พระไตรปิฎกเล่มที่ ๓๕ ภาษาบาลี อักษรไทย
พระอภิธรรมปิฎกเล่มที่ ๒ อภิ. วิภงฺโค

     [๒๑๔]   จตฺตาริ   สจฺจานิ   ทุกฺขํ   ทุกฺขสมุทโย   ทุกฺขนิโรโธ
ทุกฺขนิโรธคามินี ปฏิปทา ฯ
     [๒๑๕]   ตตฺถ    กตโม   ทุกฺขสมุทโย   ตณฺหา   อยํ   วุจฺจติ
ทุกฺขสมุทโย ฯ
     [๒๑๖]   ตตฺถ   กตมํ   ทุกฺขํ   อวเสสา  จ  กิเลสา  อวเสสา
จ   อกุสลา   ธมฺมา   ตีณิ   จ   กุสลมูลานิ   สาสวานิ  อวเสสา  จ
สาสวา   กุสลา   ธมฺมา   สาสวา  จ  กุสลากุสลานํ  ธมฺมานํ  วิปากา
เย   จ   ธมฺมา   กิริยา  เนว  กุสลา  นากุสลา  น  จ  กมฺมวิปากา
สพฺพญฺจ รูปํ อิทํ วุจฺจติ ทุกฺขํ ฯ
     [๒๑๗]   ตตฺถ  กตโม  ทุกฺขนิโรโธ  ตณฺหาย  ปหานํ  อยํ  วุจฺจติ
ทุกฺขนิโรโธ ฯ
     [๒๑๘]   ตตฺถ   กตมา   ทุกฺขนิโรธคามินี   ปฏิปทา   อิธ  ภิกฺขุ
ยสฺมึ  สมเย  โลกุตฺตรํ  ฌานํ  ภาเวติ  นิยฺยานิกํ  อปจยคามึ  ทิฏฺฐิคตานํ
ปหานาย   ปฐมาย   ภูมิยา   ปตฺติยา  วิวิจฺเจว  กาเมหิ  ฯเปฯ  ปฐมํ
ฌานํ    อุปสมฺปชฺช   วิหรติ   ทุกฺขาปฏิปทํ   ทนฺธาภิญฺญํ   ตสฺมึ   สมเย
ผสฺโส   โหติ   ฯเปฯ   อวิกฺเขโป  โหติ  อยํ  วุจฺจติ  ทุกฺขนิโรธคามินี
ปฏิปทา ฯเปฯ
     [๒๑๙]   ตตฺถ   กตโม   ทุกฺขสมุทโย   ตณฺหา  จ  อวเสสา  จ
กิเลสา   อวเสสา   จ  อกุสลา  ธมฺมา  ตีณิ  จ  กุสลมูลานิ  สาสวานิ
อวเสสา จ สาสวา กุสลา ธมฺมา อยํ วุจฺจติ ทุกฺขสมุทโย ฯ
     [๒๒๐]   ตตฺถ   กตมํ   ทุกฺขํ   สาสวา   กุสลากุสลานํ  ธมฺมานํ
วิปากา  เย  จ  ธมฺมา  กิริยา  เนว  กุสลา นากุสลา น จ กมฺมวิปากา
สพฺพญฺจ รูปํ อิทํ วุจฺจติ ทุกฺขํ ฯ
     [๒๒๑]   ตตฺถ   กตโม   ทุกฺขนิโรโธ  ตณฺหาย  จ  อวเสสานญฺจ
กิเลสานํ   อวเสสานญฺจ   อกุสลานํ   ธมฺมานํ   ติณฺณนฺนญฺจ   กุสลมูลานํ
สาสวานํ   อวเสสานญฺจ   สาสวานํ   กุสลานํ   ธมฺมานํ   ปหานํ   อยํ
วุจฺจติ ทุกฺขนิโรโธ ฯ
     [๒๒๒]   ตตฺถ   กตมา   ทุกฺขนิโรธคามินี   ปฏิปทา   อิธ  ภิกฺขุ
ยสฺมึ  สมเย  โลกุตฺตรํ  ฌานํ  ภาเวติ  นิยฺยานิกํ  อปจยคามึ  ทิฏฺฐิคตานํ
ปหานาย    ปฐมาย    ภูมิยา   ปตฺติยา   วิวิจฺเจว   กาเมหิ   ฯเปฯ
