พระไตรปิฎกเล่มที่ ๓๓ ภาษาบาลี อักษรไทย
พระสุตตันตปิฎกเล่มที่ ๒๕ สุตฺต. ขุ. อปทานํ (๒) พุทฺธวํโส จริยาปิฏกํ

                                     สุตฺตนฺตปิฏเก ขุทฺทกนิกายสฺส
                                                   พุทฺธวํโส
                                                -------------
                           นโม ตสฺส ภควโต อรหโต สมฺมาสมฺพุทฺธสฺส ฯ
                                             รตนจงฺกมนกณฺโฑ
     [๑]   /พุทฺธ./ |๑.๑| พฺรหฺมา จ โลกาธิปตี สมหฺปติ ๑-
                             กตญฺชลี อนธิวรํ อยาจถ
                             สนฺตีธ สตฺตา อปฺปรชกฺขชาติกา
                             เทเสหิ ธมฺมํ อนุกมฺปิมํ ปชนฺติ ฯ
                    |๑.๒| ๒- [ภควา โลกาธิปตี นรุตฺตโม
                             กตญฺชลีพฺรหฺมคเณหิ ยาจิโต
                             สนฺตีธ ธีราปฺปรชกฺขชาติกา
                             เทเสตุ ธมฺมํ อนุกมฺปิมํ ปชํ ฯ
         |๑.๓| เทเสตุ สุคโต ธมฺมํ                 เทเสตุ อมตํปทํ
                  โลกานมนุกมฺปาย                ธมฺมํ เทเสตุ นายก] ฯ
                    |๑.๔| สมฺปนฺนวิชฺชาจรณสฺส ตาทิโน
                             ชุตินฺธรสฺสนฺติมเทหธาริโน
                             ตถาคตสฺสปฺปฏิปุคฺคลสฺส
                             อุปฺปชฺชิ การุญฺญตา สพฺพสตฺเต ฯ
@เชิงอรรถ: ๑ ม. สหมฺปตี ฯ ๒ ม. ยุ. อิเม ปาฐา นตฺถิ ฯ
     ๑- [ตํ สุตฺวา ภควา สตฺถา      อิทํ วจนมพฺรวิ]
                    |๑.๕| อปารุตา เต อมตสฺส ทฺวารา
                             เย โสตวนฺโต ปมุญฺจนฺตุ สทฺธํ
                             วิหึสสญฺญี ปคุณํ น ภาสึ
                             ธมฺมํ ปณีตํ มนุเชสุ พฺรเหฺมติ ฯ
         |๑.๖| ๒- [ภควา ตสฺมึ สมเย           เวเนยฺยานํนุกมฺปโก
                  อชปาลนิโคฺรธทุมา               ปายาสิ มุนิปุงฺคโว ฯ
         |๑.๗| อนุกฺกเมน คมเนน                พาราณสิมุปาคมิ
                  ตสฺมึ หิ ปลฺลงฺกวเร                นิสีทิ ภควา ตทา ฯ
         |๑.๘| ปญฺจนฺนํ วคฺคิยานญฺจ           ธมฺมจกฺกปฺปวตฺตยิ
                  ทุกฺขํ ทุกฺขสมุปฺปาทํ              นิโรธํ มคฺคมุตฺตมํ ฯ
         |๑.๙| ปวตฺตยิ ตํ ภควา                   อิสี เต ปญฺจวคฺคิยา
                  อฏฺฐารสโกฏิ ตทา                พฺรหฺมเทวคณา สห ฯ
       |๑.๑๐| ปฐมสฺมึ สนฺนิปาเต               ธมฺมาภิสมยา ลภุ
                  โกณฺฑญฺโญ ภทฺทิโย วปฺโป    มหานาโม จ อสฺสชิ ฯ
       |๑.๑๑| วินีตา เตน ปเรน                   สพฺเพปิ อนุปุพฺพโส
                  อฏฺฐารสโกฏิ ตทา                 พฺรหฺมเทวคณา สห ฯ
       |๑.๑๒| ปฐมสฺมึ สนฺนิปาเต               โสตาปตฺติผลํ ตทา
