พระไตรปิฎกเล่มที่ ๒๕ ภาษาบาลี อักษรไทย
พระสุตตันตปิฎกเล่มที่ ๑๗ สุตฺต. ขุ. ขุทฺทกปาฐ-ธมฺมปทคาถา-อุทานํ-อิติวุตฺตก-สุตฺตนิปาตา

         สุตฺตนิปาเต จตุตฺถสฺส อฏฺฐกวคฺคสฺส ทสมํ ปุราเภทสุตฺตํ
     [๔๑๗]   |๔๑๗.๑๒๗๖| ๑๐ กถํทสฺสี กถํสีโล    อุปสนฺโตติ วุจฺจติ
                          ตมฺเม โคตม ปพฺรูหิ        ปุจฺฉิโต อุตฺตมํ นรํ ฯ
     |๔๑๗.๑๒๗๗| วีตตโณฺห ปุรา เภทา        (ติ ภควา) ปุพฺพมนฺตมนิสฺสิโต
                          เวมชฺเฌ นุปสงฺเขยฺโย     ตสฺส นตฺถิ ปุเรกฺขตํ ฯ
     |๔๑๗.๑๒๗๘| อกฺโกธโน อสนฺตาสี        อวิกตฺถี อกุกฺกุจฺโจ ๔-
                          มนฺตาภาณี อนุทฺธโต     ส เว วาจายโต มุนิ ฯ
     |๔๑๗.๑๒๗๙| นิราสตฺตี อนาคเต           อตีตํ นานุโสจติ
                           วิเวกทสฺสี ผสฺเสสุ          ทิฏฺฐีสุ จ น นิยฺยติ
     |๔๑๗.๑๒๘๐| ปฏิลีโน อกุหโก              อปิหาลุ อมจฺฉรี
@เชิงอรรถ: ๑ ทิฏฺฐิยายโก น ... ฯ ๒ โป. ยุ. โส ฯ  ๓ ม. ยุ. ฆฏฺฏยนฺตา ฯ
@๔ ม. ยุ. อกฺกุกุโจ
---------------------------------------------------------------------------------------------
หน้าที่ ๕๐๑.
                          อปฺปคพฺโภ อเชคุจฺโฉ     เปสุเณยฺเย จ โน ยุโต
     |๔๑๗.๑๒๘๑| สาติเยสุ อนสฺสาวี           อติมาเน จ โน ยุโต
                          สโณฺห จ ปฏิภาณวา      น สทฺโธ น วิรชฺชติ
     |๔๑๗.๑๒๘๒| ลาภกมฺยา น สิกฺขติ        อลาเภ จ น กุปฺปติ
                          อวิรุทฺโธ จ ตณฺหาย        รเสสุ ๑- นานุคิชฺฌติ
     |๔๑๗.๑๒๘๓| อุเปกฺขโก สทา สโต         น โลเก มญฺญเต สมํ
                          น วิเสสี น นีเจยฺโย         ตสฺส โน สนฺติ อุสฺสทา ฯ
     |๔๑๗.๑๒๘๔| ยสฺส นิสฺสยตา ๒- นตฺถิ   ญตฺวา ธมฺมํ อนิสฺสิโต
                          ภวาย วิภวาย วา            ตณฺหา ยสฺส น วิชฺชติ
     |๔๑๗.๑๒๘๕| ตํ พฺรูมิ อุปสนฺโตติ          กาเมสุ อนเปกฺขินํ
                          คนฺถา ตสฺส น วิชฺชนฺติ    อตาริ ๓- โส วิสตฺติกํ ฯ
     |๔๑๗.๑๒๘๖| น ตสฺส ปุตฺตา ปสโว        เขตฺตํ วตฺถุญฺจ วิชฺชติ
                          อตฺตํ วาปิ นิรตฺตํ วา ๔-   น ตสฺมึ อุปลพฺภติ ฯ
     |๔๑๗.๑๒๘๗| เยน นํ วชฺชุ ํ ปุถุชฺชนา       อโถ สมณพฺราหฺมณา
                          ตํ ตสฺส อปุรกฺขตํ            ตสฺมา วาเทสุ เนชติ ๕- ฯ
     |๔๑๗.๑๒๘๘| วีตเคโธ อมจฺฉรี              น อุสฺเสสุ วทเต มุนิ
                          น สเมสุ น โอเมสุ          กปฺปํ เนติ อกปฺปิโย ฯ
     |๔๑๗.๑๒๘๙| ยสฺส โลเก สกํ นตฺถิ        อสตา จ น โสจติ
                          ธมฺเมสุ จ น คจฺฉติ         ส เว สนฺโตติ วุจฺจตีติ ฯ
                                        ปุราเภทสุตฺตํ ทสมํ
@เชิงอรรถ: ๑ ยุ. รเส จ ฯ ๒ ม. นิสฺสยนา ฯ ๓ โป. ม. อตรี ฯ ๔ ม. อตฺตา วาปิ นิรตฺตา ฯ
@๕ โป. นิญฺชติ ฯ
---------------------------------------------------------------------------------------------
หน้าที่ ๕๐๒.
