พระไตรปิฎกเล่มที่ ๘ ภาษาบาลี อักษรไทย
พระวินัยปิฎกเล่มที่ ๘ วินย. ปริวาโร

     [๔๖๗]   เมถุนํ  ธมฺมํ  ปฏิเสวนฺโต  กติ  อาปตฺติโย  อาปชฺชติ  ฯ
เมถุนํ   ธมฺมํ   ปฏิเสวนฺโต   ติสฺโส   อาปตฺติโย  อาปชฺชติ  อกฺขายิเต
สรีเร   เมถุนํ   ธมฺมํ   ปฏิเสวติ   อาปตฺติ   ปาราชิกสฺส   เยภุยฺเยน
ขายิเต    สรีเร    เมถุนํ   ธมฺมํ   ปฏิเสวติ   อาปตฺติ   ถุลฺลจฺจยสฺส
วิวฏกเต   ๑-  มุเข  อจฺฉุปนฺตํ  องฺคชาตํ  ปเวเสติ  อาปตฺติ  ทุกฺกฏสฺส
เมถุนํ   ธมฺมํ   ปฏิเสวนฺโต   อิมา   ติสฺโส   อาปตฺติโย  อาปชฺชติ  ฯ
ตา   อาปตฺติโย   จตุนฺนํ   วิปตฺตีนํ  กติ  วิปตฺติโย  ภชนฺติ  ฯ  สตฺตนฺนํ
อาปตฺติกฺขนฺธานํ  กตีหิ อาปตฺติกฺขนฺเธหิ สงฺคหิตา ฯ ฉนฺนํ อาปตฺติสมุฏฺฐานานํ
กตีหิ สมุฏฺฐาเนหิ สมุฏฺฐหนฺติ ฯ
     {๔๖๗.๑}   จตุนฺนํ  อธิกรณานํ  กตมํ  อธิกรณํ  ฯ  สตฺตนฺนํ สมถานํ
กตีหิ  สมเถหิ  สมฺมนฺติ  ฯ  ตา  อาปตฺติโย จตุนฺนํ วิปตฺตีนํ เทฺว วิปตฺติโย
ภชนฺติ   สิยา  สีลวิปตฺตึ  สิยา  อาจารวิปตฺตึ  ฯ สตฺตนฺนํ อาปตฺติกฺขนฺธานํ
ตีหิ   อาปตฺติกฺขนฺเธหิ   สงฺคหิตา   สิยา   ปาราชิกาปตฺติกฺขนฺเธน  สิยา
ถุลฺลจฺจยาปตฺติกฺขนฺเธน     สิยา     ทุกฺกฏาปตฺติกฺขนฺเธน    ฯ    ฉนฺนํ
อาปตฺติสมุฏฺฐานานํ  เอเกน  สมุฏฺฐาเนน  สมุฏฺฐหนฺติ  กายโต  จ จิตฺตโต
จ   สมุฏฺฐหนฺติ   น  วาจโต  ฯ  จตุนฺนํ  อธิกรณานํ  อาปตฺตาธิกรณํ  ฯ
@เชิงอรรถ: ๑ ม. วฏฺฏกเต ฯ ยุ. วตฺตกเต ฯ
สตฺตนฺนํ   สมถานํ   ตีหิ   สมเถหิ   สมฺมนฺติ   สิยา  สมฺมุขาวินเยน  จ
ปฏิญฺญาตกรเณน    จ    สิยา    สมฺมุขาวินเยน    จ   ติณวตฺถารเกน
จ   ฯเปฯ   อนาทริยํ   ปฏิจฺจ   อุทเก   อุจฺจารํ   วา  ปสฺสาวํ  วา
เขฬํ   วา   กโรนฺโต  กติ  อาปตฺติโย  อาปชฺชติ  ฯ  อนาทริยํ  ปฏิจฺจ
อุทเก  อุจฺจารํ  วา  ปสฺสาวํ  วา  เขฬํ  วา  กโรนฺโต  เอกํ  อาปตฺตึ
อาปชฺชติ   ทุกฺกฏํ   ฯ  อนาทริยํ  ปฏิจฺจ  อุทเก  อุจฺจารํ  วา  ปสฺสาวํ
วา เขฬํ วา กโรนฺโต อิมํ เอกํ อาปตฺตึ อาปชฺชติ ฯ
     {๔๖๗.๒}   สา  อาปตฺติ  จตุนฺนํ  วิปตฺตีนํ  กติ  วิปตฺติโย  ภชติ ฯ
สตฺตนฺนํ   อาปตฺติกฺขนฺธานํ   กตีหิ   อาปตฺติกฺขนฺเธหิ  สงฺคหิตา  ฯ  ฉนฺนํ
อาปตฺติสมุฏฺฐานานํ   กตีหิ  สมุฏฺฐาเนหิ  สมุฏฺฐาติ  ฯ  จตุนฺนํ  อธิกรณานํ
