พระไตรปิฎกเล่มที่ ๑ ภาษาบาลี อักษรไทย
พระวินัยปิฎกเล่มที่ ๑ วินย. มหาวิภงฺโค (๑)

     [๔๒๗]   อสฺโสสุํ   โข   ภิกฺขู   เอกจฺจานํ  อิตฺถีนํ  โอยาจนฺตีนํ
เอกจฺจานํ  อิตฺถีนํ  อายาจนฺตีนํ  ฯ  เย  เต  ภิกฺขู  อปฺปิจฺฉา  สนฺตุฏฺฐา
ฯเปฯ   เต   อุชฺฌายนฺติ   ขียนฺติ  วิปาเจนฺติ  กถํ  หิ  นาม  อายสฺมา
อุทายิ   สญฺจริตฺตํ   สมาปชฺชิสฺสตีติ   ฯ   อถโข   เต   ภิกฺขู  ภควโต
เอตมตฺถํ   อาโรเจสุํ   ฯ   อถโข   ภควา  เอตสฺมึ  นิทาเน  เอตสฺมึ
ปกรเณ    ภิกฺขุสงฺฆํ   สนฺนิปาตาเปตฺวา   อายสฺมนฺตํ   อุทายึ   ปฏิปุจฺฉิ
สจฺจํ   กิร   ตฺวํ  อุทายิ  สญฺจริตฺตํ  สมาปชฺชสีติ  ฯ  สจฺจํ  ภควาติ  ฯ
วิครหิ   พุทฺโธ   ภควา   อนนุจฺฉวิกํ   โมฆปุริส   อนนุโลมิกํ  อปฺปฏิรูปํ
อสฺสามณกํ    อกปฺปิยํ    อกรณียํ    กถํ   หิ   นาม   ตฺวํ   โมฆปุริส
สญฺจริตฺตํ   สมาปชฺชิสฺสสิ   เนตํ   โมฆปุริส  อปฺปสนฺนานํ  วา  ปสาทาย
ฯเปฯ เอวญฺจ ปน ภิกฺขเว อิมํ สิกฺขาปทํ อุทฺทิเสยฺยาถ
     {๔๒๗.๑}   โย ปน ภิกฺขุ สญฺจริตฺตํ สมาปชฺเชยฺย อิตฺถิยา วา ปุริสมตึ
ปุริสสฺส วา อิตฺถีมตึ ชายตฺตเน วา ชารตฺตเน วา สงฺฆาทิเสโสติ ฯ
     {๔๒๗.๒}   เอวญฺจิทํ ภควตา ภิกฺขูนํ สิกฺขาปทํ ปญฺญตฺตํ โหติ ฯ
     [๔๒๘]   เตน โข ปน สมเยน สมฺพหุลา ธุตฺตา อุยฺยาเน ปริจาเรนฺตา
อญฺญตริสฺสา   เวสิยา   สนฺติเก   ทูตํ   ปาเหสุํ   อาคจฺฉตุ   อุยฺยาเน
ปริจาเรสฺสามาติ  ฯ  สา  เอวมาห  อหํ  ขฺวยฺยา  ตุเมฺห น ชานามิ เก
วา    อิเม    กสฺส    วาติ    อหญฺจมฺหิ    พหุภณฺฑา   พหุปริกฺขารา
พหินครญฺจ    คนฺตพฺพํ    นาหํ   คมิสฺสามีติ   ฯ   อถโข   โส   ทูโต
เตสํ   ธุตฺตานํ   เอตมตฺถํ   อาโรเจสิ   ฯ   เอวํ   วุตฺเต  อญฺญตโร
ปุริโส  เต  ธุตฺเต  เอตทโวจ  กิสฺส  ตุเมฺห  อยฺยา  ตํ  เวสึ  ยาจิตฺถ
นนุ   อยฺโย  อุทายิ  วตฺตพฺโพ  อยฺโย  อุทายิ  อุยฺโยเชสฺสตีติ  ฯ  เอวํ
วุตฺเต   อญฺญตโร   อุปาสโก   ตํ  ปุริสํ  เอตทโวจ  มา  อยฺโย  เอวํ
อวจ   น   กปฺปติ   สมณานํ   สกฺยปุตฺติยานํ   เอวรูปํ   กาตุํ  นายฺโย
อุทายิ   เอวรูปํ   กริสฺสตีติ   ฯ   เอวํ  วุตฺเต  กริสฺสติ  น  กริสฺสตีติ
อพฺภุตํ  อกํสุ  ฯ  อถโข  เต  ธุตฺตา  เยนายสฺมา  อุทายิ  เตนุปสงฺกมึสุ
