พระไตรปิฎกเล่มที่ ๓๕ ภาษาบาลี อักษรไทย
พระอภิธรรมปิฎกเล่มที่ ๒ อภิ. วิภงฺโค

     [๕๖๒]   สตฺต   โพชฺฌงฺคา   สติสมฺโพชฺฌงฺโค  ฯเปฯ  อุเปกฺขา-
สมฺโพชฺฌงฺโค   ฯ   ตตฺถ   กตเม  สตฺต  โพชฺฌงฺคา  อิธ  ภิกฺขุ  ยสฺมึ
สมเย   โลกุตฺตรํ   ฌานํ   ภาเวติ   นิยฺยานิกํ   อปจยคามึ  ทิฏฺฐิคตานํ
ปหานาย   ปฐมาย   ภูมิยา   ปตฺติยา  วิวิจฺเจว  กาเมหิ  ฯเปฯ  ปฐมํ
ฌานํ    อุปสมฺปชฺช   วิหรติ   ทุกฺขาปฏิปทํ   ทนฺธาภิญฺญํ   ตสฺมึ   สมเย
ผสฺโส   โหติ   ฯเปฯ  อวิกฺเขโป  โหติ  อิเม  ธมฺมา  กุสลา  ตสฺเสว
โลกุตฺตรสฺส   กุสลสฺส   ฌานสฺส   กตตฺตา  ภาวิตตฺตา  วิปากํ  วิวิจฺเจว
กาเมหิ    ฯเปฯ    ปฐมํ    ฌานํ   อุปสมฺปชฺช   วิหรติ   ทุกฺขาปฏิปทํ
ทนฺธาภิญฺญํ    สุญฺญตํ    ตสฺมึ    สมเย    สตฺต    โพชฺฌงฺคา   โหนฺติ
สติสมฺโพชฺฌงฺโค    ฯเปฯ    อุเปกฺขาสมฺโพชฺฌงฺโค   ฯ   ตตฺถ   กตโม
สติสมฺโพชฺฌงฺโค   ยา   สติ  อนุสฺสติ  ฯเปฯ  สมฺมาสติ  สติสมฺโพชฺฌงฺโค
มคฺคงฺคํ    มคฺคปริยาปนฺนํ    อยํ    วุจฺจติ    สติสมฺโพชฺฌงฺโค   ฯเปฯ
ตตฺถ    กตโม    อุเปกฺขาสมฺโพชฺฌงฺโค    ยา   อุเปกฺขา   อุเปกฺขนา
อชฺฌุเปกฺขนา     มชฺฌตฺตตา    จิตฺตสฺส    อุเปกฺขาสมฺโพชฺฌงฺโค    อยํ
วุจฺจติ   อุเปกฺขาสมฺโพชฺฌงฺโค   ฯ   อิเม   วุจฺจนฺติ   สตฺต  โพชฺฌงฺคา
อวเสสา ธมฺมา สตฺตหิ โพชฺฌงฺเคหิ สมฺปยุตฺตา ฯ
     [๕๖๓]   สตฺต   โพชฺฌงฺคา   สติสมฺโพชฺฌงฺโค  ฯเปฯ  อุเปกฺขา-
สมฺโพชฺฌงฺโค   ฯ   ตตฺถ   กตโม   สติสมฺโพชฺฌงฺโค  อิธ  ภิกฺขุ  ยสฺมึ
สมเย   โลกุตฺตรํ   ฌานํ   ภาเวติ   นิยฺยานิกํ   อปจยคามึ  ทิฏฺฐิคตานํ
ปหานาย   ปฐมาย   ภูมิยา   ปตฺติยา  วิวิจฺเจว  กาเมหิ  ฯเปฯ  ปฐมํ
ฌานํ    อุปสมฺปชฺช   วิหรติ   ทุกฺขาปฏิปทํ   ทนฺธาภิญฺญํ   ตสฺมึ   สมเย
ผสฺโส   โหติ   ฯเปฯ  อวิกฺเขโป  โหติ  อิเม  ธมฺมา  กุสลา  ตสฺเสว
โลกุตฺตรสฺส   กุสลสฺส   ฌานสฺส   กตตฺตา  ภาวิตตฺตา  วิปากํ  วิวิจฺเจว
กาเมหิ    ฯเปฯ    ปฐมํ    ฌานํ   อุปสมฺปชฺช   วิหรติ   ทุกฺขาปฏิปทํ
ทนฺธาภิญฺญํ   สุญฺญตํ   ยา  ตสฺมึ  สมเย  สติ  อนุสฺสติ  ฯเปฯ  สมฺมาสติ