                         สุตฺตนิปาเต จตุตฺถสฺส อฏฺฐกวคฺคสฺส
                         เอกาทสมํ กลหวิวาทสุตฺตํ
     [๔๑๘]   |๔๑๘.๑๒๙๐| ๑๑ กุโต ปหูตา กลหา วิวาทา
                          ปริเทวโสกา สหมจฺฉรา จ
                          มานาติมานา สหเปสุณา จ
                          กุโต ปหูตา เต ตทิงฺฆ พฺรูหิ ฯ
     |๔๑๘.๑๒๙๑| ปิยปฺปหูตา กลหา วิวาทา
                          ปริเทวโสกา สหมจฺฉรา จ
                          มานาติมานา สหเปสุณา จ
                          มจฺเฉรยุตฺตา กลหา วิวาทา
                          วิวาทชาเตสุ จ เปสุณานิ ฯ
     |๔๑๘.๑๒๙๒| ปิยา สุ โลกสฺมึ กุโตนิทานา
                          เย วาปิ ๑- โลภา วิจรนฺติ โลเก
                          อาสา จ นิฏฺฐา จ กุโตนิทานา
                          เย สมฺปรายาย นรสฺส โหนฺติ ฯ
     |๔๑๘.๑๒๙๓| ฉนฺทานิทานานิ ปิยานิ โลเก
                          เย วาปิ โลภา วิจรนฺติ โลเก
                          อาสา จ นิฏฺฐา จ อิโตนิทานา
                          เย สมฺปรายาย นรสฺส โหนฺติ ฯ
@เชิงอรรถ: ๑ โป. ม. สพฺพตฺถ วาเรสุ จาปิ ฯ
---------------------------------------------------------------------------------------------
หน้าที่ ๕๐๓.
     |๔๑๘.๑๒๙๔| ฉนฺโท นุ โลกสฺมึ กุโตนิทาโน
                          วินิจฺฉยา วาปิ กุโต ปหูตา
                          โกโธ โมสวชฺชญฺจ กถงฺกถา จ
                          เย วาปิ ธมฺมา สมเณน วุตฺตา ฯ
     |๔๑๘.๑๒๙๕| สาตํ อสาตนฺติ ยมาหุ โลเก
                          ตมูปนิสฺสาย ปโหติ ฉนฺโท
                          รูเปสุ ทิสฺวา วิภวํ ภวญฺจ
                          วินิจฺฉยํ กุรุเต ๑- ชนฺตุ โลเก ฯ
     |๔๑๘.๑๒๙๖| โกโธ โมสวชฺชญฺจ กถงฺกถา จ
                          เอเตปิ ธมฺมา ทฺวยเมว สนฺเต
                          กถงฺกถี ญาณปถาย สิกฺเข
                          ญตฺวา ปวุตฺตา สมเณน ธมฺมา ฯ
     |๔๑๘.๑๒๙๗| สาตํ อสาตญฺจ กุโตนิทานา
                          กิสฺมึ อสนฺเต น ภวนฺติ เหเต
                          วิภวํ ภวญฺจาปิ ยเมตมตฺถํ
                          เอตมฺเม ปพฺรูหิ ยโตนิทานํ ฯ
     |๔๑๘.๑๒๙๘| ผสฺสนิทานํ สาตํ อสาตํ
                          ผสฺเส อสนฺเต น ภวนฺติ เหเต
                          วิภวํ ภวญฺจาปิ ยเมตมตฺถํ
                          เอตนฺเต ปพฺรูมิ อิโตนิทานํ ฯ
@เชิงอรรถ: ๑ ม. กุพฺพติ ฯ
---------------------------------------------------------------------------------------------
หน้าที่ ๕๐๔.