ปฐมํ    ฌานํ    อุปสมฺปชฺช   วิหรติ   ทุกฺขาปฏิปทํ   ทนฺธาภิญฺญํ   ตสฺมึ
สมเย  ผสฺโส  โหติ  ฯเปฯ  อวิกฺเขโป  โหติ อยํ วุจฺจติ ทุกฺขนิโรธคามินี
ปฏิปทา ฯ
                                  อภิธมฺมภาชนียํ ฯ
     [๒๒๓]   จตฺตาริ   อริยสจฺจานิ   ทุกฺขํ   อริยสจฺจํ   ทุกฺขสมุทโย
อริยสจฺจํ  ทุกฺขนิโรโธ  อริยสจฺจํ  ทุกฺขนิโรธคามินี  ปฏิปทา  อริยสจฺจํ  ฯ
จตุนฺนํ   อริยสจฺจานํ  กติ  กุสลา  กติ  อกุสลา  กติ  อพฺยากตา  ฯเปฯ
กติ สรณา กติ อรณา ฯ
     [๒๒๔]   สมุทยสจฺจํ  อกุสลํ  มคฺคสจฺจํ  กุสลํ  นิโรธสจฺจํ  อพฺยากตํ
ทุกฺขสจฺจํ   สิยา  กุสลํ  สิยา  อกุสลํ  สิยา  อพฺยากตํ  ฯ  เทฺว  สจฺจา
สิยา   สุขาย   เวทนาย   สมฺปยุตฺตา   สิยา   อทุกฺขมสุขาย  เวทนาย
สมฺปยุตฺตา   นิโรธสจฺจํ   น   วตฺตพฺพํ   สุขาย  เวทนาย  สมฺปยุตฺตนฺติปิ
ทุกฺขาย     เวทนาย     สมฺปยุตฺตนฺติปิ     อทุกฺขมสุขาย     เวทนาย
สมฺปยุตฺตนฺติปิ  ทุกฺขสจฺจํ  สิยา  สุขาย  เวทนาย  สมฺปยุตฺตํ  สิยา ทุกฺขาย
เวทนาย   สมฺปยุตฺตํ   สิยา   อทุกฺขมสุขาย   เวทนาย  สมฺปยุตฺตํ  สิยา
น    วตฺตพฺพํ   สุขาย   เวทนาย   สมฺปยุตฺตนฺติปิ   ทุกฺขาย   เวทนาย
สมฺปยุตฺตนฺติปิ อทุกฺขมสุขาย เวทนาย สมฺปยุตฺตนฺติปิ ฯ
     {๒๒๔.๑}   เทฺว สจฺจา วิปากธมฺมธมฺมา นิโรธสจฺจํ เนววิปากนวิปาก-
ธมฺมธมฺมํ    ทุกฺขสจฺจํ   สิยา   วิปากํ   สิยา   วิปากธมฺมธมฺมํ   สิยา
เนววิปากนวิปากธมฺมธมฺมํ      ฯ     สมุทยสจฺจํ     อนุปาทินฺนุปาทานิยํ
เทฺว      สจฺจา      อนุปาทินฺนอนุปาทานิยา      ทุกฺขสจฺจํ     สิยา
อุปาทินฺนุปาทานิยํ     สิยา      อนุปาทินฺนุปาทานิยํ    ฯ    สมุทยสจฺจํ
สงฺกิลิฏฺฐสงฺกิเลสิกํ       เทฺว      สจฺจา      อสงฺกิลิฏฺฐอสงฺกิเลสิกา
ทุกฺขสจฺจํ   สิยา   สงฺกิลิฏฺฐสงฺกิเลสิกํ   สิยา   อสงฺกิลิฏฺฐสงฺกิเลสิกํ   ฯ
สมุทยสจฺจํ    สวิตกฺกสวิจารํ    นิโรธสจฺจํ    อวิตกฺกอวิจารํ   มคฺคสจฺจํ
สิยา   สวิตกฺกสวิจารํ   สิยา   อวิตกฺกวิจารมตฺตํ   สิยา  อวิตกฺกอวิจารํ
