พระไตรปิฎกเล่มที่ ๓๕ ภาษาบาลี อักษรไทย
พระอภิธรรมปิฎกเล่มที่ ๒ อภิ. วิภงฺโค

                            อภิธมฺมปิฏเก วิภงฺโค
                                    --------
              นโม ตสฺส ภควโต อรหโต สมฺมาสมฺพุทฺธสฺส
                                  ขนฺธวิภงฺโค
     [๑]   ปญฺจกฺขนฺธา   รูปกฺขนฺโธ   เวทนากฺขนฺโธ   สญฺญากฺขนฺโธ
สงฺขารกฺขนฺโธ วิญฺญาณกฺขนฺโธ ฯ
     [๒]   ตตฺถ   กตโม   รูปกฺขนฺโธ   ยงฺกิญฺจิ   รูปํ  อตีตานาคต-
ปจฺจุปฺปนฺนํ   อชฺฌตฺตํ   วา   พหิทฺธา   วา  โอฬาริกํ  วา  สุขุมํ  วา
หีนํ   วา   ปณีตํ  วา  ยํ  ทูเร  สนฺติเก  วา  ตเทกชฺฌํ  อภิสญฺญูหิตฺวา
อภิสงฺขิปิตฺวา อยํ วุจฺจติ รูปกฺขนฺโธ ฯ
     [๓]   ตตฺถ  กตมํ  รูปํ  อตีตํ  ยํ  รูปํ  อตีตํ  นิรุทฺธํ วิคตํ วิปริณตํ
อตฺถงฺคตํ     อพฺภตฺถงฺคตํ    อุปฺปชฺชิตฺวา    วิคตํ    อตีตํ    อตีตํเสน
สงฺคหิตํ     จตฺตาโร     จ     มหาภูตา     จตุนฺนญฺจ    มหาภูตานํ
อุปาทาย   รูปํ   อิทํ  วุจฺจติ  รูปํ  อตีตํ  ฯ  ตตฺถ  กตมํ  รูปํ  อนาคตํ
ยํ   รูปํ   อชาตํ   อภูตํ   อสญฺชาตํ   อนิพฺพตฺตํ  อนภินิพฺพตฺตํ  อปาตุภูตํ
อนุปฺปนฺนํ    อสมุปฺปนฺนํ    อนุฏฺฐิตํ    อสมุฏฺฐิตํ   อนาคตํ   อนาคตํเสน
สงฺคหิตํ   จตฺตาโร   จ   มหาภูตา   จตุนฺนญฺจ   มหาภูตานํ   อุปาทาย
รูปํ   อิทํ   วุจฺจติ   รูปํ   อนาคตํ   ฯ   ตตฺถ  กตมํ  รูปํ  ปจฺจุปฺปนฺนํ
ยํ    รูปํ    ชาตํ    ภูตํ    สญฺชาตํ   นิพฺพตฺตํ   อภินิพฺพตฺตํ   ปาตุภูตํ
อุปฺปนฺนํ   สมุปฺปนฺนํ   อุฏฺฐิตํ   สมุฏฺฐิตํ   ปจฺจุปฺปนฺนํ   ปุจฺจุปฺปนฺนํเสน
สงฺคหิตํ   จตฺตาโร   จ   มหาภูตา   จตุนฺนญฺจ   มหาภูตานํ   อุปาทาย
รูปํ อิทํ วุจฺจติ รูปํ ปจฺจุปฺปนฺนํ ฯ
     [๔]   ตตฺถ   กตมํ  รูปํ  อชฺฌตฺตํ  ยํ  รูปํ  เตสํ  เตสํ  สตฺตานํ
อชฺฌตฺตํ    ปจฺจตฺตํ    นิยกํ    ปาฏิปุคฺคลิกํ   อุปาทินฺนํ   จตฺตาโร   จ
มหาภูตา   จตุนฺนญฺจ   มหาภูตานํ   อุปาทาย   รูปํ   อิทํ   วุจฺจติ  รูปํ
อชฺฌตฺตํ  ฯ  ตตฺถ  กตมํ  รูปํ  พหิทฺธา  ยํ  รูปํ  เตสํ  เตสํ  ปรสตฺตานํ