     |๔๑๘.๑๒๙๙| ผสฺโส นุ โลกสฺมึ กุโตนิทาโน
                          ปริคฺคหา วาปิ กุโต ปหูตา
                          กสฺมึ อสนฺเต น มมตฺตมตฺถิ
                          กสฺมึ วิภูเต น ผุสนฺติ ผสฺสา ฯ
     |๔๑๘.๑๓๐๐| นามญฺจ รูปญฺจ ปฏิจฺจ ผสฺโส
                          อิจฺฉานิทานานิ ปริคฺคหานิ
                          อิจฺฉาย ๑- อสนฺตฺยา น มมตฺตมตฺถิ
                          รูเป วิภูเต น ผุสนฺติ ผสฺสา ฯ
     |๔๑๘.๑๓๐๑| กถํสเมตสฺส วิโภติ รูปํ
                          สุขํ ทุกฺขํ วาปิ กถํ วิโภติ
                          เอตมฺเม ปพฺรูหิ ยถา วิโภติ
                          ตํ ชานิยาม อิติ ๒- เม มโน อหุ ฯ
     |๔๑๘.๑๓๐๒| น สญฺญสญฺญี น วิสญฺญสญฺญี
                          โนปิ อสญฺญี น วิภูตสญฺญี
                          เอวํสเมตสฺส วิโภติ รูปํ
                          สญฺญานิทานา หิ ปปญฺจสงฺขา ฯ
     |๔๑๘.๑๓๐๓| ยนฺตํ อปุจฺฉิมฺห อกิตฺตยิ โน
                          อญฺญนฺตํ ปุจฺฉาม ตทิงฺฆ พฺรูหิ
                          เอตฺตาวตคฺคํ โน ๓- วทนฺติ เหเก
                          ยกฺขสฺส สุทฺธึ อิธ ปณฺฑิตาเส
@เชิงอรรถ: ๑ ยุ. อิจฺฉา น สนฺตฺยา ฯ ๒ ม. ชานิยามาติ ฯ ๓ ม. นุ ฯ
---------------------------------------------------------------------------------------------
หน้าที่ ๕๐๕.
                          อุทาหุ อญฺญมฺปิ วทนฺติ เอตฺโต ฯ
     |๔๑๘.๑๓๐๔| เอตฺตาวตคฺคมฺปิ วทนฺติ เหเก
                          ยกฺขสฺส สุทฺธึ อิธ ปณฺฑิตาเส
                          เตสํ ปุเนเก สมยํ วทนฺติ
                          อนุปาทิเสเส กุสลา วทานา ฯ
     |๔๑๘.๑๓๐๕| เอเต จ ญตฺวา อุปนิสฺสิตาติ
                          ญตฺวา มุนี นิสฺสเย โส วิมํสี
                          ญตฺวา วิมุตฺโต น วิวาทเมติ
                          ภวาภวาย น สเมติ ธีโรติ ฯ
                          กลหวิวาทสุตฺตํ เอกาทสมํ ฯ
                                ----------
       สุตฺตนิปาเต จตุตฺถสฺส อฏฺฐกวคฺคสฺส ทฺวาทสมํ จูฬวิยูหสุตฺตํ
     [๔๑๙]   |๔๑๙.๑๓๐๖| ๑๒ สกํ สกํ ทิฏฺฐิปริพฺพสานา
                          วิคฺคยฺห นานา กุสลา วทนฺติ
                          โย เอวํ ชานาติ ส เวทิ ธมฺมํ
                          อิทํ ปฏิกฺโกสมเกวลี โส ฯ
     |๔๑๙.๑๓๐๗| เอวมฺปิ วิคฺคยฺห วิวาทยนฺติ
                          พาโล ปโร อกุสโลติ จาหุ
                          สจฺโจ นุ วาโท กตโม อิเมสํ
---------------------------------------------------------------------------------------------
หน้าที่ ๕๐๖.
