พระไตรปิฎกเล่มที่ ๓๑ ภาษาบาลี อักษรไทย
พระสุตตันตปิฎกเล่มที่ ๒๓ สุตฺต. ขุ. ปฏิสมฺภิทามคฺโค

     [๑๑๒]   กถํ    อารมฺมณํ   ปฏิสงฺขา   ภงฺคานุปสฺสเน   ปญฺญา
วิปสฺสเน     ญาณํ    รูปารมฺมณตาจิตฺตํ    อุปฺปชฺชิตฺวา    ภิชฺชติ    ตํ
อารมฺมณํ   ปฏิสงฺขา   ตสฺส   จิตฺตสฺส   ภงฺคํ  อนุปสฺสติ  ฯ  อนุปสฺสตีติ
กถํ  อนุปสฺสติ  ฯ  อนิจฺจโต  อนุปสฺสติ  โน  นิจฺจโต  ทุกฺขโต  อนุปสฺสติ
โน   สุขโต   อนตฺตโต  อนุปสฺสติ  โน  อตฺตโต  นิพฺพินฺทติ  โน  นนฺทติ
วิรชฺชติ  โน  รชฺชติ  นิโรเธติ  โน  สมุเทติ  ปฏินิสฺสชฺชติ  โน  อาทิยติ
อนิจฺจโต    อนุปสฺสนฺโต    นิจฺจสญฺญํ    ปชหติ   ทุกฺขโต   อนุปสฺสนฺโต
สุขสญฺญํ     ปชหติ     อนตฺตโต    อนุปสฺสนฺโต    อตฺตสญฺญํ    ปชหติ
นิพฺพินฺทนฺโต   นนฺทึ   ปชหติ   วิรชฺชนฺโต   ราคํ   ปชหติ   นิโรเธนฺโต
สมุทยํ ปชหติ ปฏินิสฺสชฺชนฺโต อาทานํ ปชหติ ฯ
     [๑๑๓]   เวทนารมฺมณตา  ฯเปฯ  สญฺญารมฺมณตา  สงฺขารารมฺมณตา
วิญฺญาณารมฺมณตา   จกฺขุํ   ฯเปฯ   ชรามรณารมฺมณตาจิตฺตํ   อุปฺปชฺชิตฺวา
ภิชฺชติ   ตํ   อารมฺมณํ   ปฏิสงฺขาตสฺส   จิตฺตสฺส   ภงฺคํ   อนุปสฺสติ  ฯ
อนุปสฺสตีติ  กถํ  อนุปสฺสติ  ฯ  อนิจฺจโต  อนุปสฺสติ   โน นิจฺจโต ทุกฺขโต
อนุปสฺสติ  โน  สุขโต  อนตฺตโต  อนุปสฺสติ  โน  อตฺตโต  นิพฺพินฺทติ  โน
นนฺทติ   วิรชฺชติ  โน  รชฺชติ  นิโรเธติ  โน  สมุเทติ  ปฏินิสฺสชฺชติ  โน
อาทิยติ     อนิจฺจโต    อนุปสฺสนฺโต    นิจฺจสญฺญํ    ปชหติ    ทุกฺขโต
อนุปสฺสนฺโต    สุขสญฺญํ    ปชหติ    อนตฺตโต   อนุปสฺสนฺโต   อตฺตสญฺญํ
ปชหติ    นิพฺพินฺทนฺโต    นนฺทึ    ปชหติ    วิรชฺชนฺโต   ราคํ   ปชหติ
นิโรเธนฺโต สมุทยํ ปชหติ ปฏินิสฺสชฺชนฺโต อาทานํ ปชหติ ฯ
     [๑๑๔]        วตฺถุสงฺกมนา เจว             สญฺญาย จ วิวฏฺฏนา
                       อาวชฺชนา พลญฺเจว          ปฏิสงฺขา วิปสฺสนา
                       อารมฺมณํ อนฺวเยน           อุโภ เอกววตฺถนา
                       นิโรเธ อธิมุตฺตตา             วยลกฺขณวิปสฺสนา
                       อารมฺมณญฺจ ปฏิสงฺขา     ภงฺคญฺจ อนุปสฺสติ
                       สุญฺญโต จ อุปฏฺฐานํ         อธิปญฺญาวิปสฺสนา
