พระไตรปิฎกเล่มที่ ๑๖ ภาษาบาลี อักษรไทย
พระสุตตันตปิฎกเล่มที่ ๘ สุตฺต. สํ. นิทานวคฺโค

     [๓๗๕]   สาวตฺถิยํ  วิหรติ  ...  ตตฺร  โข  ภควา ... ธาตุโสว
ภิกฺขเว    สตฺตา   สํสนฺทนฺติ   สเมนฺติ   อสฺสทฺธา   อสฺสทฺเธหิ   สทฺธึ
สํสนฺทนฺติ    สเมนฺติ   อหิริกา   อหิริเกหิ   สทฺธึ   สํสนฺทนฺติ   สเมนฺติ
ทุปฺปญฺญา   ทุปฺปญฺเญหิ   สทฺธึ   สํสนฺทนฺติ   สเมนฺติ  ฯ  สทฺธา  สทฺเธหิ
สทฺธึ    สํสนฺทนฺติ    สเมนฺติ    หิริมนา   หิริมเนหิ   สทฺธึ   สํสนฺทนฺติ
สเมนฺติ    ปญฺญวนฺโต    ปญฺญวนฺเตหิ   สทฺธึ   สํสนฺทนฺติ   สเมนฺติ   ฯ
อตีตมฺปิ   ภิกฺขเว   อทฺธานํ   ธาตุโสว   สตฺตา  สํสนฺทึสุ  สมึสุ  ฯเปฯ
อนาคตมฺปิ    ภิกฺขเว    อทฺธานํ    ธาตุโสว    สตฺตา    สํสนฺทิสฺสนฺติ
สเมสฺสนฺติ   ฯเปฯ   เอตรหิปิ   ภิกฺขเว  ปจฺจุปฺปนฺนํ  อทฺธานํ  ธาตุโสว
สตฺตา   สํสนฺทนฺติ   สเมนฺติ   อสฺสทฺธา   อสฺสทฺเธหิ   สทฺธึ   สํสนฺทนฺติ
สเมนฺติ    อหิริกา   อหิริเกหิ   สทฺธึ   สํสนฺทนฺติ   สเมนฺติ   ทุปฺปญฺญา
ทุปฺปญฺเญหิ    สทฺธึ    สํสนฺทนฺติ    สเมนฺติ    สทฺธา   สทฺเธหิ   สทฺธึ
สํสนฺทนฺติ    สเมนฺติ   หิริมนา   หิริมเนหิ   สทฺธึ   สํสนฺทนฺติ   สเมนฺติ
ปญฺญวนฺโต ปญฺญวนฺเตหิ สทฺธึ สํสนฺทนฺติ สเมนฺติ [๑]- ฯ
     [๓๗๖]   ธาตุโสว  ภิกฺขเว  สตฺตา  สํสนฺทนฺติ  สเมนฺติ  อสฺสทฺธา
อสฺสทฺเธหิ    สทฺธึ    สํสนฺทนฺติ   สเมนฺติ   อโนตฺตาปิโน   อโนตฺตาปีหิ
สทฺธึ    สํสนฺทนฺติ   สเมนฺติ   ทุปฺปญฺญา   ทุปฺปญฺเญหิ   สทฺธึ   สํสนฺทนฺติ
@เชิงอรรถ: ๑ โป. ม. ยุ. อิติสทฺโท ทิสฺสติ ฯ
สเมนฺติ   ฯ   สทฺธา   สทฺเธหิ   สทฺธึ  สํสนฺทนฺติ  สเมนฺติ  โอตฺตาปิโน
โอตฺตาปีหิ    สทฺธึ    สํสนฺทนฺติ    สเมนฺติ    ปญฺญวนฺโต   ปญฺญวนฺเตหิ
สทฺธึ สํสนฺทนฺติ สเมนฺติ ฯ
     [๓๗๗]   อสฺสทฺธา    อสฺสทฺเธหิ    สทฺธึ   สํสนฺทนฺติ   สเมนฺติ
อปฺปสฺสุตา    อปฺปสฺสุเตหิ    สทฺธึ    สํสนฺทนฺติ    สเมนฺติ    ทุปฺปญฺญา
ทุปฺปญฺเญหิ   สทฺธึ   สํสนฺทนฺติ   สเมนฺติ   ฯ   สทฺธา   สทฺเธหิ   สทฺธึ
สํสนฺทนฺติ     สเมนฺติ     พหุสฺสุตา    พหุสฺสุเตหิ    สทฺธึ    สํสนฺทนฺติ
สเมนฺติ ปญฺญวนฺโต ปญฺญวนฺเตหิ สทฺธึ สํสนฺทนฺติ สเมนฺติ ฯ
     [๓๗๘]   อสฺสทฺธา   อสฺสทฺเธหิ  สทฺธึ  สํสนฺทนฺติ  สเมนฺติ  กุสีตา
กุสีเตหิ    สทฺธึ    สํสนฺทนฺติ   สเมนฺติ   ทุปฺปญฺญา   ทุปฺปญฺเญหิ   สทฺธึ
สํสนฺทนฺติ   สเมนฺติ   ฯ   สทฺธา   สทฺเธหิ   สทฺธึ   สํสนฺทนฺติ  สเมนฺติ
อารทฺธวิริยา   อารทฺธวิริเยหิ   สทฺธึ   สํสนฺทนฺติ   สเมนฺติ   ปญฺญวนฺโต
ปญฺญวนฺเตหิ สทฺธึ สํสนฺทนฺติ สเมนฺติ ฯ
     [๓๗๙]   อสฺสทฺธา    อสฺสทฺเธหิ    สทฺธึ   สํสนฺทนฺติ   สเมนฺติ
มุฏฺฐสฺสติโน    มุฏฺฐสฺสตีหิ    สทฺธึ    สํสนฺทนฺติ    สเมนฺติ    ทุปฺปญฺญา
ทุปฺปญฺเญหิ  สทฺธึ  สํสนฺทนฺติ  สเมนฺติ  ฯ  สทฺธา  สทฺเธหิ  สทฺธึ สํสนฺทนฺติ
สเมนฺติ    อุปฏฺฐิตสฺสติโน    อุปฏฺฐิตสฺสตีหิ   สทฺธึ   สํสนฺทนฺติ   สเมนฺติ
ปญฺญวนฺโต ปญฺญวนฺเตหิ สทฺธึ สํสนฺทนฺติ สเมนฺตีติ ฯ อฏฺฐมํ ๑- ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๑๖ หน้าที่ ๑๙๒-๑๙๓.
https://84000.org/tipitaka/read/pali_item.php?book=16&item=375&items=5
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=16&item=375&items=5&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=16&item=375&items=5
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=16&item=375&items=5
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=16&i=375
             สารบัญพระไตรปิฎกเล่มที่ ๑๖
https://84000.org/tipitaka/read/?index_16
https://84000.org/tipitaka/english/?index_16