พระไตรปิฎกเล่มที่ ๒๗ ภาษาบาลี อักษรไทย
พระสุตตันตปิฎกเล่มที่ ๑๙ สุตฺต. ขุ. ชาตกํ (๑): เอก-จตฺตาลีสนิปาตชาตกํ

                                       ๑๐ มหาวาณิชชาตกํ
     [๑๙๙๐]      วาณิชา สมิตึ กตฺวา          นานารฏฺฐโต อาคตา
                       ธนหารา ปกฺกมึสุ             เอกํ กตฺวาน คามณึ ฯ
                       เต ตํ กนฺตารมาคมฺม        อปฺปภกฺขํ อนูทกํ ๔-
                       มหานิโคฺรธมทฺทกฺขุํ          สีตจฺฉายํ มโนรมํ ฯ
                       เต จ ตตฺถ นิสีทิตฺวา         ตสฺส รุกฺขสฺส ฉาทิยา
                       วาณิชา สมจินฺเตสุํ           พาลา โมเหน ปารุตา ฯ
                       อลฺลายเต ๕- อยํ รุกฺโข     อปิ วารีว ๖- สนฺทติ
                       อิงฺฆสฺส ปุริมํ สาขํ            มยํ ฉินฺทาม วาณิชา ฯ
                       สา จ ฉินฺนาว ปคฺฆริ         อจฺฉํ วาริ ๗- อนาวิลํ
@เชิงอรรถ: ๑ ม. ปมุทิตา ฯ   ๒ ม. มหานาทํ ปนาทิสุํ ฯ  ๓ ม. เต สุ อุทุมฺพรมูลสฺมึ ฯ
@๔ ม. อโนทกํ ฯ   ๕ สี. ยุ. อทฺทายเต ฯ  ๖ สี. ยุ. วารี จ ฯ  ๗ ม. วารี ฯ
                       เต ตตฺถ นฺหาตฺวา ปิวิตฺวา  ยาวติจฺฉึสุ วาณิชา ฯ
                       ทุติยํ สมจินฺเตสุํ               พาลา โมเหน ปารุตา
                       อิงฺฆสฺส ทกฺขิณํ สาขํ         มยํ ฉินฺทาม วาณิชา ฯ
                       สา จ ฉินฺนาว ปคฺฆริ         สาลิมํโสทนํ พหุํ
                       อปฺโปทวณฺเณ กุมฺมาเส     สิงฺคิวิทลสูปิโย
                       เต ตตฺถ ภุตฺวา ขาทิตฺวา     ยาวติจฺฉึสุ วาณิชา ฯ
                       ตติยํ สมจินฺเตสุํ                พาลา โมเหน ปารุตา
                       อิงฺฆสฺส ปจฺฉิมํ สาขํ          มยํ ฉินฺทาม วาณิชา ฯ
                       สา จ ฉินฺนาว ปคฺฆริ         นาริโย สมลงฺกตา
                       วิจิตฺตวตฺถาภรณา            อามุตฺตมณิกุณฺฑลา ฯ
                       อปิสุ วาณิชา เอกา           นาริโย ปญฺจวีสติ
                       สมนฺตา ปริกรึสุ ๑-           ตสฺส รุกฺขสฺส ฉาทิยา
                       เต ตาหิ ปริวาเรตฺวา ๒-     ยาวติจฺฉึสุ วาณิชา ฯ
                       จตุตฺถํ สมจินฺเตสุํ              พาลา โมเหน ปารุตา
                       อิงฺฆสฺส อุตฺตรํ สาขํ           มยํ ฉินฺทาม วาณิชา ฯ
                       สา จ ฉินฺนาว ปคฺฆริ         มุตฺตา เวฬุริยา พหู
                       รชตํ ชาตรูปญฺจ               กุตฺติโย ปฏิยานิ จ
                       กาสิกานิ จ วตฺถานิ          อุทฺธิยานิ ๓- จ กมฺพลา