สติสมฺโพชฺฌงฺโค      มคฺคงฺคํ      มคฺคปริยาปนฺนํ      อยํ     วุจฺจติ
สติสมฺโพชฺฌงฺโค    อวเสสา   ธมฺมา   สติสมฺโพชฺฌงฺคสมฺปยุตฺตา   ฯเปฯ
อวเสสา    ธมฺมา    ธมฺมวิจยสมฺโพชฺฌงฺคสมฺปยุตฺตา   ฯเปฯ   อวเสสา
ธมฺมา     วิริยสมฺโพชฺฌงฺคสมฺปยุตฺตา     ฯเปฯ     อวเสสา    ธมฺมา
ปีติสมฺโพชฺฌงฺคสมฺปยุตฺตา   ฯเปฯ   อวเสสา  ธมฺมา  ปสฺสทฺธิสมฺโพชฺฌงฺค-
สมฺปยุตฺตา ฯเปฯ อวเสสา ธมฺมา สมาธิสมฺโพชฺฌงฺคสมฺปยุตฺตา ฯ
     {๕๖๓.๑}   ตตฺถ  กตโม อุเปกฺขาสมฺโพชฺฌงฺโค อิธ ภิกฺขุ ยสฺมึ สมเย
โลกุตฺตรํ   ฌานํ   ภาเวติ   นิยฺยานิกํ  อปจยคามึ  ทิฏฺฐิคตานํ  ปหานาย
ปฐมาย   ภูมิยา   ปตฺติยา   วิวิจฺเจว   กาเมหิ   ฯเปฯ   ปฐมํ  ฌานํ
อุปสมฺปชฺช     วิหรติ     ทุกฺขาปฏิปทํ    ทนฺธาภิญฺญํ    ตสฺมึ    สมเย
ผสฺโส   โหติ   ฯเปฯ  อวิกฺเขโป  โหติ  อิเม  ธมฺมา  กุสลา  ตสฺเสว
โลกุตฺตรสฺส   กุสลสฺส   ฌานสฺส   กตตฺตา  ภาวิตตฺตา  วิปากํ  วิวิจฺเจว
กาเมหิ  ฯเปฯ  ปฐมํ  ฌานํ  อุปสมฺปชฺช  วิหรติ  ทุกฺขาปฏิปทํ  ทนฺธาภิญฺญํ
สุญฺญตํ  ยา  ตสฺมึ  สมเย  อุเปกฺขา  อุเปกฺขนา  อชฺฌุเปกฺขนา มชฺฌตฺตตา
จิตฺตสฺส    อุเปกฺขาสมฺโพชฺฌงฺโค    อยํ   วุจฺจติ   อุเปกฺขาสมฺโพชฺฌงฺโค
อวเสสา ธมฺมา อุเปกฺขาสมฺโพชฺฌงฺคสมฺปยุตฺตา ฯ
                                 อภิธมฺมภาชนียํ ฯ
     [๕๖๔]   สตฺต  โพชฺฌงฺคา  สติสมฺโพชฺฌงฺโค  ธมฺมวิจยสมฺโพชฺฌงฺโค
วิริยสมฺโพชฺฌงฺโค         ปีติสมฺโพชฺฌงฺโค         ปสฺสทฺธิสมฺโพชฺฌงฺโค
สมาธิสมฺโพชฺฌงฺโค    อุเปกฺขาสมฺโพชฺฌงฺโค   ฯ   สตฺตนฺนํ   โพชฺฌงฺคานํ
กติ กุสลา กติ อกุสลา กติ อพฺยากตา ฯเปฯ กติ สรณา กติ อรณา ฯ
     [๕๖๕]   สิยา  กุสลา  สิยา  อพฺยากตา  ฯ ปีติสมฺโพชฺฌงฺโค สุขาย
เวทนาย  สมฺปยุตฺโต  ฉ  โพชฺฌงฺคา  สิยา  สุขาย  เวทนาย  สมฺปยุตฺตา
สิยา   อทุกฺขมสุขาย   เวทนาย   สมฺปยุตฺตา   ฯ  สิยา  วิปากา  สิยา
วิปากธมฺมธมฺมา      อนุปาทินฺนอนุปาทานิยา      อสงฺกิลิฏฺฐอสงฺกิเลสิกา
สิยา  สวิตกฺกสวิจารา  สิยา  อวิตกฺกวิจารมตฺตา  สิยา อวิตกฺกอวิจารา ฯ
ปีติสมฺโพชฺฌงฺโค    น    ปีติสหคโต   สุขสหคโต   น   อุเปกฺขาสหคโต
ฉ  โพชฺฌงฺคา  สิยา  ปีติสหคตา  สิยา สุขสหคตา สิยา อุเปกฺขาสหคตา ฯ
