พระไตรปิฎกเล่มที่ ๑ ภาษาบาลี อักษรไทย
พระวินัยปิฎกเล่มที่ ๑ วินย. มหาวิภงฺโค (๑)

     [๕๔๖]   อถโข   เมตฺติยา  ภิกฺขุนี  เยน  เมตฺติยภุมฺมชกา  ภิกฺขู
เตนุปสงฺกมิ   อุปสงฺกมิตฺวา   เมตฺติยภุมฺมชเก  ภิกฺขู  เอตทโวจ  วนฺทามิ
อยฺยาติ   ฯ  เอวํ  วุตฺเต  เมตฺติยภุมฺมชกา  ภิกฺขู  นาลปึสุ  ฯ  ทุติยมฺปิ
โข   ฯเปฯ   ตติยมฺปิ   โข   เมตฺติยา  ภิกฺขุนี  เมตฺติยภุมฺมชเก  ภิกฺขู
เอตทโวจ   วนฺทามิ   อยฺยาติ  ฯ  ตติยมฺปิ  โข  เมตฺติยภุมฺมชกา  ภิกฺขู
นาลปึสุ  ฯ  กฺยาหํ  อยฺยานํ  อปรชฺฌามิ  กิสฺส  มํ  อยฺยา  นาลปนฺตีติ ฯ
ตถา   หิ   ปน  ตฺวํ  ภคินิ  อเมฺห  ทพฺเพน  มลฺลปุตฺเตน  วิเหฐิยมาเน
อชฺฌุเปกฺขสีติ   ฯ   กฺยาหํ   อยฺยา  กโรมีติ  ฯ  สเจ  โข  ตฺวํ  ภคินิ
อิจฺเฉยฺยาสิ   อชฺเชว   ภควา   ทพฺพํ   มลฺลปุตฺตํ   นาสาเปยฺยาติ   ฯ
กฺยาหํ   อยฺยา  กโรมิ  กึ  มยา  สกฺกา  กาตุนฺติ  ฯ  เอหิ  ตฺวํ  ภคินิ
เยน    ภควา   เตนุปสงฺกมิ   อุปสงฺกมิตฺวา   ภควนฺตํ   เอวํ   วเทหิ
อิทํ   ภนฺเต   นจฺฉนฺนํ   นปฺปฏิรูปํ  ยายํ  ภนฺเต  ทิสา  อภยา  อนีติกา
อนุปทฺทวา   สายํ   ทิสา   สภยา   สอีติกา   สอุปทฺทวา  ยโต  นีวาตํ
ตโต   ปวาตํ   อุทกํ  มญฺเญ  อาทิตฺตํ  อยฺเยนมฺหิ  ทพฺเพน  มลฺลปุตฺเตน
ทูสิตาติ   ฯ   เอวํ   อยฺยาติ  โข  เมตฺติยา  ภิกฺขุนี  เมตฺติยภุมฺมชกานํ
ภิกฺขูนํ   ปฏิสฺสุตฺวา   เยน   ภควา  เตนุปสงฺกมิ  อุปสงฺกมิตฺวา  ภควนฺตํ
อภิวาเทตฺวา   เอกมนฺตํ   อฏฺฐาสิ   ฯ  เอกมนฺตํ  ฐิตา  โข  เมตฺติยา
ภิกฺขุนี   ภควนฺตํ   เอตทโวจ   อิทํ   ภนฺเต   นจฺฉนฺนํ  นปฺปฏิรูปํ  ยายํ
ภนฺเต   ทิสา  อภยา  อนีติกา  อนุปทฺทวา  สายํ  ทิสา  สภยา  สอีติกา
สอุปทฺทวา    ยโต   นีวาตํ   ตโต   ปวาตํ   อุทกํ   มญฺเญ   อาทิตฺตํ
อยฺเยนมฺหิ ทพฺเพน มลฺลปุตฺเตน ทูสิตาติ ฯ
     [๕๔๗]   อถโข  ภควา  เอตสฺมึ  นิทาเน เอตสฺมึ ปกรเณ ภิกฺขุสงฺฆํ
สนฺนิปาตาเปตฺวา   อายสฺมนฺตํ   ทพฺพํ   มลฺลปุตฺตํ   ปฏิปุจฺฉิ   สรสิ  ตฺวํ
ทพฺพ   เอวรูปํ   กตฺตา   ยถายํ  ภิกฺขุนี  อาหาติ  ฯ  ยถา  มํ  ภนฺเต
ภควา   ชานาตีติ   ฯ   ทุติยมฺปิ   โข   ภควา   ฯเปฯ  ตติยมฺปิ  โข
ภควา   อายสฺมนฺตํ   ทพฺพํ   มลฺลปุตฺตํ   เอตทโวจ   สรสิ   ตฺวํ  ทพฺพ
เอวรูปํ   กตฺตา   ยถายํ  ภิกฺขุนี  อาหาติ  ฯ  ยถา  มํ  ภนฺเต  ภควา
ชานาตีติ  ฯ  น  โข  ทพฺพ  ทพฺพา  เอวํ  นิพฺเพเฐนฺติ  สเจ  ตยา กตํ
กตนฺติ   วเทหิ  สเจ  ตยา  อกตํ  อกตนฺติ  วเทหีติ  ฯ  ยโตหํ  ภนฺเต
ชาโต   นาภิชานามิ   สุปินนฺเตนปิ   เมถุนํ   ธมฺมํ   ปฏิเสวิตา  ปเคว
ชาคโรติ  ฯ  อถโข  ภควา  ภิกฺขู  อามนฺเตสิ  เตนหิ  ภิกฺขเว  เมตฺติยํ
ภิกฺขุนึ   นาเสถ   อิเม  จ  ภิกฺขู  อนุยุญฺชถาติ  ฯ  อิทํ  วตฺวา  ภควา
อุฏฺฐายาสนา วิหารํ ปาวิสิ ฯ
     {๕๔๗.๑}   อถโข เต ภิกฺขู เมตฺติยํ ภิกฺขุนึ นาเสสุํ ฯ อถโข เมตฺติยภุมฺมชกา