                  อนุกฺกเมน คมเนน                ราชคหมุปาคมิ ฯ
@เชิงอรรถ: ๑-๒ ม. ยุ. อิเม ปาฐา นตฺถิ ฯ
       |๑.๑๓| เวฬุวนมหาวิหาเร                 วิหาสิ มุนิปุงฺคโว
                  ตํ สุตฺวา พิมฺพิสาโร จ            ภควนฺตมุปสงฺกมิ ฯ
       |๑.๑๔| เอกาทสนหุเตเนว                 ปริวารา มหา อหุ
                  ทีปคนฺธธูปมาลาทีนิ             ภควนฺตมภิปูชยิ ฯ
       |๑.๑๕| ตสฺมึ สมาคเมเยว                 กามาทีนว เทสยิ
                  เทสนาปริโยสาเน                  ราชานมฺปมุขํ ตทา ฯ
       |๑.๑๖| จตุราสีติสหสฺสานํ                ธมฺมาภิสมโย อหุ
                  ตํ สุตฺวาน ปิตา ราชา [๑]-      นว ทูตานิ เปสยิ ฯ
       |๑.๑๗| นวสหสฺสปริวาเรหิ                ปพฺพชฺชํ ยาจเต มุนึ
                  นวสหสฺสปริวารา                  อรหตฺตมุปาคมุ ํ ฯ
       |๑.๑๘| กาฬุทายิ ปริโยสาเน             ภิกฺขุเวสํ คเหตฺวา โส
                   สหสฺสปริวาเรหิ                    ภควนฺตํ นิมนฺตยิ ฯ
       |๑.๑๙| นิมนฺตมธิวาเสตฺวา               มหามคฺคํ ปฏิปชฺชติ
                   วีสติสหสฺสภิกฺขูหิ                 ปายาสิ สกฺยปุงฺคโว ฯ
       |๑.๒๐| อนุกฺกเมน คมเนน               กปิลวตฺถุมุปาคมิ
                  โรหิณิยา นทีตีเร                   ปาฏิหารมกาสิ โส ฯ
       |๑.๒๑| ตสฺมึ ปลฺลงฺกมชฺฌมฺหิ           นิสีทิ สกฺยปุงฺคโว
                   มหาเวสฺสนฺตรธมฺมํ               เทเสตฺวา ภควา ปิตุ
                   จตุราสีติสหสฺสานํ                ธมฺมาภิสมโย อหุ] ฯ
@เชิงอรรถ: ๑ โป. ภควนฺตํ นิมนฺตยิ ฯ
              |๑.๒๒| น เหเต ๑- ชานนฺติ สเทวมนุสฺสา ๒-
                         พุทฺโธ อยํ กีทิสโก นรุตฺตโม
                         อิทฺธิพลํ ปญฺญาพลญฺจ กีทิสํ
                         พุทฺธพลํ โลกหิตสฺส กีทิสํ ฯ
              |๑.๒๓| น เหเต ๓- ชานนฺติ สเทวมนุสฺสา ๔-
                         พุทฺโธ อยํ อีทิสโก นรุตฺตโม
                         อิทฺธิพลํ ปญฺญาพลญฺจ อีทิสํ ๕-
                         พุทฺธพลํ โลกหิตสฺส อีทิสํ ๖-
       |๑.๒๔| หนฺทาหํ ทสฺสยิสฺสามิ           พุทฺธพลํ อนุตฺตรํ
                      จงฺกมํ มาปยิสฺสามิ           นเภ รตนมณฺฑิตํ ฯ
              |๑.๒๕| ภุมฺมา มหาราชิกา ตาวตึสา
                         ยามา จ เทวา ตุสิตา จ นิมฺมิตา
                         ปรนิมฺมิตา เยปิจ พฺรหฺมกายิกา
                         อานนฺทิตา วิปุลมกํสุ โฆสํ ฯ
              |๑.๒๖| โอภาสิตา จ ปฐวี สเทวกา
                         ปุถู จ โลกนฺตริกา อสํวุตา
                         ตโม จ ติพฺโพ วิหโต ตทา อหุ
                         ทิสฺวาน อจฺเฉรกปาฏิหีรํ ฯ
              |๑.๒๗| สเทวคนฺธพฺพมนุสฺสรกฺขเส
                         อาภา อุฬารา วิปุลา อชายถ
