พระไตรปิฎกเล่มที่ ๓๗ ภาษาบาลี อักษรไทย
พระอภิธรรมปิฎกเล่มที่ ๔ อภิ. กถาวตฺถุ

                                         สงฺคหิตกถา
     [๑๑๒๗]   นตฺถิ   เกจิ   ธมฺมา  เกหิจิ  ธมฺเมหิ  สงฺคหิตาติ  ฯ
อามนฺตา   ฯ  นนุ  อตฺถิ  เกจิ  ธมฺมา  เกหิจิ  ธมฺเมหิ  คณนํ  คจฺฉนฺติ
อุทฺเทสํ    คจฺฉนฺติ   ปริยาปนฺนาติ   ฯ   อามนฺตา   ฯ   หญฺจิ   อตฺถิ
เกจิ   ธมฺมา   เกหิจิ   ธมฺเมหิ   คณนํ   คจฺฉนฺติ   อุทฺเทสํ   คจฺฉนฺติ
ปริยาปนฺนา   โน   วต   เร   วตฺตพฺเพ   นตฺถิ  เกจิ  ธมฺมา  เกหิจิ
ธมฺเมหิ สงฺคหิตาติ ฯ
     [๑๑๒๘]   จกฺขายตนํ   กตมกฺขนฺธคณนํ  คจฺฉตีติ  ฯ  รูปกฺขนฺธคณนํ
คจฺฉตีติ   ฯ   หญฺจิ   จกฺขายตนํ  รูปกฺขนฺธคณนํ  คจฺฉติ  เตน  วต  เร
วตฺตพฺเพ   จกฺขายตนํ   รูปกฺขนฺเธน   สงฺคหิตนฺติ  ฯ  โสตายตนํ  ฯเปฯ
ฆานายตนํ    ฯเปฯ   ชิวฺหายตนํ   ฯเปฯ   กายายตนํ   กตมกฺขนฺธคณนํ
คจฺฉตีติ    ฯ    รูปกฺขนฺธคณนํ    คจฺฉตีติ    ฯ    หญฺจิ    กายายตนํ
รูปกฺขนฺธคณนํ    คจฺฉติ    เตน    วต    เร   วตฺตพฺเพ   กายายตนํ
รูปกฺขนฺเธน สงฺคหิตนฺติ ฯ
     [๑๑๒๙]   รูปายตนํ   ฯเปฯ   สทฺทายตนํ   ฯเปฯ   คนฺธายตนํ
ฯเปฯ   รสายตนํ   ฯเปฯ   โผฏฺฐพฺพายตนํ  กตมกฺขนฺธคณนํ  คจฺฉตีติ  ฯ
รูปกฺขนฺธคณนํ    คจฺฉตีติ    ฯ    หญฺจิ   โผฏฺฐพฺพายตนํ   รูปกฺขนฺธคณนํ
คจฺฉติ    เตน    วต   เร   วตฺตพฺเพ   โผฏฺฐพฺพายตนํ   รูปกฺขนฺเธน
สงฺคหิตนฺติ ฯ
     [๑๑๓๐]   สุขา    เวทนา    กตมกฺขนฺธคณนํ    คจฺฉตีติ    ฯ
เวทนากฺขนฺธคณนํ   คจฺฉตีติ   ฯ  หญฺจิ  สุขา  เวทนา  เวทนากฺขนฺธคณนํ
คจฺฉติ  เตน  วต เร วตฺตพฺเพ สุขา เวทนา เวทนากฺขนฺเธน สงฺคหิตาติ ฯ
ทุกฺขา    เวทนา    ฯเปฯ    อทุกฺขมสุขา    เวทนา   กตมกฺขนฺธคณนํ
คจฺฉตีติ    ฯ    เวทนากฺขนฺธคณนํ   คจฺฉตีติ   ฯ   หญฺจิ   อทุกฺขมสุขา
เวทนา    เวทนากฺขนฺธคณนํ    คจฺฉติ    เตน   วต   เร   วตฺตพฺเพ
อทุกฺขมสุขา เวทนา เวทนากฺขนฺเธน สงฺคหิตาติ ฯ
     [๑๑๓๑]   จกฺขุสมฺผสฺสชา   สญฺญา   กตมกฺขนฺธคณนํ   คจฺฉตีติ  ฯ
สญฺญากฺขนฺธคณนํ     คจฺฉตีติ    ฯ    หญฺจิ    จกฺขุสมฺผสฺสชา    สญฺญา
สญฺญากฺขนฺธคณนํ   คจฺฉติ   เตน   วต   เร   วตฺตพฺเพ  จกฺขุสมฺผสฺสชา
