พระไตรปิฎกเล่มที่ ๓๒ ภาษาบาลี อักษรไทย
พระสุตตันตปิฎกเล่มที่ ๒๔ สุตฺต. ขุ. อปทานํ (๑)

                                    นวมํ ชตุกณฺณิกตฺเถราปทานํ (๔๐๙)
     [๔๑๑]   |๔๑๑.๒๗๗| นคเร หํสวติยา       เสฏฺฐิปุตฺโต อโหสหํ
                         สมปฺปิโต กามคุเณหิ ๑-  ปริวาเรมหํ ตทา ฯ
       |๔๑๑.๒๗๘| ตโต ปาสาทมารุยฺห       มหาโภเค วลญฺชโก
                           ตตฺถ นจฺเจหิ คีเตหิ        ปริวาเรมหํ ตทา ฯ
       |๔๑๑.๒๗๙| ตุริยา อาหตา มยฺหํ        สมฺมตาลสมาหิตา
                           รญฺชนฺตี ๒- อิตฺถิโย สพฺพา   หรนฺติเยว เม มโน ฯ
       |๔๑๑.๒๘๐| เจลาวกา วามนิกา ๓-     กุญฺชวา สีหิมชฺฌิตา ๔-
                           ลงฺฆิกา โสกชฺฌายี จ     ปริวาเรนฺติ มํ สทา ฯ
       |๔๑๑.๒๘๑| เวตาฬิโน กุมฺภถูนิ          นฏา จ นจฺจกา พหู
                           นฏกา นาฏกา เจว         ปริวาเรนฺติ มํ สทา ฯ
       |๔๑๑.๒๘๒| กปฺปกา นฺหาปกา สูทา  มาลาการา สุปาสกา ๕-
                           ชลฺลา มลฺลา จ เต สพฺเพ   ปริวาเรนฺติ มํ สทา ฯ
       |๔๑๑.๒๘๓| เอเตสุ กีฬมาเนสุ           สิกฺขิเต กตุปาสเน
                           รตฺตินฺทิวํ น ชานามิ       อินฺโทว ติทเส ปุเร ๖- ฯ
       |๔๑๑.๒๘๔| อทฺธิกา กปณา ๗- สพฺเพ   ยาจกา จรกา พหู
                           อุปคจฺฉนฺติ เต นิจฺจํ       ภิกฺขยนฺตา มมํ ฆรํ ฯ
       |๔๑๑.๒๘๕| สมณา พฺราหฺมณา เจว   ปุญฺญกฺเขตฺตา อนุตฺตรา
                           วฑฺฒยนฺตา มมํ ปุญฺญํ  อาคจฺฉนฺติ มมํ ฆรํ ฯ
        |๔๑๑.๒๘๖| ปฏกา ๘- ลฏุกา สพฺเพ  นิคนฺถา ปุปฺผสาฏกา
@เชิงอรรถ: ๑ ม. ยุ. กามคุเณ ฯ ๒ ม. ยุ. นจฺจนฺตา ฯ ๓ ม. เจลาปิกา ลามณิกา ฯ ยุ.