@เชิงอรรถ: ๑-๓ ย. น โภ เต ฯ ๒-๔ ม. ยุ. สเทวมานุสา ฯ ๕-๖ ม. ยุ. เอทิสํ ฯ
                         อิมสฺมึ โลเก ปรสฺมึ จูภเย
                         อโธปิ อุทฺธํ ติริยญฺจ วิตฺถตํ ฯ
              |๑.๒๘| สตฺตุตฺตโม อนธิวโร วินายโก
                         สตฺถา อหุ เทว มนุสฺส ปูชิโต
                         มหานุภาโว สต ปุญฺญ ลกฺขโณ
                         ทสฺเสสิ อจฺเฉรกปาฏิหีริยํ ฯ
       |๑.๒๙| ๑- [ตสฺมึ สมาคเม สตฺถา      อพฺภุคฺคนฺตฺวา นเภ ตเล
                       สิเนรุปพฺพตํ รมฺมํ             จงฺกมํ มาปยี ชิโน ฯ
       |๑.๓๐| ทสสหสฺสิโลกธาตุเทวตา       ชินสนฺติเก
                   ตถาคตํ นมสฺสิตฺวา              พุทฺธปูชํ กรึสุ เต] ฯ
              |๑.๓๑| โส ยาจิโต เทววเรน จกฺขุมา
                         อตฺถํ สเมกฺขิตฺวา ตทา นรุตฺตโม
                         จงฺกมํ มาปยิ โลกนายโก
                         สุนิฏฺฐิตํ สพฺพรตนนิมฺมิตํ ฯ
              |๑.๓๒| อิทฺธิ จ อาเทสนานุสาสนี
                         ติปาฏิหีเร ภควา วสี อหุ
                         จงฺกมํ มาปยิ โลกนายโก
                         สุนิฏฺฐิตํ สพฺพรตนนิมฺมิตํ ฯ
       |๑.๓๓| ทสสหสฺสิโลกธาตุยา            สิเนรุปพฺพตุตฺตเม ถมฺเภว
                   ทสฺเสสิ ปฏิปาฏิยา               จงฺกเม รตนามเย ฯ
@เชิงอรรถ: ๑ ม. ยุ. อิเม ปาฐา นตฺถิ ฯ
       |๑.๓๔| ทสสหสฺสํ ๑- อติกฺกมฺม        จงฺกมํ มาปยี ชิโน
                   สพฺพโสวณฺณมยา ปสฺเส      จงฺกเม รตนามเย ฯ
       |๑.๓๕| ตุลาสงฺฆาฏานุวตฺตา ๒-       โสวณฺณผลกตฺถกา
                   เวทิกา สพฺพโสวณฺณา         ทุภโต ปสฺเสสุ นิมฺมิตา ฯ
       |๑.๓๖| มณิมุตฺตาวาลุกากิณฺโณ       นิมฺมิโต รตนามโย
                  โอภาเสติ ทิสา สพฺพา           สตรํสีว อุคฺคโต ฯ
       |๑.๓๗| ตสฺมึ จงฺกมเน ธีโร                ทฺวตฺตึสวรลกฺขโณ
                   วิโรจมาโน สมฺพุทฺโธ            จงฺกเม จงฺกมี ชิโน ฯ
       |๑.๓๘| ทิพฺพํ มนฺทารวํ ปุปฺผํ            ปทุมํ ปาริฉตฺตกํ
                   จงฺกมเน โอกิรนฺติ                สพฺเพ เทวา สมาคตา ฯ
       |๑.๓๙| ปสฺสนฺติ ตํ เทวสงฺฆา            ทสสหสฺสี สมาคตา
                   นมสฺสมานา นิปตนฺติ          ตุฏฺฐหฏฺฐา ปโมทิตา ฯ
       |๑.๔๐| ตาวตึสา จ ยามา จ              ตุสิตา จาปิ เทวตา
                  นิมฺมานรติโน เทวา               เย เทวา วสวตฺติโน
                  อุทคฺคจิตฺตา สุมนา               ปสฺสนฺติ โลกนายกํ ฯ
              |๑.๔๑| สเทวคนฺธพฺพมนุสฺสรกฺขสา
                          นาคา สุปณฺณา อถวาปิ กินฺนรา
                          ปสฺสนฺติ ตํ โลกหิตานุกมฺปกํ
                          นเภว อจฺจุคฺคตจนฺทมณฺฑลํ ฯ
@เชิงอรรถ: ๑ ม. ยุ. ... ทสสหสฺสี ฯ ๒ ม. ยุ. ... นุวคฺคา ฯ
