ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับภาษาไทย   บาลีอักษรไทย   บาลีอักษรโรมัน 
แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๒๒ ภาษาบาลี อักษรไทย พระสุตตันตปิฎกเล่มที่ ๑๔ สุตฺต. องฺ. (๓): ปญฺจก-ฉกฺกนิปาตา
     [๑]   เอวมฺเม   สุตํ  ฯ  เอกํ  สมยํ  ภควา  สาวตฺถิยํ  วิหรติ
เชตวเน  อนาถปิณฺฑิกสฺส  อาราเม  ฯ  ตตฺร  โข ภควา ภิกฺขู อามนฺเตสิ
ภิกฺขโวติ  ฯ  ภทนฺเตติ  เต  ภิกฺขู ภควโต ปจฺจสฺโสสุํ ฯ ภควา เอตทโวจ
ปญฺจิมานิ  ภิกฺขเว  เสขพลานิ  กตมานิ  ปญฺจ สทฺธาพลํ หิริพลํ โอตฺตปฺปพลํ
วิริยพลํ   ปญฺญาพลํ  อิมานิ  โข  ภิกฺขเว  ปญฺจ  เสขพลานิ  ตสฺมา  ติห
ภิกฺขเว  เอวํ  สิกฺขิตพฺพํ  สทฺธาพเลน  สมนฺนาคตา  ภวิสฺสาม  เสขพเลน
หิริพเลน  สมนฺนาคตา  ภวิสฺสาม  เสขพเลน  โอตฺตปฺปพเลน  สมนฺนาคตา
ภวิสฺสาม เสขพเลน วิริยพเลน สมนฺนาคตา ภวิสฺสาม เสขพเลน ปญฺญาพเลน
สมนฺนาคตา ภวิสฺสาม เสขพเลนาติ เอวํ หิ โว ภิกฺขเว สิกฺขิตพฺพนฺติ ฯ [๑]-
@เชิงอรรถ:  อิโต ปรํ โป. ม. อิทมโวจ ภควา อตฺตมนา เต ภิกฺขู ภควโต ภาสิตํ อภินนฺทุนฺติ ฯ
     [๒]   ปญฺจิมานิ  ภิกฺขเว  เสขพลานิ  กตมานิ ปญฺจ สทฺธาพลํ หิริพลํ
โอตฺตปฺปพลํ   วิริยพลํ   ปญฺญาพลํ   ฯ  กตมญฺจ  ภิกฺขเว  สทฺธาพลํ  อิธ
ภิกฺขเว  อริยสาวโก  สทฺโธ  โหติ  สทฺทหติ  ตถาคตสฺส  โพธึ  อิติปิ โส
ภควา    อรหํ   สมฺมาสมฺพุทฺโธ   วิชฺชาจรณสมฺปนฺโน   สุคโต   โลกวิทู
อนุตฺตโร    ปุริสทมฺมสารถิ    สตฺถา   เทวมนุสฺสานํ   พุทฺโธ   ภควาติ
อิทํ วุจฺจติ ภิกฺขเว สทฺธาพลํ ฯ
     {๒.๑}   กตมญฺจ   ภิกฺขเว   หิริพลํ   อิธ  ภิกฺขเว  อริยสาวโก
หิริมา   โหติ   หิริยติ   กายทุจฺจริเตน   วจีทุจฺจริเตน   มโนทุจฺจริเตน
หิริยติ    ปาปกานํ    อกุสลานํ   ธมฺมานํ   สมาปตฺติยา   อิทํ   วุจฺจติ
ภิกฺขเว หิริพลํ ฯ
     {๒.๒}   กตมญฺจ  ภิกฺขเว  โอตฺตปฺปพลํ  อิธ  ภิกฺขเว  อริยสาวโก
โอตฺตปฺปี  โหติ  โอตฺตปฺปติ  กายทุจฺจริเตน  วจีทุจฺจริเตน  มโนทุจฺจริเตน
โอตฺตปฺปติ   ปาปกานํ   อกุสลานํ   ธมฺมานํ   สมาปตฺติยา   อิทํ  วุจฺจติ