@เวลามิกา วามนิกา ฯ ๔ ม. กุญฺชวาสี ติมชฺฌิกา ฯ ๕ ยุ. สุมาสกา ฯ
@๖ ม. ยุ. ติทสงฺคเณ ฯ ๗ ม. ยุ. ปถิกา ฯ ๘ ม. ปฏคา ฯ ยุ. ปทกา ฯ
                           เตทณฺฑิกา เอกสิขา       อาคจฺฉนฺติ มมํ ฆรํ ฯ
       |๔๑๑.๒๘๗| อาชีวิกา วิลุตฺตาวี           โคตมา ๑- เทวธมฺมิกา
                           รโชชลฺลธรา เอเต           อาคจฺฉนฺติ มมํ ฆรํ ฯ
       |๔๑๑.๒๘๘| ปริวตฺตกา สิทฺธิปตฺตา ๒- โกธปุคฺคนิกา ๓- พหู
                           ตปสี วนจารี จ               อาคจฺฉนฺติ มมํ ฆรํ ฯ
       |๔๑๑.๒๘๙| อนฺธกา ๔- ทมิลา เจว     สากุฬา มลยาฬกา ๕-
                           สวรา โยนกา เจว           อาคจฺฉนฺติ มมํ ฆรํ ฯ
       |๔๑๑.๒๙๐| คนฺธกา ๖- มุณฺฑกา สพฺเพ   กุฏฺฐลา สานุวินฺทกา ๗-
                           อาราว จีนรฏฺฐา จ          อาคจฺฉนฺติ มมํ ฆรํ ฯ
       |๔๑๑.๒๙๑| อลสนฺทกา ปลฺลวกา       ปพฺพตานคฺคมารุหา ๘-
                           พาหิกา ๙- เจตปุตฺตา จ  อาคจฺฉนฺติ มมํ ฆรํ ฯ
       |๔๑๑.๒๙๒| มธุรกา โกสลกา             กาสิกา ๑๐- หตฺถิโปริกา
                           อิสินฺทา มกฺกลา ๑๑- เจว  อาคจฺฉนฺติ มมํ ฆรํ ฯ
       |๔๑๑.๒๙๓| เจลาวกา อารมฺพา จ ๑๒-  โอภาสา เมฆลา พหู
                           ขุทฺทกา สุทฺทกา เจว      อาคจฺฉนฺติ มมํ ฆรํ ฯ
       |๔๑๑.๒๙๔| โรหกา ๑๓- สินฺธวา เจว  จิตฺตกา ๑๔- เอกกณฺณิกา
                           สุรฏฺฐา อปรนฺตา จ        อาคจฺฉนฺติ มมํ ฆรํ ฯ
       |๔๑๑.๒๙๕| สุปฺปารกา กุมารา ๑๕- จ   มลยา ๑๖- โสณฺณภูมิกา
                           วชฺชิหารา ๑๗- จ เต สพฺเพ อาคจฺฉนฺติ มมํ ฆรํ ฯ
@เชิงอรรถ: ๑ ม. โคธมฺมา ฯ ๒ ม. ปริตฺตกา สนฺติปตฺตา ฯ ๓ ยุ. โกณฺฑปุคฺคลิกา พหู ฯ
@๔ ม. ยุ. โอฑฺฑกา ฯ ๕ ม. มลวาฬกา ฯ ๖ ม. ยุ. อนฺธกา ฯ ๗ ม. โกฏลา
@หนุวินฺทกา ฯ ยุ. โกลกา ... ฯ ๘ ม. ธมฺมรานิคฺคมานุสา ฯ ยุ. ปพฺพราภคฺคการุสา ฯ
@๙ ม. เคหิตา ฯ ๑๐ ม. กลิงฺคา ฯ ๑๑ ยุ. มตฺถลา ฯ ๑๒ ม. อารพฺภา จ โอฆุฏฐา ฯ ยุ.
@เวลาวกา อรมฺมา โอกฺกลา เมกลา ฯ ๑๓ ม. ยุ. โรหนา ฯ ๑๔ ยุ. จิตฺตาว ฯ
@๑๕ ย. สุปฺปาริกา กิกุมารา จ ฯ ๑๖ ม. มลฺลโสวณฺณภูมิกา ฯ ๑๗ ม. วชฺชีตงฺคา ฯ
       |๔๑๑.๒๙๖| นฬการา เปสการา         จมฺมการา จ ตจฺฉกา
                           กมฺมการา ๑- กุมฺภการา  อาคจฺฉนฺติ มมํ ฆรํ ฯ
       |๔๑๑.๒๙๗| มณิการา โลหการา        โสณฺณการา จ ทุสฺสิกา
                           ติปุการา จ เต สพฺเพ      อาคจฺฉนฺติ มมํ ฆรํ ฯ
       |๔๑๑.๒๙๘| อุสุการา ๒- ภมการา     เปสการา จ คนฺธิกา
                           รชกา ตุนฺนวายา จ        อาคจฺฉนฺติ มมํ ฆรํ ฯ