       |๑.๔๒| อาภสฺสรา สุภกิณฺหา            เวหปฺผลา อกนิฏฺฐา จ
                   สุสุทฺธสุกฺก วตฺถวสนา          ติฏฺฐนฺติ ปญฺชลีกตา ฯ
              |๑.๔๓| มุญฺจนฺติ ปุปฺผํ ปน ปญฺจวณฺณิกํ
                          มนฺทารวํ ๑- จนฺทนจุณฺณมิสฺสกํ ๒-
                          ภมนฺติ เจลานิ จ อมฺพเร ตทา
                          อโห ชิโน โลกหิตานุกมฺปโก ฯ
       |๑.๔๔| ตุวํ สตฺถา จ เกตุ จ                ธโช ยูโป จ ปาณินํ
                  ปรายโน ปติฏฺฐา จ               ทีโป จ ทิปทุตฺตโม ฯ
       |๑.๔๕| ทสสหสฺสิโลกธาตุยา            เทวตาโย มหิทฺธิกา
                  ปริวาเรตฺวา นมสฺสนฺติ           ตุฏฺฐหฏฺฐา ปโมทิตา ฯ
       |๑.๔๖| เทวตา เทวกญฺญา จ             ปสนฺนา ตุฏฺฐมานสา
                  ปญฺจวณฺณิกปุปฺเผหิ              ปูชยนฺติ นราสภํ ฯ
       |๑.๔๗| ปสฺสนฺติ ตํ เทวสงฺฆา            ปสนฺนา ตุฏฺฐมานสา
                  ปญฺจวณฺณิกปุปฺเผหิ             ปูชยนฺติ นราสภํ ฯ
       |๑.๔๘| อโห อจฺฉริยํ โลเก                 อพฺภูตํ โลมหํสนํ
                  น เมทิสํ ภูตปุพฺพํ                 อจฺเฉรํ โลมหํสนํ ฯ
       |๑.๔๙| สกสกมฺหิ ภวเน                    นิสีทิตฺวาน เทวตา
                  หสนฺติ ตา มหาหสิตํ             ทิสฺวานจฺเฉรกํ นเภ ฯ
       |๑.๕๐| อากาสฏฺฐา จ ภุมฺมฏฺฐา        ติโณสธินิวาสิโน ๓-
                  กตญฺชลี นมสฺสนฺติ                  ตุฏฺฐหฏฺฐา ปโมทิตา ฯ
@เชิงอรรถ: ๑ ยุ. มนฺทาวรํ ฯ ๒ ม. ยุ. ..มิสฺสิตํ ฯ อิโต ปรํ อีทิสเมว ฯ
@๓ ม. ยุ. ติณปนฺถนิวาสิโน ฯ
       |๑.๕๑| เยปิ ทีฆายุกา นาคา             ปุญฺญวนฺโต มหิทฺธิกา
                  ปโมทิตา นมสฺสนฺติ              ปูชยนฺติ นรุตฺตมํ ฯ
       |๑.๕๒| สงฺคีติโย ปวตฺตนฺติ               อมฺพเร อนิลญฺชเส
                  จมฺมนทฺธานิ วาเทนฺติ            ทิสฺวานจฺเฉรกํ นเภ ฯ
       |๑.๕๓| สงฺขา จ ปณวา เจว               อโถปิ เทณฺฑิมา พหู
                  อนฺตลิกฺขสฺมึ วชฺชยนฺติ           ทิสฺวานจฺเฉรกํ นเภ ฯ
       |๑.๕๔| อพฺภูโต วต โน อชฺช              อุปฺปชฺชิ โลมหํสโน
                  ธุวมตฺถสิทฺธึ ลภาม               ขโณ โน ปฏิปาฏิโต ฯ
       |๑.๕๕| พุทฺโธติ เตสํ สุตฺวาน             ปีติ อุปฺปชฺชิ ตาวเท
                  พุทฺโธ พุทฺโธติ กถยนฺตา        ติฏฺฐนฺติ ปญฺชลีกตา ฯ
       |๑.๕๖| หิงฺการํ ๑- สาธุการญฺจ         อุกฺกุฏฺฐิสมฺปนาทนํ ๒-
                  ปชา จ วิวิธา คคเน                วตฺตนฺติ ปญฺชลีกตา ฯ
              |๑.๕๗| คายนฺติ เสเฬนฺติ จ วาทยนฺติ จ
                          ภุชานิปฺโผเฏนฺติ ๓- จ นจฺจยนฺติ จ
                          มุญฺจนฺติ ปุปฺผํ ปน ปญฺจวณฺณิกํ
                          มนฺทารวํ จนฺทนจุณฺณมิสฺสกํ ฯ