ภิกฺขเว โอตฺตปฺปพลํ ฯ
     {๒.๓}   กตมญฺจ   ภิกฺขเว   วิริยพลํ  อิธ  ภิกฺขเว  อริยสาวโก
อารทฺธวิริโย   วิหรติ   อกุสลานํ   ธมฺมานํ  ปหานาย  กุสลานํ  ธมฺมานํ
อุปสมฺปทาย   ถามวา   ทฬฺหปรกฺกโม   อนิกฺขิตฺตธุโร   กุสเลสุ  ธมฺเมสุ
อิทํ วุจฺจติ ภิกฺขเว วิริยพลํ ฯ
     {๒.๔}   กตมญฺจ   ภิกฺขเว  ปญฺญาพลํ  อิธ  ภิกฺขเว  อริยสาวโก
ปญฺญวา    โหติ    อุทยตฺถคามินิยา    ปญฺญาย   สมนฺนาคโต   อริยาย
นิพฺเพธิกาย   สมฺมาทุกฺขกฺขยคามินิยา  อิทํ  วุจฺจติ  ภิกฺขเว  ปญฺญาพลํ  ฯ
อิมานิ   โข   ภิกฺขเว   ปญฺจ   เสขพลานิ  ตสฺมา  ติห  ภิกฺขเว  เอวํ
สิกฺขิตพฺพํ  สทฺธาพเลน  สมนฺนาคตา  ภวิสฺสาม  เสขพเลน  หิริพเลน ...
โอตฺตปฺปพเลน    ...   วิริยพเลน   ...   ปญฺญาพเลน   สมนฺนาคตา
ภวิสฺสาม เสขพเลนาติ เอวํ หิ โว ภิกฺขเว สิกฺขิตพฺพนฺติ ฯ
     [๓]   ปญฺจหิ   ภิกฺขเว   ธมฺเมหิ   สมนฺนาคโต   ภิกฺขุ  ทิฏฺเฐว
ธมฺเม  ทุกฺขํ  วิหรติ  สวิฆาตํ  สอุปายาสํ  สปริฬาหํ กายสฺส [๑]- เภทา
ปรมฺมรณา    ทุคฺคติ    ปาฏิกงฺขา    กตเมหิ   ปญฺจหิ   อิธ   ภิกฺขเว
ภิกฺขุ   อสฺสทฺโธ   โหติ   อหิริโก  โหติ  อโนตฺตปฺปี  โหติ  กุสีโต  ๒-
โหติ    ทุปฺปญฺโญ    โหติ   อิเมหิ   โข   ภิกฺขเว   ปญฺจหิ   ธมฺเมหิ
สมนฺนาคโต   ภิกฺขุ   ทิฏฺเฐว  ธมฺเม  ทุกฺขํ  วิหรติ  สวิฆาตํ  สอุปายาสํ
สปริฬาหํ    กายสฺส    เภทา    ปรมฺมรณา   ทุคฺคติ   ปาฏิกงฺขา   ฯ
ปญฺจหิ   ภิกฺขเว   ธมฺเมหิ   สมนฺนาคโต   ภิกฺขุ   ทิฏฺเฐว  ธมฺเม  สุขํ
วิหรติ   อวิฆาตํ   อนุปายาสํ   อปริฬาหํ   กายสฺส   เภทา  ปรมฺมรณา
สุคติ  ปาฏิกงฺขา  กตเมหิ  ปญฺจหิ  อิธ  ภิกฺขเว  ภิกฺขุ สทฺโธ โหติ หิริมา
โหติ  โอตฺตปฺปี  โหติ  อารทฺธวิริโย โหติ ปญฺญวา โหติ อิเมหิ โข ภิกฺขเว
ปญฺจหิ  ธมฺเมหิ  สมนฺนาคโต  ภิกฺขุ  ทิฏฺเฐว  ธมฺเม  สุขํ  วิหรติ อวิฆาตํ
อนุปายาสํ อปริฬาหํ กายสฺส เภทา ปรมฺมรณา สุคติ ปาฏิกงฺขาติ ฯ
     [๔]   ปญฺจหิ   ภิกฺขเว   ธมฺเมหิ   สมนฺนาคโต   ภิกฺขุ  ยถาภตํ