       |๔๑๑.๒๙๙| เตลิกา กฏฺฐหารา จ       อุทหารา จ เปสิกา
                           สุปิกา สรทกฺขา จ ๓-    อาคจฺฉนฺติ มมํ ฆรํ ฯ
       |๔๑๑.๓๐๐| โทวาริกา อนีกตฺถา        คนฺถิกา ๔- ปุปฺผฉฑฺฑกา
                           หตฺถาโรหา หตฺถิปาลา  อาคจฺฉนฺติ มมํ ฆรํ ฯ
       |๔๑๑.๓๐๑| อานนฺทสฺส นาม รญฺโญ สมคฺคสฺส ๕- อทาสหํ
                           สตฺตวณฺเณน รตเนน     อูนตฺตํ ปูรยามหํ ฯ
       |๔๑๑.๓๐๒| เย มยา กิตฺติตา สพฺเพ   นานาวณฺณา พหู ชนา
                           เตสาหํ จิตฺตมญฺญาย    ตปฺปยึ รตเนนปิ ๖- ฯ
       |๔๑๑.๓๐๓| วคฺคูสุ ภาสมาเนสุ         วชฺชมานาสุ เภริสุ
                           สงฺเขสุ ธมยนฺเตสุ          สกเคเห รมามหํ ฯ
       |๔๑๑.๓๐๔| ภควา ตมฺหิ สมเย          ปทุมุตฺตรนามโก ๗-
                           สห ๘- สตสหสฺเสหิ       ปริกฺขีณาสเวหิ โส ฯ
       |๔๑๑.๓๐๕| ภิกฺขูหิ สหิโต วีถึ            ปฏิปชฺชิตฺถ จกฺขุมา
                           โอภาเสนฺโต ทิสา สพฺพา  ทีปรุกฺโขว โชตติ ฯ
@เชิงอรรถ: ๑ ม. ยุ. กมฺมารา ฯ ๒ ยุ. จาปการา ฯ ๓ ม. สูปิกา สูปรกฺขา จ ฯ ยุ. ...
@รูทสกฺกา จ ฯ ๔ ม. พนฺธิกา ฯ ยุ. สนฺถิกา ฯ ๕ ม. มมตฺตสฺส ... ฯ ยุ.
@ปมตฺตสฺส ฯ ๖ ม. ยุ. รตเนนหํ ฯ ๗ ม. ยุ. ... นายโก ฯ ๘ ม. วสี ฯ
       |๔๑๑.๓๐๖| วชฺชนฺติ เภริโย สพฺพา     คจฺฉนฺเต โลกนายเก
                           ปภา นิทฺธาวเต ตสฺส     สตรํสีว อุคฺคโต ฯ
       |๔๑๑.๓๐๗| กวาฏนฺตริกายาปิ          ปวิฏฺเฐน จ รสฺมินา
                           อนฺโตฆเรสุ วิปุโล         อาโลโก อาสิ ตาวเท ฯ
       |๔๑๑.๓๐๘| ปภํ ทิสฺวาน พุทฺธสฺส     ปาริสชฺเช อโวจหํ
                           นิสฺสํสยํ พุทฺธเสฏฺโฐ     อิมํ วีถิมุปาคโต ฯ
       |๔๑๑.๓๐๙| ขิปฺปํ โอรุยฺห ปาสาทา   อคมึ อนฺตราปถํ ๑-
                           สมฺพุทฺธํ อภิวาเทนฺโต ๒-  อิทํ วจนมพฺรวึ ฯ
       |๔๑๑.๓๑๐| อนุกมฺปตุ เม พุทฺโธ       ชลชุตฺตมนามโก ๓-
                           วสีสตสหสฺเสหิ             อธิวาเสสิ โส มุนิ ฯ
       |๔๑๑.๓๑๑| นิมนฺตยิตฺวาน สมฺพุทฺธํ  อภิเนสึ สกํ ฆรํ
                           ตตฺถ อนฺเนน ปาเนน     สนฺตปฺเปสึ มหามุนึ ฯ
       |๔๑๑.๓๑๒| ภุตฺตาวีกาลมญฺญาย     พุทฺธเสฏฺฐสฺส ตาทิโน
                           สงฺคีเตน ๔- ตุริเยน       พุทฺธเสฏฺฐํ อุปฏฺฐหึ ฯ
       |๔๑๑.๓๑๓| ปทุมุตฺตโร โลกวิทู         อาหุตีนํ ปฏิคฺคโห
                           อนฺโตฆเร นิสีทิตฺวา       อิมา คาถา อภาสถ ฯ
       |๔๑๑.๓๑๔| โย มํ ตุริเยนุปฏฺฐาสิ      อนฺนปานญฺจทาสิ เม