       |๑.๕๘| ยถา ตุยฺหํ มหาวีร                 ปาเทสุ จกฺกลกฺขณํ
                   ธชํ วชิรปฏากํ                      วฑฺฒมานงฺกุสาปิตํ ฯ
       |๑.๕๙| รูเป สีเล สมาธิมฺหิ                ปญฺญาย จ อสาทิโส
                   วิมุตฺติยา อสมสโม               ธมฺมจกฺกปฺปวตฺตเน ฯ
@เชิงอรรถ: ๑ ม. หิงฺการา ฯ ยุ. ภิงฺการํ ฯ ๒ ม. .. สมฺปหํสนํ ฯ ยุ. .. สมฺปสาทนํ ฯ
@๓ ม. ยุ. โปเฐนฺติ ฯ
       |๑.๖๐| ทสนาคพลํ กาเย                  ตุยฺหํ ปากติกํ พลํ
                   อิทฺธิพเลน อสโม                 ธมฺมจกฺกปฺปวตฺตเน ฯ
       |๑.๖๑| เอวํ สพฺพคุณูเปตํ                 สพฺพงฺค สมุปาคตํ
                   มหามุนึ การุณิกํ                  โลกนาถํ นมสฺสถ ฯ
       |๑.๖๒| อภิวาทนํ โถมนญฺจ              วนฺทนญฺจ ปสํสนํ
                   นมสฺสนญฺจ ปูชญฺจ              สพฺพํ อรหสี ตุวํ ฯ
       |๑.๖๓| เย เกจิ โลเก วนฺทเนยฺยา       วนฺทนํ อรหนฺติ เย
                   สพฺพเสฏฺโฐ มหาวีร              สทิโส เต น วิชฺชติ ฯ
       |๑.๖๔| สารีปุตฺโต มหาปญฺโญ          สมาธิชฺฌานโกวิโท
                  คิชฺฌกูเฏ ฐิโตเยว                  ปสฺสติ โลกนายกํ ฯ
       |๑.๖๕| สุผุลฺลํ สาลราชํว                   จนฺทํว คคเน ยถา
                  มชฺฌนฺติเกว สุริยํ                  โอโลเกติ นราสภํ ฯ
       |๑.๖๖| ชลนฺตํ ทีปรุกฺขํว                    ตรุณสุริยํว อุคฺคตํ
                  พฺยามปฺปภานุรญฺชิตํ             ปสฺสติ โลกนายกํ ฯ
       |๑.๖๗| ปญฺจนฺนํ ภิกฺขุสตานํ             กตกิจฺจาน ตาทินํ
                  ขีณาสวานํ วิมลานํ               ขเณน สนฺนิปาตยิ ฯ
       |๑.๖๘| โลกปฺปสาทนํ นาม               ปาฏิหีรํ นิทสฺสยิ
                  อเมฺหปิ ตตฺถ คนฺตฺวาน          วนฺทิสฺสาม มยํ ชินํ ฯ
       |๑.๖๙| เอถ สพฺเพ คมิสฺสาม             ปุจฺฉิสฺสาม มยํ ชินํ
                  กงฺขํ วิโนทยิสฺสาม                ปสฺสิตฺวา โลกนายกํ ฯ
       |๑.๗๐| สาธูติ เต ปฏิสฺสุตฺวา             นิปกา สํวุตินฺทฺริยา
                  ปตฺตจีวรมาทาย                   ตรมานา อุปาคมุ ํ ฯ
       |๑.๗๑| ขีณาสเวหิ วิมเลหิ                ทนฺเตหิ อุตฺตเม ทเม
                  สารีปุตฺโต มหาปญฺโญ          อิทฺธิยา อุปสงฺกมิ ฯ
       |๑.๗๒| เตหิ ภิกฺขูหิ ปริวุโต                สารีปุตฺโต มหาคณี
                  ลิฬนฺโต ๑- เทโวว คคเน        อิทฺธิยา อุปสงฺกมิ ฯ
       |๑.๗๓| อุกฺกาสิตญฺจ ขิปิตญฺจ          อชฺฌุเปกฺขิตฺวาน สุพฺพตา
                  สคารวา สปฺปติสฺสา              สมฺพุทฺธํ อุปสงฺกมุ ํ ฯ
       |๑.๗๔| อุปสงฺกมิตฺวา ปสฺสนฺติ          สยมฺภุ ํ โลกนายกํ
                  นเภ อจฺจุคฺคตํ วีรํ                  จนฺทํว คคเน ยถา ฯ
       |๑.๗๕| ชลนฺตํ ทีปรุกฺขํว                   วิชฺชุว คคเน ยถา