                       เต ตตฺถ ภาเร พนฺธิตฺวา     ยาวติจฺฉึสุ วาณิชา ฯ
                       ปญฺจมํ สมจินฺเตสุํ            พาลา โมเหน ปารุตา
@เชิงอรรถ: ๑ ม. ปริวารึสุ ฯ    ๒ ม. ปริจาเรตฺวา ฯ    ๓ อุทฺทิยานิ ฯ สี. ยุ. อุทฺทิยาเน จ
@กมฺมพเล ฯ
                       อิงฺฆสฺส มูเล ๑- ฉินฺทาม   อปิ ภิยฺโย ลภามเส ฯ
                       อถุฏฺฐหิ สตฺถวาโห            ยาจมาโน กตญฺชลิ
                       นิโคฺรโธ กึ อปรชฺฌติ ๒-    วาณิชา ภทฺทมตฺถุ เต ฯ
                       วาริทา ปุริมา สาขา          อนฺนปานญฺจ ทกฺขิณา
                       นาริทา ปจฺฉิมา สาขา       สพฺพกาเม จ อุตฺตรา
                       นิโคฺรโธ กึ อปรชฺฌติ ๒-    วาณิชา ภทฺทมตฺถุ เต ฯ
                       ยสฺส รุกฺขสฺส ฉายาย        นิสีเทยฺย สเยยฺย วา
                       น ตสฺส สาขํ ภญฺเชยฺย       มิตฺตทุพฺโภ หิ ปาปโก ฯ
                       เต จ ตสฺส อนาทิตฺวา ๓-   เอกสฺส วจนํ พหู
                       นิสิตาหิ กุฐารีหิ               มูลโต นํ อุปกฺกมุํ ฯ
     [๑๙๙๑]      ตโต นาคา นิกฺขมึสุ          สนฺนทฺธา ปญฺจวีสติ
                       ธนุคฺคหานํ ติสตา            ฉสหสฺสา จ จมฺมิโน ๔- ฯ
     [๑๙๙๒]      เอเต หนถ พนฺธถ             มา โว มุญฺจิตฺถ ชีวิตํ
                       ฐเปตฺวา สตฺถวาหํว          สพฺเพ ภสฺมํ กโรถ เน ฯ
     [๑๙๙๓]      ตสฺมาหิ ปณฺฑิโต โปโส     สมฺปสฺสํ อตฺถมตฺตโน
                       โลภสฺส น วสํ คจฺเฉ          หเนยฺย ทิสกํ มนํ ๕-
                       เอวมาทีนวํ ๖- ญตฺวา      ตณฺหา ทุกฺขสฺส สมฺภวํ
                       วีตตโณฺห อนาทาโน         สโต ภิกฺขุ ปริพฺพเชติ ฯ
                                       มหาวาณิชชาตกํ ทสมํ ฯ
@เชิงอรรถ: ๑ สี. ยุ. มูลํ ฯ   ๒ สี. อปรชฺฌถ ฯ ม. ปรชฺฌติ ฯ   ๓ ม. ตสสานาทิยิตฺวา ฯ
@๔ ม. วมฺมิโน ฯ   ๕ ม. หเนยฺยาริสกํ มนํ ฯ    ๖ สี. ยุ. เอต... ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๒๗ หน้าที่ ๓๙๔-๓๙๖.
https://84000.org/tipitaka/read/pali_item.php?book=27&item=1990&items=4
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=27&item=1990&items=4&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=27&item=1990&items=4
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=27&item=1990&items=4
             ศึกษาอรรถกถาชาดกนี้ได้ที่ :-
https://84000.org/tipitaka/attha/attha.php?b=27&i=1990
             สารบัญพระไตรปิฎกเล่มที่ ๒๗
https://84000.org/tipitaka/read/?index_27
https://84000.org/tipitaka/english/?index_27