ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๘ ภาษาบาลี อักษรไทย พระสุตตันตปิฎกเล่มที่ ๑๐ สังยุตตนิกาย สฬายตนวรรค

     [๖๒๙]   อถ   โข   ราสิโย  คามณี  เยน  ภควา  เตนุปสงฺกมิ
อุปสงฺกมิตฺวา   ภควนฺตํ   อภิวาเทตฺวา   เอกมนฺตํ   นิสีทิ  ฯ  เอกมนฺตํ
นิสินฺโน   โข   ราสิโย   คามณี  ภควนฺตํ  เอตทโวจ  สุตมฺเมตํ  ภนฺเต
@เชิงอรรถ:  ยุ. เต คามณิ อาคมฺม ฯ
สมโณ   โคตโม   สพฺพํ   ตปํ   ครหติ  สพฺพํ  ตปสฺสึ  ลูขชีวึ  เอกํเสน
อุปวทติ   อุปกฺโกสตีติ  ฯ  เย  เต  ภนฺเต  เอวมาหํสุ  สมโณ  โคตโม
สพฺพํ    ตปํ    ครหติ    สพฺพํ   ตปสฺสึ   ลูขชีวึ   เอกํเสน   อุปวทติ
อุปกฺโกสตีติ   ฯ   กจฺจิ   เต   ภนฺเต   ภควโต   วุตฺตวาทิโน  น  จ
ภควนฺตํ    อภูเตน    อพฺภาจิกฺขนฺติ   ธมฺมสฺส   จานุธมฺมํ   พฺยากโรนฺติ
น  จ  โกจิ  สหธมฺมิโก  วาทานุปาโต  คารยฺหํ  ฐานํ  อาคจฺฉตีติ ฯ เย
เต   คามณิ   เอวมาหํสุ   สมโณ   โคตโม   สพฺพํ  ตปํ  ครหติ  สพฺพํ
ตปสฺสึ   ลูขชีวึ   เอกํเสน   อุปวทติ   อุปกฺโกสตีติ   ฯ   น  เม  เต
วุตฺตวาทิโน อพฺภาจิกฺขนฺติ จ ปน มนฺเต อสตา อภูเตน ๑- ฯ
     [๖๓๐]   เทฺวเม  คามณิ  อนฺตา  ปพฺพชิเตน  น  เสวิตพฺพา  โย
จายํ    กาเมสุ    กามสุขลฺลิกานุโยโค    หีโน   คมฺโม   โปถุชฺชนิโก
อนริโย    อนตฺถสญฺหิโต    โย    จายํ    อตฺตกิลมถานุโยโค   ทุกฺโข
อนริโย   อนตฺถสญฺหิโต  ฯ  เอเต  เต  คามณิ  อุโภ  อนฺเต  อนุปคมฺม
มชฺฌิมา    ปฏิปทา    ตถาคเตน    อภิสมฺพุทฺธา   จกฺขุกรณี   ญาณกรณี
อุปสมาย    อภิญฺญาย   สมฺโพธาย   นิพฺพานาย   สํวตฺตติ   ฯ   กตมา
จ   สา   คามณิ   มชฺฌิมา  ปฏิปทา  ตถาคเตน  อภิสมฺพุทฺธา  จกฺขุกรณี
ญาณกรณี      อุปสมาย      อภิญฺญาย      สมฺโพธาย     นิพฺพานาย
สํวตฺตติ   ฯ   อยเมว   อริโย   อฏฺฐงฺคิโก   มคฺโค  ฯ  เสยฺยถีทํ  ฯ
สมฺมาทิฏฺฐิ   ฯเปฯ   สมฺมาสมาธิ   ฯ   อยํ  โข  สา  คามณิ  มชฺฌิมา
@เชิงอรรถ:  ม. อสตา ตุจฺฉา อภูเตน ฯ
ปฏิปทา      ตถาคเตน      อภิสมฺพุทฺธา      จกฺขุกรณี     ญาณกรณี
อุปสมาย อภิญฺญาย สมฺโพธาย นิพฺพานาย สํวตฺตติ ฯ
     [๖๓๑]   ตโยเม   ๑-  คามณิ  กามโภคิโน  สนฺโต  สํวิชฺชมานา
