พระไตรปิฎกเล่มที่ ๓๗ ภาษาบาลี อักษรไทย
พระอภิธรรมปิฎกเล่มที่ ๔ อภิ. กถาวตฺถุ

                                         อสญฺจิจฺจกถา
     [๑๘๐๙]   อสญฺจิจฺจ   มาตรํ  ชีวิตา  โวโรเปตฺวา  อานนฺตริโก
โหตีติ   ฯ   อามนฺตา   ฯ   อสญฺจิจฺจ   ปาณํ   หนฺตฺวา   ปาณาติปาตี
โหตีติ   ฯ   น   เหวํ   วตฺตพฺเพ   ฯเปฯ   อสญฺจิจฺจ  มาตรํ  ชีวิตา
โวโรเปตฺวา   อานนฺตริโก   โหตีติ  ฯ  อามนฺตา  ฯ  อสญฺจิจฺจ  อทินฺนํ
อาทิยิตฺวา   ฯเปฯ   มุสา   ภณิตฺวา   มุสาวาที   โหตีติ  ฯ  น  เหวํ
วตฺตพฺเพ ฯเปฯ
     [๑๘๑๐]   อสญฺจิจฺจ  ปาณํ  หนฺตฺวา  ปาณาติปาตี  น  โหตีติ  ฯ
อามนฺตา   ฯ   อสญฺจิจฺจ  มาตรํ  ชีวิตา  โวโรเปตฺวา  อานนฺตริโก  น
โหตีติ   ฯ   น   เหวํ  วตฺตพฺเพ  ฯเปฯ  อสญฺจิจฺจ  อทินฺนํ  อาทิยิตฺวา
ฯเปฯ   มุสา   ภณิตฺวา   มุสาวาที   น   โหตีติ   ฯ   อามนฺตา   ฯ
อสญฺจิจฺจ   มาตรํ   ชีวิตา   โวโรเปตฺวา   อานนฺตริโก  น  โหตีติ  ฯ
น เหวํ วตฺตพฺเพ ฯเปฯ
     [๑๘๑๑]   อสญฺจิจฺจ   มาตรํ  ชีวิตา  โวโรเปตฺวา  อานนฺตริโก
โหตีติ   ฯ   อามนฺตา   ฯ   อสญฺจิจฺจ   มาตรํ   ชีวิตา  โวโรเปตฺวา
อานนฺตริโก   โหตีติ   อตฺเถว   สุตฺตนฺโตติ   ฯ   นตฺถิ   ฯ   สญฺจิจฺจ
มาตรํ  ชีวิตา  โวโรเปตฺวา  อานนฺตริโก  โหตีติ  อตฺเถว  สุตฺตนฺโตติ ฯ
อามนฺตา   ฯ  หญฺจิ  สญฺจิจฺจ  มาตรํ  ชีวิตา  โวโรเปตฺวา  อานนฺตริโก
โหตีติ    อตฺเถว   สุตฺตนฺโต   โน   วต   เร   วตฺตพฺเพ   อสญฺจิจฺจ
มาตรํ ชีวิตา โวโรเปตฺวา อานนฺตริโก โหตีติ ฯ
     [๑๘๑๒]   น  วตฺตพฺพํ  มาตุฆาตโก  อานนฺตริโกติ  ฯ อามนฺตา ฯ
นนุ  มาตา  ชีวิตา  โวโรปิตาติ  ฯ  อามนฺตา  ฯ  หญฺจิ  มาตา  ชีวิตา
โวโรปิตา   เตน   วต   เร  วตฺตพฺเพ  มาตุฆาตโก  อานนฺตริโกติ  ฯ
น   วตฺตพฺพํ   ปิตุฆาตโก   อานนฺตริโกติ   ฯ  อามนฺตา  ฯ  นนุ  ปิตา
ชีวิตา   โวโรปิโตติ   ฯ  อามนฺตา  ฯ  หญฺจิ  ปิตา  ชีวิตา  โวโรปิโต
เตน   วต   เร   วตฺตพฺเพ  ปิตุฆาตโก  อานนฺตริโกติ  ฯ  น  วตฺตพฺพํ
อรหนฺตฆาตโก   อานนฺตริโกติ   ฯ   อามนฺตา   ฯ  นนุ  อรหา  ชีวิตา
โวโรปิโตติ ฯ อามนฺตา ฯ
     {๑๘๑๒.๑}   หญฺจิ  อรหา  ชีวิตา โวโรปิโต เตน วต เร วตฺตพฺเพ