                          สพฺเพว หีเม กุสลา วทานา ฯ
     |๔๑๙.๑๓๐๘| ปรสฺส เจ ธมฺมมนานุชานํ
                          พาโล มโค ๑- โหติ นิหีนปญฺโญ
                          สพฺเพว พาลา สุนิหีนปญฺญา
                          สพฺเพวิเม ทิฏฺฐิปริพฺพสานา ฯ
     |๔๑๙.๑๓๐๙| สนฺทิฏฺฐิยา เว ปน วีวทาตา ๒-
                          สํสุทฺธปญฺญา กุสลา มตีมา
                          น เตสํ โกจิ นิหีนปญฺโญ ๓-
                          ทิฏฺฐีหิ เตสมฺปิ ตถา สมตฺตา ฯ
     |๔๑๙.๑๓๑๐| น วาหเมตํ ตถิวนฺติ ๔- พฺรูมิ
                          ยมาหุ พาโล ๕- มิถุ อญฺญมญฺญํ
                          สกํ สกํ ทิฏฺฐิมกํสุ สจฺจํ
                          ตสฺมา หิ พาโลติ ปรํ ทหนฺติ ฯ
     |๔๑๙.๑๓๑๑| ยมาหุ สจฺจํ ตถิวนฺติ เอเก
                          ตมาหุ อญฺเญปิ ๖- ตุจฺฉํ มุสาติ
                          เอวมฺปิ วิคฺคยฺห วิวาทยนฺติ ๗-
                          กสฺมา น เอกํ สมณา วทนฺติ ฯ
     |๔๑๙.๑๓๑๒| เอกํ หิ สจฺจํ น ทุตียมตฺถิ
                          ยสฺมึ ปชาโน วิวเท ปชานํ
                          นานา เต สจฺจานิ สยํ ถุนนฺติ
@เชิงอรรถ: ๑ ม. พาโลมโก ฯ ๒ โป. เจว น เจวทาตา ฯ ม. เจว น วีวทาตา ฯ
@๓ ม. ยุ. ปริหีนปญฺโญ ฯ ๔ ม. ยุ. ตถิยนฺติ ฯ ๕ ม. ยุ. พาลา ฯ
@๖ ม. ยุ. อญฺเญ จ ฯ ๗ ยุ. วิวาทิยนฺติ ฯ
---------------------------------------------------------------------------------------------
หน้าที่ ๕๐๗.
                          ตสฺมา น เอกํ สมณา วทนฺติ ฯ
     |๔๑๙.๑๓๑๓| กสฺมา นุ สจฺจานิ วทนฺติ นานา ฯ
                          ปวาทิยาเส กุสลา วทานา
                          สจฺจานิ สุตานิ พหูนิ นานา
                          อุทาหุ เต ตกฺกมนุสฺสรนฺติ ฯ
     |๔๑๙.๑๓๑๔| น เหว สจฺจานิ พหูนิ นานา
                          อญฺญตฺร สญฺญาย นิจฺจานิ โลเก
                          ตกฺกญฺจ ทิฏฺฐีสุ ปกปฺปยิตฺวา
                          สจฺจํ มุสาติ ทฺวยธมฺมมาหุ ฯ
     |๔๑๙.๑๓๑๕| ทิฏฺเฐ สุเต สีลพฺพเต มุเต วา
                          เอเต จ นิสฺสาย วิมานทสฺสี
                          วินิจฺฉเย ฐตฺวา ปหสฺสมาโน
                          พาโล ปโร อกุสโลติ จาห ฯ
     |๔๑๙.๑๓๑๖| เยเนว พาโลติ ปรํ ทหาติ
                          เตนาตุมานํ กุสโลติ จาห
                          สยมตฺตนา โส กุสโล วทาโน
                          อญฺญํ วิมาเนติ ตเทว ปาวา ฯ
     |๔๑๙.๑๓๑๗| อติสารทิฏฺฐิยา โส สมตฺโต
                          มาเนน มตฺโต ปริปุณฺณมานี
                          สยเมว สามํ มนสาภิสิตฺโต
---------------------------------------------------------------------------------------------
หน้าที่ ๕๐๘.