                  มชฺฌนฺติเกว สุริยํ                  ปสฺสนฺติ โลกนายกํ ฯ
       |๑.๗๖| ปญฺจภิกฺขุสตา สพฺเพ            ปสฺสนฺติ โลกนายกํ
                  รหทมิว วิปฺปสนฺนํ                 สุผุลฺลํ ปทุมํ ยถา ฯ
       |๑.๗๗| อญฺชลึ ปคฺคเหตฺวาน             ตุฏฺฐหฏฺฐา ปโมทิตา
                      นมสฺสมานา นิปตนฺติ        สตฺถุโน จกฺกลกฺขเณ ฯ
       |๑.๗๘| สารีปุตฺโต มหาปญฺโญ          โกรณฺฑสมสาทิโส
                  สมาธิชฺฌานกุสโล                วนฺทติ โลกนายกํ ฯ
       |๑.๗๙| คชฺชิโต กาลเมโฆว               นีลุปฺปลสมสาทิโส
                  อิทฺธิพเลน อสโม                  โมคฺคลฺลาโน มหิทฺธิโก ฯ
@เชิงอรรถ: ๑ ม. ยุ. ลฬนฺโต ฯ
       |๑.๘๐| มหากสฺสปเถโรปิ                 อุคฺคตกนกสนฺนิโภ
                  ธูตคุเณ อคฺคนิกฺขิตฺโต            โถมิโต สตฺถุวณฺณิโต ฯ
       |๑.๘๑| ทิพฺพจกฺขูน โย อคฺโค            อนุรุทฺโธ มหาคณี
                  ญาติเสฏฺโฐ ภควโต               อวิทูเรว ติฏฺฐติ ฯ
       |๑.๘๒| อาปตฺติอนาปตฺติยา              สเตกิจฺฉาย โกวิโท
                  วินเย อคฺคนิกฺขิตฺโต               อุปาลิ สตฺถุวณฺณิโต ฯ
       |๑.๘๓| สุขุมนิปุณตฺถปฏิวิทฺโธ          กถิกานํ ปวโร คณี
                  อิสิ มนฺตานิยา ปุตฺโต            ปุณฺโณ นามาติ วิสฺสุโต ฯ
       |๑.๘๔| เอเตสํ จิตฺตมญฺญาย             โอปมฺมกุสโล มุนิ
                  กงฺขจฺเฉโท มหาวีโร               กเถสิ อตฺตโน คุณํ ฯ
       |๑.๘๕| จตฺตาโร เต อสงฺเขยฺยา          โกฏิ เยสํ น นายติ
                  สตฺตกาโย จ อากาโส            จกฺกวาฬา อนนฺตกา
       |๑.๘๖| พุทฺธญาณํ อปฺปเมยฺยํ           น สกฺกา เอเต วิชานิตุ ํ ฯ
                  กิเมตํ อจฺฉริยํ โลเก               ยํ เม อิทฺธิวิกุพฺพนํ
       |๑.๘๗| อญฺเญ พหู อจฺฉริยา             อพฺภูตา โลมหํสนา ฯ
                  ยทาหํ ตุสิเต กาเย                สนฺตุสิโต นามหํ ตทา
       |๑.๘๘| ทสสหสฺสี สมาคมฺม              ยาจนฺติ อญฺชลี มมํ ฯ
                  กาโลยํ เต มหาวีร                 อุปฺปชฺช มาตุกุจฺฉิยํ
       |๑.๘๙| สเทวกํ ตารยนฺโต                 พุชฺฌสฺสุ อมตํปทํ ฯ
                  ตุสิตา กายา จวิตฺวาน            ยทา โอกฺกมิ กุจฺฉิยํ
       |๑.๙๐| ทสสหสฺสี โลกธาตุ               กมฺปติ ๑- ธรณี ตทา ฯ
                  ยทาหํ มาตุกุจฺฉิโต                สมฺปชาโนว นิกฺขมึ
       |๑.๙๑| สาธุการํ ปวตฺตนฺติ                ทสสหสฺสี ปกมฺปถ ฯ
                  โอกฺกนฺติ เม สโม นตฺถิ          ชาติโต อภินิกฺขเม
       |๑.๙๒| สมฺโพธิยํ อหํ เสฏฺโฐ             ธมฺมจกฺกปฺปวตฺตเน ฯ
                  อโห อจฺฉริยํ โลเก                 พุทฺธานํ คุณมหนฺตตา
