมฺมโปตฺถเกสุ อยํ ปาโฐ น ทิสฺสติ ฯ รามญฺญโปตฺถเก
@ปน สิลาติ ทิสฺสติ ฯ ๒ ยุ. ม. มาเรสุํ ฯ
โหติ   ฯ   ตํ   ภิกฺขู   เสเทสุํ   ฯ  โส  ภิกฺขุ  กาลมกาสิ  ฯ  เตสํ
กุกฺกุจฺจํ อโหสิ ฯเปฯ อนาปตฺติ ภิกฺขเว นมรณาธิปฺปายสฺสาติ ฯ
     {๒๑๔.๑}   เตน  โข ปน สมเยน อญฺญตโร ภิกฺขุ คิลาโน โหติ ฯ ตํ
ภิกฺขู  มรณาธิปฺปายา  เสเทสุํ  ฯ  โส  ภิกฺขุ  กาลมกาสิ ฯเปฯ โส ภิกฺขุ
น   กาลมกาสิ   ฯ   เตสํ  กุกฺกุจฺจํ  อโหสิ  ฯเปฯ  อนาปตฺติ  ภิกฺขเว
ปาราชิกสฺส อาปตฺติ ถุลฺลจฺจยสฺสาติ ฯ
     {๒๑๔.๒}   เตน  โข  ปน  สมเยน อญฺญตรสฺส ภิกฺขุโน สีสาภิตาโป
โหติ  ฯ  ตสฺส  ภิกฺขู  นตฺถุํ  อทํสุ ฯ โส ภิกฺขุ กาลมกาสิ ฯ เตสํ กุกฺกุจฺจํ
อโหสิ   ฯเปฯ   อนาปตฺติ  ภิกฺขเว  นมรณาธิปฺปายสฺสาติ  ฯ  เตน  โข
ปน   สมเยน  อญฺญตรสฺส  ภิกฺขุโน  สีสาภิตาโป   โหติ  ฯ  ตสฺส  ภิกฺขู
มรณาธิปฺปายา  นตฺถุํ  อทํสุ  ฯ  โส  ภิกฺขุ  กาลมกาสิ ฯ ฯเปฯ โส ภิกฺขุ
น   กาลมกาสิ   ฯ   เตสํ  กุกฺกุจฺจํ  อโหสิ  ฯเปฯ  อนาปตฺติ  ภิกฺขเว
ปาราชิกสฺส อาปตฺติ ถุลฺลจฺจยสฺสาติ ฯ
     {๒๑๔.๓}   เตน  โข  ปน  สมเยน อญฺญตโร ภิกฺขุ คิลาโน โหติ ฯ
ตํ  ภิกฺขู  สมฺพาเหสุํ  ฯ  โส  ภิกฺขุ  กาลมกาสิ  ฯ  เตสํ กุกฺกุจฺจํ อโหสิ
ฯเปฯ   อนาปตฺติ   ภิกฺขเว   นมรณาธิปฺปายสฺสาติ   ฯ  เตน  โข  ปน
สมเยน    อญฺญตโร  ภิกฺขุ  คิลาโน  โหติ  ฯ  ตํ  ภิกฺขู  มรณาธิปฺปายา
สมฺพาเหสุํ  ฯ   โส  ภิกฺขุ  กาลมกาสิ  ฯเปฯ  โส ภิกฺขุ น กาลมกาสิ ฯ
เตสํ    กุกฺกุจฺจํ    อโหสิ   ฯเปฯ   อนาปตฺติ   ภิกฺขเว   ปาราชิกสฺส
อาปตฺติ     ถุลฺลจฺจยสฺสาติ     ฯ     เตน    โข    ปน    สมเยน
อญฺญตโร   ภิกฺขุ  คิลาโน  โหติ  ฯ  ตํ  ภิกฺขู  นหาเปสุํ  ฯ  โส  ภิกฺขุ
กาลมกาสิ   ฯ   เตสํ   กุกฺกุจฺจํ   อโหสิ   ฯเปฯ   อนาปตฺติ  ภิกฺขเว
นมรณาธิปฺปายสฺสาติ ฯ
     {๒๑๔.๔}   เตน   โข   ปน  สมเยน  อญฺญตโร  ภิกฺขุ  คิลาโน
