พระไตรปิฎกเล่มที่ ๘ ภาษาบาลี อักษรไทย
พระวินัยปิฎกเล่มที่ ๘ วินย. ปริวาโร

     [๑๑๕]   สุราเมรยปาเน  ปาจิตฺติยํ  กตฺถ  ปญฺญตฺตนฺติ ฯ โกสมฺพิยา
ปญฺญตฺตํ   ฯ   กํ  อารพฺภาติ  ฯ  อายสฺมนฺตํ  สาคตํ  อารพฺภ  ฯ  กิสฺมึ
วตฺถุสฺมินฺติ   ฯ   อายสฺมา   สาคโต   มชฺชํ   ปิวิ   ตสฺมึ  วตฺถุสฺมึ  ฯ
เอกา   ปญฺญตฺติ   ฯ   ฉนฺนํ   อาปตฺติสมุฏฺฐานานํ   ทฺวีหิ   สมุฏฺฐาเนหิ
สมุฏฺฐาติ    สิยา    กายโต   สมุฏฺฐาติ   น   วาจโต   น   จิตฺตโต
สิยา กายโต จ จิตฺตโต จ สมุฏฺฐาติ น วาจโต ฯเปฯ
     [๑๑๖]   องฺคุลิปโตทเก  ปาจิตฺติยํ  กตฺถ  ปญฺญตฺตนฺติ  ฯ สาวตฺถิยา
ปญฺญตฺตํ   ฯ   กํ   อารพฺภาติ  ฯ  ฉพฺพคฺคิเย  ภิกฺขู  อารพฺภ  ฯ  กิสฺมึ
วตฺถุสฺมินฺติ   ฯ   ฉพฺพคฺคิยา   ภิกฺขู   ภิกฺขุํ   องฺคุลิปโตทเกน   หาเสสุํ
ตสฺมึ   วตฺถุสฺมึ   ฯ   เอกา   ปญฺญตฺติ   ฯ   ฉนฺนํ  อาปตฺติสมุฏฺฐานานํ
เอเกน   สมุฏฺฐาเนน   สมุฏฺฐาติ   กายโต   จ  จิตฺตโต  จ  สมุฏฺฐาติ
น วาจโต ฯเปฯ
     [๑๑๗]   อุทเก  หสฺสธมฺเม  ๑-  ปาจิตฺติยํ  กตฺถ  ปญฺญตฺตนฺติ  ฯ
สาวตฺถิยา   ปญฺญตฺตํ   ฯ   กํ   อารพฺภาติ   ฯ   สตฺตรสวคฺคิเย  ภิกฺขู
อารพฺภ   ฯ   กิสฺมึ   วตฺถุสฺมินฺติ   ฯ  สตฺตรสวคฺคิยา  ภิกฺขู  อจิรวติยา
นทิยา   อุทเก   กีฬึสุ   ตสฺมึ   วตฺถุสฺมึ  ฯ  เอกา  ปญฺญตฺติ  ฯ  ฉนฺนํ
อาปตฺติสมุฏฺฐานานํ    เอเกน    สมุฏฺฐาเนน   สมุฏฺฐาติ   กายโต   จ
@เชิงอรรถ: ๑ โป. หสนธมฺเม ฯ ม. หสธมฺเม ฯ ยุ. หาสธมฺเม ฯ
จิตฺตโต จ สมุฏฺฐาติ น วาจโต ฯเปฯ
     [๑๑๘]   อนาทริเย   ปาจิตฺติยํ  กตฺถ  ปญฺญตฺตนฺติ  ฯ  โกสมฺพิยา
ปญฺญตฺตํ   ฯ   กํ   อารพฺภาติ  ฯ  อายสฺมนฺตํ  ฉนฺนํ  อารพฺภ  ฯ  กิสฺมึ
วตฺถุสฺมินฺติ   ฯ   อายสฺมา  ฉนฺโน  อนาทริยํ  อกาสิ  ตสฺมึ  วตฺถุสฺมึ  ฯ
เอกา    ปญฺญตฺติ   ฯ   ฉนฺนํ   อาปตฺติสมุฏฺฐานานํ   ตีหิ   สมุฏฺฐาเนหิ
สมุฏฺฐาติ ฯเปฯ
     [๑๑๙]   ภิกฺขุํ   ภึสาเปนฺตสฺส   ปาจิตฺติยํ   กตฺถ  ปญฺญตฺตนฺติ  ฯ