ทุกฺขสจฺจํ    สิยา    สวิตกฺกสวิจารํ    สิยา   อวิตกฺกวิจารมตฺตํ   สิยา
อวิตกฺกอวิจารํ      สิยา      น      วตฺตพฺพํ     สวิตกฺกสวิจารนฺติปิ
อวิตกฺกวิจารมตฺตนฺติปิ อวิตกฺกอวิจารนฺติปิ ฯ
     {๒๒๔.๒}   เทฺว  สจฺจา  สิยา  ปีติสหคตา  สิยา  สุขสหคตา สิยา
อุเปกฺขาสหคตา   นิโรธสจฺจํ   น   วตฺตพฺพํ  ปีติสหคตนฺติปิ  สุขสหคตนฺติปิ
อุเปกฺขาสหคตนฺติปิ   ทุกฺขสจฺจํ   สิยา   ปีติสหคตํ  สิยา  สุขสหคตํ  สิยา
อุเปกฺขาสหคตํ    สิยา    น    วตฺตพฺพํ   ปีติสหคตนฺติปิ   สุขสหคตนฺติปิ
อุเปกฺขาสหคตนฺติปิ ฯ
     {๒๒๔.๓}   เทฺว    สจฺจา    เนวทสฺสเนนนภาวนายปหาตพฺพา
สมุทยสจฺจํ   สิยา   ทสฺสเนน   ปหาตพฺพํ   สิยา   ภาวนาย   ปหาตพฺพํ
ทุกฺขสจฺจํ    สิยา   ทสฺสเนน   ปหาตพฺพํ   สิยา   ภาวนาย   ปหาตพฺพํ
สิยา เนวทสฺสเนนนภาวนายปหาตพฺพํ ฯ
     {๒๒๔.๔}   เทฺว   สจฺจา   เนวทสฺสเนนนภาวนายปหาตพฺพเหตุกา
สมุทยสจฺจํ    สิยา    ทสฺสเนน    ปหาตพฺพเหตุกํ    สิยา    ภาวนาย
ปหาตพฺพเหตุกํ     ทุกฺขสจฺจํ     สิยา     ทสฺสเนน     ปหาตพฺพเหตุกํ
สิยา    ภาวนาย    ปหาตพฺพเหตุกํ    สิยา    เนวทสฺสเนนนภาวนาย-
ปหาตพฺพเหตุกํ    ฯ   สมุทยสจฺจํ   อาจยคามิ   มคฺคสจฺจํ   อปจยคามิ
นิโรธสจฺจํ    เนวอาจยคามินอปจยคามิ    ทุกฺขสจฺจํ   สิยา   อาจยคามิ
สิยา     เนวอาจยคามิ     นอปจยคามิ     ฯ    มคฺคสจฺจํ    เสกฺขํ
ตีณิ       สจฺจา       เนวเสกฺขานาเสกฺขา      ฯ      สมุทยสจฺจํ
ปริตฺตํ   เทฺว   สจฺจา   อปฺปมาณา   ทุกฺขสจฺจํ   สิยา   ปริตฺตํ   สิยา
มหคฺคตํ    ฯ    นิโรธสจฺจํ    อนารมฺมณํ   มคฺคสจฺจํ   อปฺปมาณารมฺมณํ
สมุทยสจฺจํ     สิยา     ปริตฺตารมฺมณํ    สิยา    มหคฺคตารมฺมณํ    น
อปฺปมาณารมฺมณํ      สิยา      น      วตฺตพฺพํ     ปริตฺตารมฺมณนฺติปิ
มหคฺคตารมฺมณนฺติปิ      ทุกฺขสจฺจํ     สิยา     ปริตฺตารมฺมณํ     สิยา
มหคฺคตารมฺมณํ     สิยา     อปฺปมาณารมฺมณํ    สิยา    น    วตฺตพฺพํ
ปริตฺตารมฺมณนฺติปิ     มหคฺคตารมฺมณนฺติปิ     อปฺปมาณารมฺมณนฺติปิ     ฯ