ปรปุคฺคลานํ    อชฺฌตฺตํ    ปจฺจตฺตํ    นิยกํ    ปาฏิปุคฺคลิกํ    อุปาทินฺนํ
จตฺตาโร   จ   มหาภูตา   จตุนฺนญฺจ   มหาภูตานํ   อุปาทาย  รูปํ  อิทํ
วุจฺจติ รูปํ พหิทฺธา ฯ
     [๕]   ตตฺถ  กตมํ  รูปํ  โอฬาริกํ  จกฺขายตนํ ฯเปฯ โผฏฺฐพฺพายตนํ
อิทํ    วุจฺจติ    รูปํ    โอฬาริกํ    ฯ    ตตฺถ   กตมํ   รูปํ   สุขุมํ
อิตฺถินฺทฺริยํ ฯเปฯ กพฬิงฺกาโร อาหาโร อิทํ วุจฺจติ รูปํ สุขุมํ ฯ
     [๖]   ตตฺถ   กตมํ   รูปํ   หีนํ   ยํ  รูปํ  เตสํ  เตสํ  สตฺตานํ
อุญฺญาตํ   อวญฺญาตํ   หีฬิตํ   ปริภูตํ   อจิตีกตํ   หีนํ   หีนมตํ  หีนสมฺมตํ
อนิฏฺฐํ     อกนฺตํ     อมนาปํ     รูปา     สทฺทา    คนฺธา    รสา
โผฏฺฐพฺพา   อิทํ  วุจฺจติ  รูปํ  หีนํ  ฯ  ตตฺถ  กตมํ  รูปํ  ปณีตํ  ยํ  รูปํ
เตสํ   เตสํ   สตฺตานํ   อนุญฺญาตํ   อนวญฺญาตํ  อหีฬิตํ  อปริภูตํ  จิตีกตํ
ปณีตํ    ปณีตมตํ    ปณีตสมฺมตํ   อิฏฺฐํ   กนฺตํ   มนาปํ   รูปา   สทฺทา
คนฺธา   รสา   โผฏฺฐพฺพา   อิทํ   วุจฺจติ   รูปํ  ปณีตํ  ฯ  ตํ  ตํ  วา
ปน รูปํ อุปาทาย อุปาทาย รูปํ หีนํ ปณีตํ ทฏฺฐพฺพํ ฯ
     [๗]   ตตฺถ   กตมํ   รูปํ  ทูเร  อิตฺถินฺทฺริยํ  ฯเปฯ  กพฬิงฺกาโร
อาหาโร   ยํ   วา   ปนญฺญมฺปิ   อตฺถิ   รูปํ   อนาสนฺเน  อนุปกฺกฏฺเฐ
ทูเร   อสนฺติเก  อิทํ  วุจฺจติ  รูปํ  ทูเร  ฯ  ตตฺถ  กตมํ  รูปํ  สนฺติเก
จกฺขายตนํ   ฯเปฯ   โผฏฺฐพฺพายตนํ   ยํ   วา   ปนญฺญมฺปิ   อตฺถิ  รูปํ
อาสนฺเน   อุปกฺกฏฺเฐ   อวิทูเร  สนฺติเก  อิทํ  วุจฺจติ  รูปํ  สนฺติเก  ฯ
ตํ ตํ วา ปน รูปํ อุปาทาย อุปาทาย รูปํ ทูเร สนฺติเก ทฏฺฐพฺพํ ฯ
     [๘]   ตตฺถ  กตโม  เวทนากฺขนฺโธ  ยากาจิ  เวทนา อตีตานาคต-
ปจฺจุปฺปนฺนา  อชฺฌตฺตา  วา  พหิทฺธา  วา  โอฬาริกา  วา  สุขุมา  วา
หีนา  วา  ปณีตา  วา  ยา  ทูเร  สนฺติเก  วา  ตเทกชฺฌํ อภิสญฺญูหิตฺวา
อภิสงฺขิปิตฺวา อยํ วุจฺจติ เวทนากฺขนฺโธ ฯ
     [๙]   ตตฺถ  กตมา  เวทนา  อตีตา  ยา  เวทนา  อตีตา นิรุทฺธา
วิคตา    วิปริณตา    อตฺถงฺคตา   อพฺภตฺถงฺคตา   อุปฺปชฺชิตฺวา   วิคตา