                           ตมหํ กิตฺตยิสฺสามิ        สุณาถ มม ภาสโต ฯ
       |๔๑๑.๓๑๕| ปหูตภกฺโข หุตฺวาน        สหิรญฺโญ สโภชโน
                           จตุทฺทีเป เอกรชฺชํ         การยิสฺสติยํ นโร ฯ
@เชิงอรรถ: ๑ ม. ยุ. อนฺตราปณํ ฯ ๒ ม. อภิวาเทตฺวา ฯ ๓ ม. ยุ. ... นายโก ฯ
@๔ ม. ยุ. สตงฺคิเกน ฯ
        |๔๑๑.๓๑๖| ปญฺจสีเล สมาทาย       ทสกมฺมปเถ รโต ๑-
                           สมาทาย ปวตฺตนฺโต      ปริสํ สิกฺขเปสฺสติ ฯ
        |๔๑๑.๓๑๗| ตุริยสตสหสฺสานิ           นาริโย ๒- สมลงฺกตา
                           วชฺชยิสฺสนฺติมํ นิจฺจํ       อุปฏฺฐานสฺสิทํ ผลํ ฯ
       |๔๑๑.๓๑๘| ตึสกปฺปสหสฺสานิ          เทวโลเก รมิสฺสติ
                           จตุสฏฺฐิขตฺตุ ํ เทวินฺโท    เทวรชฺชํ กริสฺสติ ฯ
       |๔๑๑.๓๑๙| จตุสตฺตติกฺขตฺตุ ํ ๓- จ     จกฺกวตฺติ ภวิสฺสติ
                           ปเทสรชฺชํ วิปุลํ             คณนาโต อสงฺขยํ ฯ
       |๔๑๑.๓๒๐| กปฺปสตสหสฺสมฺหิ         โอกฺกากกุลสมฺภโว
                           โคตโม นาม นาเมน     สตฺถา โลเก ภวิสฺสติ ฯ
       |๔๑๑.๓๒๑| อุปปชฺชติ ยํ โยนึ           เทวตฺตํ อถ มานุสํ
                           อนูนโภโค หุตฺวาน        มนุสฺสตฺตํ คมิสฺสติ ฯ
       |๔๑๑.๓๒๒| อชฺฌายโก ภวิตฺวาน      ติณฺณํ เวทาน ปารคู
                           อุตฺตมตฺถํ คเวสนฺโต      จริสฺสติ มหึ ตทา ๔- ฯ
       |๔๑๑.๓๒๓| โส จ ปจฺฉา ปพฺพชิตฺวา  สุกฺกมูเลน โจทิโต
                           โคตมสฺส ภควโต          สาสเนภิรมิสฺสติ ฯ
       |๔๑๑.๓๒๔| อาราธยิตฺวาน สมฺพุทฺธํ  โคตมํ สกฺยปุงฺควํ
                           กิเลเส ฌาปยิตฺวาน      อรหายํ ภวิสฺสติ ฯ
       |๔๑๑.๓๒๕| ปวเน พฺยคฺฆราชาว       มิคราชาว เกสรี
                           อภีโต วิหรามชฺช          สกฺยปุตฺตสฺส สาสเน ฯ
@เชิงอรรถ: ๑ ม. ยุ. ตโต ฯ ๒ ม. เภริโย ฯ ๓ ม. จตุสฏฺฐิกฺขตฺตุ ํ ฯ ๔ ม. ยุ. อิมํ ฯ
       |๔๑๑.๓๒๖| เทวโลเก มนุสฺเส วา       ทลิทฺเท ทุคฺคติมฺหิ วา
                           นิพฺพตฺตึ เม น ปสฺสามิ  อุปฏฺฐานสฺสิทํ ผลํ ฯ
       |๔๑๑.๓๒๗| วิเวกมนุยุตฺโตมฺหิ          อุปสนฺโต นิรูปธิ
                           นาโคว พนฺธนํ เฉตฺวา    วิหรามิ อนาสโว ฯ
       |๔๑๑.๓๒๘| กิเลสา ฌาปิตา มยฺหํ     ภวา สพฺเพ สมูหตา
                           นาโคว พนฺธนํ เฉตฺวา    วิหรามิ อนาสโว ฯ
       |๔๑๑.๓๒๙| สฺวาคตํ วต เม อาสิ        มม พุทฺธสฺส สนฺติเก
                           ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
       |๔๑๑.๓๓๐| ปฏิสมฺภิทา จตสฺโส        วิโมกฺขาปิจ อฏฺฐิเม