นิกฺขิตฺโต    เอวํ    นิรเย   กตเมหิ   ปญฺจหิ   อิธ   ภิกฺขเว   ภิกฺขุ
อสฺสทฺโธ    โหติ    อหิริโก    โหติ    อโนตฺตปฺปี    โหติ    กุสีโต
@เชิงอรรถ:  ม. สพฺพตฺถ วาเรสุ เอตฺถนฺตเร จสทฺโท อตฺถิ ฯ   โป. ยุ. สพฺพตฺถ วาเรสุ
@กุสิโต ฯ
โหติ    ทุปฺปญฺโญ    โหติ   อิเมหิ   โข   ภิกฺขเว   ปญฺจหิ   ธมฺเมหิ
สมนฺนาคโต  ภิกฺขุ  ยถาภตํ  นิกฺขิตฺโต  เอวํ  นิรเย  ฯ  ปญฺจหิ  ภิกฺขเว
ธมฺเมหิ   สมนฺนาคโต   ภิกฺขุ  ยถาภตํ  นิกฺขิตฺโต  เอวํ  สคฺเค  กตเมหิ
ปญฺจหิ    อิธ    ภิกฺขเว    ภิกฺขุ    สทฺโธ    โหติ    หิริมา   โหติ
โอตฺตปฺปี    โหติ    อารทฺธวิริโย    โหติ    ปญฺญวา   โหติ   อิเมหิ
โข   ภิกฺขเว   ปญฺจหิ   ธมฺเมหิ  สมนฺนาคโต  ภิกฺขุ  ยถาภตํ  นิกฺขิตฺโต
เอวํ สคฺเคติ ฯ
     [๕]   โย   หิ   โกจิ   ภิกฺขเว  ภิกฺขุ  วา  ภิกฺขุนี  วา  สิกฺขํ
ปจฺจกฺขาย   หีนายาวตฺตติ   ตสฺส   ทิฏฺเฐว   ธมฺเม   ปญฺจ  สหธมฺมิกา
วาทานุปาตา   ๑-   คารยฺหํ   ฐานํ  อาคจฺฉนฺติ  กตเม  ปญฺจ  สทฺธาปิ
นาม   เต   นาโหสิ   กุสเลสุ   ธมฺเมสุ   หิรีปิ   นาม  เต  นาโหสิ
กุสเลสุ   ธมฺเมสุ   โอตฺตปฺปํปิ   นาม   เต  นาโหสิ  กุสเลสุ  ธมฺเมสุ
วิริยํปิ   นาม   เต   นาโหสิ   กุสเลสุ   ธมฺเมสุ  ปญฺญาปิ  นาม  เต
นาโหสิ   กุสเลสุ   ธมฺเมสุ  โย  หิ  โกจิ  ภิกฺขเว  ภิกฺขุ  วา  ภิกฺขุนี
วา   สิกฺขํ   ปจฺจกฺขาย   หีนายาวตฺตติ   ตสฺส   ทิฏฺเฐว  ธมฺเม  อิเม
ปญฺจ สหธมฺมิกา วาทานุปาตา คารยฺหํ ฐานํ อาคจฺฉนฺติ ฯ
     {๕.๑}   โย หิ โกจิ ภิกฺขเว ภิกฺขุ วา ภิกฺขุนี วา สหาปิ ทุกฺเขน สหาปิ
โทมนสฺเสน   อสฺสุมุโขปิ   ๒-   รุทมาโน  ปริปุณฺณํ  ปริสุทฺธํ  พฺรหฺมจริยํ
จรติ  ตสฺส  ทิฏฺเฐว  ธมฺเม  ปญฺจ  สหธมฺมิกา ปาสํสํ ๓- ฐานํ อาคจฺฉนฺติ
@เชิงอรรถ:  โป. ม. วาทานุปาตา คารยฺหา ฐานา ฯ ยุ. วาทานุวาทา คารยฺหา ฐานา ฯ
@ ม. ปิสทฺโท นตฺถิ ฯ อิโต ปรํ อีทิสเมว ฯ   โป. ม. ยุ. ปาสํสา ฐานา ฯ
@อิโต ปรํ อีทิสเมว ฯ
กตเม   ปญฺจ   สทฺธาปิ   นาม   เต   อโหสิ  กุสเลสุ  ธมฺเมสุ  หิรีปิ
