พระไตรปิฎกเล่มที่ ๓๐ ภาษาบาลี อักษรไทย
พระสุตตันตปิฎกเล่มที่ ๒๒ สุตฺต. ขุ. จูฬนิทฺเทโส

                            สุตฺตนฺตปิฏเก ขุทฺทกนิกายสฺส จูฬนิทฺเทโส
                                              ------------
                          นโม ตสฺส ภควโต อรหโต สมฺมาสมฺพุทฺธสฺส ฯ
                                            ปารายนวคฺโค
                                              วตฺถุคาถา
     [๑]             โกสลานํ ปุรา รมฺมา           อคมา ทกฺขิณาปถํ
                       อากิญฺจญฺญํ ปตฺถยาโน      พฺราหฺมโณ มนฺตปารคู ฯ
     [๒]             โส อสฺสกสฺส วิสเย             มุฬกสฺส ๑- สมาสเน
                       วสี ๒- โคธาวรีกูเล            อุญฺเฉน จ ผเลน จ ฯ
     [๓]             ตสฺเสว อุปนิสฺสาย             คาโม จ วิปุโล อหุ
                       ตโต ชาเตน อาเยน            มหายญฺญํ อกปฺปยิ ฯ
     [๔]             มหายญฺญํ ยชิตฺวาน           ปุน ปาวิสิ อสฺสมํ
                       ตสฺมึ ปฏิปวิฏฺฐมฺหิ             อญฺโญ อาคญฺฉิ พฺราหฺมโณ ฯ
     [๕]             อุคฺฆฏฺฏปาโท ตสิโต          ปงฺกทนฺโต รชสฺสิโร
@เชิงอรรถ: ๑ ม. มฬกสฺส ฯ ยุ. อฬกสฺส ฯ ๒ ม. วสิ ฯ
                       โส จ นํ อุปสงฺกมฺม            สตานิ ปญฺจ ยาจติ ฯ
     [๖]             ตเมนํ พาวรี ทิสฺวา            อาสเนน นิมนฺตยิ
                       สุขญฺจ กุสลํ ปุจฺฉิ              อิทํ วจนมพฺรวิ ฯ
     [๗]             ยํ โข มมํ เทยฺยธมฺมํ          สพฺพํ วิสชฺชิตํ มยา
                       อนุชานาหิ เม พฺรหฺเม        นตฺถิ ปญฺจ สตานิ เม ฯ
     [๘]             สเจ เม ยาจมานสฺส           ภวํ นานุปฺปทสฺสติ
                       สตฺตเม ทิวเส ตุยฺหํ            มุทฺธา ผลตุ สตฺตธา ฯ
     [๙]             อภิสงฺขริตฺวา กุหโก           เภรวํ โส อกิตฺตยิ
                       ตสฺส ตํ วจนํ สุตฺวา            พาวรี ทุกฺขิโต อหุ ฯ
     [๑๐]           อุสฺสุสฺสติ อนาหาโร         โสกสลฺลสมปฺปิโต
                       อโถปิ เอวํจิตฺตสฺส            ชหาเน ๑- น รมตี มโน ฯ
     [๑๑]           อุตฺรสฺตํ ทุกฺขิตํ ทิสฺวา       เทวตา อตฺถกามินี
                       พาวรึ อุปสงฺกมฺม            อิทํ วจนมพฺรวิ ฯ
     [๑๒]           น โส มุทฺธํ ปชานาติ         กุหโก โส ธนตฺถิโก
                       มุทฺธนิ มุทฺธาธิปาเต ๒- วา   ญาณํ ตสฺส น วิชฺชติ ฯ
     [๑๓]           ปโหตี ๓- จรหิ ชานาติ      ตมฺเม อกฺขาหิ ปุจฺฉิตา
                       มุทฺธํ มุทฺธาธิปาตญฺจ       ตํ สุโณม วโจ ตว ฯ
     [๑๔]           อหมฺเปตํ น ชานามิ          ญาณมฺเมตฺถ ๔- น วิชฺชติ
                       มุทฺธํ มุทฺธาธิปาโต ๕- จ   ชินานํ เหต ทสฺสนํ ๖- ฯ