สญฺญา    สญฺญากฺขนฺเธน    สงฺคหิตาติ    ฯ    โสตสมฺผสฺสชา   สญฺญา
ฯเปฯ     มโนสมฺผสฺสชา    สญฺญา    กตมกฺขนฺธคณนํ    คจฺฉตีติ    ฯ
สญฺญากฺขนฺธคณนํ     คจฺฉตีติ    ฯ    หญฺจิ    มโนสมฺผสฺสชา    สญฺญา
สญฺญากฺขนฺธคณนํ   คจฺฉติ   เตน   วต   เร   วตฺตพฺเพ  มโนสมฺผสฺสชา
สญฺญา สญฺญากฺขนฺเธน สงฺคหิตาติ ฯ
     [๑๑๓๒]   จกฺขุสมฺผสฺสชา  เจตนา  ฯเปฯ  มโนสมฺผสฺสชา  เจตนา
กตมกฺขนฺธคณนํ   คจฺฉตีติ   ฯ   สงฺขารกฺขนฺธคณนํ   คจฺฉตีติ   ฯ   หญฺจิ
มโนสมฺผสฺสชา   เจตนา   สงฺขารกฺขนฺธคณนํ   คจฺฉติ   เตน   วต  เร
วตฺตพฺเพ มโนสมฺผสฺสชา เจตนา สงฺขารกฺขนฺเธน สงฺคหิตาติ ฯ
     [๑๑๓๓]    จกฺขุวิญฺญาณํ    ฯเปฯ   มโนวิญฺญาณํ   กตมกฺขนฺธคณนํ
คจฺฉตีติ    ฯ    วิญฺญาณกฺขนฺธคณนํ   คจฺฉตีติ   ฯ   หญฺจิ   มโนวิญฺญาณํ
วิญฺญาณกฺขนฺธคณนํ   คจฺฉติ   เตน   วต   เร   วตฺตพฺเพ   มโนวิญฺญาณํ
วิญฺญาณกฺขนฺเธน    สงฺคหิตนฺติ    ฯ   ยถา   ทาเมน   วา   โยตฺเตน
วา    เทฺว    พลิพทฺทา   สงฺคหิตา   สิกฺกาย   ปิณฺฑปาโต   สงฺคหิโต
สา   คทฺทุเลน   สงฺคหิโต   เอวเมว   เต   ธมฺมา   เตหิ   ธมฺเมหิ
สงฺคหิตาติ   ฯ   หญฺจิ   ทาเมน   วา  โยตฺเตน  วา  เทฺว  พลิพทฺทา
สงฺคหิตา   สิกฺกาย   ปิณฺฑปาโต   สงฺคหิโต   สา   คทฺทุเลน  สงฺคหิโต
เตน วต เร วตฺตพฺเพ อตฺถิ เกจิ ธมฺมา เกหิจิ ธมฺเมหิ สงฺคหิตาติ ฯ
                                        สงฺคหิตกถา ฯ
                                           ----------

             เนื้อความพระไตรปิฎกฉบับภาษาบาลีอักษรไทย เล่มที่ ๓๗ หน้าที่ ๓๖๓-๓๖๕.
https://84000.org/tipitaka/read/pali_item.php?book=37&item=1127&items=7
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=37&item=1127&items=7&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=37&item=1127&items=7
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=37&item=1127&items=7
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=37&i=1127
             สารบัญพระไตรปิฎกเล่มที่ ๓๗
https://84000.org/tipitaka/read/?index_37
https://84000.org/tipitaka/english/?index_37