โลกสฺมึ   ฯ   กตเม   ตโย   ฯ   อิธ   คามณิ   เอกจฺโจ  กามโภคี
อธมฺเมน   โภเค   ปริเยสติ   สาหเสน  อธมฺเมน  โภเค  ปริเยสิตฺวา
สาหเสน  น  อตฺตานํ  สุเขติ  น  ๒-  ปีเณติ  น  สํวิภชติ  น  ปุญฺญานิ
กโรติ   ฯ   อิธ   ปน   คามณิ  เอกจฺโจ  กามโภคี  อธมฺเมน  โภเค
ปริเยสติ   สาหเสน   อธมฺเมน  โภเค  ปริเยสิตฺวา  สาหเสน  อตฺตานํ
สุเขติ   ปีเณติ  น  สํวิภชติ  น  ปุญฺญานิ  กโรติ  ฯ   อิธ  ปน  คามณิ
เอกจฺโจ   กามโภคี   อธมฺเมน   โภเค  ปริเยสติ  สาหเสน  อธมฺเมน
โภเค    ปริเยสิตฺวา   สาหเสน   อตฺตานํ   สุเขติ   ปีเณติ   สํวิภชติ
ปุญฺญานิ กโรติ ฯ
     [๖๓๒]   อิธ  ปน  คามณิ  เอกจฺโจ  กามโภคี ธมฺมาธมฺเมน โภเค
ปริเยสติ   สาหเสนปิ   อสาหเสนปิ   ธมฺมาธมฺเมน  โภเค  ปริเยสิตฺวา
สาหเสนปิ  อสาหเสนปิ  น  อตฺตานํ  สุเขติ  น  ๒-  ปีเณติ  น สํวิภชติ
น  ปุญฺญานิ  กโรติ  ฯ  อิธ  ปน  คามณิ เอกจฺโจ กามโภคี ธมฺมาธมฺเมน
โภเค    ปริเยสติ    สาหเสนปิ   อสาหเสนปิ   ธมฺมาธมฺเมน   โภเค
ปริเยสิตฺวา   สาหเสนปิ   อสาหเสนปิ   อตฺตานํ   สุเขติ   ปีเณติ   น
สํวิภชติ   น   ปุญฺญานิ   กโรติ   ฯ   อิธ  คามณิ  เอกจฺโจ  กามโภคี
ธมฺมาธมฺเมน   โภเค   ปริเยสติ  สาหเสนปิ  อสาหเสนปิ  ธมฺมาธมฺเมน
@เชิงอรรถ:  ม. ตโย โขเม ฯ   ยุ. นสทฺโท นตฺถิ ฯ
โภเค    ปริเยสิตฺวา    สาหเสนปิ    อสาหเสนปิ    อตฺตานํ   สุเขติ
ปีเณติ สํวิภชติ ปุญฺญานิ กโรติ ฯ
     [๖๓๓]   อิธ   ปน  คามณิ  เอกจฺโจ  กามโภคี  ธมฺเมน  โภเค
ปริเยสติ   อสาหเสน   ธมฺเมน   โภเค   ปริเยสิตฺวา   อสาหเสน  น
อตฺตานํ  สุเขติ  น  ๑-  ปีเณติ  น  สํวิภชติ  น  ปุญฺญานิ  กโรติ ฯ อิธ
ปน   คามณิ  เอกจฺโจ  กามโภคี  ธมฺเมน  โภเค  ปริเยสติ  อสาหเสน
ธมฺเมน   โภเค   ปริเยสิตฺวา   อสาหเสน  อตฺตานํ  สุเขติ  ปีเณติ  น
สํวิภชติ   น  ปุญฺญานิ  กโรติ  ฯ  อิธ  ปน  คามณิ  เอกจฺโจ  กามโภคี
ธมฺเมน   โภเค   ปริเยสติ   อสาหเสน   ธมฺเมน  โภเค  ปริเยสิตฺวา
อสาหเสน   อตฺตานํ   สุเขติ   ปีเณติ   สํวิภชติ   ปุญฺญานิ  กโรติ  เต
จ     โภเค     คธิโต    มุจฺฉิโต    อชฺฌาปนฺโน    อนาทีนวทสฺสาวี
อนิสฺสรณปญฺโญ   ปริภุญฺชติ   ฯ   อิธ   ปน  คามณิ  เอกจฺโจ  กามโภคี