       |๑.๙๓| ทสสหสฺสี โลกธาตุ               ฉปฺปการํ ปกมฺปถ
                  โอภาโส จ มหา อาสิ             อจฺเฉรํ โลมหํสนํ ฯ
       |๑.๙๔| ภควา จ ตมฺหิ สมเย              โลกเชฏฺโฐ นราสโภ
                  สเทวกํ ทสฺสยนฺโต                อิทฺธิยา จงฺกมี ชิโน ฯ
       |๑.๙๕| จงฺกเม จงฺกมนฺโตว                กเถสิ โลกนายโก
                  อนฺตรา น นิวตฺเตติ                จตุหตฺเถ จงฺกเม ยถา ฯ
       |๑.๙๖| สารีปุตฺโต มหาปญฺโญ          สมาธิชฺฌานโกวิโท
                  ปญฺญาย ปารมิปฺปตฺโต         ปุจฺฉติ โลกนายกํ ฯ
       |๑.๙๗| กีทิโส เต มหาวีร                  อภินีหาโร นรุตฺตม
                  กิมฺหิ กาเล ตยา วีร               ปตฺถิตา โพธิมุตฺตมา ฯ
       |๑.๙๘| ทานํ สีลญฺจ เนกฺขมฺมํ           ปญฺญาวิริยญฺจ กีทิสํ
                  ขนฺติสจฺจมธิฏฺฐานํ                 เมตฺตูเปกฺขา จ กีทิสา ฯ
@เชิงอรรถ: ๑ ม. ยุ. กมฺปิตฺถ ฯ
       |๑.๙๙| ทสปารมี มหาวีร                  กีทิสา โลกนายก
                   กถํ อุปปารมี ปุณฺณา           ปรมตฺถปารมี กถํ ฯ
       |๑.๑๐๐| ๑- [กติกมฺมอธิฏฺฐาย         อธิปติ จ กีทิสา
                     กีทิสา ปารมี โหนฺติ            ธีรา โลกสฺมิ กีทิสา ฯ
       |๑.๑๐๑| เมตฺตา กรุณา มุทิตา          อุเปกฺขา จาปิ กีทิสา
                     กีทิสํ พุทฺธธมฺมานํ             เกวลํ ปริปูรย]
       |๑.๑๐๒| ตสฺส ปุฏฺโฐ วิยากาสิ          กรวีกมธุรคิโร
                     นิพฺพาปยนฺโต หทยํ           หาสยนฺโต สเทวกํ ฯ
           |๑.๑๐๓| อตีตพุทฺธาน ชินาน เทสิตํ
                         นิกีฬิตํ พุทฺธปรมฺปราคตํ
                         ปุพฺเพ นิวาสานุคตาย พุทฺธิยา
                         ปกาสยี โลกหิตํ สเทวเก ฯ
       |๑.๑๐๔| ปีติปาโมชฺชชนนํ                โสกสลฺลวิโนทนํ
                     สพฺพสมฺปตฺติปฏิลาภํ         จิตฺตํ กตฺวา สุณาถ เม ฯ
       |๑.๑๐๕| มทนิมฺมทนํ โสกนุทํ           สํสารปริโมจนํ
                     สพฺพทุกฺขกฺขยํ มคฺคํ           สกฺกจฺจํ ปฏิปชฺชถาติ ฯ
                                       รตนจงฺกมนกณฺโฑ นิฏฺฐิโต ฯ
@เชิงอรรถ: ๑ ม. ยุ. อิเม ปาฐา นตฺถิ ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๓๓ หน้าที่ ๔๐๓-๔๑๕.
http://84000.org/tipitaka/read/pali_item.php?book=33.2&item=1&items=1
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/read/pali_item.php?book=33.2&item=1&items=1&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item.php?book=33.2&item=1&items=1
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem.php?book=33.2&item=1&items=1
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=33.2&i=1
             สารบัญพระไตรปิฎกเล่มที่ ๓๓
http://84000.org/tipitaka/read/?index_33