                       กุสโล ตีสุ อนุปสฺสนาสุ      จตูสุ จ วิปสฺสนาสุ ๑-
                       ตโย อุปฏฺฐาเน กุสลตา      นานาทิฏฺฐีสุ น กมฺปตีติ ฯ
     {๑๑๔.๑}   ตํ  ญาตฏฺเฐน  ญาณํ  ปชานนฏฺเฐน  ปญฺญา เตน วุจฺจติ
อารมฺมณํ ปฏิสงฺขา ภงฺคานุปสฺสเน ปญฺญา วิปสฺสเน ญาณํ ฯ
                                                --------
     [๑๑๕]   กถํ   ภยตุปฏฺฐาเน   ปญฺญา  อาทีนเว  ญาณํ  อุปฺปาโท
ภยนฺติ    ภยตุปฏฺฐาเน    ปญฺญา    อาทีนเว   ญาณํ   ปวตฺตํ   ภยนฺติ
ภยตุปฏฺฐาเน    ปญฺญา    อาทีนเว    ญาณํ   นิมิตฺตํ   ภยนฺติ   ฯเปฯ
อายุหนา     ภยนฺติ    ปฏิสนฺธิ    ภยนฺติ    คติ    ภยนฺติ    นิพฺพตฺติ
ภยนฺติ    อุปปตฺติ    ภยนฺติ    ชาติ   ภยนฺติ   ชรา   ภยนฺติ   พฺยาธิ
@เชิงอรรถ: ๑ สี. ม. จตสฺโส จ วิปสฺสนา ฯ
ภยนฺติ     มรณํ     ภยนฺติ    โสโก    ภยนฺติ    ปริเทโว    ภยนฺติ
อุปายาโส    ภยนฺติ    ภยตุปฏฺฐาเน    ปญฺญา   อาทีนเว   ญาณํ   ฯ
อนุปฺปาโท   เขมนฺติ   สนฺติปเท   ญาณํ   อปฺปวตฺตํ   เขมนฺติ  สนฺติปเท
ญาณํ    ฯเปฯ    อนุปายาโส   เขมนฺติ   สนฺติปเท   ญาณํ   อุปฺปาโท
ภยํ   อนุปฺปาโท   เขมนฺติ   สนฺติปเท   ญาณํ   ปวตฺตํ   ภยํ  อปฺปวตฺตํ
เขมนฺติ    สนฺติปเท    ญาณํ   ฯเปฯ   อุปายาโส   ภยํ   อนุปายาโส
เขมนฺติ     สนฺติปเท    ญาณํ    อุปฺปาโท    ทุกฺขนฺติ    ภยตุปฏฺฐาเน
ปญฺญา   อาทีนเว   ญาณํ   ฯเปฯ   อุปายาโส   ทุกฺขนฺติ  ภยตุปฏฺฐาเน
ปญฺญา    อาทีนเว    ญาณํ    อนุปฺปาโท    สุขนฺติ   สนฺติปเท   ญาณํ
อปฺปวตฺตํ    สุขนฺติ    สนฺติปเท   ญาณํ   ฯเปฯ   อนุปายาโส   สุขนฺติ
สนฺติปเท ญาณํ ฯ
     [๑๑๖]   อุปฺปาโท    ทุกฺขํ    อนุปฺปาโท    สุขนฺติ   สนฺติปเท
ญาณํ    ปวตฺตํ   ทุกฺขํ   อปฺปวตฺตํ   สุขนฺติ   สนฺติปเท   ญาณํ   ฯเปฯ
อุปายาโส ทุกฺขํ อนุปายาโส สุขนฺติ สนฺติปเท ญาณํ ฯ
     [๑๑๗]   อุปฺปาโท   สามิสนฺติ   ภยตุปฏฺฐาเน   ปญฺญา  อาทีนเว
ญาณํ    ปวตฺตํ    สามิสนฺติ   ภยตุปฏฺฐาเน   ปญฺญา   อาทีนเว   ญาณํ
ฯเปฯ    อุปายาโส    สามิสนฺติ    ภยตุปฏฺฐาเน    ปญฺญา   อาทีนเว
ญาณํ   อนุปฺปาโท   นิรามิสนฺติ   สนฺติปเท   ญาณํ  อปฺปวตฺตํ  นิรามิสนฺติ
สนฺติปเท     ญาณํ    ฯเปฯ    อนุปายาโส    นิรามิสนฺติ    สนฺติปเท
ญาณํ     อุปฺปาโท     สามิสํ    อนุปฺปาโท    นิรามิสนฺติ    สนฺติปเท
ญาณํ    ปวตฺตํ    สามิสํ    อปฺปวตฺตํ    นิรามิสนฺติ   สนฺติปเท   ญาณํ
ฯเปฯ    อุปายาโส    สามิสํ    อนุปายาโส    นิรามิสนฺติ   สนฺติปเท
ญาณํ ฯ
     [๑๑๘]   อุปฺปาโท   สงฺขาราติ   ภยตุปฏฺฐาเน  ปญฺญา  อาทีนเว
ญาณํ     ฯเปฯ    อุปายาโส    สงฺขาราติ    ภยตุปฏฺฐาเน    ปญฺญา
อาทีนเว     ญาณํ     อนุปฺปาโท     นิพฺพานนฺติ    สนฺติปเท    ญาณํ
อปฺปวตฺตํ     นิพฺพานนฺติ    สนฺติปเท    ญาณํ    ฯเปฯ    อนุปายาโส
นิพฺพานนฺติ    สนฺติปเท    ญาณํ    อุปฺปาโท    สงฺขารา    อนุปฺปาโท
นิพฺพานนฺติ     สนฺติปเท     ญาณํ     ปวตฺตํ    สงฺขารา    อปฺปวตฺตํ
นิพฺพานนฺติ   สนฺติปเท   ญาณํ  ฯเปฯ  อุปายาโส  สงฺขารา  อนุปายาโส
นิพฺพานนฺติ สนฺติปเท ญาณํ ฯ
     [๑๑๙]        อุปฺปาทญฺจ ปวตฺตญฺจ       นิมิตฺตํ ทุกฺขนฺติ ปสฺสติ
                       อายุหนํ ปฏิสนฺธึ              ญาณํ อาทีนเว อิทํ
                       อนุปฺปาทํ อปฺปวตฺตํ          อนิมิตฺตํ สุขนฺติ จ
                       อนายุหนํ อปฺปฏิสนฺธึ        ญาณํ สนฺติปเท อิทํ
                       อิทํ อาทีนเว ญาณํ           ปญฺจฏฺฐาเนสุ ชายติ
                       ปญฺจฏฺฐาเน สนฺติปเท       ทส ญาเณ ปชานาติ
                       ทฺวินฺนํ ญาณานํ กุสลตา     นานาทิฏฺฐีสุ น กมฺปตีติ ฯ
     {๑๑๙.๑}   ตํ  ญาตฏฺเฐน  ญาณํ  ปชานนฏฺเฐน  ปญฺญา เตน วุจฺจติ
ภยตุปฏฺฐาเน ปญฺญา อาทีนเว ญาณํ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๓๑ หน้าที่ ๘๓-๘๖.
https://84000.org/tipitaka/read/pali_item.php?book=31&item=112&items=8
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=31&item=112&items=8&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=31&item=112&items=8
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=31&item=112&items=8
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=31&i=112
             สารบัญพระไตรปิฎกเล่มที่ ๓๑
https://84000.org/tipitaka/read/?index_31
https://84000.org/tipitaka/english/?index_31