อรหนฺตฆาตโก  อานนฺตริโกติ  ฯ  น วตฺตพฺพํ รุหิรุปฺปาทโก อานนฺตริโกติ ฯ
อามนฺตา  ฯ  นนุ  ตถาคตสฺส  โลหิตํ  อุปฺปาทิตนฺติ  ฯ  อามนฺตา ฯ หญฺจิ
ตถาคตสฺส   โลหิตํ   อุปฺปาทิตํ  เตน  วต  เร  วตฺตพฺเพ  รุหิรุปฺปาทโก
อานนฺตริโกติ   ฯ   สงฺฆเภทโก  อานนฺตริโกติ  ฯ  อามนฺตา  ฯ  สพฺเพ
สงฺฆเภทกา  อานนฺตริกาติ  ฯ  น เหวํ วตฺตพฺเพ ฯเปฯ สพฺเพ สงฺฆเภทกา
อานนฺตริกาติ  ฯ  อามนฺตา  ฯ  ธมฺมสญฺญี  สงฺฆเภทโก  อานนฺตริโกติ  ฯ
น   เหวํ   วตฺตพฺเพ   ฯเปฯ  ธมฺมสญฺญี  สงฺฆเภทโก  อานนฺตริโกติ  ฯ
อามนฺตา   ฯ   นนุ   วุตฺตํ  ภควตา  อตฺถุปาลิ  สงฺฆเภทโก  อาปายิโก
เนรยิโก   กปฺปฏฺโฐ   อเตกิจฺโฉ  อตฺถุปาลิ  สงฺฆเภทโก  น  อาปายิโก
น   เนรยิโก   น   กปฺปฏฺโฐ  น  อเตกิจฺโฉติ  อตฺเถว  สุตฺตนฺโตติ  ฯ
อามนฺตา ฯ เตน หิ น วตฺตพฺพํ ธมฺมสญฺญี สงฺฆเภทโก อานนฺตริโกติ ฯ
     [๑๘๑๓]   น  วตฺตพฺพํ  ธมฺมสญฺญี  สงฺฆเภทโก  อานนฺตริโกติ  ฯ
อามนฺตา ฯ นนุ วุตฺตํ ภควตา
                     อาปายิโก เนรยิโก        กปฺปฏฺโฐ สงฺฆเภทโก
                     วคฺครโต อธมฺมฏฺโฐ       โยคกฺเขมา ปธํสติ
                    สงฺฆํ สมคฺคํ เภตฺวาน     กปฺปํ นิรยมฺหิ ปจฺจตีติ ๑-
อตฺเถว สุตฺตนฺโตติ ฯ อามนฺตา ฯ เตน หิ สงฺฆเภทโก อนนฺตริโกติ ฯ
                                        อสญฺจิจฺจกถา ฯ
                                            --------

             เนื้อความพระไตรปิฎกฉบับภาษาบาลีอักษรไทย เล่มที่ ๓๗ หน้าที่ ๖๒๕-๖๒๗.
https://84000.org/tipitaka/read/pali_item.php?book=37&item=1809&items=5
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=37&item=1809&items=5&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=37&item=1809&items=5
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=37&item=1809&items=5
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=37&i=1809
             สารบัญพระไตรปิฎกเล่มที่ ๓๗
https://84000.org/tipitaka/read/?index_37
https://84000.org/tipitaka/english/?index_37