นาม   เต   อโหสิ   กุสเลสุ   ธมฺเมสุ  โอตฺตปฺปํปิ  นาม  เต  อโหสิ
กุสเลสุ    ธมฺเมสุ   วิริยํปิ   นาม   เต   อโหสิ   กุสเลสุ   ธมฺเมสุ
ปญฺญาปิ   นาม   เต  อโหสิ  กุสเลสุ  ธมฺเมสุ  โย  หิ  โกจิ  ภิกฺขเว
ภิกฺขุ  วา  ภิกฺขุนี  วา  สหาปิ  ทุกฺเขน  สหาปิ  โทมนสฺเสน  อสฺสุมุโขปิ
รุทมาโน    ปริปุณฺณํ    ปริสุทฺธํ    พฺรหฺมจริยํ   จรติ   ตสฺส   ทิฏฺเฐว
ธมฺเม อิเม ปญฺจ สหธมฺมิกา ปาสํสํ ฐานํ อาคจฺฉนฺตีติ ฯ
     [๖]   น   ตาว   ภิกฺขเว   อกุสลสฺส   สมาปตฺติ   โหติ  ยาว
สทฺธา   ปจฺจุปฏฺฐิตา   โหติ   กุสเลสุ  ธมฺเมสุ  ยโต  จ  โข  ภิกฺขเว
สทฺธา   อนฺตรหิตา   โหติ   อสฺสทฺธิยํ   ปริยุทฺธาย   ๑-   ติฏฺฐติ  อถ
อกุสลสฺส   สมาปตฺติ   โหติ    น   ตาว  ภิกฺขเว  อกุสลสฺส  สมาปตฺติ
โหติ  ยาว  หิรี  ปจฺจุปฏฺฐิตา  โหติ  กุสเลสุ ธมฺเมสุ ยโต จ โข ภิกฺขเว
หิรี  อนฺตรหิตา  โหติ  อหิริกํ  ปริยุทฺธาย  ติฏฺฐติ  อถ อกุสลสฺส สมาปตฺติ
โหติ  น  ตาว  ภิกฺขเว อกุสลสฺส สมาปตฺติ โหติ ยาว โอตฺตปฺปํ ปจฺจุปฏฺฐิตํ
โหติ  กุสเลสุ  ธมฺเมสุ  ยโต  จ  โข  ภิกฺขเว  โอตฺตปฺปํ อนฺตรหิตํ โหติ
อโนตฺตปฺปํ    ปริยุทฺธาย    ติฏฺฐติ   อถ   อกุสลสฺส   สมาปตฺติ   โหติ
น   ตาว  ภิกฺขเว  อกุสลสฺส  สมาปตฺติ  โหติ  ยาว  วิริยํ  ปจฺจุปฏฺฐิตํ
โหติ   กุสเลสุ  ธมฺเมสุ  ยโต  จ  โข  ภิกฺขเว  วิริยํ  อนฺตรหิตํ  โหติ
@เชิงอรรถ:  ม. ยุ. ปริยุฏฺฐาย ฯ สพฺพตฺถ วาเรสุ อีทิสเมว ฯ
โกสชฺชํ   ปริยุทฺธาย   ติฏฺฐติ  อถ  อกุสลสฺส  สมาปตฺติ  โหติ  น  ตาว
ภิกฺขเว   อกุสลสฺส   สมาปตฺติ   โหติ  ยาว  ปญฺญา  ปจฺจุปฏฺฐิตา  โหติ
กุสเลสุ  ธมฺเมสุ  ยโต  จ  โข  ภิกฺขเว ปญฺญา อนฺตรหิตา โหติ ทุปฺปญฺญา
ปริยุทฺธาย ติฏฺฐติ อถ อกุสลสฺส สมาปตฺติ โหตีติ ฯ
     [๗]   เยภุยฺเยน  ภิกฺขเว  สตฺตา  กาเมสุ ลฬิตา ๑- อสิตพฺยาภงฺคึ
ภิกฺขเว   กุลปุตฺโต   โอหาย   อคารสฺมา   อนคาริยํ   ปพฺพชิโต  โหติ
สทฺโธ   ปพฺพชิโต   ๒-   กุลปุตฺโตติ   อลํ   วจนาย   ตํ  กิสฺส  เหตุ
ลพฺภา  หิ  ๓-  ภิกฺขเว  โยพฺพเนน  กามา  เต  จ  โข  ยาทิสา  วา