@เชิงอรรถ: ๑ ม. ฌาเน ฯ ๒ ม. มุทฺธปาเต ฯ ๓ ม. ยุ. โภตี ฯ ๔ ม. ญาณํ เมตฺถ ฯ
@๕ ม. มุทฺธาธิปาเต จ ฯ ๖ ม. เหตฺถ ทสฺสนํ ฯ
     [๑๕]           อถ โก จรหิ ชานาติ            อสฺมึ ปฐวิมณฺฑเล ๑-
                       มุทฺธํ มุทฺธาธิปาตญฺจ         ตมฺเม อกฺขาหิ เทวเต ฯ
     [๑๖]           ปุรา กปิลวตฺถุมฺหา             นิกฺขนฺโต โลกนายโก
                       อปจฺโจ โอกฺกากราชสฺส       สกฺยปุตฺโต ปภงฺกโร ฯ
     [๑๗]           โส หิ พฺราหฺมณ สมฺพุทฺโธ    สพฺพธมฺมาน ปารคู
                       สพฺพาภิญฺญาพลปฺปตฺโต    สพฺพธมฺเมสุ จกฺขุมา
                       สพฺพธมฺมกฺขยํ ๒- ปตฺโต     วิมุตฺโต อุปธิกฺขเย ฯ
     [๑๘]           พุทฺโธ โส ภควา โลเก          ธมฺมํ เทเสติ จกฺขุมา
                       ตํ ตฺวํ คนฺตฺวาน ปุจฺฉสฺสุ      โส เต ตํ พฺยากริสฺสติ ฯ
     [๑๙]           สมฺพุทฺโธติ วโจ สุตฺวา         อุทคฺโค พาวรี อหุ
                       โสกสฺส ตนุโก อาสิ             ปีติญฺจ วิปุลํ ลภิ ฯ
     [๒๐]           โส พาวรี อตฺตมโน อุทคฺโค
                       ตํ เทวตํ ปุจฺฉติ เวทชาโต
                       กตมมฺหิ คาเม นิคมมฺหิ วา ปน
                       กตมมฺหิ วา ชนปเท โลกนาโถ
                       ยตฺถ คนฺตฺวา นมสฺเสมุ ๓-
                       สมฺพุทฺธํ ทิปทุตฺตมํ ๔- ฯ
     [๒๑]           สาวตฺถิยํ โกสลมนฺทิเร ชิโน
                       ปหูตปญฺโญ วรภูริเมธโส
                       โส สกฺยปุตฺโต วิธุโร อนาสโว
@เชิงอรรถ: ๑ ม. ปถวิมณฺฑเล ฯ สี. ปุถวิมณฺฑเล ฯ ๒ ม. สพฺพกมฺมกฺขยํ ฯ
@๓ ม. ปสฺเสมุ ฯ ๔ ม. สพฺพตฺถ ทฺวิปทุตฺตมํ ฯ
                       มุทฺธาธิปาตสฺส วิทู นราสโภ ฯ
     [๒๒]           ตโต อามนฺตยี สิสฺเส        พฺราหฺมเณ มนฺตปารเค ๑-
                       เอถ มาณวา อกฺขิสฺสํ       สุโณถ วจนํ มม ฯ
     [๒๓]           ยสฺเสโส ทุลฺลโภ โลเก      ปาตุภาโว อภิณฺหโส
                       สฺวาชฺช โลกมฺหิ อุปฺปนฺโน  สมฺพุทฺโธ อิติ วิสฺสุโต
                       ขิปฺปํ คนฺตฺวาน สาวตฺถึ      ปสฺสโวฺห ทิปทุตฺตมํ ฯ
     [๒๔]           กถํ จรหิ ชาเนมุ               ทิสฺวา พุทฺโธติ พฺราหฺมณ
                       อชานตํ โน ปพฺรูหิ           ยถา ชาเนมุ ตํ มยํ ฯ
     [๒๕]           อาคตานิ หิ มนฺเตสุ          มหาปุริสลกฺขณา
                       ทฺวตฺตึสา จ พฺยาขฺยาตา ๒-   สมตฺตา อนุปุพฺพโส ฯ
     [๒๖]           ยสฺเสเต โหนฺติ คตฺเตสุ      มหาปุริสลกฺขณา
                       ทุเวว ๓- ตสฺส คติโย         ตติยา หิ น วิชฺชติ ฯ
     [๒๗]           สเจ อคารํ อาวสติ            วิเชยฺย ปฐวึ อิมํ
                       อทณฺเฑน อสตฺเถน          ธมฺเมนมนุสาสติ ๔- ฯ