อุปสงฺกมิตฺวา    อายสฺมนฺตํ    อุทายึ   เอตทโวจุํ   อิธ   มยํ   ภนฺเต
อุยฺยาเน  ปริจาเรนฺตา  อมุกาย  นาม  เวสิยา  สนฺติเก  ทูตํ  ปหิณิมฺหา
อาคจฺฉตุ   อุยฺยาเน   ปริจาเรสฺสามาติ   สา   เอวมาห  อหํ  ขฺวยฺยา
ตุเมฺห   น   ชานามิ  เก  วา  อิเม  กสฺส  วาติ  อหญฺจมฺหิ  พหุภณฺฑา
พหุปริกฺขารา     พหินครญฺจ    คนฺตพฺพํ    นาหํ    คมิสฺสามีติ    สาธุ
ภนฺเต อยฺโย ตํ เวสึ อุยฺโยเชตูติ ฯ
     {๔๒๘.๑}   อถโข  อายสฺมา  อุทายิ  เยน  สา  เวสี เตนุปสงฺกมิ
อุปสงฺกมิตฺวา  ตํ  เวสึ  เอตทโวจ  กิสฺส  อิเมสํ น คจฺฉสีติ ฯ อหํ ขฺวยฺย
อิเม  น  ชานามิ เก วา อิเม กสฺส วาติ อหญฺจมฺหิ พหุภณฺฑา พหุปริกฺขารา
พหินครญฺจ  คนฺตพฺพํ  นาหํ  คมิสฺสามีติ ฯ คจฺฉ อิเมสํ อหํ อิเม ชานามีติ ฯ
สเจ   ภนฺเต   อยฺโย  ชานาติ  คมิสฺสามีติ  ฯ  อถโข  เต  ธุตฺตา  ตํ
เวสึ   อาทาย   อุยฺยานํ   อคมํสุ  ฯ  อถโข  โส  อุปาสโก  อุชฺฌายติ
ขียติ   วิปาเจติ   กถํ   หิ   นาม   อยฺโย   อุทายิ  ตํขณิกํ  สญฺจริตฺตํ
สมาปชฺชิสฺสตีติ   ฯ  อสฺโสสุํ  โข  ภิกฺขู  ตสฺส  อุปาสกสฺส  อุชฺฌายนฺตสฺส
ขียนฺตสฺส   วิปาเจนฺตสฺส   ฯ   เย   เต  ภิกฺขู  อปฺปิจฺฉา  ฯเปฯ  เต
อุชฺฌายนฺติ   ขียนฺติ   วิปาเจนฺติ   กถํ   หิ   นาม   อายสฺมา   อุทายิ
ตํขณิกํ   สญฺจริตฺตํ   สมาปชฺชิสฺสตีติ   ฯ   อถโข   เต   ภิกฺขู  ภควโต
เอตมตฺถํ   อาโรเจสุํ   ฯ   อถโข   ภควา  เอตสฺมึ  นิทาเน  เอตสฺมึ
ปกรเณ    ภิกฺขุสงฺฆํ   สนฺนิปาตาเปตฺวา   อายสฺมนฺตํ   อุทายึ   ปฏิปุจฺฉิ
สจฺจํ   กิร   ตฺวํ  อุทายิ  ตํขณิกํ  สญฺจริตฺตํ  สมาปชฺชสีติ  ๑-  ฯ  สจฺจํ
ภควาติ   ฯ   วิครหิ   พุทฺโธ  ภควา  อนนุจฺฉวิกํ  โมฆปุริส  อนนุโลมิกํ
ฯเปฯ   กถํ   หิ  นาม  ตฺวํ  โมฆปุริส  ตํขณิกํ  สญฺจริตฺตํ  สมาปชฺชิสฺสสิ
เนตํ   โมฆปุริส   อปฺปสนฺนานํ   วา   ปสาทาย   ฯเปฯ  เอวญฺจ  ปน
ภิกฺขเว อิมํ สิกฺขาปทํ อุทฺทิเสยฺยาถ
     {๔๒๘.๒}   โย  ปน  ภิกฺขุ  สญฺจริตฺตํ  สมาปชฺเชยฺย  อิตฺถิยา  วา
ปุริสมตึ  ปุริสสฺส  วา  อิตฺถีมตึ  ชายตฺตเน  วา  ชารตฺตเน วา อนฺตมโส
ตํขณิกายปิ สงฺฆาทิเสโสติ ฯ
     [๔๒๙]   โย   ปนาติ  โย  ยาทิโส  ฯเปฯ  ภิกฺขูติ  ฯเปฯ  อยํ
อิมสฺมึ   อตฺเถ   อธิปฺเปโต   ภิกฺขูติ   ฯ   สญฺจริตฺตํ   สมาปชฺเชยฺยาติ