กตมํ   อธิกรณํ   ฯ   สตฺตนฺนํ   สมถานํ   กตีหิ   สมเถหิ   สมฺมติ  ฯ
สา   อาปตฺติ   จตุนฺนํ   วิปตฺตีนํ  เอกํ  วิปตฺตึ  ภชติ  อาจารวิปตฺตึ  ฯ
สตฺตนฺนํ     อาปตฺติกฺขนฺธานํ    เอเกน    อาปตฺติกฺขนฺเธน    สงฺคหิตา
ทุกฺกฏาปตฺติกฺขนฺเธน   ฯ  ฉนฺนํ  อาปตฺติสมุฏฺฐานานํ  เอเกน  สมุฏฺฐาเนน
สมุฏฺฐาติ   กายโต   จ   จิตฺตโต   จ   สมุฏฺฐาติ   น   วาจโต   ฯ
จตุนฺนํ    อธิกรณานํ    อาปตฺตาธิกรณํ    ฯ   สตฺตนฺนํ   สมถานํ   ตีหิ
สมเถหิ    สมฺมติ    สิยา   สมฺมุขาวินเยน   จ   ปฏิญฺญาตกรเณน   จ
สิยา สมฺมุขาวินเยน จ ติณวตฺถารเกน จ ฯ
                         สมุจฺจยวารํ นิฏฺฐิตํ อฏฺฐมํ ฯ
               อิเม อฏฺฐ วารา สชฺฌายมตฺเตน ๑- ลิขิตา ฯ
@เชิงอรรถ: ๑ ม. ยุ. สชฺฌายมคฺเคน ฯ
                                   ตสฺสุทฺทานํ
     [๔๖๘]   กตฺถ ปญฺญตฺติ กตี จ         วิปตฺติสงฺคเหน จ
                  สมุฏฺฐานาธิกรณา                  สมโถ จ สมุจฺจโยติ ฯ
                                    ----------
     [๔๖๙]   ยนฺเตน  ภควตา  ชานตา ปสฺสตา อรหตา สมฺมาสมฺพุทฺเธน
เมถุนํ   ธมฺมํ   ปฏิเสวนปจฺจยา   ปาราชิกํ   กตฺถ   ปญฺญตฺตํ   ฯ   กํ
อารพฺภ   ฯ   กิสฺมึ  วตฺถุสฺมึ  ฯเปฯ  เกนาภฏนฺติ  ฯ  ยนฺเตน  ภควตา
ชานตา  ปสฺสตา  อรหตา  สมฺมาสมฺพุทฺเธน  เมถุนํ  ธมฺมํ ปฏิเสวนปจฺจยา
ปาราชิกํ    กตฺถ    ปญฺญตฺตนฺติ    ฯ   เวสาลิยา   ปญฺญตฺตํ   ฯ   กํ
อารพฺภาติ   ฯ   สุทินฺนํ   กลนฺทปุตฺตํ  อารพฺภ  ฯ  กิสฺมึ  วตฺถุสฺมินฺติ  ฯ
สุทินฺโน   กลนฺทปุตฺโต   ปุราณทุติยิกาย   เมถุนํ   ธมฺมํ   ปฏิเสวิ  ตสฺมึ
วตฺถุสฺมึ   ฯ   อตฺถิ   ตตฺถ  ปญฺญตฺติ  อนุปฺปญฺญตฺติ  อนุปฺปนฺนปญฺญตฺตีติ  ฯ
เอกา      ปญฺญตฺติ      เทฺว     อนุปฺปญฺญตฺติโย     อนุปฺปนฺนปญฺญตฺติ
ตสฺมึ    นตฺถิ    ฯ   สพฺพตฺถ   ปญฺญตฺติ   ปเทสปญฺญตีติ   ฯ   สพฺพตฺถ
ปญฺญตฺติ      ฯ      สาธารณปญฺญตฺติ      อสาธารณปญฺญตฺตีติ      ฯ
สาธารณปญฺญตฺติ    ฯ    เอกโต    ปญฺญตฺติ    อุภโต   ปญฺญตฺตีติ   ฯ
อุภโต   ปญฺญตฺติ   ฯ   ปญฺจนฺนํ   ปาติโมกฺขุทฺเทสานํ   กตฺโถคธํ   กตฺถ
ปริยาปนฺนนฺติ   ฯ   นิทาโนคธํ  นิทานปริยาปนฺนํ  ฯ  กตเมน  อุทฺเทเสน
อุทฺเทสํ  อาคจฺฉตีติ  ฯ  ทุติเยน  อุทฺเทเสน  อุทฺเทสํ  อาคจฺฉติ ฯ จตุนฺนํ