ภิกฺขู  เต  ภิกฺขู เอตทโวจุํ มา อาวุโส เมตฺติยํ ภิกฺขุนึ นาเสถ น สา กิญฺจิ
อปรชฺฌติ  อเมฺหหิ สา อุสฺสาหิตา กุปิเตหิ อนตฺตมเนหิ จาวนาธิปฺปาเยหีติ ฯ
กึ   ปน   ตุเมฺห   อาวุโส   อายสฺมนฺตํ   ทพฺพํ   มลฺลปุตฺตํ   อมูลเกน
ปาราชิเกน  ธมฺเมน  อนุทฺธํเสถาติ  ฯ  เอวมาวุโสติ  ฯ  เย  เต ภิกฺขู
อปฺปิจฺฉา   ฯเปฯ   เต   อุชฺฌายนฺติ  ขียนฺติ  วิปาเจนฺติ  กถํ  หิ  นาม
เมตฺติยภุมฺมชกา    ภิกฺขู    อายสฺมนฺตํ    ทพฺพํ    มลฺลปุตฺตํ   อมูลเกน
ปาราชิเกน   ธมฺเมน   อนุทฺธํเสสฺสนฺตีติ  ฯ  อถโข  เต  ภิกฺขู  ภควโต
เอตมตฺถํ   อาโรเจสุํ   ฯ   อถโข   ภควา  เอตสฺมึ  นิทาเน  เอตสฺมึ
ปกรเณ   ภิกฺขุสงฺฆํ   สนฺนิปาตาเปตฺวา   เมตฺติยภุมฺมชเก  ภิกฺขู  ปฏิปุจฺฉิ
สจฺจํ   กิร   ตุเมฺห   ภิกฺขเว   ทพฺพํ  มลฺลปุตฺตํ  อมูลเกน  ปาราชิเกน
ธมฺเมน   อนุทฺธํเสถาติ   ฯ   สจฺจํ  ภควาติ  ฯ  วิครหิ  พุทฺโธ  ภควา
กถํ    หิ    นาม   ตุเมฺห   โมฆปุริสา   ทพฺพํ   มลฺลปุตฺตํ   อมูลเกน
ปาราชิเกน   ธมฺเมน   อนุทฺธํเสสฺสถ   เนตํ   โมฆปุริสา   อปฺปสนฺนานํ
วา    ปสาทาย    ฯเปฯ   เอวญฺจ   ปน   ภิกฺขเว   อิมํ   สิกฺขาปทํ
อุทฺทิเสยฺยาถ
     {๕๔๗.๒}   โย  ปน  ภิกฺขุ  ภิกฺขุํ  ทุฏฺโฐ โทโส อปฺปตีโต อมูลเกน
ปาราชิเกน    ธมฺเมน    อนุทฺธํเสยฺย    อปฺเปวนาม    นํ    อิมมฺหา
พฺรหฺมจริยา   จาเวยฺยนฺติ   ตโต   อปเรน   สมเยน  สมนุคฺคาหิยมาโน
วา   อสมนุคฺคาหิยมาโน   วา   อมูลกญฺเจว   ตํ  อธิกรณํ  โหติ  ภิกฺขุ
จ โทสํ ปติฏฺฐาติ สงฺฆาทิเสโสติ ฯ
     [๕๔๘]   โย   ปนาติ  โย  ยาทิโส  ฯเปฯ  ภิกฺขูติ  ฯเปฯ  อยํ
อิมสฺมึ   อตฺเถ   อธิปฺเปโต   ภิกฺขูติ   ฯ   ภิกฺขุนฺติ   อญฺญํ   ภิกฺขุํ  ฯ
ทุฏฺโฐ  โทโสติ  กุปิโต  อนตฺตมโน  อนภิรทฺโธ  อาหตจิตฺโต  ชิลชาโต ฯ
อปฺปตีโตติ  เตน  จ  โกเปน  เตน  จ  โทเสน  ตาย  จ อนตฺตมนตาย
ตาย   จ   อนภิรทฺธิยา   อปฺปตีโต   โหติ   ฯ   อมูลกํ  นาม  อทิฏฺฐํ
อสฺสุตํ   อปริสงฺกิตํ   ฯ  ปาราชิเกน  ธมฺเมนาติ  จตุนฺนํ  อญฺญตเรน  ฯ
อนุทฺธํเสยฺยาติ  โจเทติ  วา  โจทาเปติ  วา  ฯ  อปฺเปวนาม นํ อิมมฺหา
พฺรหฺมจริยา   จาเวยฺยนฺติ   ภิกฺขุภาวา   จาเวยฺยํ  สมณธมฺมา  จาเวยฺยํ
สีลกฺขนฺธา จาเวยฺยํ ตโปคุณา จาเวยฺยํ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๑ หน้าที่ ๓๗๔-๓๗๗.
https://84000.org/tipitaka/read/pali_item.php?book=1&item=546&items=3
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=1&item=546&items=3&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=1&item=544&items=3
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=1&item=544&items=3
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=1&i=544
             สารบัญพระไตรปิฎกเล่มที่ ๑
https://84000.org/tipitaka/read/?index_1
https://84000.org/tipitaka/english/?index_1