อตีตา  อตีตํเสน  สงฺคหิตา  สุขา  เวทนา  ทุกฺขา  เวทนา  อทุกฺขมสุขา
เวทนา  อยํ  วุจฺจติ  เวทนา  อตีตา  ฯ  ตตฺถ  กตมา เวทนา อนาคตา
ยา   เวทนา   อชาตา   อภูตา   อสญฺชาตา  อนิพฺพตฺตา  อนภินิพฺพตฺตา
อปาตุภูตา     อนุปฺปนฺนา     อสมุปฺปนฺนา     อนุฏฺฐิตา     อสมุฏฺฐิตา
อนาคตา     อนาคตํเสน     สงฺคหิตา     สุขา    เวทนา    ทุกฺขา
เวทนา   อทุกฺขมสุขา   เวทนา   อยํ   วุจฺจติ   เวทนา  อนาคตา  ฯ
ตตฺถ   กตมา   เวทนา   ปจฺจุปฺปนฺนา   ยา   เวทนา   ชาตา   ภูตา
สญฺชาตา    นิพฺพตฺตา   อภินิพฺพตฺตา   ปาตุภูตา   อุปฺปนฺนา   สมุปฺปนฺนา
อุฏฺฐิตา    สมุฏฺฐิตา    ปจฺจุปฺปนฺนา   ปจฺจุปฺปนฺนํเสน   สงฺคหิตา   สุขา
เวทนา   ทุกฺขา   เวทนา   อทุกฺขมสุขา  เวทนา  อยํ  วุจฺจติ  เวทนา
ปจฺจุปฺปนฺนา ฯ
     [๑๐]   ตตฺถ  กตมา  เวทนา  อชฺฌตฺตา  ยา  เวทนา  เตสํ เตสํ
สตฺตานํ   อชฺฌตฺตํ   ปจฺจตฺตํ   นิยกา   ปาฏิปุคฺคลิกา   อุปาทินฺนา  สุขา
เวทนา   ทุกฺขา   เวทนา   อทุกฺขมสุขา  เวทนา  อยํ  วุจฺจติ  เวทนา
อชฺฌตฺตา  ฯ  ตตฺถ  กตมา  เวทนา  พหิทฺธา  ยา  เวทนา  เตสํ  เตสํ
ปรสตฺตานํ    ปรปุคฺคลานํ    อชฺฌตฺตํ   ปจฺจตฺตํ   นิยกา   ปาฏิปุคฺคลิกา
อุปาทินฺนา   สุขา   เวทนา   ทุกฺขา   เวทนา   อทุกฺขมสุขา   เวทนา
อยํ วุจฺจติ เวทนา พหิทฺธา ฯ
     [๑๑]   ตตฺถ  กตมา  เวทนา  โอฬาริกา  สุขุมา  อกุสลา เวทนา
โอฬาริกา    กุสลาพฺยากตา   เวทนา   สุขุมา   กุสลากุสลา   เวทนา
โอฬาริกา   อพฺยากตา   เวทนา   สุขุมา   ทุกฺขา  เวทนา  โอฬาริกา
สุขา    จ   อทุกฺขมสุขา   จ   เวทนา   สุขุมา   สุขทุกฺขา   เวทนา
โอฬาริกา    อทุกฺขมสุขา    เวทนา   สุขุมา   อสมาปนฺนสฺส   เวทนา
โอฬาริกา   สมาปนฺนสฺส   เวทนา  สุขุมา  สาสวา  เวทนา  โอฬาริกา
อนาสวา  เวทนา  สุขุมา  ตํ  ตํ  วา  ปน  เวทนํ  อุปาทาย  อุปาทาย
เวทนา โอฬาริกา สุขุมา ทฏฺฐพฺพา ฯ
     [๑๒]   ตตฺถ  กตมา  เวทนา  หีนา  ปณีตา  อกุสลา เวทนา หีนา
กุสลาพฺยากตา    เวทนา    ปณีตา    กุสลากุสลา    เวทนา    หีนา
อพฺยากตา  เวทนา  ปณีตา  ทุกฺขา  เวทนา  หีนา  สุขา  จ อทุกฺขมสุขา