สมุทยสจฺจํ หีนํ เทฺว สจฺจา ปณีตา ทุกฺขสจฺจํ สิยา หีนํ สิยา มชฺฌิมํ ฯ
     {๒๒๔.๕}   นิโรธสจฺจํ  อนิยตํ  มคฺคสจฺจํ  สมฺมตฺตนิยตํ  เทฺว สจฺจา
สิยา    มิจฺฉตฺตนิยตา    สิยา   อนิยตา   ฯ   นิโรธสจฺจํ   อนารมฺมณํ
สมุทยสจฺจํ      น     วตฺตพฺพํ     มคฺคารมฺมณนฺติปิ     มคฺคเหตุกนฺติปิ
มคฺคาธิปตีติปิ   มคฺคสจฺจํ   น   มคฺคารมฺมณํ   สิยา   มคฺคเหตุกํ   สิยา
มคฺคาธิปติ    สิยา    น    วตฺตพฺพํ    มคฺคเหตุกนฺติปิ    มคฺคาธิปตีติปิ
ทุกฺขสจฺจํ    สิยา    มคฺคารมฺมณํ   น   มคฺคเหตุกํ   สิยา   มคฺคาธิปติ
สิยา น วตฺตพฺพํ มคฺคารมฺมณนฺติปิ มคฺคาธิปตีติปิ ฯ
     {๒๒๔.๖}   เทฺว   สจฺจา  สิยา  อุปฺปนฺนา  สิยา  อนุปฺปนฺนา  น
วตฺตพฺพา    อุปฺปาทิโนติ    นิโรธสจฺจํ    น    วตฺตพฺพํ    อุปฺปนฺนนฺติปิ
อนุปฺปนฺนนฺติปิ   อุปฺปาทีติปิ   ทุกฺขสจฺจํ   สิยา  อุปฺปนฺนํ  สิยา  อนุปฺปนฺนํ
สิยา  อุปฺปาทิ  ฯ  ตีณิ สจฺจา สิยา อตีตา สิยา อนาคตา สิยา ปจฺจุปฺปนฺนา
นิโรธสจฺจํ   น   วตฺตพฺพํ   อตีตนฺติปิ   อนาคตนฺติปิ   ปจฺจุปฺปนฺนนฺติปิ  ฯ
นิโรธสจฺจํ    อนารมฺมณํ    มคฺคสจฺจํ    น   วตฺตพฺพํ   อตีตารมฺมณนฺติปิ
อนาคตารมฺมณนฺติปิ     ปจฺจุปฺปนฺนารมฺมณนฺติปิ    เทฺว    สจฺจา    สิยา
อตีตารมฺมณา    สิยา    อนาคตารมฺมณา    สิยา    ปจฺจุปฺปนฺนารมฺมณา
สิยา      น     วตฺตพฺพา     อตีตารมฺมณาติปิ     อนาคตารมฺมณาติปิ
ปจฺจุปฺปนฺนารมฺมณาติปิ   ฯ   นิโรธสจฺจํ   พหิทฺธา   ตีณิ   สจฺจา   สิยา
อชฺฌตฺตา สิยา พหิทฺธา สิยา อชฺฌตฺตพหิทฺธา ฯ
     {๒๒๔.๗}   นิโรธสจฺจํ    อนารมฺมณํ   มคฺคสจฺจํ   พหิทฺธารมฺมณํ
สมุทยสจฺจํ    สิยา    อชฺฌตฺตารมฺมณํ    สิยา    พหิทฺธารมฺมณํ    สิยา
อชฺฌตฺตพหิทฺธารมฺมณํ     ทุกฺขสจฺจํ     สิยา     อชฺฌตฺตารมฺมณํ    สิยา
พหิทฺธารมฺมณํ    สิยา    อชฺฌตฺตพหิทฺธารมฺมณํ    สิยา    น    วตฺตพฺพํ
อชฺฌตฺตารมฺมณนฺติปิ    พหิทฺธารมฺมณนฺติปิ    อชฺฌตฺตพหิทฺธารมฺมณนฺติปิ    ฯ
