พระไตรปิฎกเล่มที่ ๓ ภาษาบาลี อักษรไทย
พระวินัยปิฎกเล่มที่ ๓ วินย. ภิกฺขุนีวิภงฺโค

                        คพฺภินีวคฺคสฺส ทุติยสิกฺขาปทํ
     [๓๖๘]   เตน  สมเยน  พุทฺโธ  ภควา  สาวตฺถิยํ  วิหรติ เชตวเน
อนาถปิณฺฑิกสฺส  อาราเม  ฯ  เตน  โข  ปน  สมเยน  ภิกฺขุนิโย ปายนฺตึ
วุฏฺฐาเปนฺติ  ฯ  สา  ปิณฺฑาย  จรติ  ฯ  มนุสฺสา  เอวมาหํสุ  เทถยฺยาย
ภิกฺขํ  สทุติยา  ๑-  อยฺยาติ  ฯ  มนุสฺสา  อุชฺฌายนฺติ  ขียนฺติ  วิปาเจนฺติ
กถํ   หิ   นาม   ภิกฺขุนิโย  ปายนฺตึ  วุฏฺฐาเปสฺสนฺตีติ  ฯ  อสฺโสสุํ  โข
ภิกฺขุนิโย   เตสํ   มนุสฺสานํ   อุชฺฌายนฺตานํ  ขียนฺตานํ  วิปาเจนฺตานํ  ฯ
ยา  ตา  ภิกฺขุนิโย  อปฺปิจฺฉา  ฯเปฯ  ตา  อุชฺฌายนฺติ  ขียนฺติ วิปาเจนฺติ
กถํ   หิ   นาม  ภิกฺขุนิโย  ปายนฺตึ  วุฏฺฐาเปสฺสนฺตีติ  ฯเปฯ  สจฺจํ  กิร
ภิกฺขเว  ภิกฺขุนิโย  ปายนฺตึ  วุฏฺฐาเปนฺตีติ  ฯ  สจฺจํ  ภควาติ  ฯ  วิครหิ
พุทฺโธ  ภควา  กถํ  หิ  นาม  ภิกฺขเว  ภิกฺขุนิโย  ปายนฺตึ วุฏฺฐาเปสฺสนฺติ
เนตํ   ภิกฺขเว   อปฺปสนฺนานํ   วา   ปสาทาย   ฯเปฯ   เอวญฺจ  ปน
ภิกฺขเว ภิกฺขุนิโย อิมํ สิกฺขาปทํ อุทฺทิสนฺตุ
     {๓๖๘.๑}   ยา ปน ภิกฺขุนี ปายนฺตึ วุฏฺฐาเปยฺย ปาจิตฺติยนฺติ ฯ
     [๓๖๙]   ยา  ปนาติ  ยา  ยาทิสา  ฯเปฯ  ภิกฺขุนีติ  ฯเปฯ  อยํ
อิมสฺมึ  อตฺเถ  อธิปฺเปตา  ภิกฺขุนีติ  ฯ  ปายนฺตี  นาม  มาตา  วา โหติ
ธาตี   วา  ฯ  วุฏฺฐาเปยฺยาติ  อุปสมฺปาเทยฺย  ฯ  วุฏฺฐาเปสฺสามีติ  คณํ
วา   อาจรินึ   วา   ปตฺตํ   วา  จีวรํ  ปริเยสติ  สีมํ  วา  สมฺมนฺนติ
อาปตฺติ    ทุกฺกฏสฺส   ญตฺติยา   ทุกฺกฏํ   ทฺวีหิ   กมฺมวาจาหิ   ทุกฺกฏา
@เชิงอรรถ: ๑ ม. ยุ. สทุติยิกา ฯ
กมฺมวาจาปริโยสาเน    อุปชฺฌายาย    อาปตฺติ    ปาจิตฺติยสฺส   คณสฺส
จ อาจรินิยา จ อาปตฺติ ทุกฺกฏสฺส ฯ
     [๓๗๐]   ปายนฺติยา    ปายนฺตีสญฺญา    วุฏฺฐาเปติ    อาปตฺติ
ปาจิตฺติยสฺส  ฯ  ปายนฺติยา  เวมติกา  วุฏฺฐาเปติ  อาปตฺติ  ทุกฺกฏสฺส  ฯ
ปายนฺติยา    อปายนฺตีสญฺญา   วุฏฺฐาเปติ   อนาปตฺติ   ฯ   อปายนฺติยา
ปายนฺตีสญฺญา    อาปตฺติ    ทุกฺกฏสฺส    ฯ    อปายนฺติยา    เวมติกา
อาปตฺติ ทุกฺกฏสฺส ฯ อปายนฺติยา อปายนฺตีสญฺญา อนาปตฺติ ฯ
     [๓๗๑]   อนาปตฺติ  ปายนฺตึ  อปายนฺตีสญฺญา  วุฏฺฐาเปติ  อปายนฺตึ
อปายนฺตีสญฺญา วุฏฺฐาเปติ อุมฺมตฺติกาย อาทิกมฺมิกายาติ ฯ
                                    ---------

             เนื้อความพระไตรปิฎกฉบับภาษาบาลีอักษรไทย เล่มที่ ๓ หน้าที่ ๑๙๘-๑๙๙.
https://84000.org/tipitaka/read/pali_item.php?book=3&item=368&items=4
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=3&item=368&items=4&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=3&item=368&items=4
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=3&item=368&items=4
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=3&i=368
             สารบัญพระไตรปิฎกเล่มที่ ๓
https://84000.org/tipitaka/read/?index_3
https://84000.org/tipitaka/english/?index_3