บาลี ข้อ 11 พระไตรปิฎกเล่มที่ 33

                                               ๒. สีลปารมิตา
                                             ปฐมํ สีลวนาคจริยํ
     [๑๑]   |๑๑.๑| ยทา อโหสึ ปวเน            กุญฺชโร มาตุโปสโก
                  น ตทา อตฺถิ มหิยา               คุเณน มม สาทิโส ฯ
       |๑๑.๒| ปวเน ทิสฺวา วนจโร               รญฺโญ มํ ปฏิเวทยิ
                  ตวานุจฺฉโว มหาราช               คโช อสติ ^๑- กานเน ฯ
       |๑๑.๓| น ตสฺส ปริกฺขายตฺโถ             นปิ อาฬฺหกกาสุยา ^๒-
                  สมาคหิเต โสณฺฑาย              สยเมว อิเธหิติ ฯ
       |๑๑.๔| ตสฺส ตํ วจนํ สุตฺวา                ราชาปิ ตุฏฺฐมานโส
                   เปเสสิ หตฺถิทมกํ                  เฉกาจริยํ สุสิกฺขิตํ ฯ
       |๑๑.๕| คนฺตฺวา โส หตฺถิทมโก           อทฺทส ปทุมสฺสเร
                   ภิสมูฬาลํ ^๓- อุทฺธรนฺตํ          ยาปนตฺถาย มาตุยา ฯ
       |๑๑.๖| วิญฺญาย เม สีลคุณํ               ลกฺขณํ อุปธารยิ
                  เอหิ ปุตฺตาติ วตฺวาน              โสณฺฑาย มม อคฺคหิ ฯ
       |๑๑.๗| ยํ เม ตทา ปากติกํ                สรีรานุคตํ พลํ
                  อชฺช นาคสหสฺสานํ               พเลน สมสาทิสํ ฯ
       |๑๑.๘| ยทิหนฺเตสํ ปกุปฺเปยฺยํ           อุเปตํ ^๔- คหณาย มํ
                  ปฏิพโล ภเว เตสํ                   ยาว รชฺชมฺปิ มานุสํ ฯ
@เชิงอรรถ: ^๑ ม. ยุ. วสติ ฯ ^๒ ม. ยุ. อาฬก... ฯ ^๓ ยุ. ภิสมูลํ ฯ ^๔ ม. อุเปตานํ ฯ
       |๑๑.๙| อปิจาหํ สีลรกฺขาย                สีลปารมิปูริยา
                   น กโรมิ จิตฺเต อญฺญถตฺตํ     ปกฺขิปนฺตํ มมาฬฺหเก ^๑- ฯ
       |๑๑.๑๐| ยทิ เต มํ ตตฺถ โกเฏยฺยุํ       ผรสูหิ โตมเรหิ จ
                     เนว เตสํ ปกุปฺเปยฺยํ              สีลขณฺฑภยา มมาติ ฯ
                                          สีลวนาคจริยํ ^๒- ปฐมํ ฯ

เนื้อความพระไตรปิฎกฉบับภาษาบาลีอักษรไทย เล่มที่ ๓๓ หน้าที่ ๕๖๘-๕๖๙. https://84000.org/tipitaka/read/pali_item.php?book=33.3&item=11&items=1 อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- https://84000.org/tipitaka/read/pali_item.php?book=33.3&item=11&items=1&mode=bracket อ่านเทียบพระไตรปิฎกฉบับภาษาบาลีอักษรโรมัน :- https://84000.org/tipitaka/read/roman_item.php?book=33.3&item=11&items=1 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=33.3&item=11&items=1 ศึกษาอรรถกถานี้ได้ที่ :- https://84000.org/tipitaka/attha/attha.php?b=33.3&i=11 สารบัญพระไตรปิฎกเล่มที่ ๓๓ https://84000.org/tipitaka/read/?index_33 https://84000.org/tipitaka/english/?index_33