                           ฉฬภิญฺญา สจฺฉิกตา     กตํ พุทฺธสฺส สาสนนฺติ ฯ
         อิตฺถํ สุทํ อายสฺมา ชตุกณฺณิโก เถโร อิมา คาถาโย
อภาสิตฺถาติ ฯ
                                ชตุกณฺณิกตฺเถรสฺส อปทานํ สมตฺตํ ฯ
                                     ทสมํ อุเทนตฺเถราปทานํ (๔๑๐)
     [๔๑๒]   |๔๑๒.๓๓๑| หิมวนฺตสฺส อวิทูเร  ปทุโม นาม ปพฺพโต
                           อสฺสโม สุกโต มยฺหํ      ปณฺณสาลา สุมาปิตา ฯ
       |๔๑๒.๓๓๒| นทิโย สนฺทเร ๑- ตตฺถ   สุปติตฺถา มโนรมา
                           อจฺโฉทกา สีตชลา        สนฺทเร ๒-  นทิโย สทา ฯ
@เชิงอรรถ: ๑-๒ ยุ. สุนฺทรี ฯ
       |๔๑๒.๓๓๓| ปาฐีนา ปาวุสา มจฺฉา         วลชา ๑- มุญฺชโรหิตา
                           โสภนฺติ นทิโย เอเต            วสนฺติ นทิยา ตทา ฯ
       |๔๑๒.๓๓๔| อมฺพชมฺพูหิ สญฺฉนฺนา        กเรริติลกา ตถา
                           อุทฺทาลกา ปาฏลิโย           โสภนฺติ มม อสฺสมํ ฯ
       |๔๑๒.๓๓๕| องฺโกลกา ๒- พิมฺพิชาลา      มายาหรา ๓- จ ปุปฺผิตา
                           คนฺเธน อุปวายนฺตา ๔-       โสภนฺติ มม อสฺสมํ ฯ
       |๔๑๒.๓๓๖| อธิมุตฺตา สตฺตลิกา              นาคา สาลา จ ปุปฺผิตา
                           ทิพฺพา คนฺธา ๕- สมฺปวนฺตา  โสภนฺติ มม อสฺสมํ ฯ
       |๔๑๒.๓๓๗| โกสุมฺภา สลฬา นีปา          หตฺถปาตา ๖- จ ปุปฺผิตา
                           ทิพฺพา คนฺธา สมฺปวนฺตา    โสภนฺติ มม อสฺสมํ ฯ
       |๔๑๒.๓๓๘| หรีตกา อามลกา                อมฺพา ชมฺพู วิเภทกา
                           โกลา ภลฺลาตกา เพลฺลา     ผลานิ พหุ อสฺสเม ฯ
       |๔๑๒.๓๓๙| กลมฺพา กทลี ตตฺถ             ปุปฺผนฺติ มม อสฺสเม
                           ทิพฺพา คนฺธา สมฺปวนฺตา    โสภนฺติ มม อสฺสมํ ฯ
       |๔๑๒.๓๔๐| อโสกปิณฺฑี จ วรี ๗-           นิมฺพรุกฺขา ๘- จ ปุปฺผิตา
                           ทิพฺพา คนฺธา สมฺปวนฺตา    โสภนฺติ มม อสฺสมํ ฯ
       |๔๑๒.๓๔๑| ปุณฺณาวา คิริปุณฺณาวา ๙-  ติมิรา ตตฺถ ปุปฺผิตา
                           ทิพฺพา คนฺธา สมฺปวนฺตา    โสภนฺติ มม อสฺสมํ ฯ
       |๔๑๒.๓๔๒| นิคฺคุณฺฑี สิรินิคฺคุณฺฑี         จมฺปรุกฺเขตฺถ ปุปฺผิตา
                           ทิพฺพา คนฺธา สมฺปวนฺตา    โสภนฺติ มม อสฺสมํ ฯ
@เชิงอรรถ: ๑ ยุ. ชลชา ฯ ๒ ยุ. อาโกลกา ฯ ๓ ม. มายาการี ฯ ยุ. มายาจารา ฯ
@๔-๕ ยุ. ทิพฺพคนฺธสมาปนฺนา ฯ อิโต ปรํ อีทิสเมว ฯ ๖ ม. อฏฺฐงฺคาปิ ฯ
@ยุ. กฏฺฐงฺคา จ สุปุปฺผิตา ฯ ๗ ม. อโสกาปิณฺฑิวารี จ ฯ ๘ ยุ. นีปรุกฺขา ฯ
@๙ ม. ยุ. ปุนฺนาคา คิริปุนฺนาคา ฯ