วิปตฺตีนํ   กตมา   วิปตฺตีติ   ฯ  สีลวิปตฺติ  ฯ  สตฺตนฺนํ  อาปตฺติกฺขนฺธานํ
@เชิงอรรถ: ๑ ม. สมโถ สมุจฺจเยน จ ฯ ยุ. สมถา สมุจฺจเยน จ ฯ
กตโม    อาปตฺติกฺขนฺโธติ    ฯ    ปาราชิกาปตฺติกฺขนฺโธ    ฯ    ฉนฺนํ
อาปตฺติสมุฏฺฐานานํ    กตีหิ    สมุฏฺฐาเนหิ    สมุฏฺฐาตีติ   ฯ   เอเกน
สมุฏฺฐาเนน   สมุฏฺฐาติ  กายโต  จ  จิตฺตโต  จ  สมุฏฺฐาติ  น  วาจโต
ฯเปฯ เกนาภฏนฺติ ฯ ปารมฺปราภฏํ ฯ
      อุปาลิ ทาสโก เจว                  โสณโก สิคฺคโว ตถา
      โมคฺคลีปุตฺเตน ปญฺจมา          เอเต ชมฺพุสิริวฺหเย ฯ
      ตโต มหินฺโท อิฏฺฏิโย              อุตฺติโย เจว สมฺพโล
                                      ฯเปฯ
      เอเต นาคา มหาปญฺญา          วินยญฺญู มคฺคโกวิทา
      วินยํ ทีเป ปกาเสสุํ                  ปิฏกํ ตมฺพปณฺณิยาติ ฯ
     [๔๗๐]   ยนฺเตน  ภควตา  ชานตา ปสฺสตา อรหตา สมฺมาสมฺพุทฺเธน
อทินฺนํ     อาทิยนปจฺจยา     ปาราชิกํ     กตฺถ     ปญฺญตฺตนฺติ    ฯ
ราชคเห    ปญฺญตฺตํ   ฯ   กํ   อารพฺภาติ   ฯ   ธนิยํ   กุมฺภการปุตฺตํ
อารพฺภ  ฯ  กิสฺมึ  วตฺถุสฺมินฺติ  ฯ  ธนิโย  กุมฺภการปุตฺโต  รญฺโญ  ทารูนิ
อทินฺนํ    อาทิยิ    ตสฺมึ    วตฺถุสฺมึ    ฯ   เอกา   ปญฺญตฺติ   เอกา
อนุปฺปญฺญตฺติ    ฯ    ฉนฺนํ    อาปตฺติสมุฏฺฐานานํ    ตีหิ    สมุฏฺฐาเนหิ
สมุฏฺฐาติ   สิยา   กายโต   จ   จิตฺตโต   จ   สมุฏฺฐาติ  น  วาจโต
สิยา    วาจโต   จ   จิตฺตโต   จ   สมุฏฺฐาติ   น   กายโต   สิยา
กายโต จ วาจโต จ จิตฺตโต จ สมุฏฺฐาติ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๘ หน้าที่ ๑๑๖-๑๑๙.
https://84000.org/tipitaka/read/pali_item.php?book=8&item=467&items=4&mode=bracket
             อ่านโดยใช้เนื้อความเป็นเกณฑ์แบ่งข้อ :-
https://84000.org/tipitaka/read/pali_item.php?book=8&item=467&items=4
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=8&item=467&items=4&mode=bracket
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=8&item=467&items=4&mode=bracket
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=8&i=467
             สารบัญพระไตรปิฎกเล่มที่ ๘
https://84000.org/tipitaka/read/?index_8
https://84000.org/tipitaka/english/?index_8