จ   เวทนา   ปณีตา   สุขทุกฺขา   เวทนา  หีนา  อทุกฺขมสุขา  เวทนา
ปณีตา   อสมาปนฺนสฺส   เวทนา   หีนา   สมาปนฺนสฺส   เวทนา  ปณีตา
สาสวา   เวทนา   หีนา   อนาสวา  เวทนา  ปณีตา  ตํ  ตํ  วา  ปน
เวทนํ อุปาทาย อุปาทาย เวทนา หีนา ปณีตา ทฏฺฐพฺพา ฯ
     [๑๓]   ตตฺถ  กตมา  เวทนา ทูเร อกุสลา เวทนา กุสลาพฺยากตาหิ
เวทนาหิ   ทูเร   กุสลาพฺยากตา   เวทนา   อกุสลาย  เวทนาย  ทูเร
กุสลา   เวทนา   อกุสลาพฺยากตาหิ   เวทนาหิ   ทูเร  อกุสลาพฺยากตา
เวทนา   กุสลาย   เวทนาย   ทูเร  อพฺยากตา  เวทนา  กุสลากุสลาหิ
เวทนาหิ    ทูเร    กุสลากุสลา    เวทนา    อพฺยากตาย   เวทนาย
ทูเร  ทุกฺขา  เวทนา  สุขาย  จ  อทุกฺขมสุขาย  จ  เวทนาหิ ทูเร สุขา
จ   อทุกฺขมสุขา   จ  เวทนา  ทุกฺขาย  เวทนาย  ทูเร  สุขา  เวทนา
ทุกฺขาย   จ  อทุกฺขมสุขาย  จ  เวทนาหิ  ทูเร  ทุกฺขา  จ  อทุกฺขมสุขา
จ   เวทนา   สุขาย  เวทนาย  ทูเร  อทุกฺขมสุขา  เวทนา  สุขทุกฺขาหิ
เวทนาหิ   ทูเร   สุขทุกฺขา   เวทนา   อทุกฺขมสุขาย   เวทนาย  ทูเร
อสมาปนฺนสฺส    เวทนา   สมาปนฺนสฺส   เวทนาย   ทูเร   สมาปนฺนสฺส
เวทนา     อสมาปนฺนสฺส     เวทนาย    ทูเร    สาสวา    เวทนา
อนาสวาย   เวทนาย   ทูเร   อนาสวา   เวทนา  สาสวาย  เวทนาย
ทูเร   อยํ   วุจฺจติ  เวทนา  ทูเร  ฯ  ตตฺถ  กตมา  เวทนา  สนฺติเก
อกุสลา  เวทนา  อกุสลาย  เวทนาย  สนฺติเก   กุสลา  เวทนา กุสลาย
เวทนาย   สนฺติเก  อพฺยากตา  เวทนา  อพฺยากตาย  เวทนาย  สนฺติเก
ทุกฺขา   เวทนา   ทุกฺขาย   เวทนาย   สนฺติเก  สุขา  เวทนา  สุขาย
เวทนาย    สนฺติเก   อทุกฺขมสุขา   เวทนา   อทุกฺขมสุขาย   เวทนาย
สนฺติเก    อสมาปนฺนสฺส   เวทนา   อสมาปนฺนสฺส   เวทนาย   สนฺติเก
สมาปนฺนสฺส   เวทนา  สมาปนฺนสฺส  เวทนาย  สนฺติเก  สาสวา  เวทนา
สาสวาย   เวทนาย   สนฺติเก  อนาสวา  เวทนา  อนาสวาย  เวทนาย
สนฺติเก  อยํ  วุจฺจติ  เวทนา  สนฺติเก  ฯ  ตํ ตํ วา ปน เวทนํ อุปาทาย
อุปาทาย เวทนา ทูเร สนฺติเก ทฏฺฐพฺพา ฯ
     [๑๔]   ตตฺถ     กตโม    สญฺญากฺขนฺโธ    ยากาจิ    สญฺญา