สาวตฺถิยา  ปญฺญตฺตํ  ฯ  กํ  อารพฺภาติ  ฯ  ฉพฺพคฺคิเย  ภิกฺขู  อารพฺภ ฯ
กิสฺมึ    วตฺถุสฺมินฺติ   ฯ   ฉพฺพคฺคิยา   ภิกฺขู   ภิกฺขุํ   ภึสาเปสุํ   ตสฺมึ
วตฺถุสฺมึ   ฯ   เอกา   ปญฺญตฺติ   ฯ   ฉนฺนํ   อาปตฺติสมุฏฺฐานานํ   ตีหิ
สมุฏฺฐาเนหิ สมุฏฺฐาติ ฯเปฯ
     [๑๒๐]   โชตึ   สมาทหิตฺวา   วิสิพฺเพนฺตสฺส   ปาจิตฺติยํ   กตฺถ
ปญฺญตฺตนฺติ   ฯ   ภคฺเคสุ   ปญฺญตฺตํ   ฯ   กํ  อารพฺภาติ  ฯ  สมฺพหุเล
ภิกฺขู  อารพฺภ  ฯ  กิสฺมึ  วตฺถุสฺมินฺติ  ฯ  สมฺพหุลา ภิกฺขู โชตึ สมาทหิตฺวา
วิสิพฺเพสุํ   ตสฺมึ   วตฺถุสฺมึ   ฯ  เอกา  ปญฺญตฺติ  เทฺว  อนุปฺปญฺญตฺติ  ฯ
ฉนฺนํ อาปตฺติสมุฏฺฐานานํ ฉหิ สมุฏฺฐาเนหิ สมุฏฺฐาติ ฯเปฯ
     [๑๒๑]   โอเรนฑฺฒมาสํ     นฺหายนฺตสฺส    ปาจิตฺติยํ    กตฺถ
ปญฺญตฺตนฺติ  ฯ  ราชคเห  ปญฺญตฺตํ  ฯ  กํ  อารพฺภาติ  ฯ  สมฺพหุเล ภิกฺขู
อารพฺภ   ฯ  กิสฺมึ  วตฺถุสฺมินฺติ  ฯ  สมฺพหุลา  ภิกฺขู  ราชานํปิ  ปสฺสิตฺวา
น   มตฺตํ   ชานิตฺวา   นฺหายึสุ   ตสฺมึ   วตฺถุสฺมึ   ฯ  เอกา  ปญฺญตฺติ
ฉ    อนุปฺปญฺญตฺติโย    ฯ    สพฺพตฺถ    ปญฺญตฺติ   ปเทสปญฺญตฺตีติ   ฯ
ปเทสปญฺญตฺติ    ฯ    ฉนฺนํ    อาปตฺติสมุฏฺฐานานํ   ทฺวีหิ   สมุฏฺฐาเนหิ
สมุฏฺฐาติ (เอฬกโลมเก) ฯเปฯ
     [๑๒๒]   อนาทยิตฺวา     ติณฺณํ     ทุพฺพณฺณกรณานํ    อญฺญตรํ
ทุพฺพณฺณกรณํ   นวํ   จีวรํ  ปริภุญฺชนฺตสฺส  ปาจิตฺติยํ  กตฺถ  ปญฺญตฺตนฺติ  ฯ
สาวตฺถิยา  ปญฺญตฺตํ  ฯ  กํ  อารพฺภาติ  ฯ  สมฺพหุเล  ภิกฺขู  อารพฺภ  ฯ
กิสฺมึ   วตฺถุสฺมินฺติ   ฯ   สมฺพหุลา   ภิกฺขู  อตฺตโน  จีวรํ  น  สญฺชานึสุ
ตสฺมึ   วตฺถุสฺมึ   ฯ   เอกา   ปญฺญตฺติ   ฯ   ฉนฺนํ  อาปตฺติสมุฏฺฐานานํ
ทฺวีหิ สมุฏฺฐาเนหิ สมุฏฺฐาติ (เอฬกโลมเก) ฯเปฯ
     [๑๒๓]   ภิกฺขุสฺส  วา  ภิกฺขุนิยา  วา  สิกฺขมานาย วา สามเณรสฺส
วา   สามเณริยา   วา   สามํ  จีวรํ  วิกปฺเปตฺวา  อปฺปจฺจุทฺธารกํ  ๑-
ปริภุญฺชนฺตสฺส   ปาจิตฺติยํ   กตฺถ  ปญฺญตฺตนฺติ  ฯ  สาวตฺถิยา  ปญฺญตฺตํ  ฯ