ตาทิสา  วา  เย  จ  ภิกฺขเว  หีนา  กามา เย จ มชฺฌิมา กามา เย จ
ปณีตา    กามา    สพฺเพ   กามาเตฺวว   สงฺขํ   คจฺฉนฺติ   เสยฺยถาปิ
ภิกฺขเว    กุมาโร   มนฺโท   อุตฺตานเสยฺยโก   ธาติยา   ปมาทมนฺวาย
กฏฺฐํ  วา  กถลํ  ๔-  วา  มุเข  อาหเรยฺย  ตเมนํ  ธาตี  ๕- สีฆํ สีฆํ
มนสิกเรยฺย สีฆํ สีฆํ มนสิกริตฺวา สีฆํ สีฆํ อาหเรยฺย
     {๗.๑}   โน เจ สกฺกุเณยฺย สีฆํ สีฆํ อาหริตุํ วาเมน หตฺเถน สีฆํ ๖-
ปริคฺคเหตฺวา   ทกฺขิเณน   หตฺเถน   วงฺกงฺคุลํ   ๗-  กริตฺวา  สโลหิตํปิ
อาหเรยฺย  ตํ  กิสฺส เหตุ อตฺเถสา ภิกฺขเว กุมารสฺส วิเหสา เนสา นตฺถีติ
วทามิ  กรณียญฺจ  โข  เอวํ  ๘-  ภิกฺขเว ธาติยา อตฺถกามาย หิเตสินิยา
อนุกมฺปิกาย  อนุกมฺปํ  อุปาทาย  ฯ  ยโต  จ  โข  ภิกฺขเว  โส กุมาโร
@เชิงอรรถ:  โป. จฬิตา ฯ ยุ. ปลาลิตา ฯ   ม. สทฺธาปพฺพชิโต ฯ   โป. ม. ยุ.
@หิสทฺโท นตฺถิ ฯ   ม. กฐลํ ฯ   ม. ยุ. ธาติ ฯ   ม. ยุ. สีสํ ฯ
@ ม. วงฺกงฺคุลึ ฯ   ม. เอตํ ฯ
วุฑฺโฒ  ๑-  โหติ  อลํปญฺโญ  อนเปกฺขา  ปน  ๒-  ภิกฺขเว  ธาตี  ตสฺมึ
กุมารสฺมึ โหติ อตฺตคุตฺโตทานิ กุมาโร นาลํ ปมาทายาติ
     {๗.๒}   เอวเมว  โข  ภิกฺขเว  ยาวกีวญฺจ  ภิกฺขุโน สทฺธาย อกตํ
โหติ  กุสเลสุ  ธมฺเมสุ  หิริยา  อกตํ  โหติ  กุสเลสุ ธมฺเมสุ โอตฺตปฺเปน
อกตํ  โหติ  กุสเลสุ  ธมฺเมสุ  วิริเยน อกตํ โหติ กุสเลสุ ธมฺเมสุ ปญฺญาย
อกตํ  โหติ  กุสเลสุ  ธมฺเมสุ  อนุรกฺขิตพฺโพ  ตาว  เม โส ภิกฺขเว ภิกฺขุ
โหติ  ยโต  จ  โข  ภิกฺขเว  ภิกฺขุ โน สทฺธาย กตํ โหติ กุสเลสุ ธมฺเมสุ
หิริยา  กตํ  โหติ  กุสเลสุ  ธมฺเมสุ โอตฺตปฺเปน กตํ โหติ กุสเลสุ ธมฺเมสุ
วิริเยน  กตํ  โหติ  กุสเลสุ  ธมฺเมสุ  ปญฺญาย  กตํ โหติ กุสเลสุ ธมฺเมสุ
อนเปกฺโข   ปนาหํ   ๓-  ภิกฺขเว  ตสฺมึ  ภิกฺขุสฺมึ  โหมิ  อตฺตคุตฺโตทานิ
ภิกฺขเว ๔- ภิกฺขุ นาลํ ปมาทายาติ ฯ
     [๘]   ปญฺจหิ   ภิกฺขเว   ธมฺเมหิ   สมนฺนาคโต   ภิกฺขุ   จวติ
นปฺปติฏฺฐาติ    สทฺธมฺเม   กตเมหิ   ปญฺหิ   อสฺสทฺโธ   ภิกฺขเว   ภิกฺขุ
จวติ  นปฺปติฏฺฐาติ  สทฺธมฺเม  อหิริโก  ภิกฺขเว  ภิกฺขุ  จวติ  นปฺปติฏฺฐาติ