โหติ  ฯ  ตํ  ภิกฺขู  มรณาธิปฺปายา  นหาเปสุํ  ฯ  โส  ภิกฺขุ  กาลมกาสิ
ฯเปฯ   โส   ภิกฺขุ   น  กาลมกาสิ  ฯ  เตสํ  กุกฺกุจฺจํ  อโหสิ  ฯเปฯ
อนาปตฺติ    ภิกฺขเว    ปาราชิกสฺส    อาปตฺติ    ถุลฺลจฺจยสฺสาติ    ฯ
เตน  โข  ปน  สมเยน  อญฺญตโร  ภิกฺขุ  คิลาโน  โหติ  ฯ   ตํ  ภิกฺขู
เตเลน   อพฺภญฺชึสุ   ฯ   โส   ภิกฺขุ   กาลมกาสิ   ฯ  เตสํ  กุกฺกุจฺจํ
อโหสิ     ฯเปฯ    อนาปตฺติ    ภิกฺขเว    นมรณาธิปฺปายสฺสาติ    ฯ
เตน   โข  ปน  สมเยน  อญฺญตโร  ภิกฺขุ  คิลาโน  โหติ  ฯ  ตํ  ภิกฺขู
มรณาธิปฺปายา   เตเลน   อพฺภญฺชึสุ   ฯ  โส  ภิกฺขุ  กาลมกาสิ  ฯเปฯ
โส   ภิกฺขุ  น  กาลมกาสิ  ฯ  เตสํ  กุกฺกุจฺจํ  อโหสิ  ฯเปฯ  อนาปตฺติ
ภิกฺขเว ปาราชิกสฺส อาปตฺติ ถุลฺลจฺจยสฺสาติ ฯ
     {๒๑๔.๕}   เตน  โข  ปน  สมเยน อญฺญตโร ภิกฺขุ คิลาโน โหติ ฯ
ตํ  ภิกฺขู  อุฏฺฐาเปสุํ  ฯ  โส  ภิกฺขุ  กาลมกาสิ  ฯ  เตสํ กุกฺกุจฺจํ อโหสิ
ฯเปฯ   อนาปตฺติ   ภิกฺขเว   นมรณาธิปฺปายสฺสาติ   ฯ  เตน  โข  ปน
สมเยน   อญฺญตโร   ภิกฺขุ  คิลาโน  โหติ  ฯ  ตํ  ภิกฺขู  มรณาธิปฺปายา
อุฏฺฐาเปสุํ  ฯ  โส  ภิกฺขุ กาลมกาสิ ฯเปฯ โส ภิกฺขุ น กาลมกาสิ ฯ เตสํ
กุกฺกุจฺจํ   อโหสิ   ฯเปฯ   อนาปตฺติ   ภิกฺขเว   ปาราชิกสฺส   อาปตฺติ
ถุลฺลจฺจยสฺสาติ ฯ
     {๒๑๔.๖}   เตน  โข  ปน  สมเยน อญฺญตโร ภิกฺขุ คิลาโน โหติ ฯ
ตํ  ภิกฺขู  นิปาเตสุํ  ฯ  โส ภิกฺขุ กาลมกาสิ ฯ เตสํ กุกฺกุจฺจํ อโหสิ ฯเปฯ
อนาปตฺติ   ภิกฺขเว   นมรณาธิปฺปายสฺสาติ   ฯ  เตน  โข  ปน  สมเยน
อญฺญตโร  ภิกฺขุ  คิลาโน  โหติ  ฯ  ตํ  ภิกฺขู  มรณาธิปฺปายา นิปาเตสุํ ฯ
โส   ภิกฺขุ   กาลมกาสิ   ฯเปฯ   โส  ภิกฺขุ  น  กาลมกาสิ  ฯ  เตสํ
กุกฺกุจฺจํ   อโหสิ   ฯเปฯ   อนาปตฺติ   ภิกฺขเว   ปาราชิกสฺส   อาปตฺติ
ถุลฺลจฺจยสฺสาติ   ฯ   เตน  โข  ปน  สมเยน  อญฺญตโร  ภิกฺขุ  คิลาโน