กํ   อารพฺภาติ   ฯ   อายสฺมนฺตํ  อุปนนฺทํ  สกฺยปุตฺตํ  อารพฺภ  ฯ  กิสฺมึ
วตฺถุสฺมินฺติ    ฯ    อายสฺมา   อุปนนฺโท   สกฺยปุตฺโต   ภิกฺขุสฺส   สามํ
จีวรํ    วิกปฺเปตฺวา    อปฺปจฺจุทฺธารกํ   ปริภุญฺชิ   ตสฺมึ   วตฺถุสฺมึ   ฯ
เอกา   ปญฺญตฺติ   ฯ   ฉนฺนํ   อาปตฺติสมุฏฺฐานานํ   ทฺวีหิ   สมุฏฺฐาเนหิ
สมุฏฺฐาติ (กฐินเก) ฯเปฯ
     [๑๒๔]   ภิกฺขุสฺส  ปตฺตํ  วา  จีวรํ  วา  นิสีทนํ  วา  สูจิฆรํ  วา
กายพนฺธนํ    วา    อปนิเธนฺตสฺส   ปาจิตฺติยํ   กตฺถ   ปญฺญตฺตนฺติ   ฯ
@เชิงอรรถ: ๑ ม. อปฺปจฺจุทฺธารณํ ฯ
สาวตฺถิยา  ปญฺญตฺตํ  ฯ  กํ  อารพฺภาติ  ฯ  ฉพฺพคฺคิเย  ภิกฺขู  อารพฺภ ฯ
กิสฺมึ   วตฺถุสฺมินฺติ   ฯ   ฉพฺพคฺคิยา    ภิกฺขู   ภิกฺขูนํ   ปตฺตํปิ  จีวรํปิ
นิสีทนํปิ   ๑-   สูจิฆรํปิ   กายพนฺธนํปิ   อปนิเธสุํ   ตสฺมึ   วตฺถุสฺมึ  ฯ
เอกา    ปญฺญตฺติ   ฯ   ฉนฺนํ   อาปตฺติสมุฏฺฐานานํ   ตีหิ   สมุฏฺฐาเนหิ
สมุฏฺฐาติ ฯเปฯ
                            สุราเมรยวคฺโค ฉฏฺโฐ ฯ
                                   ตสฺสุทฺทานํ
     [๑๒๕]   สุรํ องฺคุลิปโตเท         อุทเก จ อนาทเร
                  ภิกฺขุํ วา ภึสาปนญฺจ        โชติญฺจ นฺหานทุพฺพณฺณ-
                  กรณํ วิกปฺปญฺเจว            จีวรํ อปนิเธน จาติ ๒- ฯ
                                   -----------

             เนื้อความพระไตรปิฎกฉบับภาษาบาลีอักษรไทย เล่มที่ ๘ หน้าที่ ๔๘-๕๑.
https://84000.org/tipitaka/read/pali_item.php?book=8&item=115&items=11
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=8&item=115&items=11&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=8&item=115&items=11
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=8&item=115&items=11
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=8&i=115
             สารบัญพระไตรปิฎกเล่มที่ ๘
https://84000.org/tipitaka/read/?index_8
https://84000.org/tipitaka/english/?index_8