                          ทิฏฺฐีหิ สา ตสฺส ตถา สมตฺตา ฯ
     |๔๑๙.๑๓๑๘| ปรสฺส เจ หิ วจสา นิหีโน
                          ตุโม สหา โหติ นิหีนปญฺโญ
                          อถ เจ สยํ เวทคู โหติ ธีโร
                          น โกจิ พาโล สมเณสุ อตฺถิ ฯ
     |๔๑๙.๑๓๑๙| อญฺญํ อิโต ยาภิวทนฺติ ธมฺมํ
                          อปรทฺธา สุทฺธิมเกวลี เต ๑-
                          เอวมฺปิ ติตฺถฺยา ปุถุโส วทนฺติ
                          สนฺทิฏฺฐิราเคน หิ ตฺยาภิรตฺตา ๒- ฯ
     |๔๑๙.๑๓๒๐| อิเธว สุทฺธึ อิติ วาทยนฺติ
                          นาญฺเญสุ ธมฺเมสุ วิสุทฺธิมาหุ
                          เอวมฺปิ ติตฺถฺยา ปุถุโส นิวิฏฺฐา
     |๔๑๙.๑๓๒๑| สกายเน ตตฺถ ทฬฺหํ วทานา ฯ
                          สกายเน วาปิ ทฬฺหํ วทาโน
                          กเมตฺถ พาโลติ ปรํ ทเหยฺย
                          สยเมว โส เมธคํ อาวเหยฺย
                          ปรํ วทํ พาลมสุทฺธิธมฺมํ ฯ
     |๔๑๙.๑๓๒๒| วินิจฺฉเย ฐตฺวา สยํ ปมาย
                          อุทฺธํ โส โลกสฺมึ วิวาทเมติ
                          หิตฺวาน สพฺพานิ วินิจฺฉยานิ
@เชิงอรรถ: ๑ ยุ. สุทฺธิมเกวลี โน ฯ ๒ โป. สนฺทิฏฺฐิราเคน ติตฺถฺยาภิรตฺตา ฯ ยุ. เตภิรตฺตา ฯ
---------------------------------------------------------------------------------------------
หน้าที่ ๕๐๙.
                          น เมธคํ กุรุเต ชนฺตุ โลเกติ ฯ
                                      จูฬวิยูหสุตฺตํ ทฺวาทสมํ ฯ
                                         -----------
       สุตฺตนิปาเต จตุตฺถสฺส อฏฺฐกวคฺคสฺส เตรสมํ มหาวิยูหสุตฺตํ
     [๔๒๐]   |๔๒๐.๑๓๒๓| ๑๓ เย เกจิเม ทิฏฺฐิปริพฺพสานา
                         อิทเมว สจฺจนฺติ วิวาทยนฺติ
                         สพฺเพว เต นินฺทมนฺวานยนฺติ
                         อโถ ปสํสมฺปิ ลภนฺติ ตตฺถ ฯ
     |๔๒๐.๑๓๒๔| อปฺปญฺหิ เอตํ น อลํ สมาย
                          ทุเว วิวาทสฺส ผลานิ พฺรูมิ
                          เอตมฺปิ ทิสฺวาน วิวาทเยถ
                          เขมาภิปสฺสํ อวิวาทภูมึ ฯ
     |๔๒๐.๑๓๒๕| ยา กาจิมา สมฺมติโย ปุถุชฺชา
                          สพฺพา ว เอตา น อุเปติ วิทฺวา
                          อนูปโย โส อุปยํ กิเมยฺย
                          ทิฏฺเฐ สุเต ขนฺติมกุพฺพมาโน ฯ
     |๔๒๐.๑๓๒๖| สีลุตฺตมา สญฺญเมนาหุ สุทฺธึ
                          วตฺตํ สมาทาย อุปฏฺฐิตาเส
                          อิเธว สิกฺเขม อถสฺส สุทฺธึ
---------------------------------------------------------------------------------------------
หน้าที่ ๕๑๐.
                          ภวูปนีตา กุสลา วทานา ฯ
     |๔๒๐.๑๓๒๗| สเจ จุโต สีลวตาโต โหติ
                          ปเวธตี กมฺม วิราธยิตฺวา
                          ปชปฺปตี ๑- ปตฺถยตี จ สุทฺธึ
                          สตฺถา ว หีโน ปวสํ ฆรมฺหา ฯ
     |๔๒๐.๑๓๒๘| สีลพฺพตํ วาปิ ปหาย สพฺพํ
                          ธมฺมญฺจ สาวชฺชนวชฺชเมตํ
                          สุทฺธี อสุทฺธีติ อปตฺถยาโน
                          วิรโต จเร สนฺติมนุคฺคหาย ฯ
     |๔๒๐.๑๓๒๙| ตมูปนิสฺสาย ชิคุจฺฉิตํ วา
                          อถ วาปิ ทิฏฺฐํ ว สุตํ มุตํ วา
                          อุทฺธํสรา สุทฺธิมนุตฺถุนนฺติ
                          อวีตตณฺหาเส ภวาภเวสุ ฯ
     |๔๒๐.๑๓๓๐| ปตฺถยมานสฺส หิ ชปฺปิตานิ
                          ปเวธิตํ วาปิ ปกปฺปิเตสุ
                          จุตูปปาโต อิธ ยสฺส นตฺถิ
                          ส เกน เวเธยฺย กุหิญฺจิ ชปฺเป ๒- ฯ
     |๔๒๐.๑๓๓๑| ยมาหุ ธมฺมํ ปรมนฺติ เอเก
                          ตเมว หีนนฺติ ปนาหุ อญฺเญ
                          สจฺโจ นุ วาโท กตโม อิเมสํ
@เชิงอรรถ: ๑ โป. ปชมฺปติ ฯ ๒ โป. กุหึ ปชปฺเป ฯ
---------------------------------------------------------------------------------------------
หน้าที่ ๕๑๑.