ตีณิ    สจฺจา    อนิทสฺสนอปฺปฏิฆา   ทุกฺขสจฺจํ   สิยา   สนิทสฺสนสปฺปฏิฆํ
สิยา อนิทสฺสนสปฺปฏิฆํ สิยา อนิทสฺสนอปฺปฏิฆํ ฯ
     [๒๒๕]   สมุทยสจฺจํ  เหตุ  นิโรธสจฺจํ  น  เหตุ  เทฺว สจฺจา สิยา
เหตู   สิยา  น  เหตู  ฯ  เทฺว  สจฺจา  สเหตุกา  นิโรธสจฺจํ  อเหตุกํ
ทุกฺขสจฺจํ  สิยา  สเหตุกํ  สิยา  อเหตุกํ  ฯ  เทฺว  สจฺจา เหตุสมฺปยุตฺตา
นิโรธสจฺจํ    เหตุวิปฺปยุตฺตํ    ทุกฺขสจฺจํ    สิยา   เหตุสมฺปยุตฺตํ   สิยา
เหตุวิปฺปยุตฺตํ    ฯ   สมุทยสจฺจํ   เหตุ   เจว   สเหตุกญฺจ  นิโรธสจฺจํ
น   วตฺตพฺพํ  เหตุ  เจว  สเหตุกญฺจาติปิ  สเหตุกญฺเจว  น  จ  เหตูติปิ
มคฺคสจฺจํ  สิยา  เหตุ  เจว  สเหตุกญฺจ  สิยา  สเหตุกญฺเจว  น จ เหตุ
ทุกฺขสจฺจํ  สิยา  เหตุ  เจว  สเหตุกญฺจ  สิยา  สเหตุกญฺเจว  น จ เหตุ
สิยา   น   วตฺตพฺพํ   เหตุ  เจว  สเหตุกญฺจาติปิ  สเหตุกญฺเจว  น  จ
เหตูติปิ   ฯ   สมุทยสจฺจํ   เหตุ   เจว   เหตุสมฺปยุตฺตญฺจ   นิโรธสจฺจํ
น    วตฺตพฺพํ   เหตุ   เจว   เหตุสมฺปยุตฺตญฺจาติปิ   เหตุสมฺปยุตฺตญฺเจว
น   จ   เหตูติปิ  มคฺคสจฺจํ  สิยา  เหตุ  เจว  เหตุสมฺปยุตฺตญฺจ   สิยา
เหตุสมฺปยุตฺตญฺเจว    น   จ   เหตุ   ทุกฺขสจฺจํ   สิยา   เหตุ   เจว
เหตุสมฺปยุตฺตญฺจ   สิยา   เหตุสมฺปยุตฺตญฺเจว   น   จ   เหตุ  สิยา  น
วตฺตพฺพํ     เหตุ    เจว    เหตุสมฺปยุตฺตญฺจาติปิ    เหตุสมฺปยุตฺตญฺเจว
น  จ  เหตูติปิ  ฯ  นิโรธสจฺจํ  น  เหตุ  อเหตุกํ  สมุทยสจฺจํ น วตฺตพฺพํ
น  เหตุ  สเหตุกนฺติปิ  น  เหตุ  อเหตุกนฺติปิ  มคฺคสจฺจํ  สิยา  น  เหตุ
สเหตุกํ  สิยา  น  วตฺตพฺพํ  น  เหตุ  สเหตุกนฺติปิ  น  เหตุ อเหตุกนฺติปิ
ทุกฺขสจฺจํ  สิยา  น  เหตุ  สเหตุกํ  สิยา น เหตุ อเหตุกํ สิยา น วตฺตพฺพํ
น เหตุ สเหตุกนฺติปิ น เหตุ อเหตุกนฺติปิ ฯ
     [๒๒๖]   ตีณิ   สจฺจา  สปฺปจฺจยา  นิโรธสจฺจํ  อปฺปจฺจยํ  ฯ  ตีณิ
สจฺจา   สงฺขตา   นิโรธสจฺจํ   อสงฺขตํ   ฯ   ตีณิ   สจฺจา  อนิทสฺสนา
ทุกฺขสจฺจํ   สิยา   สนิทสฺสนํ  สิยา  อนิทสฺสนํ  ฯ  ตีณิ  สจฺจา  อปฺปฏิฆา
