พระไตรปิฎกเล่มที่ ๔๑ ภาษาบาลี อักษรไทย
พระอภิธรรมปิฎกเล่มที่ ๘ อภิ. ป.(๒) อนุโลมติกปฏฺฐานํ ปจฺฉิมํ

     [๒๑๔๑]   นเหตุปจฺจยา  อารมฺมเณ  เทฺว  ...  อนนฺตเร  เทฺว
สมนนฺตเร   เทฺว   ฯ   สงฺขิตฺตํ   ฯ  มคฺเค  เทฺว  อวิคเต  เทฺว  ฯ
เอวํ คเณตพฺพํ ฯ
                                ปจฺจนียานุโลมํ ฯ
                            ปฏิจฺจวาโร นิฏฺฐิโต ฯ
              สหชาตวาโรปิ ปจฺจยวาโรปิ นิสฺสยวาโรปิ
           สํสฏฺฐวาโรปิ สมฺปยุตฺตวาโรปิ ปฏิจฺจวารสทิสา ฯ
                                 ปญฺหาวาโร
     [๒๑๔๒]   อชฺฌตฺตารมฺมโณ   ธมฺโม   อชฺฌตฺตารมฺมณสฺส   ธมฺมสฺส
เหตุปจฺจเยน     ปจฺจโย     อชฺฌตฺตารมฺมณา    เหตู    สมฺปยุตฺตกานํ
ขนฺธานํ    เหตุปจฺจเยน    ปจฺจโย    ปฏิสนฺธิกฺขเณ    อชฺฌตฺตารมฺมณา
เหตู สมฺปยุตฺตกานํ ขนฺธานํ ฯ
     [๒๑๔๓]   พหิทฺธารมฺมโณ    ธมฺโม   พหิทฺธารมฺมณสฺส   ธมฺมสฺส
เหตุปจฺจเยน ปจฺจโย พหิทฺธารมฺมณา เหตู ... ปฏิสนฺธิกฺขเณ ... ฯ
     [๒๑๔๔]   อชฺฌตฺตารมฺมโณ   ธมฺโม   อชฺฌตฺตารมฺมณสฺส   ธมฺมสฺส
อารมฺมณปจฺจเยน      ปจฺจโย      อชฺฌตฺตารมฺมณํ     วิญฺญาณญฺจายตนํ
ปจฺจเวกฺขติ     เนวสญฺญานาสญฺญายตนํ    ปจฺจเวกฺขติ    อชฺฌตฺตารมฺมณํ
อชฺฌตฺตํ   ทิพฺพํ   จกฺขุํ  ปจฺจเวกฺขติ  ทิพฺพํ  โสตธาตุํ  ...  อิทฺธิวิธญาณํ
...  ปุพฺเพนิวาสานุสฺสติญาณํ  ...  ยถากมฺมูปคญาณํ  ...  อนาคตํสญาณํ
ปจฺจเวกฺขติ   อริยา   อชฺฌตฺตารมฺมเณ   ปหีเน   กิเลเส  ปจฺจเวกฺขนฺติ
วิกฺขมฺภิเต  กิเลเส  ปจฺจเวกฺขนฺติ ปุพฺเพ สมุทาจิณฺเณ ... อชฺฌตฺตารมฺมเณ
อชฺฌตฺเต   ขนฺเธ   อนิจฺจโต   ...  วิปสฺสติ  อสฺสาเทติ  อภินนฺทติ  ตํ
อารพฺภ    อชฺฌตฺตารมฺมโณ    ราโค    ...    โทมนสฺสํ    อุปฺปชฺชติ
อชฺฌตฺตารมฺมณา      อชฺฌตฺตา     ขนฺธา     ปุพฺเพนิวาสานุสฺสติญาณสฺส
ยถากมฺมูปคญาณสฺส            อนาคตํสญาณสฺส           อาวชฺชนาย
อารมฺมณปจฺจเยน ปจฺจโย ฯ
     [๒๑๔๕]   อชฺฌตฺตารมฺมโณ   ธมฺโม   พหิทฺธารมฺมณสฺส   ธมฺมสฺส
อารมฺมณปจฺจเยน   ปจฺจโย  ปโร  อชฺฌตฺตารมฺมณํ  วิญฺญาณญฺจายตนํ  ...
เนวสญฺญานาสญฺญายตนํ      ปจฺจเวกฺขติ      ปโร      อชฺฌตฺตารมฺมณํ
อชฺฌตฺตํ  ทิพฺพํ  จกฺขุํ  ปจฺจเวกฺขติ  ทิพฺพํ  โสตธาตุํ ... อิทฺธิวิธญาณํ ...