อตีตานาคตปจฺจุปฺปนฺนา    อชฺฌตฺตา    วา   พหิทฺธา   วา   โอฬาริกา
วา  สุขุมา  วา  หีนา  วา  ปณีตา  วา  ยา ทูเร สนฺติเก วา ตเทกชฺฌํ
อภิสญฺญูหิตฺวา อภิสงฺขิปิตฺวา อยํ วุจฺจติ สญฺญากฺขนฺโธ ฯ
     [๑๕]   ตตฺถ  กตมา  สญฺญา  อตีตา  ยา  สญฺญา  อตีตา  นิรุทฺธา
วิคตา    วิปริณตา    อตฺถงฺคตา   อพฺภตฺถงฺคตา   อุปฺปชฺชิตฺวา   วิคตา
อตีตา   อตีตํเสน   สงฺคหิตา   จกฺขุสมฺผสฺสชา   สญฺญา   โสตสมฺผสฺสชา
สญฺญา      ฆานสมฺผสฺสชา      สญฺญา     ชิวฺหาสมฺผสฺสชา     สญฺญา
กายสมฺผสฺสชา   สญฺญา   มโนสมฺผสฺสชา   สญฺญา   อยํ   วุจฺจติ  สญฺญา
อตีตา  ฯ  ตตฺถ  กตมา  สญฺญา  อนาคตา  ยา  สญฺญา  อชาตา  อภูตา
อสญฺชาตา     อนิพฺพตฺตา     อนภินิพฺพตฺตา    อปาตุภูตา    อนุปฺปนฺนา
อสมุปฺปนฺนา     อนุฏฺฐิตา     อสมุฏฺฐิตา     อนาคตา     อนาคตํเสน
สงฺคหิตา    จกฺขุสมฺผสฺสชา    สญฺญา   ฯเปฯ   มโนสมฺผสฺสชา   สญฺญา
อยํ วุจฺจติ สญฺญา อนาคตา ฯ
     {๑๕.๑}   ตตฺถ  กตมา  สญฺญา  ปจฺจุปฺปนฺนา  ยา  สญฺญา  ชาตา
ภูตา    สญฺชาตา    นิพฺพตฺตา    อภินิพฺพตฺตา    ปาตุภูตา    อุปฺปนฺนา
สมุปฺปนฺนา     อุฏฺฐิตา     สมุฏฺฐิตา     ปจฺจุปฺปนฺนา    ปจฺจุปฺปนฺนํเสน
สงฺคหิตา      จกฺขุสมฺผสฺสชา     สญฺญา     ฯเปฯ     มโนสมฺผสฺสชา
สญฺญา อยํ วุจฺจติ สญฺญา ปจฺจุปฺปนฺนา ฯ
     [๑๖]   ตตฺถ  กตมา  สญฺญา  อชฺฌตฺตา  ยา  สญฺญา  เตสํ  เตสํ
สตฺตานํ    อชฺฌตฺตํ    ปจฺจตฺตํ    นิยกา    ปาฏิปุคฺคลิกา    อุปาทินฺนา
จกฺขุสมฺผสฺสชา   สญฺญา   ฯเปฯ   มโนสมฺผสฺสชา   สญฺญา   อยํ  วุจฺจติ
สญฺญา   อชฺฌตฺตา   ฯ   ตตฺถ   กตมา   สญฺญา   พหิทฺธา  ยา  สญฺญา
เตสํ    เตสํ    ปรสตฺตานํ   ปรปุคฺคลานํ   อชฺฌตฺตํ   ปจฺจตฺตํ   นิยกา
ปาฏิปุคฺคลิกา      อุปาทินฺนา     จกฺขุสมฺผสฺสชา     สญฺญา     ฯเปฯ
มโนสมฺผสฺสชา สญฺญา อยํ วุจฺจติ สญฺญา พหิทฺธา ฯ
     [๑๗]   ตตฺถ   กตมา  สญฺญา  โอฬาริกา  สุขุมา  ปฏิฆสมฺผสฺสชา
สญฺญา   โอฬาริกา   อธิวจนสมฺผสฺสชา   สญฺญา  สุขุมา  อกุสลา  สญฺญา
โอฬาริกา    กุสลาพฺยากตา    สญฺญา    สุขุมา   กุสลากุสลา   สญฺญา