ทุกฺขสจฺจํ  สิยา  สปฺปฏิฆํ  สิยา  อปฺปฏิฆํ  ฯ  ตีณิ  สจฺจา  รูปา ทุกฺขสจฺจํ
สิยา  รูปํ  สิยา  อรูปํ  ฯ  เทฺว สจฺจา โลกิยา เทฺว สจฺจา โลกุตฺตรา ฯ
เกนจิ วิญฺเญยฺยา เกนจิ น วิญฺเญยฺยา ฯ
     [๒๒๗]   สมุทยสจฺจํ  อาสโว  เทฺว  สจฺจา  โน  อาสวา ทุกฺขสจฺจํ
สิยา  อาสโว  สิยา  โน  อาสโว  ฯ  เทฺว  สจฺจา สาสวา เทฺว สจฺจา
อนาสวา  ฯ  สมุทยสจฺจํ  อาสวสมฺปยุตฺตํ  เทฺว  สจฺจา   อาสววิปฺปยุตฺตา
ทุกฺขสจฺจํ   สิยา   อาสวสมฺปยุตฺตํ   สิยา  อาสววิปฺปยุตฺตํ  ฯ  สมุทยสจฺจํ
อาสโว  เจว  สาสวญฺจ  เทฺว  สจฺจา  น วตฺตพฺพา อาสวา เจว สาสวา
จาติปิ  สาสวา  เจว  โน  จ  อาสวาติปิ  ทุกฺขสจฺจํ  สิยา อาสโว เจว
สาสวญฺจ   สิยา  สาสวญฺเจว  โน  จ  อาสโว  ฯ  สมุทยสจฺจํ  อาสโว
เจว   อาสวสมฺปยุตฺตญฺจ   เทฺว   สจฺจา   น  วตฺตพฺพา  อาสวา  เจว
อาสวสมฺปยุตฺตา   จาติปิ   อาสวสมฺปยุตฺตา   เจว   โน  จ  อาสวาติปิ
ทุกฺขสจฺจํ  สิยา  อาสโว  เจว อาสวสมฺปยุตฺตญฺจ สิยา อาสวสมฺปยุตฺตญฺเจว
โน  จ  อาสโว  สิยา  น  วตฺตพฺพํ  อาสโว  เจว อาสวสมฺปยุตฺตญฺจาติปิ
อาสวสมฺปยุตฺตญฺเจว  โน  จ  อาสโวติปิ  ฯ  เทฺว สจฺจา อาสววิปฺปยุตฺต-
อนาสวา     สมุทยสจฺจํ     น    วตฺตพฺพํ    อาสววิปฺปยุตฺตสาสวนฺติปิ
อาสววิปฺปยุตฺตอนาสวนฺติปิ     ทุกฺขสจฺจํ     สิยา    อาสววิปฺปยุตฺตสาสวํ
สิยา น วตฺตพฺพํ อาสววิปฺปยุตฺตสาสวนฺติปิ อาสววิปฺปยุตฺตอนาสวนฺติปิ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๓๕ หน้าที่ ๑๔๖-๑๕๓.
https://84000.org/tipitaka/read/pali_item.php?book=35&item=214&items=14
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=35&item=214&items=14&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=35&item=214&items=14
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=35&item=214&items=14
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=35&i=214
             สารบัญพระไตรปิฎกเล่มที่ ๓๕
https://84000.org/tipitaka/read/?index_35
https://84000.org/tipitaka/english/?index_35