ปุพฺเพนิวาสานุสฺสติญาณํ    ...   ยถากมฺมูปคญาณํ   ...   อนาคตํสญาณํ
ปจฺจเวกฺขติ     อชฺฌตฺตารมฺมเณ     อชฺฌตฺเต     ขนฺเธ     อนิจฺจโต
ทุกฺขโต    อนตฺตโต    วิปสฺสติ    เจโตปริยญาเณน    อชฺฌตฺตารมฺมณ-
อชฺฌตฺตจิตฺตสมงฺคิสฺส    จิตฺตํ    ชานาติ    อชฺฌตฺตารมฺมณา    พหิทฺธา
ขนฺธา   เจโตปริยญาณสฺส   ปุพฺเพนิวาสานุสฺสติญาณสฺส  ยถากมฺมูปคญาณสฺส
อนาคตํสญาณสฺส อาวชฺชนาย อารมฺมณปจฺจเยน ปจฺจโย ฯ
     [๒๑๔๖]   พหิทฺธารมฺมโณ    ธมฺโม   พหิทฺธารมฺมณสฺส   ธมฺมสฺส
อารมฺมณปจฺจเยน    ปจฺจโย    ปโร    พหิทฺธารมฺมณํ   พหิทฺธา   ทิพฺพํ
จกฺขุํ ปจฺจเวกฺขติ ทิพฺพํ โสตธาตุํ ... อิทฺธิวิธญาณํ ... เจโตปริยญาณํ ...
ปุพฺเพนิวาสานุสฺสติญาณํ    ...   ยถากมฺมูปคญาณํ   ...   อนาคตํสญาณํ
ปจฺจเวกฺขติ    ปโร    พหิทฺธารมฺมเณ    พหิทฺธา    ขนฺเธ   อนิจฺจโต
ทุกฺขโต     อนตฺตโต    วิปสฺสติ    เจโตปริยญาเณน    พหิทฺธารมฺมณ-
พหิทฺธาจิตฺตสมงฺคิสฺส     จิตฺตํ    ชานาติ    พหิทฺธารมฺมณา    พหิทฺธา
ขนฺธา   เจโตปริยญาณสฺส   ปุพฺเพนิวาสานุสฺสติญาณสฺส  ยถากมฺมูปคญาณสฺส
อนาคตํสญาณสฺส อาวชฺชนาย อารมฺมณปจฺจเยน ปจฺจโย ฯ
     [๒๑๔๗]   พหิทฺธารมฺมโณ   ธมฺโม   อชฺฌตฺตารมฺมณสฺส   ธมฺมสฺส
อารมฺมณปจฺจเยน   ปจฺจโย  ทานํ  ทตฺวา  สีลํ  สมาทิยิตฺวา  อุโปสถกมฺมํ
กตฺวา  ตํ  ปจฺจเวกฺขติ  ปุพฺเพ  สุจิณฺณานิ  ปจฺจเวกฺขติ  ฌานา วุฏฺฐหิตฺวา
ฌานํ   ปจฺจเวกฺขติ  อริยา  มคฺคา  วุฏฺฐหิตฺวา  มคฺคํ  ปจฺจเวกฺขนฺติ  ผลํ
ปจฺจเวกฺขนฺติ   ปหีเน  กิเลเส  ปจฺจเวกฺขนฺติ  วิกฺขมฺภิเต  กิเลเส  ...
ปุพฺเพ    สมุทาจิณฺเณ   ฯเปฯ   พหิทฺธารมฺมณํ   อชฺฌตฺตํ   ทิพฺพํ   จกฺขุํ
ปจฺจเวกฺขติ   ทิพฺพํ   โสตธาตุํ  ...  อิทฺธิวิธญาณํ  ...  เจโตปริยญาณํ
...  ปุพฺเพนิวาสานุสฺสติญาณํ  ...  ยถากมฺมูปคญาณํ  ...  อนาคตํสญาณํ
...  พหิทฺธารมฺมเณ  อชฺฌตฺเต  ขนฺเธ  อนิจฺจโต ... วิปสฺสติ อสฺสาเทติ
อภินนฺทติ    ตํ   อารพฺภ   อชฺฌตฺตารมฺมโณ   ราโค   ...   โทมนสฺสํ
อุปฺปชฺชติ     พหิทฺธารมฺมณา     อชฺฌตฺตา    ขนฺธา     อิทฺธิวิธญาณสฺส
ปุพฺเพนิวาสานุสฺสติญาณสฺส ยถากมฺมูปคญาณสฺส
อนาคตํสญาณสฺส อาวชฺชนาย อารมฺมณปจฺจเยน ปจฺจโย ฯ
     [๒๑๔๘]   อชฺฌตฺตารมฺมโณ   ธมฺโม   อชฺฌตฺตารมฺมณสฺส   ธมฺมสฺส
อธิปติปจฺจเยน     ปจฺจโย     อารมฺมณาธิปติ     สหชาตาธิปติ     ฯ
อารมฺมณาธิปติ:    อชฺฌตฺตารมฺมณํ    อชฺฌตฺตํ    วิญฺญาณญฺจายตนํ    ครุํ
กตฺวา    ปจฺจเวกฺขติ    เนวสญฺญานาสญฺญายตนํ    ครุํ   กตฺวา   ...