                          สพฺเพว หีเม กุสลา วทานา ฯ
     |๔๒๐.๑๓๓๒| สกญฺหิ ธมฺมํ ปริปุณฺณมาหุ
                          อญฺญสฺส ธมฺมํ ปน หีนมาหุ
                          เอวมฺปิ วิคฺคยฺห วิวาทยนฺติ
                          สกํ สกํ สมฺมติมาหุ ๑- สจฺจํ ฯ
     |๔๒๐.๑๓๓๓| ปรสฺส เจ วมฺภยิเตน หีโน
                          น โกจิ ธมฺเมสุ วิเสสิ อสฺส
                          ปุถูหิ อญฺญสฺส วทนฺติ ธมฺมํ
                          นิหีนโต สมฺหิ ทฬฺหํ วทานา ฯ
     |๔๒๐.๑๓๓๔| สธมฺมปูชา จ ปนา ตเถว
                          ยถา ปสํสนฺติ สกายนานิ
                          สพฺเพ ปวาทา ๒- ตถิวา ภเวยฺยุ ํ
                          สุทฺธีหิ เนสํ ปจฺจตฺตเมว ฯ
     |๔๒๐.๑๓๓๕| น พฺราหฺมณสฺส ปรเนยฺยมตฺถิ
                          ธมฺเมสุ นิจฺเฉยฺย สมุคฺคหีตํ
                          ตสฺมา วิวาทานิ อุปาติวตฺโต
                          น หิ เสฏฺฐโต ปสฺสติ ธมฺมมญฺญํ ฯ
     |๔๒๐.๑๓๓๖| ชานามิ ปสฺสามิ ตเถว เอตํ
                          ทิฏฺฐิยา เอเก ปจฺเจนฺติ สุทฺธึ
                          อทฺทกฺขิ เจ กิญฺหิ ตุมสฺส เตน
@เชิงอรรถ: ๑ โป. ยุ. สมฺมุติมาหุ ฯ ๒ โป. สพฺเพว วาทา ฯ
---------------------------------------------------------------------------------------------
หน้าที่ ๕๑๒.
                          อติสิตฺวา อญฺเญน วทนฺติ สุทฺธึ ฯ
     |๔๒๐.๑๓๓๗| ปสฺสํ นโร ทกฺขติ ๑- นามรูปํ
                          ทิสฺวาน วาญฺญสฺสติ ตานิ เจว
                          กามํ พาหุ ํ ปสฺสตุ อปฺปกํ วา
                          น หิ เตน สุทฺธึ กุสลา วทนฺติ ฯ
     |๔๒๐.๑๓๓๘| นิวิสฺสวาที น หิ สุพฺพินาโย
                          ปกปฺปิตํ ทิฏฺฐิ ปุเรกฺขราโน
                          ยนฺนิสฺสิโต ตตฺถ สุภํวทาโน
                          สุทฺธึวโท ๒- ตตฺถ ตถทฺทสา โส ฯ
     |๔๒๐.๑๓๓๙| น พฺราหฺมโณ กปฺปมุเปติ สงฺขํ
                          น ทิฏฺฐิสารี นปิ ญาณพนฺธุ
                          ญตฺวา จ โส สมฺมติโย ปุถุชฺชา
                          อุเปกฺขติ อุคฺคหณนฺติมญฺเญ ฯ
     |๔๒๐.๑๓๔๐| วิสชฺช คนฺถานิ มุนีธ โลเก
                          วิวาทชาเตสุ น วคฺคสารี
                          สนฺโต อสนฺเตสุ อุเปกฺขโก โส
                          อนุคฺคโห อุคฺคหณนฺติมญฺเญ ฯ
     |๔๒๐.๑๓๔๑| ปุพฺพาสเว หิตฺวา นเว อกุพฺพํ
                          น ฉนฺทคู นาปิ นิวิสฺสวาโท
                          ส วิปฺปมุตฺโต ทิฏฺฐิคเตหิ ธีโร
@เชิงอรรถ: ๑ ยุ. ทกฺขิติ ฯ ๒ โป. สุทฺธิวโท ฯ
---------------------------------------------------------------------------------------------
หน้าที่ ๕๑๓.