สทฺธมฺเม     อโนตฺตปฺปี     ภิกฺขเว     ภิกฺขุ    จวติ    นปฺปติฏฺฐาติ
สทฺธมฺเม    กุสีโต    ภิกฺขเว   ภิกฺขุ   จวติ   นปฺปติฏฺฐาติ   สทฺธมฺเม
ทุปฺปญฺโญ   ภิกฺขเว   ภิกฺขุ   จวติ   นปฺปติฏฺฐาติ  สทฺธมฺเม  อิเมหิ  โข
ภิกฺขเว    ปญฺจหิ   ธมฺเมหิ   สมนฺนาคโต   ภิกฺขุ   จวติ   นปฺปติฏฺฐาติ
สทฺธมฺเม ฯ
     {๘.๑}   ปญฺจหิ   ภิกฺขเว  ธมฺเมหิ  สมนฺนาคโต  ภิกฺขุ  น  จวติ
ปติฏฺฐาติ   สทฺธมฺเม   กตเมหิ   ปญฺจหิ   สทฺโธ   ภิกฺขเว   ภิกฺขุ   น
@เชิงอรรถ:  โป. ม. ยุ. สพฺพตฺถ วุทฺโธ ฯ   ม. ยุ. ทานิ ฯ   ม. ยุ. ทานาหํ ฯ
@ ม. ยุ. อยํ ปาโฐ นตฺถิ ฯ
จวติ   ปติฏฺฐาติ   สทฺธมฺเม  หิริมา  ภิกฺขเว  ภิกฺขุ  น  จวติ  ปติฏฺฐาติ
สทฺธมฺเม   โอตฺตปฺปี   ภิกฺขเว   ภิกฺขุ   น   จวติ  ปติฏฺฐาติ  สทฺธมฺเม
อารทฺธวิริโย    ภิกฺขเว    ภิกฺขุ    น    จวติ   ปติฏฺฐาติ   สทฺธมฺเม
ปญฺญวา   ภิกฺขเว   ภิกฺขุ   น   จวติ  ปติฏฺฐาติ  สทฺธมฺเม  อิเมหิ  โข
ภิกฺขเว   ปญฺจหิ   ธมฺเมหิ   สมนฺนาคโต   ภิกฺขุ   น   จวติ  ปติฏฺฐาติ
สทฺธมฺเมติ ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๒๒ หน้าที่ ๑-๘. https://84000.org/tipitaka/read/pali_item.php?book=22&item=1&items=8&mode=bracket              อ่านโดยใช้เนื้อความเป็นเกณฑ์แบ่งข้อ :- https://84000.org/tipitaka/read/pali_item.php?book=22&item=1&items=8              อ่านเทียบพระไตรปิฎกฉบับภาษาบาลีอักษรโรมัน :- https://84000.org/tipitaka/read/roman_item.php?book=22&item=1&items=8&mode=bracket              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=22&item=1&items=8&mode=bracket              ศึกษาอรรถกถานี้ได้ที่ :- https://84000.org/tipitaka/attha/attha.php?b=22&i=1              สารบัญพระไตรปิฎกเล่มที่ ๒๒ https://84000.org/tipitaka/read/?index_22 https://84000.org/tipitaka/english/?index_22

แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]