โหติ  ฯ  ตสฺส  ภิกฺขู  อนฺนํ  อทํสุ  ฯ  โส  ภิกฺขุ  กาลมกาสิ  ฯ  เตสํ
กุกฺกุจฺจํ อโหสิ ฯเปฯ อนาปตฺติ ภิกฺขเว นมรณาธิปฺปายสฺสาติ ฯ
     {๒๑๔.๗}   เตน   โข  ปน  สมเยน  อญฺญตโร  ภิกฺขุ  คิลาโน
โหติ   ฯ   ตสฺส   ภิกฺขู   มรณาธิปฺปายา   อนฺนํ  อทํสุ  ฯ  โส  ภิกฺขุ
กาลมกาสิ  ฯเปฯ  โส  ภิกฺขุ  น  กาลมกาสิ  ฯ  เตสํ  กุกฺกุจฺจํ  อโหสิ
ฯเปฯ   อนาปตฺติ   ภิกฺขเว   ปาราชิกสฺส   อาปตฺติ  ถุลฺลจฺจยสฺสาติ  ฯ
เตน   โข   ปน   สมเยน   อญฺญตโร  ภิกฺขุ  คิลาโน  โหติ  ฯ  ตสฺส
ภิกฺขู   ปานํ   อทํสุ   ฯ   โส   ภิกฺขุ   กาลมกาสิ  ฯ  เตสํ  กุกฺกุจฺจํ
อโหสิ   ฯเปฯ   อนาปตฺติ   ภิกฺขเว   นมรณาธิปฺปายสฺสาติ   ฯ   เตน
โข   ปน   สมเยน   อญฺญตโร   ภิกฺขุ  คิลาโน  โหติ  ฯ  ตสฺส  ภิกฺขู
มรณาธิปฺปายา    ปานํ   อทํสุ   ฯ   โส   ภิกฺขุ   กาลมกาสิ   ฯเปฯ
โส   ภิกฺขุ  น  กาลมกาสิ  ฯ  เตสํ  กุกฺกุจฺจํ  อโหสิ  ฯเปฯ  อนาปตฺติ
ภิกฺขเว ปาราชิกสฺส อาปตฺติ ถุลฺลจฺจยสฺสาติ ฯ
     [๒๑๕]   เตน   โข  ปน  สมเยน  อญฺญตรา  อิตฺถี  ปวุตฺถปติกา
ชาเรน   คพฺภินี   โหติ   ฯ   สา   กุลูปกํ  ภิกฺขุํ  เอตทโวจ  อิงฺฆยฺย
คพฺภปาตนํ   ชานาหีติ   ฯ  สุฏฺฐุ  ภคินีติ  ตสฺสา  คพฺภปาตนํ  อทาสิ  ฯ
ทารโก   กาลมกาสิ   ฯ   ตสฺส  กุกฺกุจฺจํ  อโหสิ  ฯเปฯ  อาปตฺตึ  ตฺวํ
ภิกฺขุ อาปนฺโน ปาราชิกนฺติ ฯ
     {๒๑๕.๑}   เตน   โข  ปน  สมเยน  อญฺญตรสฺส  ปุริสสฺส  เทฺว
ปชาปติโย   โหนฺติ   เอกา   วญฺฌา  เอกา  วิชายินี  ฯ  วญฺฌา  อิตฺถี
กุลูปกํ  ภิกฺขุํ  เอตทโวจ  สเจ  สา  ภนฺเต  วิชายิสฺสติ สพฺพสฺส กุฏุมฺพสฺส
อิสฺสรา  ภวิสฺสติ  อิงฺฆยฺย  ตสฺสา  คพฺภปาตนํ  ชานาหีติ  ฯ  สุฏฺฐุ ภคินีติ
ตสฺสา   คพฺภปาตนํ   อทาสิ   ฯ   ทารโก   กาลมกาสิ  ฯ  มาตา  น
กาลมกาสิ  ฯ  ตสฺส  กุกฺกุจฺจํ  อโหสิ  ฯเปฯ  อาปตฺตึ ตฺวํ ภิกฺขุ อาปนฺโน