                          น ลิมฺปตี โลเก อนตฺตครหี ฯ
     |๔๒๐.๑๓๔๒| ส สพฺพธมฺเมสุ วิเสนิภูโต
                          ยํ กิญฺจิ ทิฏฺฐํ ว ๑- สุตํ มุตํ วา
                          สมฺปนฺนภาโร มุนิ วิปฺปมุตฺโต
                          น กปฺปิโย นูปรโต น ปตฺถิโยติ ภควาติ ฯ
                                      มหาวิยูหสุตฺตํ เตรสมํ
                                ------------
        สุตฺตนิปาเต จตุตฺถสฺส อฏฺฐกวคฺคสฺส จุทฺทสมํ ตุวฏกสุตฺตํ
     [๔๒๑]   |๔๒๑.๑๓๔๓| ๑๔ ปุจฺฉามิ ตํ อาทิจฺจพนฺธุ ํ
                          วิเวกํ สนฺติปทญฺจ มเหสึ
                          กถํ ทิสฺวา นิพฺพาติ ภิกฺขุ
                          อนุปาทิยาโน โลกสฺมึ กิญฺจิ ฯ
     |๔๒๑.๑๓๔๔| มูลํ ปปญฺจสงฺขายา (ติ ภควา)
                          มนฺตา อสฺมีติ สพฺพมุปรุทฺเธ
                          ยา กาจิ ตณฺหา อชฺฌตฺตํ
                          ตาสํ วินยา สทา สโต สิกฺเข ฯ
     |๔๒๑.๑๓๔๕| ยํ กิญฺจิ ธมฺมํ อภิชญฺญา ๒-
                          อชฺฌตฺตํ อถ วาปิ พหิทฺธา
                          น เตน ถามํ กุพฺเพถ ๓-
@เชิงอรรถ: ๑ โป. จ ฯ ๒ โป. ธมฺมมภิชญฺญา ฯ ๓ โป. กุรุพฺเพถ ฯ
---------------------------------------------------------------------------------------------
หน้าที่ ๕๑๔.
                          น หิ สา นิพฺพุติ สตํ วุตฺตา
     |๔๒๑.๑๓๔๖| เสยฺโย น เตน มญฺเญยฺย
                          นีเจยฺโย อถ วาปิ สริกฺโข
                          ปุฏฺโฐ อเนกรูเปหิ
                          นาตุมานํ วิกปฺปยํ ติฏฺเฐ ฯ
     |๔๒๑.๑๓๔๗| อชฺฌตฺตเมว อุปสเม
                          น อญฺญโต ๑- ภิกฺขุ สนฺติเมเสยฺย
                          อชฺฌตฺตํ อุปสนฺตสฺส
                          นตฺถิ อตฺตา กุโต นิรตฺตํ วา ๒- ฯ
     |๔๒๑.๑๓๔๘| มชฺเฌ ยถา สมุทฺทสฺส
                          อูมิ โน ชายติ ฐิโต โหติ
                          เอวํ ฐิโต อเนชสฺส
                          อุสฺสทํ ภิกฺขุ น กเรยฺย กุหิญฺจิ ฯ
     |๔๒๑.๑๓๔๙| อกิตฺตยิ วิวฏจกฺขุ
                          สกฺขิธมฺมํ ปริสฺสยวินยํ
                          ปฏิปทญฺจ วเทหิ ภทฺทนฺเต
                          ปาฏิโมกฺขํ อถ วาปิ สมาธึ ฯ
     |๔๒๑.๑๓๕๐| จกฺขูหิ เนว โลลสฺส
                          คามกถาย อาวรเย โสตํ
                          รเส จ นานุคิชฺเฌยฺย
@เชิงอรรถ: ๑ ยุ. นาญฺญโต ฯ ๒ โป. ว ฯ
---------------------------------------------------------------------------------------------
หน้าที่ ๕๑๕.