โอฬาริกา   อพฺยากตา   สญฺญา   สุขุมา  ทุกฺขาย  เวทนาย  สมฺปยุตฺตา
สญฺญา   โอฬาริกา   สุขาย  จ  อทุกฺขมสุขาย  จ  เวทนาหิ  สมฺปยุตฺตา
สญฺญา     สุขุมา     สุขทุกฺขาหิ     เวทนาหิ    สมฺปยุตฺตา    สญฺญา
โอฬาริกา    อทุกฺขมสุขาย    เวทนาย    สมฺปยุตฺตา   สญฺญา   สุขุมา
อสมาปนฺนสฺส    สญฺญา    โอฬาริกา    สมาปนฺนสฺส    สญฺญา   สุขุมา
สาสวา    สญฺญา    โอฬาริกา   อนาสวา   สญฺญา   สุขุมา   ตํ   ตํ
วา   ปน   สญฺญํ   อุปาทาย   อุปาทาย   สญฺญา   โอฬาริกา   สุขุมา
ทฏฺฐพฺพา ฯ
     [๑๘]   ตตฺถ  กตมา  สญฺญา  หีนา  ปณีตา  อกุสลา  สญฺญา  หีนา
กุสลาพฺยากตา     สญฺญา     ปณีตา    กุสลากุสลา    สญฺญา    หีนา
อพฺยากตา   สญฺญา   ปณีตา   ทุกฺขาย   เวทนาย   สมฺปยุตฺตา   สญฺญา
หีนา   สุขาย   จ   อทุกฺขมสุขาย   จ   เวทนาหิ   สมฺปยุตฺตา  สญฺญา
ปณีตา     สุขทุกฺขาหิ     เวทนาหิ     สมฺปยุตฺตา     สญฺญา    หีนา
อทุกฺขมสุขาย    เวทนาย   สมฺปยุตฺตา   สญฺญา   ปณีตา   อสมาปนฺนสฺส
สญฺญา   หีนา   สมาปนฺนสฺส   สญฺญา   ปณีตา   สาสวา   สญฺญา  หีนา
อนาสวา   สญฺญา   ปณีตา  ตํ  ตํ  วา  ปน  สญฺญํ  อุปาทาย  อุปาทาย
สญฺญา หีนา ปณีตา ทฏฺฐพฺพา ฯ
     [๑๙]   ตตฺถ  กตมา  สญฺญา  ทูเร  อกุสลา สญฺญา กุสลาพฺยากตาหิ
สญฺญาหิ    ทูเร   กุสลาพฺยากตา   สญฺญา   อกุสลาย   สญฺญาย   ทูเร
กุสลา    สญฺญา   อกุสลาพฺยากตาหิ   สญฺญาหิ   ทูเร   อกุสลาพฺยากตา
สญฺญา      กุสลาย      สญฺญาย     ทูเร     อพฺยากตา     สญฺญา
กุสลากุสลาหิ    สญฺญาหิ    ทูเร    กุสลากุสลา   สญฺญา   อพฺยากตาย
สญฺญาย   ทูเร   ทุกฺขาย   เวทนาย   สมฺปยุตฺตา   สญฺญา   สุขาย  จ
อทุกฺขมสุขาย   จ   เวทนาหิ   สมฺปยุตฺตาหิ   สญฺญาหิ  ทูเร  สุขาย  จ
อทุกฺขมสุขาย   จ   เวทนาหิ   สมฺปยุตฺตา   สญฺญา   ทุกฺขาย  เวทนาย
สมฺปยุตฺตาย   สญฺญาย   ทูเร   สุขาย   เวทนาย   สมฺปยุตฺตา   สญฺญา
ทุกฺขาย   จ   อทุกฺขมสุขาย   จ  เวทนาหิ  สมฺปยุตฺตาหิ  สญฺญาหิ  ทูเร
ทุกฺขาย   จ   อทุกฺขมสุขาย   จ   เวทนาหิ  สมฺปยุตฺตา  สญฺญา  สุขาย