ธมฺเมน   โภเค   ปริเยสติ   อสาหเสน   ธมฺเมน  โภเค  ปริเยสิตฺวา
อสาหเสน    อตฺตานํ    สุเขติ    ปีเณติ   สํวิภชติ   ปุญฺญานิ   กโรติ
เต   จ   โภเค   อคธิโต   อมุจฺฉิโต   อนชฺฌาปนฺโน   อาทีนวทสฺสาวี
นิสฺสรณปญฺโญ ปริภุญฺชติ ฯ
     [๖๓๔]   ตตฺร  คามณิ  ยฺวายํ  กามโภคี  อธมฺเมน โภเค ปริเยสติ
สาหเสน   อธมฺเมน  โภเค  ปริเยสิตฺวา  สาหเสน  น  อตฺตานํ  สุเขติ
น   ปีเณติ  น  สํวิภชติ  น  ปุญฺญานิ  กโรติ  ฯ  อยํ  คามณิ  กามโภคี
ตีหิ   ฐาเนหิ   คารโยฺห   ฯ   กตเมหิ   ตีหิ   ฐาเนหิ  คารโยฺห  ฯ
@เชิงอรรถ:  ยุ. นสทฺโท นตฺถิ ฯ
อธมฺเมน   โภเค   ปริเยสติ   สาหเสนาติ   อิมินา   ปฐเมน  ฐาเนน
คารโยฺห  ฯ  น  อตฺตานํ  สุเขติ  น  ๑- ปีเณตีติ อิมินา ทุติเยน ฐาเนน
คารโยฺห  ฯ  น  สํวิภชติ  น  ปุญฺญานิ  กโรตีติ  อิมินา  ตติเยน ฐาเนน
คารโยฺห ฯ อยํ คามณิ กามโภคี อิเมหิ ตีหิ ฐาเนหิ คารโยฺห ฯ
     [๖๓๕]   ตตฺร  คามณิ  ยฺวายํ  กามโภคี  อธมฺเมน โภเค ปริเยสติ
สาหเสน  อธมฺเมน  โภเค  ปริเยสิตฺวา  สาหเสน  อตฺตานํ สุเขติ ปีเณติ
น   สํวิภชติ   น   ปุญฺญานิ   กโรติ   ฯ  อยํ  คามณิ  กามโภคี  ทฺวีหิ
ฐาเนหิ  คารโยฺห  เอเกน  ฐาเนน  ปาสํโส  ฯ  กตเมหิ  ทฺวีหิ ฐาเนหิ
คารโยฺห   ฯ  อธมฺเมน  โภเค  ปริเยสติ  สาหเสนาติ  อิมินา  ปฐเมน
ฐาเนน   คารโยฺห   ฯ   น   สํวิภชติ   น   ปุญฺญานิ  กโรตีติ  อิมินา
ทุติเยน   ฐาเนน  คารโยฺห  ฯ  กตเมน  เอเกน  ฐาเนน  ปาสํโส  ฯ
อตฺตานํ   สุเขติ   ปีเณตีติ   อิมินา  เอเกน  ฐาเนน  ปาสํโส  ฯ  อยํ
คามณิ   กามโภคี   อิเมหิ   ทฺวีหิ   ฐาเนหิ  คารโยฺห  อิมินา  เอเกน
ฐาเนน ปาสํโส ฯ
     [๖๓๖]   ตตฺร  คามณิ  ยฺวายํ  กามโภคี  อธมฺเมน โภเค ปริเยสติ
สาหเสน   อธมฺเมน   โภเค   ปริเยสิตฺวา   สาหเสน  อตฺตานํ  สุเขติ
ปีเณติ   สํวิภชติ   ปุญฺญานิ   กโรติ  ฯ  อยํ  คามณิ  กามโภคี  เอเกน
ฐาเนน   คารโยฺห   ทฺวีหิ   ฐาเนหิ   ปาสํโส   ฯ   กตเมน  เอเกน
ฐาเนน   คารโยฺห  ฯ  อธมฺเมน  โภเค  ปริเยสติ  สาหเสนาติ  อิมินา
เอเกน   ฐาเนน   คารโยฺห   ฯ  กตเมหิ  ทฺวีหิ  ฐาเนหิ  ปาสํโส  ฯ
@เชิงอรรถ:  ยุ. นสทฺโท นตฺถิ ