พระไตรปิฎกเล่มที่ ๓๓ ภาษาบาลี อักษรไทย
พระสุตตันตปิฎกเล่มที่ ๒๕ สุตฺต. ขุ. อปทานํ (๒) พุทฺธวํโส จริยาปิฏกํ

                                         ปญฺจปญฺญาโส ภทฺทิยวคฺโค
                                ปฐมํ ลกุณฺฏกภทฺทิยตฺเถราปทานํ (๕๔๑)
     [๑๓๑]   |๑๓๑.๑| ปทุมุตฺตโร นาม ชิโน  สพฺพธมฺมาน ปารคู ๑-
                    อิโต สตสหสฺสมฺหิ              โลเก ๒- อุปฺปชฺชิ นายโก ๓- ฯ
      |๑๓๑.๒| ตทาหํ หํสวติยา                 เสฏฺฐิปุตฺโต มหทฺธโน
                    ชงฺฆวิหารํ วิจรํ                   สงฺฆารามํ อคญฺฉหํ ฯ
      |๑๓๑.๓| ตทา โส โลกปชฺโชโต         ธมฺมํ เทเสสิ นายโก
                    มธุรสฺสรานํ ๔- ปวรํ           สาวกํ อภิกิตฺตยิ ฯ
      |๑๓๑.๔| ตํ สุตฺวา มุทิโต หุตฺวา         การํ กตฺวา มเหสิโน
                    วนฺทิตฺวา สตฺถุโน ปาเท       ตํ ฐานํ อภิปตฺถยึ ฯ
      |๑๓๑.๕| ตทา พุทฺโธ วิยากาสิ          สงฺฆมชฺเฌ วินายโก
                    อนาคตมฺหิ อทฺธาเน           ลจฺฉเสตํ มโนรถํ ฯ
      |๑๓๑.๖| สตสหสฺเส อิโต กปฺเป        โอกฺกากกุลสมฺภโว
                    โคตโม นาม นาเมน           สตฺถา โลเก ภวิสฺสติ ฯ
      |๑๓๑.๗| ตสฺส ธมฺเมสุ ทายาโท        โอรโส ธมฺมนิมฺมิโต
                    ภทฺทิโย นาม นาเมน          เหสฺสติ สตฺถุ สาวโก ฯ
      |๑๓๑.๘| เตน กมฺเมน สุกเตน           เจตนาปณิธีหิ จ
                    ชหิตฺวา มานุสํ เทหํ            ตาวตึสํ อคญฺฉหํ ฯ
@เชิงอรรถ: ๑ ม. ยุ. สพฺพธมฺเมสุ จกฺขุมา ฯ ๒ ม. ยุ. กปฺเป ฯ ๓ ยุ. จกฺขุมา ฯ
@๔ ม. ยุ. มญฺชุสฺสรานํ ฯ
      |๑๓๑.๙|   เทฺวนวุเต อิโต กปฺเป         ผุสฺโส อุปฺปชฺชิ นายโก
                      ทุราสโท ทุปสโห            สพฺพโลกุตฺตโม ชิโน ฯ
      |๑๓๑.๑๐| จรเณน จ สมฺปนฺโน         พฺรหฺมา ๑- อุชุ ปตาปวา
                       หิเตสี สพฺพสตฺตานํ        พหุํ โมเจสิ พนฺธนา ฯ
      |๑๓๑.๑๑| นนฺทารามวเร ๒- ตสฺส     อโหสึ ปุสฺสโกกิโล
                       คนฺธกุฏิสมาสนฺเน         อมฺพรุกฺเข วสามหํ ฯ
      |๑๓๑.๑๒| ตทา ปิณฺฑาย คจฺฉนฺตํ    ทกฺขิเณยฺยํ ชินุตฺตมํ
                       ทิสฺวา จิตฺตํ ปสาเทตฺวา   มญฺชุนา อภิกูชหํ ๓- ฯ
      |๑๓๑.๑๓| ราชุยฺยานํ ตทา คนฺตฺวา   สุปกฺกํ กนกตฺตจํ
                       อมฺพปิณฺฑํ คเหตฺวาน    สมฺพุทฺธสฺโสปนามยึ ฯ
      |๑๓๑.๑๔| ตทา เม จิตฺตมญฺญาย     มหาการุณิโก ชิโน
                       อุปฏฺฐากสฺส หตฺถโต      ปตฺตํ ปคฺคณฺหิ นายโก ฯ
      |๑๓๑.๑๕| อทาสึ ๔- หฏฺฐจิตฺโตหํ     อมฺพปิณฺฑํ มหามุเน
                       ปตฺเต ปกฺขิปฺป ปกฺเขหิ    ปญฺชลึ กตฺวาน มญฺชุนา ฯ
      |๑๓๑.๑๖| สเรน รชนีเยน                 สวนีเยน มญฺชุนา ๕-
                      วสฺสนฺโต พุทฺธปูชตฺถํ       นิทฺทํ ๖- คนฺตฺวา นิปชฺชหํ ฯ
      |๑๓๑.๑๗| ตทา มุทิตจิตฺตํ มํ            พุทฺธเปมคตาสยํ
                       สกุณคฺฆิ อุปาคนฺตฺวา     ฆาตยิ ทุฏฺฐมานโส ๗- ฯ
      |๑๓๑.๑๘| ตโต จุโตหํ ตุสิเต             อนุโภตฺวา มหาสุขํ
                       มนุสฺสโยนิมาคญฺฉึ        ตสฺส กมฺมสฺส วาหสา ฯ
@เชิงอรรถ: ๑ ม. ยุ. พฺรหา ฯ ๒ ม. นนฺทารามวเน ฯ ๓ ม. มญฺชุนาภินิกูชหํ ฯ ๔ ยุ.
@ททามิ ฯ ๕ ม. วคฺคุนา ฯ ยุ. ธํสนา ฯ ๖ ม. นีฬํ ฯ ๗ ยุ. ทุฏฺฐมานสา ฯ
      |๑๓๑.๑๙| อิมมฺหิ ภทฺทเก กปฺเป      พฺรหฺมพนฺธุ มหายโส
                       กสฺสโป นาม โคตฺเตน     อุปฺปชฺชิ วทตํ วโร ฯ
      |๑๓๑.๒๐| สาสนํ โชตยิตฺวา โส        อภิภุยฺย กุติตฺถิเย
                       วินยิตฺวาน เวเนยฺเย         นิพฺพุโต โส สสาวโก ฯ
      |๑๓๑.๒๑| นิพฺพุเต ตมฺหิ โลกคฺเค     ปสนฺนา ชนตา พหู
                       ปูชนตฺถาย พุทฺธสฺส        ถูปํ กุพฺพนฺติ สตฺถุโน ฯ
      |๑๓๑.๒๒| สตฺตโยชนิกํ ถูปํ             สตฺตรตนภูสิตํ ๑-
                       กาเรสฺสาม มเหสิสฺส       อิจฺเจวํ มนฺตยนฺติ เต ฯ
      |๑๓๑.๒๓| กิกิโน กาสิราชสฺส           ตทา เสนาย นายโก
                       หุตฺวาหํ อปฺปมาณสฺส     ปมาณํ เจติเย วทึ ฯ
      |๑๓๑.๒๔| ตทา เต มม วาเกฺยน       เจติยํ โยชนุคฺคตํ
                       อกํสุ นรธีรสฺส                นานารตนภูสิตํ ฯ
      |๑๓๑.๒๕| เตน กมฺเมน สุกเตน        เจตนาปณิธีหิ จ
                       ชหิตฺวา มานุสํ เทหํ         ตาวตึสํ อคญฺฉหํ ฯ
      |๑๓๑.๒๖| ปจฺฉิเม จ ภเว ทานิ         ชาโต เสฏฺฐิกุเล อหํ
                       สาวตฺถิยํ ปุรวเร              อิทฺเธ ผีเต มหทฺธเน ฯ
      |๑๓๑.๒๗| ปุรปฺปเวเส สุคตํ              ทิสฺวา วิมฺหิตมานโส
                       ปพฺพชิตฺวาน น จิรํ          อรหตฺตํ อปาปุณึ ฯ
      |๑๓๑.๒๘| เจติยสฺส ปมาณํ ยํ          อกรึ เตน กมฺมุนา
                       ลกุณฺฏกสรีโรหํ              ชาโต ปริพฺภวารโห ฯ
@เชิงอรรถ: ๑ ยุ. สตฺตรตนวิภูสิตํ ฯ
      |๑๓๑.๒๙| สเรน มธุเรนาหํ              ปูเชตฺวา อิสิสตฺตมํ
                       มญฺชุสฺสราน ภิกฺขูนํ        อคฺคตฺตํ อนุปาปุณึ ฯ
      |๑๓๑.๓๐| ผลทาเนน พุทฺธสฺส         คุณานุสฺสรเณน จ
                       สามญฺญผลสมฺปนฺโน     วิหรามิ อนาสโว ฯ
      |๑๓๑.๓๑| กิเลสา ฌาปิตา มยฺหํ       ภวา สพฺเพ สมูหตา
                       นาโคว พนฺธนํ เฉตฺวา      วิหรามิ อนาสโว ฯ
      |๑๓๑.๓๒| สฺวาคตํ วต เม อาสิ          มม พุทฺธสฺส สนฺติเก
                       ติสฺโส วิชฺชา อนุปฺปตฺตา   กตํ พุทฺธสฺส สาสนํ ฯ
      |๑๓๑.๓๓| ปฏิสมฺภิทา จตสฺโส         วิโมกฺขาปิจ อฏฺฐิเม
                       ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
            อิตฺถํ สุทํ อายสฺมา ลกุณฺฏกภทฺทิโย เถโร อิมา คาถาโย อภาสิตฺถาติ ฯ
                                ลกุณฺฏกภทฺทิยตฺเถรสฺส อปทานํ สมตฺตํ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๓๓ หน้าที่ ๒๑๙-๒๒๒.
https://84000.org/tipitaka/read/pali_item.php?book=33.1&item=131&items=1
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=33.1&item=131&items=1&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=33.1&item=131&items=1
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=33.1&item=131&items=1
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=33.1&i=131
             สารบัญพระไตรปิฎกเล่มที่ ๓๓
https://84000.org/tipitaka/read/?index_33
https://84000.org/tipitaka/english/?index_33