อิตฺถิยา   วา   ปหิโต   ปุริสสฺส  สนฺติเก  คจฺฉติ  ปุริเสน  วา  ปหิโต
อิตฺถิยา   สนฺติเก   คจฺฉติ   ฯ   อิตฺถิยา   วา   ปุริสมตินฺติ   ปุริสสฺส
มตึ   อิตฺถิยา   วา   อาโรเจติ  ฯ  ปุริสสฺส  วา  อิตฺถีมตินฺติ  อิตฺถิยา
มตึ  ปุริสสฺส  วา  อาโรเจติ  ฯ  ชายตฺตเน  วาติ  ชายา  ภวิสฺสสิ  ฯ
ชารตฺตเน   วาติ   ชารี  ภวิสฺสสิ  ฯ  อนฺตมโส  ตํขณิกายปีติ  มุหุตฺติกา
@เชิงอรรถ: ๑ ยุ. ม. สมาปชฺชีติ ฯ
ภวิสฺสสิ ฯ สงฺฆาทิเสโสติ ฯเปฯ เตนปิ วุจฺจติ สงฺฆาทิเสโสติ ฯ
     [๔๓๐]   ทส   อิตฺถิโย  มาตุรกฺขิตา  ปิตุรกฺขิตา  มาตาปิตุรกฺขิตา
ภาตุรกฺขิตา    ภคินีรกฺขิตา    ญาติรกฺขิตา   โคตฺตรกฺขิตา   ธมฺมรกฺขิตา
สารกฺขา สปริทณฺฑา ฯ
     [๔๓๑]   ทส  ภริยาโย  ธนกฺกีตา  ฉนฺทวาสินี  โภควาสินี ปฏวาสินี
โอทปตฺตกินี   โอภตจุมฺพฏา   ทาสี  จ  ภริยา  จ  กมฺมการี  จ  ภริยา
จ ธชาหฏา มุหุตฺติกา ฯ
     [๔๓๒]   มาตุรกฺขิตา   นาม   มาตา   รกฺขติ  โคเปติ  อิสฺสริยํ
กาเรติ   วสํ   วตฺเตติ   ฯ   ปิตุรกฺขิตา  นาม  ปิตา  รกฺขติ  โคเปติ
อิสฺสริยํ   กาเรติ  วสํ  วตฺเตติ  ฯ  มาตาปิตุรกฺขิตา  นาม  มาตาปิตโร
รกฺขนฺติ    โคเปนฺติ    อิสฺสริยํ    กาเรนฺติ    วสํ    วตฺเตนฺติ    ฯ
ภาตุรกฺขิตา   นาม   ภาตา   รกฺขติ   โคเปติ   อิสฺสริยํ  กาเรติ  วสํ
วตฺเตติ   ฯ   ภคินีรกฺขิตา   นาม   ภคินี   รกฺขติ   โคเปติ   อิสฺสริยํ
กาเรติ   วสํ   วตฺเตติ   ฯ   ญาติรกฺขิตา   นาม   ญาตกา   รกฺขนฺติ
โคเปนฺติ   อิสฺสริยํ   กาเรนฺติ   วสํ  วตฺเตนฺติ  ฯ  โคตฺตรกฺขิตา  นาม
สโคตฺตา  รกฺขนฺติ  โคเปนฺติ อิสฺสริยํ กาเรนฺติ วสํ วตฺเตนฺติ ฯ ธมฺมรกฺขิตา
นาม    สหธมฺมิกา    รกฺขนฺติ    โคเปนฺติ   อิสฺสริยํ   กาเรนฺติ   วสํ
วตฺเตนฺติ  ฯ  สารกฺขา  นาม  คพฺเภปิ  ปริคฺคหิตา  โหติ  มยฺหํ  เอสาติ
อนฺตมโส   มาลาคุลปริกฺขิตฺตาปิ   ฯ   สปริทณฺฑา   นาม  เกนจิ  ทณฺโฑ
ฐปิโต โหติ โย อิตฺถนฺนามํ อิตฺถึ คจฺฉติ เอตฺตโก ทณฺโฑติ ฯ
     [๔๓๓]   ธนกฺกีตา  นาม  ธเนน  กีณิตฺวา  วาเสติ  ฯ  ฉนฺทวาสินี
นาม   ปิโย   ปิยํ   วาเสติ   ฯ   โภควาสินี   นาม   โภคํ   ทตฺวา
วาเสติ   ฯ   ปฏวาสินี   นาม   ปฏํ  ทตฺวา  วาเสติ  ฯ  โอทปตฺตกินี