     [๒๘]           สเจ จ โส ปพฺพชติ           อคารา อนคาริยํ
                       วิวฏจฺฉโท ๕- สมฺพุทฺโธ    อรหา ภวติ อนุตฺตโร ฯ
     [๒๙]           ชาตึ โคตฺตญฺจ ลกฺขณํ      มนฺเต สิสฺเส ปุนาปเร
                       มุทฺธํ มุทฺธาธิปาตญฺจ       มนสาเยว ปุจฺฉถ ฯ
     [๓๐]           อนาวรณทสฺสาวี             ยทิ พุทฺโธ ภวิสฺสติ
                       มนสา ปุจฺฉิเต ปเญฺห        วาจาย วิสฺสเชสฺสติ ๖- ฯ
@เชิงอรรถ: ๑ ม. มนฺตปารคู ฯ ๒ ม. ทฺวตฺตึสานิ จ พฺยากฺขาตา ฯ ๓ ม. เทฺวเยว ฯ
@๔ ม. ธมฺเมน อนุสาสติ ฯ ๕ สี. วิวตฺตจฺฉทฺโท ฯ ม. วิวฏฺฏจฺฉโท ฯ
@๖ ม. วิสชฺชิสฺสติ ฯ
     [๓๑]           พาวริสฺส วโจ สุตฺวา          สิสฺสา โสฬส พฺราหฺมณา
                       อชิโต ติสฺสเมตฺเตยฺโย       ปุณฺณโก อถ เมตฺตคู ฯ
     [๓๒]           โธตโก อุปสีโว จ              นนฺโท จ อถ เหมโก
                       โตเทยฺยกปฺปา ทุภโย       ชตุกณฺณี จ ปณฺฑิโต ฯ
     [๓๓]           ภทฺราวุโธ อุทโย จ           โปสาโล จาปิ พฺราหฺมโณ
                       โมฆราชา จ เมธาวี          ปิงฺคิโย จ มหาอิสิ ฯ
     [๓๔]           ปจฺเจกคณิโน สพฺเพ         สพฺพโลกสฺส วิสฺสุตา
                       ฌายี ฌานรตา ธีรา         ปุพฺพวาสนวาสิตา ฯ
     [๓๕]           พาวรึ อภิวาเทตฺวา           กตฺวา จ นํ ปทกฺขิณํ
                       ชฏาชินธรา สพฺเพ            ปกฺกามุํ อุตฺตรามุขา ฯ
     [๓๖]           มุฬกสฺส ๑- ปติฏฺฐานํ       ปุริมํ มาหิสฺสตึ ๒- ตทา
                       อุชฺเชนิญฺจาปิ โคนทฺธํ       เวทิสํ วนสวฺหยํ ฯ
     [๓๗]           โกสมฺพิญฺจาปิ สาเกตํ       สาวตฺถิญฺจ ปุรุตฺตมํ
                       เสตพฺยํ กปิลวตฺถุํ             กุสินารญฺจ มนฺทิรํ ฯ
     [๓๘]           ปาวญฺจ โภคนครํ             เวสาลึ มาคธํ ปุรํ
                       ปาสาณกํ เจติยญฺจ           รมณียํ มโนรมํ ฯ
     [๓๙]           ตสิโต วุทกํ สีตํ                 มหาลาภํว วาณิโช
                       ฉายํ ฆมฺมาภิตตฺโตว         ตุริตา ปพฺพตมารุหุํ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๓๐ หน้าที่ ๑-๕.
https://84000.org/tipitaka/read/pali_item.php?book=30&item=1&items=39
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=30&item=1&items=39&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=30&item=1&items=39
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=30&item=1&items=39
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=30&i=1
             สารบัญพระไตรปิฎกเล่มที่ ๓๐
https://84000.org/tipitaka/read/?index_30
https://84000.org/tipitaka/english/?index_30