อชฺฌตฺตารมฺมณํ  อชฺฌตฺตํ  ทิพฺพํ  จกฺขุํ  ครุํ กตฺวา ... ทิพฺพํ โสตธาตุํ ...
อิทฺธิวิธญาณํ   ...  ปุพฺเพนิวาสานุสฺสติญาณํ  ...  ยถากมฺมูปคญาณํ  ...
อนาคตํสญาณํ   ครุํ   กตฺวา   ...   อชฺฌตฺตารมฺมเณ  อชฺฌตฺเต  ขนฺเธ
ครุํ   กตฺวา   อสฺสาเทติ   อภินนฺทติ   ตํ  ครุํ  กตฺวา  อชฺฌตฺตารมฺมโณ
ราโค   ...   ทิฏฺฐิ  อุปฺปชฺชติ  ฯ  สหชาตาธิปติ:  อชฺฌตฺตารมฺมณาธิปติ
สมฺปยุตฺตกานํ ขนฺธานํ อธิปติปจฺจเยน ปจฺจโย ฯ
     [๒๑๔๙]   พหิทฺธารมฺมโณ    ธมฺโม   พหิทฺธารมฺมณสฺส   ธมฺมสฺส
อธิปติปจฺจเยน    ปจฺจโย    ฯ    สหชาตาธิปติ:    พหิทฺธารมฺมณาธิปติ
สมฺปยุตฺตกานํ ขนฺธานํ อธิปติปจฺจเยน ปจฺจโย ฯ
     [๒๑๕๐]   พหิทฺธารมฺมโณ   ธมฺโม   อชฺฌตฺตารมฺมณสฺส   ธมฺมสฺส
อธิปติปจฺจเยน    ปจฺจโย   ฯ   อารมฺมณาธิปติ:   ทานํ   ทตฺวา   สีลํ
สมาทิยิตฺวา    อุโปสถกมฺมํ    กตฺวา   ตํ   ครุํ   กตฺวา   ปจฺจเวกฺขติ
ปุพฺเพ  สุจิณฺณานิ  ...  ฌานา  วุฏฺฐหิตฺวา  ... อริยา มคฺคา วุฏฺฐหิตฺวา
มคฺคํ  ...  ผลํ  ครุํ  กตฺวา  ...  พหิทฺธารมฺมณํ  อชฺฌตฺตํ  ทิพฺพํ  จกฺขุํ
ครุํ  กตฺวา ... ทิพฺพํ โสตธาตุํ ... อิทฺธิวิธญาณํ ... เจโตปริยญาณํ ...