       |๔๑๒.๓๔๓| อวิทูเร โปกฺขรณี                จกฺกวากุปกุชฺชิตา
                           มนฺทาลเกหิ สญฺฉนฺนา      ปทุมุปฺปลเกหิ จ ฯ
       |๔๑๒.๓๔๔| อจฺโฉทกา สีตชลา             สุปติตฺถา มโนรมา
                           อจฺฉา ผลิกสมานา            โสภนฺติ มม อสฺสมํ ฯ
       |๔๑๒.๓๔๕| ปทุมา ปุปฺผเร ตตฺถ            ปุณฺฑรีกา จ อุปฺปลา
                           มนฺทาลเกหิ สญฺฉนฺนา      โสภนฺติ มม อสฺสมํ ฯ
       |๔๑๒.๓๔๖| ปาฐีนา ปาวุสา มจฺฉา        พลชา มุญฺชโรหิตา
                           วิจรนฺตาว เต ตตฺถ             โสภนฺติ มม อสฺสมํ ฯ
       |๔๑๒.๓๔๗| กุมฺภีลา สุ ํสุมารา จ            กจฺฉปา จ คหา พหู
                            โอคหา ๑- อชครา จ         โสภนฺติ มม อสฺสมํ ฯ
       |๔๑๒.๓๔๘| ปาเรวตา รวิหํสา                จกฺกวากา นทีจรา
                           ทินฺทิภา ๒- สาลิกา เจว     โสภนฺติ มม อสฺสมํ ฯ
       |๔๑๒.๓๔๙| นยิตา อมฺพคนฺธี จ             เกตกา ตตฺถ ปุปฺผิตา
                           ทิพฺพา คนฺธา สมฺปวนฺตา    โสภนฺติ มม อสฺสมํ ฯ
       |๔๑๒.๓๕๐| สีหา พฺยคฺฆา จ ทีปี จ         อจฺฉโกกตรจฺฉโย
                           อนุสญฺจรนฺตา ปวเน          โสภนฺติ มม อสฺสมํ ฯ
       |๔๑๒.๓๕๑| ชฏาภาเรน ภริตา               อชินุตฺตรวาสิโน
                           อนุสญฺจรนฺตา ปวเน          โสภนฺติ มม อสฺสมํ ฯ
       |๔๑๒.๓๕๒| อชินานิ ธรา เอเก ๓-          นิปกา สนฺตวุตฺติโน
                           อปฺปาหารา จ เต สพฺเพ      โสภนฺติ มม อสฺสมํ ฯ
@เชิงอรรถ: ๑ ยุ. โอคุหา ฯ ๒ ม. จนฺทิภา ฯ ๓ ม. ยุ. เอเต ฯ
       |๔๑๒.๓๕๓| ขาริกาชํ ๑- คเหตฺวาน    อชฺโฌคยฺห วนํ ตทา
                           มูลผลานิ ภุญฺชนฺตา      วสนฺติ อสฺสเม ตทา ฯ
       |๔๑๒.๓๕๔| น เต ทารุ ํ อาหรนฺติ        อุทกํ ปาทโธวนํ
                           สพฺเพสํ อานุภาเวน       สยเมวาหรียติ ฯ
       |๔๑๒.๓๕๕| จุลฺลาสีติสหสฺสานิ         อิสโย ตตฺถ สมาคตา
                           สพฺเพว ฌายิโน เอเต     อุตฺตมตฺถํ คเวสิโน ฯ
       |๔๑๒.๓๕๖| ตปสฺสิโน พฺรหฺมจารี       โจเทนฺโต อปฺปนาว เต
                           อมฺพราวจรา สพฺเพ       วสนฺติ อสฺสเม ตทา ฯ
       |๔๑๒.๓๕๗| ปญฺจาหํ สนฺนิปตนฺติ      เอกคฺคา สนฺตวุตฺติโน
                           อญฺญมญฺญํ ๒- อภิวาเทตฺวา   ปกฺกมนฺติ ทิสามุขา ฯ
        |๔๑๒.๓๕๘| ปทุมุตฺตโร นาม ชิโน     สพฺพธมฺมาน ปารคู
                           ตมนฺธการํ วิธมํ             อุปฺปชฺชิ ตาวเท ชิโน ฯ