ปาราชิกนฺติ ฯ
     {๒๑๕.๒}   เตน   โข  ปน  สมเยน  อญฺญตรสฺส  ปุริสสฺส  เทฺว
ปชาปติโย   โหนฺติ   เอกา   วญฺฌา  เอกา  วิชายินี  ฯ  วญฺฌา  อิตฺถี
กุลูปกํ   ภิกฺขุํ   เอตทโวจ   สเจ   สา   ภนฺเต   วิชายิสฺสติ  สพฺพสฺส
กุฏุมฺพสฺส   อิสฺสรา   ภวิสฺสติ  อิงฺฆยฺย  ตสฺสา  คพฺภปาตนํ  ชานาหีติ  ฯ
สุฏฺฐุ   ภคินีติ   ตสฺสา   คพฺภปาตนํ   อทาสิ  ฯ  มาตา  กาลมกาสิ  ฯ
ทารโก   น   กาลมกาสิ   ฯ  ตสฺส  กุกฺกุจฺจํ  อโหสิ  ฯเปฯ  อนาปตฺติ
ภิกฺขุ   ปาราชิกสฺส   อาปตฺติ   ถุลฺลจฺจยสฺสาติ   ฯ    เตน   โข  ปน
สมเยน    อญฺญตรสฺส    ปุริสสฺส   เทฺว   ปชาปติโย   โหนฺติ   เอกา
วญฺฌา   เอกา   วิชายินี   ฯ   วญฺฌา  อิตฺถี  กุลูปกํ  ภิกฺขุํ  เอตทโวจ
สเจ   สา   ภนฺเต   วิชายิสฺสติ   สพฺพสฺส  กุฏุมฺพสฺส  อิสฺสรา  ภวิสฺสติ
อิงฺฆยฺย   ตสฺสา   คพฺภปาตนํ   ชานาหีติ   ฯ   สุฏฺฐุ   ภคินีติ   ตสฺสา
คพฺภปาตนํ   อทาสิ  ฯ  อุโภ  กาลมกํสุ  ฯเปฯ  อุโภ  น  กาลมกํสุ  ฯ
ตสฺส   กุกฺกุจฺจํ   อโหสิ   ฯเปฯ  อนาปตฺติ  ภิกฺขุ  ปาราชิกสฺส  อาปตฺติ
ถุลฺลจฺจยสฺสาติ ฯ
     {๒๑๕.๓}   เตน    โข    ปน   สมเยน   อญฺญตรา   คพฺภินี
อิตฺถี   กุลูปกํ   ภิกฺขุํ   เอตทโวจ   อิงฺฆยฺย   คพฺภปาตนํ  ชานาหีติ  ฯ
เตนหิ   ภคินิ   มทฺทสฺสูติ   ฯ  สา  มทฺทิตฺวา  คพฺภํ  ปาเตสิ  ฯ  ตสฺส
กุกฺกุจฺจํ อโหสิ ฯเปฯ อาปตฺตึ ตฺวํ ภิกฺขุ อาปนฺโน ปาราชิกนฺติ ฯ
     {๒๑๕.๔}   เตน  โข ปน สมเยน อญฺญตรา คพฺภินี อิตฺถี กุลูปกํ ภิกฺขุํ
เอตทโวจ  อิงฺฆยฺย  คพฺภปาตนํ  ชานาหีติ  ฯ  เตนหิ  ภคินิ  ตาเปหีติ ฯ
สา  ตาเปตฺวา  คพฺภํ  ปาเตสิ  ฯ  ตสฺส  กุกฺกุจฺจํ  อโหสิ ฯเปฯ อาปตฺตึ
ตฺวํ  ภิกฺขุ  อาปนฺโน  ปาราชิกนฺติ  ฯ  เตน  โข  ปน  สมเยน อญฺญตรา
วญฺฌา   อิตฺถี   กุลูปกํ   ภิกฺขุํ   เอตทโวจ   อิงฺฆยฺย  เภสชฺชํ  ชานาหิ