ปุพฺเพนิวาสานุสฺสติญาณํ   ...  ยถากมฺมูปคญาณํ  ...  อนาคตํสญาณํ  ครุํ
กตฺวา   ปจฺจเวกฺขติ   พหิทฺธารมฺมเณ   อชฺฌตฺเต   ขนฺเธ   ครุํ  กตฺวา
อสฺสาเทติ   ตํ   ครุํ   กตฺวา   อชฺฌตฺตารมฺมโณ   ราโค   ...  ทิฏฺฐิ
อุปฺปชฺชติ ฯ
     [๒๑๕๑]   อชฺฌตฺตารมฺมโณ   ธมฺโม   อชฺฌตฺตารมฺมณสฺส   ธมฺมสฺส
อนนฺตรปจฺจเยน    ปจฺจโย   ปุริมา   ปุริมา   อชฺฌตฺตารมฺมณา   ขนฺธา
ปจฺฉิมานํ    ปจฺฉิมานํ    อชฺฌตฺตารมฺมณานํ    ขนฺธานํ   อนนฺตรปจฺจเยน
ปจฺจโย ฯ
     [๒๑๕๒]   อชฺฌตฺตารมฺมโณ   ธมฺโม   พหิทฺธารมฺมณสฺส   ธมฺมสฺส
อนนฺตรปจฺจเยน    ปจฺจโย   อชฺฌตฺตารมฺมณํ   จุติจิตฺตํ   พหิทฺธารมฺมณสฺส
อุปปตฺติจิตฺตสฺส    อนนฺตรปจฺจเยน    ปจฺจโย    อชฺฌตฺตารมฺมณํ   ภวงฺคํ
พหิทฺธารมฺมณาย   อาวชฺชนาย  อนนฺตรปจฺจเยน  ปจฺจโย  อชฺฌตฺตารมฺมณา
ขนฺธา     พหิทฺธารมฺมณสฺส    วุฏฺฐานสฺส    อนนฺตรปจฺจเยน    ปจฺจโย
อชฺฌตฺตารมฺมณํ    อนุโลมํ   โคตฺรภุสฺส   อนุโลมํ   โวทานสฺส   อนุโลมํ
ผลสมาปตฺติยา      นิโรธา     วุฏฺฐหนฺตสฺส     เนวสญฺญานาสญฺญายตนํ
ผลสมาปตฺติยา อนนฺตรปจฺจเยน ปจฺจโย ฯ
     [๒๑๕๓]   พหิทฺธารมฺมโณ    ธมฺโม   พหิทฺธารมฺมณสฺส   ธมฺมสฺส
อนนฺตรปจฺจเยน    ปจฺจโย    ปุริมา   ปุริมา   พหิทฺธารมฺมณา   ขนฺธา
ปจฺฉิมานํ    ปจฺฉิมานํ    พหิทฺธารมฺมณานํ    ขนฺธานํ    อนนฺตรปจฺจเยน
ปจฺจโย    พหิทฺธารมฺมณํ    อนุโลมํ   โคตฺรภุสฺส   อนุโลมํ   โวทานสฺส
โคตฺรภุ   มคฺคสฺส   โวทานํ   มคฺคสฺส   มคฺโค   ผลสฺส   ผลํ   ผลสฺส
อนุโลมํ ผลสมาปตฺติยา อนนฺตรปจฺจเยน ปจฺจโย ฯ
     [๒๑๕๔]   พหิทฺธารมฺมโณ   ธมฺโม   อชฺฌตฺตารมฺมณสฺส   ธมฺมสฺส
อนนฺตรปจฺจเยน    ปจฺจโย   พหิทฺธารมฺมณํ   จุติจิตฺตํ   อชฺฌตฺตารมฺมณสฺส
อุปปตฺติจิตฺตสฺส    อนนฺตรปจฺจเยน    ปจฺจโย    พหิทฺธารมฺมณํ    ภวงฺคํ
อชฺฌตฺตารมฺมณาย   อาวชฺชนาย  อนนฺตรปจฺจเยน  ปจฺจโย  พหิทฺธารมฺมณา
ขนฺธา อชฺฌตฺตารมฺมณสฺส วุฏฺฐานสฺส อนนฺตรปจฺจเยน ปจฺจโย ฯ
     [๒๑๕๕]   อชฺฌตฺตารมฺมโณ   ธมฺโม   อชฺฌตฺตารมฺมณสฺส   ธมฺมสฺส
สมนนฺตรปจฺจเยน   ปจฺจโย   สหชาตปจฺจเยน  ปจฺจโย  อญฺญมญฺญปจฺจเยน
ปจฺจโย     นิสฺสยปจฺจเยน     ปจฺจโย    อุปนิสฺสยปจฺจเยน    ปจฺจโย
อารมฺมณูปนิสฺสโย        อนนฺตรูปนิสฺสโย       ปกตูปนิสฺสโย       ฯ
ปกตูปนิสฺสโย:     อชฺฌตฺตารมฺมณา    อนิจฺจานุปสฺสนา    ทุกฺขานุปสฺสนา
อนตฺตานุปสฺสนา   อชฺฌตฺตารมฺมณาย   อนิจฺจานุปสฺสนาย   ทุกฺขานุปสฺสนาย
อนตฺตานุปสฺสนาย อุปนิสฺสยปจฺจเยน ปจฺจโย ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๔๑ หน้าที่ ๕๙๗-๖๐๓.
https://84000.org/tipitaka/read/pali_item.php?book=41&item=2141&items=15
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=41&item=2141&items=15&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=41&item=2141&items=15
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=41&item=2141&items=15
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=41&i=2141
             สารบัญพระไตรปิฎกเล่มที่ ๔๑
https://84000.org/tipitaka/read/?index_41
https://84000.org/tipitaka/english/?index_41