นาม   อุทกปตฺตํ   อามสิตฺวา   วาเสติ  ฯ  โอภตจุมฺพฏา  นาม  จุมฺพฏํ
โอโรเปตฺวา  วาเสติ  ฯ  ทาสี  นาม  ทาสี  เจว  โหติ  ภริยา  จ ฯ
กมฺมการี   นาม  กมฺมการี  เจว  โหติ  ภริยา  จ  ฯ  ธชาหฏา  นาม
กรมรานีตา วุจฺจติ ฯ มุหุตฺติกา นาม ตํขณิกา วุจฺจติ ฯ
     [๔๓๔]   ปุริโส   ภิกฺขุํ   ปหิณติ   ๑-  คจฺฉ  ภนฺเต  อิตฺถนฺนามํ
มาตุรกฺขิตํ    พฺรูหิ    โหหิ   กิร   อิตฺถนฺนามสฺส   ภริยา   ธนกฺกีตาติ
ปฏิคฺคณฺหาติ   วีมํสติ   ปจฺจาหรติ   อาปตฺติ   สงฺฆาทิเสสสฺส  ฯ  ปุริโส
ภิกฺขุํ   ปหิณติ   คจฺฉ   ภนฺเต   อิตฺถนฺนามํ   ปิตุรกฺขิตํ   พฺรูหิ   ฯเปฯ
มาตาปิตุรกฺขิตํ   พฺรูหิ   ฯ   ภาตุรกฺขิตํ  พฺรูหิ  ฯ  ภคินีรกฺขิตํ  พฺรูหิ  ฯ
ญาติรกฺขิตํ   พฺรูหิ   ฯ   โคตฺตรกฺขิตํ   พฺรูหิ   ฯ  ธมฺมรกฺขิตํ  พฺรูหิ  ฯ
สารกฺขํ    พฺรูหิ    ฯ   สปริทณฺฑํ   พฺรูหิ   โหหิ   กิร   อิตฺถนฺนามสฺส
ภริยา    ธนกฺกีตาติ    ปฏิคฺคณฺหาติ    วีมํสติ    ปจฺจาหรติ    อาปตฺติ
สงฺฆาทิเสสสฺส ฯ
                                นิกฺเขปปทานิ ฯ
     [๔๓๕]   ปุริโส    ภิกฺขุํ   ปหิณติ   คจฺฉ   ภนฺเต   อิตฺถนฺนามํ
มาตุรกฺขิตญฺจ     ปิตุรกฺขิตญฺจ    พฺรูหิ    โหถ    กิร    อิตฺถนฺนามสฺส
@เชิงอรรถ: ๑ ปหิณาตีติ อมฺหากํ ขนฺติ ฯ
ภริยาโย    ธนกฺกีตาติ    ปฏิคฺคณฺหาติ    วีมํสติ   ปจฺจาหรติ   อาปตฺติ
สงฺฆาทิเสสสฺส   ฯ   ปุริโส   ภิกฺขุํ   ปหิณติ   คจฺฉ  ภนฺเต  อิตฺถนฺนามํ
มาตุรกฺขิตญฺจ     มาตาปิตุรกฺขิตญฺจ     พฺรูหิ    ฯเปฯ    มาตุรกฺขิตญฺจ
ภาตุรกฺขิตญฺจ    ฯ    มาตุรกฺขิตญฺจ   ภคินีรกฺขิตญฺจ   ฯ   มาตุรกฺขิตญฺจ
ญาติรกฺขิตญฺจ    ฯ   มาตุรกฺขิตญฺจ   โคตฺตรกฺขิตญฺจ   ฯ   มาตุรกฺขิตญฺจ
ธมฺมรกฺขิตญฺจ    ฯ    มาตุรกฺขิตญฺจ    สารกฺขญฺจ    ฯ   มาตุรกฺขิตญฺจ
สปริทณฺฑญฺจ   พฺรูหิ   โหถ   กิร   อิตฺถนฺนามสฺส   ภริยาโย  ธนกฺกีตาติ
ปฏิคฺคณฺหาติ วีมํสติ ปจฺจาหรติ อาปตฺติ สงฺฆาทิเสสสฺส ฯ
                                  ขณฺฑจกฺกํ ฯ
     [๔๓๖]   ปุริโส  ภิกฺขุํ  ปหิณติ  คจฺฉ  ภนฺเต อิตฺถนฺนามํ ปิตุรกฺขิตญฺจ
มาตาปิตุรกฺขิตญฺจ       พฺรูหิ       โหถ      กิร      อิตฺถนฺนามสฺส
ภริยาโย    ธนกฺกีตาติ    ปฏิคฺคณฺหาติ    วีมํสติ   ปจฺจาหรติ   อาปตฺติ