เนวทสฺสเนนนภาวนายปหาตพฺพา เนวทสฺสเนนนภาวนาย-
ปหาตพฺพเหตุกา    สิยา    อปจยคามิโน    สิยา   เนวอาจยคามิโน-
นอปจยคามิโน    สิยา    เสกฺขา    สิยา    อเสกฺขา    อปฺปมาณา
อปฺปมาณารมฺมณา    ปณีตา    สิยา    สมฺมตฺตนิยตา    สิยา   อนิยตา
น    มคฺคารมฺมณา   สิยา   มคฺคเหตุกา   สิยา   มคฺคาธิปติโน   สิยา
น    วตฺตพฺพา    มคฺคเหตุกาติปิ    มคฺคาธิปติโนติปิ   สิยา   อุปฺปนฺนา
สิยา  อนุปฺปนฺนา  สิยา  อุปฺปาทิโน  สิยา  อตีตา  สิยา  อนาคตา  สิยา
ปจฺจุปฺปนฺนา    น    วตฺตพฺพา    อตีตารมฺมณาติปิ    อนาคตารมฺมณาติปิ
ปจฺจุปฺปนฺนารมฺมณาติปิ    สิยา    อชฺฌตฺตา    สิยา    พหิทฺธา    สิยา
อชฺฌตฺตพหิทฺธา พหิทฺธารมฺมณา อนิทสฺสนอปฺปฏิฆา ฯ
     [๕๖๖]   ธมฺมวิจยสมฺโพชฺฌงฺโค  เหตุ  ฉ  โพชฺฌงฺคา  น  เหตู  ฯ
สเหตุกา    เหตุสมฺปยุตฺตา    ฯ   ธมฺมวิจยสมฺโพชฺฌงฺโค   เหตุ   เจว
สเหตุโก  จ  ฉ  โพชฺฌงฺคา  น  วตฺตพฺพา  เหตู  เจว  สเหตุกา  จาติ
สเหตุกา   เจว   น   จ  เหตู  ฯ  ธมฺมวิจยสมฺโพชฺฌงฺโค  เหตุ  เจว
เหตุสมฺปยุตฺโต  จ  ฉ  โพชฺฌงฺคา  น  วตฺตพฺพา เหตู เจว เหตุสมฺปยุตฺตา
จาติ   เหตุสมฺปยุตฺตา  เจว  น  จ  เหตู  ฯ  ฉ  โพชฺฌงฺคา  น  เหตู
สเหตุกา   ธมฺมวิจยสมฺโพชฺฌงฺโค   น   วตฺตพฺโพ  น  เหตุ  สเหตุโกติปิ
น เหตุ อเหตุโกติปิ ฯ
     [๕๖๗]   สปฺปจฺจยา   สงฺขตา   อนิทสฺสนา   อปฺปฏิฆา   อรูปา
โลกุตฺตรา   เกนจิ  วิญฺเญยฺยา  เกนจิ  น  วิญฺเญยฺยา  ฯ  โน  อาสวา
อนาสวา   อาสววิปฺปยุตฺตา   น   วตฺตพฺพา   อาสวา   เจว   สาสวา
จาติปิ  สาสวา  เจว  โน  จ  อาสวาติปิ  น  วตฺตพฺพา  อาสวา  เจว
อาสวสมฺปยุตฺตา   จาติปิ   อาสวสมฺปยุตฺตา   เจว   โน  จ  อาสวาติปิ
อาสววิปฺปยุตฺตอนาสวา   ฯ  โน  สญฺโญชนา  ฯเปฯ  โน  คนฺถา  ฯเปฯ
โน  โอฆา  ฯเปฯ  โน  โยคา  ฯเปฯ โน นีวรณา ฯเปฯ โน ปรามาสา
ฯเปฯ   สารมฺมณา   โน  จิตฺตา  เจตสิกา  จิตฺตสมฺปยุตฺตา  จิตฺตสํสฏฺฐา
จิตฺตสมุฏฺฐานา    จิตฺตสหภุโน    จิตฺตานุปริวตฺติโน   จิตฺตสํสฏฺฐสมุฏฺฐานา
จิตฺตสํสฏฺฐสมุฏฺฐานสหภุโน จิตฺตสํสฏฺฐสมุฏฺฐานานุปริวตฺติโน