       |๔๑๒.๓๕๙| มม อสฺสมสามนฺตา        ยกฺโข อาสิ  มหิทฺธิโก
                           โส เม สํสิตฺถ สมฺพุทฺธํ    ชลชุตฺตมนามกํ ๓- ฯ
       |๔๑๒.๓๖๐| เอส พุทฺโธ สมุปฺปนฺโน    ปทุมุตฺตโร มหามุนิ
                    ขิปฺปํ คนฺตฺวาน สมฺพุทฺธํ         ปยิรุปาสสฺสุ ๔- มาริส ๕- ฯ
        |๔๑๒.๓๖๑| ยกฺขสฺส วจนํ สุตฺวา        วิปฺปสนฺเนน เจตสา
                           อสฺสมํ สํสาเมตฺวาน       นิกฺขมึ ปวนา ตทา ฯ
        |๔๑๒.๓๖๒| เจเลว ฑยฺหมานมฺหิ      นิกฺขมิตฺวาน อสฺสมา
                           เอกรตฺตึ นิวาสิตฺวา        อุปคญฺฉึ วินายกํ ฯ
@เชิงอรรถ: ๑ ม. ยุ. ขาริภารํ ฯ ๒ ม. ยุ. อญฺโญญฺญํ ฯ ๓ ม. ยุ. ... นายกํ ฯ
@๔ ม. ปยิรุปาส ฯ ๕ ยุ. ปยิรุปาสสฺสุ ตํ มุนิ ฯ
       |๔๑๒.๓๖๓| ปทุมุตฺตโร โลกวิทู             อาหุตีนํ ปฏิคฺคโห
                           จตุสจฺจํ ปกาเสนฺโต           เทเสสิ อมตํ ปทํ ฯ
       |๔๑๒.๓๖๔| สุผุลฺลํ ปทุมํ คยฺห              อุปคนฺตฺวา มเหสิโน
                           ปสนฺนจิตฺโต สุมโน            พุทฺธสฺส อภิวาทยึ ๑- ฯ
       |๔๑๒.๓๖๕| ปูชยิตฺวาน สมฺพุทฺธํ            ชลชุตฺตมนายกํ
                           เอกํสํ อชินํ กตฺวา              สนฺถวึ โลกนายกํ ฯ
       |๔๑๒.๓๖๖| เยน ญาเณน สมฺพุทฺโธ       วสตีห อนาสโว
                           ตํ ญาณํ กิตฺตยิสฺสามิ        สุณาถ มม ภาสโต ฯ
       |๔๑๒.๓๖๗| สํสารโสตํ ฉินฺทิตฺวา            ตาเรสิ สพฺพปาณินํ
                           ตว ธมฺมํ สุณิตฺวาน            ตณฺหาโสตํ ตรนฺติ เต ฯ
       |๔๑๒.๓๖๘| ตุวํ สตฺถา จ เกตุว ๒-          ธโช ยูโปว ๓- ปาณินํ
                           ปรายโน ปติฏฺฐาสิ             ทีโป จ ทิปทุตฺตโม ๔- ฯ
       |๔๑๒.๓๖๙| ยาวตา คณิโน โลเก            สตฺถวาหา ปวุจฺจเร
                           ตุวํ อคฺโคสิ สปฺปญฺโญ        ตว อนฺโตคธาว เต ฯ
       |๔๑๒.๓๗๐| ตว ญาเณน สปฺปญฺโญ ๕-  ตาเรสิ ชนตํ พหุ ํ
                           ตว ทสฺสนมาคมฺม             ทุกฺขสฺสนฺตํ กริสฺสเร ฯ
       |๔๑๒.๓๗๑| เยเกจิเม คนฺธชาตา            โลเก วายนฺติ จกฺขุม
                           ตว คนฺธสโม นตฺถิ             ปุญฺญกฺเขตฺเต มหามุนิ ฯ
       |๔๑๒.๓๗๒| ติรจฺฉานโยนึ นิรยํ              ปริโมเจหิ ๖- จกฺขุมา
                           อสงฺขตํ ปทํ สนฺตํ               เทเสสิ ตฺวํ มหามุนิ ฯ
@เชิงอรรถ: ๑ ม. ยุ. อภิโรปยึ ฯ ๒-๓  ม. ยุ. จ ฯ ๔ ม. ยุ. ทิปทุตฺตม ฯ
@๕ ม. ตุวํ อคฺโคสิ สพฺพญฺญู ฯ ยุ. ตุวํ อคฺโคสิ สปฺปญฺโญ ฯ ๖ ม. ยุ. ปริโมเจสิ ฯ
       |๔๑๒.๓๗๓| ปทุมุตฺตโร โลกวิทู             อาหุตีนํ ปฏิคฺคโห