เวทนาย    สมฺปยุตฺตาย    สญฺญาย    ทูเร   อทุกฺขมสุขาย   เวทนาย
สมฺปยุตฺตา   สญฺญา   สุขทุกฺขาหิ   เวทนาหิ  สมฺปยุตฺตาหิ  สญฺญาหิ  ทูเร
สุขทุกฺขาหิ    เวทนาหิ   สมฺปยุตฺตา   สญฺญา   อทุกฺขมสุขาย   เวทนาย
สมฺปยุตฺตาย    สญฺญาย    ทูเร    อสมาปนฺนสฺส   สญฺญา   สมาปนฺนสฺส
สญฺญาย     ทูเร    สมาปนฺนสฺส    สญฺญา    อสมาปนฺนสฺส    สญฺญาย
ทูเร   สาสวา   สญฺญา   อนาสวาย   สญฺญาย  ทูเร  อนาสวา  สญฺญา
สาสวาย สญฺญาย ทูเร อยํ วุจฺจติ สญฺญา ทูเร ฯ
     {๑๙.๑}   ตตฺถ   กตมา   สญฺญา   สนฺติเก   อกุสลา   สญฺญา
อกุสลาย    สญฺญาย    สนฺติเก    กุสลา   สญฺญา   กุสลาย   สญฺญาย
สนฺติเก     อพฺยากตา    สญฺญา    อพฺยากตาย    สญฺญาย    สนฺติเก
ทุกฺขาย   เวทนาย   สมฺปยุตฺตา  สญฺญา  ทุกฺขาย  เวทนาย  สมฺปยุตฺตาย
สญฺญาย    สนฺติเก    สุขาย   เวทนาย   สมฺปยุตฺตา   สญฺญา   สุขาย
เวทนาย    สมฺปยุตฺตาย   สญฺญาย   สนฺติเก   อทุกฺขมสุขาย   เวทนาย
สมฺปยุตฺตา    สญฺญา   อทุกฺขมสุขาย   เวทนาย   สมฺปยุตฺตาย   สญฺญาย
สนฺติเก    อสมาปนฺนสฺส    สญฺญา    อสมาปนฺนสฺส   สญฺญาย   สนฺติเก
สมาปนฺนสฺส    สญฺญา    สมาปนฺนสฺส    สญฺญาย    สนฺติเก    สาสวา
สญฺญา   สาสวาย   สญฺญาย   สนฺติเก   อนาสวา   สญฺญา   อนาสวาย
สญฺญาย   สนฺติเก   อยํ   วุจฺจติ  สญฺญา  สนฺติเก  ฯ  ตํ  ตํ  วา  ปน
สญฺญํ อุปาทาย อุปาทาย สญฺญา ทูเร สนฺติเก ทฏฺฐพฺพา ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๓๕ หน้าที่ ๑-๑๐.
https://84000.org/tipitaka/read/pali_item.php?book=35&item=1&items=19
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=35&item=1&items=19&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=35&item=1&items=19
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=35&item=1&items=19
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=35&i=1
             สารบัญพระไตรปิฎกเล่มที่ ๓๕
https://84000.org/tipitaka/read/?index_35
https://84000.org/tipitaka/english/?index_35