พาหิรา นุปาทา อนุปาทินฺนา ฯ นุปาทานา ฯเปฯ โน กิเลสา ฯเปฯ
     [๕๖๘]   น   ทสฺสเนน  ปหาตพฺพา  น  ภาวนาย  ปหาตพฺพา  น
ทสฺสเนน    ปหาตพฺพเหตุกา    น   ภาวนาย   ปหาตพฺพเหตุกา   สิยา
สวิตกฺกา   สิยา   อวิตกฺกา   สิยา   สวิจารา   สิยา   อวิจารา   ฯ
ปีติสมฺโพชฺฌงฺโค   อปฺปีติโก   ฉ   โพชฺฌงฺคา    สิยา   สปฺปีติกา  สิยา
อปฺปีติกา   ฯ   ปีติสมฺโพชฺฌงฺโค   น   ปีติสหคโต  ฉ  โพชฺฌงฺคา  สิยา
ปีติสหคตา   สิยา   น   ปีติสหคตา   ฯ   ปีติสมฺโพชฺฌงฺโค   สุขสหคโต
ฉ  โพชฺฌงฺคา  สิยา  สุขสหคตา  สิยา  น  สุขสหคตา ฯ ปีติสมฺโพชฺฌงฺโค
น   อุเปกฺขาสหคโต   ฉ   โพชฺฌงฺคา   สิยา   อุเปกฺขาสหคตา   สิยา
น  อุเปกฺขาสหคตา  ฯ  น  กามาวจรา  น  รูปาวจรา  น  อรูปาวจรา
อปริยาปนฺนา   สิยา   นิยฺยานิกา   สิยา   อนิยฺยานิกา   สิยา   นิยตา
สิยา อนิยตา อนุตฺตรา อรณาติ ฯ
                                  ปญฺหาปุจฺฉกํ ฯ
                            โพชฺฌงฺควิภงฺโค สมตฺโต ฯ
                                     ---------
                                   มคฺควิภงฺโค
     [๕๖๙]   อริโย    อฏฺฐงฺคิโก   มคฺโค   เสยฺยถีทํ   สมฺมาทิฏฺฐิ
สมฺมาสงฺกปฺโป      สมฺมาวาจา      สมฺมากมฺมนฺโต      สมฺมาอาชีโว
สมฺมาวายาโม สมฺมาสติ สมฺมาสมาธิ ฯ
     [๕๗๐]   ตตฺถ   กตมา   สมฺมาทิฏฺฐิ   ทุกฺเข  ญาณํ  ทุกฺขสมุทเย
ญาณํ     ทุกฺขนิโรเธ    ญาณํ    ทุกฺขนิโรธคามินิยา   ปฏิปทาย   ญาณํ
อยํ วุจฺจติ สมฺมาทิฏฺฐิ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๓๕ หน้าที่ ๓๑๒-๓๑๗.
https://84000.org/tipitaka/read/pali_item.php?book=35&item=562&items=9
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=35&item=562&items=9&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=35&item=562&items=9
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=35&item=562&items=9
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=35&i=562
             สารบัญพระไตรปิฎกเล่มที่ ๓๕
https://84000.org/tipitaka/read/?index_35
https://84000.org/tipitaka/english/?index_35