                           ภิกฺขุสงฺเฆ นิสีทิตฺวา          อิมา คาถา อภาสถ ฯ
       |๔๑๒.๓๗๔| โย เม ญาณํ อปูเชสิ           ปสนฺโน เสหิ ปาณิหิ
                           ตมหํ กิตฺตยิสฺสามิ             สุณาถ มม ภาสโต ฯ
       |๔๑๒.๓๗๕| ตึส กปฺปสหสฺสานิ             เทวโลเก รมิสฺสติ
                           สหสฺสกฺขตฺตุ ํ ราชา จ         จกฺกวตฺติ ภวิสฺสติ ฯ
       |๔๑๒.๓๗๖| สุลทฺธลาโภ ๑- ลทฺโธมฺหิ    โตสยิตฺวาน สุพฺพตํ
                           สพฺพาสเว ปริญฺญาย         วิหรามิ อนาสโว ฯ
       |๔๑๒.๓๗๗| กิเลสา ฌาปิตา มยฺหํ         ภวา สพฺเพ สมูหตา
                           นาโคว พนฺธนํ เฉตฺวา        วิหรามิ อนาสโว ฯ
       |๔๑๒.๓๗๘| สฺวาคตํ วต เม อาสิ            มม พุทฺธสฺส สนฺติเก
                           ติสฺโส วิชฺชา อนุปฺปตฺตา     กตํ พุทฺธสฺส สาสนํ ฯ
       |๔๑๒.๓๗๙| ปฏิสมฺภิทา จตสฺโส            วิโมกฺขาปิจ อฏฺฐิเม
                           ฉฬภิญฺญา สจฺฉิกตา         กตํ พุทฺธสฺส สาสนนฺติ ฯ
         อิตฺถํ สุทํ อายสฺมา อุเทโน เถโร อิมา คาถาโย
อภาสิตฺถาติ ฯ
                                   อุเทนตฺเถรสฺส อปทานํ สมตฺตํ ฯ
                                                อุทฺทานํ
                         เมตฺเตยฺโย ปุณฺณโก เถโร     เมตฺตคู โธตโกปิจ
@เชิงอรรถ: ๑ ม. ยุ. สุลทฺธลาภํ ฯ
                       อุปสีโว จ นนฺโท จ                 เหมโก สตฺตโม ตหึ ฯ
                       โตเทยฺโย ชตุกณฺณี จ             อุเทโน จ มหายโส
                       ตีณิ คาถาสตาเนตฺถ              อสีติ ตีณิ จุตฺตรึ ฯ
                                    เมตฺเตยฺยวคฺโค เอกจตฺตาฬีสโม ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๓๒ หน้าที่ ๕๖๓-๕๗๔.
http://84000.org/tipitaka/read/pali_item_s.php?book=32&item=411&items=2&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/read/pali_item_s.php?book=32&item=411&items=2&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=32&item=411&items=2&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=32&item=411&items=2&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=32&i=411
             The Pali Atthakatha in Thai :-
http://84000.org/tipitaka/atthapali/read_th.php?B=50&A=5466
             The Pali Atthakatha in Roman :-
http://84000.org/tipitaka/atthapali/read_rm.php?B=50&A=5466
             สารบัญพระไตรปิฎกเล่มที่ ๓๒
http://84000.org/tipitaka/read/?index_32