สงฺฆาทิเสสสฺส   ฯ   ปุริโส   ภิกฺขุํ   ปหิณติ   คจฺฉ  ภนฺเต  อิตฺถนฺนามํ
ปิตุรกฺขิตญฺจ    ภาตุรกฺขิตญฺจ    ฯ    ปิตุรกฺขิตญฺจ    ภคินีรกฺขิตญฺจ   ฯ
ปิตุรกฺขิตญฺจ    ญาติรกฺขิตญฺจ    ฯ    ปิตุรกฺขิตญฺจ   โคตฺตรกฺขิตญฺจ   ฯ
ปิตุรกฺขิตญฺจ     ธมฺมรกฺขิตญฺจ    ฯ    ปิตุรกฺขิตญฺจ    สารกฺขญฺจ    ฯ
ปิตุรกฺขิตญฺจ     สปริทณฺฑญฺจ     พฺรูหิ    โหถ    กิร    อิตฺถนฺนามสฺส
ภริยาโย    ธนกฺกีตาติ    ปฏิคฺคณฺหาติ    วีมํสติ   ปจฺจาหรติ   อาปตฺติ
สงฺฆาทิเสสสฺส   ฯ   ปุริโส   ภิกฺขุํ   ปหิณติ   คจฺฉ  ภนฺเต  อิตฺถนฺนามํ
ปิตุรกฺขิตญฺจ     มาตุรกฺขิตญฺจ    พฺรูหิ    โหถ    กิร    อิตฺถนฺนามสฺส
ภริยาโย    ธนกฺกีตาติ    ปฏิคฺคณฺหาติ    วีมํสติ   ปจฺจาหรติ   อาปตฺติ
สงฺฆาทิเสสสฺส ฯ
                                   พทฺธจกฺกํ ๑- ฯ
     [๔๓๗]   ปุริโส ภิกฺขุํ ปหิณติ คจฺฉ ภนฺเต อิตฺถนฺนามํ มาตาปิตุรกฺขิตญฺจ
ภาตุรกฺขิตญฺจ      ฯ      มาตาปิตุรกฺขิตญฺจ      ภคินีรกฺขิตญฺจ     ฯ
มาตาปิตุรกฺขิตญฺจ  ญาติรกฺขิตญฺจ  ฯ  มาตาปิตุรกฺขิตญฺจ  โคตฺตรกฺขิตญฺจ  ฯ
มาตาปิตุรกฺขิตญฺจ       ธมฺมรกฺขิตญฺจ       ฯ       มาตาปิตุรกฺขิตญฺจ
สารกฺขญฺจ   ฯ   มาตาปิตุรกฺขิตญฺจ   สปริทณฺฑญฺจ   ฯ  มาตาปิตุรกฺขิตญฺจ
มาตุรกฺขิตญฺจ      ฯ      มาตาปิตุรกฺขิตญฺจ     ปิตุรกฺขิตญฺจ     พฺรูหิ
โหถ   กิร   อิตฺถนฺนามสฺส   ภริยาโย   ธนกฺกีตาติ  ปฏิคฺคณฺหาติ  วีมํสติ
ปจฺจาหรติ อาปตฺติ สงฺฆาทิเสสสฺส ฯ
                                ทุติยํ พทฺธจกฺกํ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๑ หน้าที่ ๓๐๐-๓๐๖.
https://84000.org/tipitaka/read/pali_item.php?book=1&item=427&items=11
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=1&item=427&items=11&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=1&item=425&items=11
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=1&item=425&items=11
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=1&i=425
             สารบัญพระไตรปิฎกเล่มที่ ๑
https://84000.org/tipitaka/read/?index_1
https://84000.org/tipitaka/english/?index_1