                          น จ มมาเยถ กิญฺจิ โลกสฺมึ ฯ
     |๔๒๑.๑๓๕๑| ผสฺเสน ยทา ผุฏฺฐสฺส
                          ปริเทวํ ภิกฺขุ น กเรยฺย
                          กุหิญฺจิ ภวญฺจ นาภิชปฺเปยฺย
                          เภรเวสุ จ น สมฺปเวเธยฺย ฯ
     |๔๒๑.๑๓๕๒| อนฺนานมโถ ปานานํ
                          ขาทนียานํ อโถปิ วตฺถานํ
                          ลทฺธา น สนฺนิธึ กยิรา
                          น จ ปริตฺตเส ตานิ อลภมาโน ฯ
     |๔๒๑.๑๓๕๓| ฌายี น ปาทโลลสฺส
                          วิรเม กุกฺกุจฺจา นปฺปมชฺเชยฺย
                          อถ วา อาสเนสุ สยเนสุ
                          อปฺปสทฺเทสุ ภิกฺขุ วิหเรยฺย ฯ
     |๔๒๑.๑๓๕๔| นิทฺทํ พหุลํ น กเรยฺย
                          ชาคริยํ ภเชยฺย อาตาปี
                          ตนฺทึ มายํ หสฺสํ ขิฑฺฑํ
                          เมถุนํ วิปฺปชเห สวิภูสํ ฯ
     |๔๒๑.๑๓๕๕| อาถพฺพณํ สุปินํ ลกฺขณํ
                          โน วิทเห อโถปิ นกฺขตฺตํ
                          วิรุตญฺจ คพฺภกรณํ
---------------------------------------------------------------------------------------------
หน้าที่ ๕๑๖.
                          ติกิจฺฉํ มามโก น เสเวยฺย ฯ
     |๔๒๑.๑๓๕๖| นินฺทาย นปฺปเวเธยฺย
                          น อุณฺณเมยฺย ปสํสิโต ภิกฺขุ
                          โลภํ สห มจฺฉริเยน
                          โกธํ เปสุณิยญฺจ ปนุเทยฺย ฯ
     |๔๒๑.๑๓๕๗| กยวิกฺกเย น ติฏฺเฐยฺย
                          อุปวาทํ ภิกฺขุ น กเรยฺย กุหิญฺจิ
                          คาเม จ นาภิสชฺเชยฺย
                          ลาภกมฺยา ชนํ น ลปเยยฺย ฯ
     |๔๒๑.๑๓๕๘| น จ กตฺถิตา สิยา ภิกฺขุ
                          น จ วาจํ ปยุตฺตํ ภาเสยฺย
                          ปาคพฺภิยํ น สิกฺเขยฺย
                          กถํ วิคาหิกํ น กเถยฺย ฯ
     |๔๒๑.๑๓๕๙| โมสวชฺเช น นิยฺเยถ
                          สมฺปชาโน สฐานิ น กยิรา
                          อถ ชีวิเตน ปญฺญาย
                          สีลพฺพเตน นาญฺญมติมญฺเญ ฯ
     |๔๒๑.๑๓๖๐| สุตฺวา รุสิโต พหุ ํ วาจํ
                          สมณานํ วา ปุถุวจนานํ
                          ผรุเสน นปฺปฏิวชฺชา
---------------------------------------------------------------------------------------------
หน้าที่ ๕๑๗.
                          น หิ สนฺโต ปฏิเสนิกโรนฺติ ฯ
     |๔๒๑.๑๓๖๑| เอตญฺจ ธมฺมมญฺญาย
                          วิจินํ ภิกฺขุ สทา สโต สิกฺเข
                          สนฺตีติ นิพฺพุตึ ญตฺวา
                          สาสเน โคตมสฺส นปฺปมชฺเชยฺย ฯ
     |๔๒๑.๑๓๖๒| อภิภู หิ โส อนภิภูโต
                          สกฺขิธมฺมํ อนีติหมทสฺสี
                          ตสฺมา หิ ตสฺส ภควโต สาสเน
                          อปฺปมตฺโต สทา นมสฺสมนุสิกฺเขติ ภควาติ ฯ
                                      ตุวฏกสุตฺตํ จุทฺทสมํ ฯ
                                                -------------


             เนื้อความพระไตรปิฎกฉบับภาษาบาลีอักษรไทย เล่มที่ ๒๕ หน้าที่ ๕๐๐-๕๑๗.
https://84000.org/tipitaka/read/pali_item.php?book=25&item=417&items=5&pagebreak=1&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=25&item=417&items=5&pagebreak=1&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=25&item=417&items=5&pagebreak=1&modeTY=2
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=25&item=417&items=5&pagebreak=1&modeTY=2
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=25&i=417
             สารบัญพระไตรปิฎกเล่มที่ ๒๕
https://84000.org/tipitaka/read/?index_25
https://84000.org/tipitaka/english/?index_25