เยนาหํ  วิชาเยยฺยนฺติ  ฯ  สุฏฺฐุ  ภคินีติ  ตสฺสา  เภสชฺชํ  อทาสิ  ฯ สา
กาลมกาสิ   ฯ   กุกฺกุจฺจํ   อโหสิ  ฯเปฯ  อนาปตฺติ  ภิกฺขุ  ปาราชิกสฺส
อาปตฺติ ทุกฺกฏสฺสาติ ฯ
     {๒๑๕.๕}   เตน โข ปน สมเยน อญฺญตรา วิชายินี อิตฺถี กุลูปกํ ภิกฺขุํ
เอตทโวจ  อิงฺฆยฺย เภสชฺชํ ชานาหิ เยนาหํ น วิชาเยยฺยนฺติ ฯ สุฏฺฐุ ภคินีติ
ตสฺสา  เภสชฺชํ  อทาสิ  ฯ  สา  กาลมกาสิ ฯ ตสฺส กุกฺกุจฺจํ อโหสิ ฯเปฯ
อนาปตฺติ ภิกฺขุ ปาราชิกสฺส อาปตฺติ ทุกฺกฏสฺสาติ ฯ
     [๒๑๖]   เตน  โข  ปน  สมเยน  ฉพฺพคฺคิยา  ภิกฺขู  สตฺตรสวคฺคิยํ
ภิกฺขุํ  องฺคุลิปโตทเกน  หาเสสุํ  ฯ  โส  ภิกฺขุ อุตฺตสนฺโต ๑- อนสฺสาสโก
กาลมกาสิ  ฯ  เตสํ  กุกฺกุจฺจํ  อโหสิ ฯเปฯ อนาปตฺติ ภิกฺขเว ปาราชิกสฺส
อาปตฺติ ปาจิตฺติยสฺสาติ ๒- ฯ
     [๒๑๗]   เตน  โข  ปน  สมเยน  สตฺตรสวคฺคิยา  ภิกฺขู  ฉพฺพคฺคิยํ
ภิกฺขุํ  กมฺมํ  กริสฺสามาติ  โอตฺถริตฺวา  มาเรสุํ  ฯ  เตสํ  กุกฺกุจฺจํ อโหสิ
ฯเปฯ อนาปตฺติ ภิกฺขเว ปาราชิกสฺส อาปตฺติ ปาจิตฺติยสฺสาติ ๓- ฯ
     [๒๑๘]   เตน   โข  ปน  สมเยน  อญฺญตโร  ภูตเวชฺชโก  ภิกฺขุ
ยกฺขํ   ชีวิตา   โวโรเปสิ  ฯ  ตสฺส  กุกฺกุจฺจํ  อโหสิ  ฯเปฯ  อนาปตฺติ
ภิกฺขุ ปาราชิกสฺส อาปตฺติ ถุลฺลจฺจยสฺสาติ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๑ หน้าที่ ๑๔๗-๑๖๐.
https://84000.org/tipitaka/read/pali_item.php?book=1&item=203&items=16
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=1&item=203&items=16&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=1&item=203&items=16
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=1&item=203&items=16
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=1&i=203
             สารบัญพระไตรปิฎกเล่มที่ ๑
https://84000.org/tipitaka/read/?index_1
https://84000.org/tipitaka/english/?index_1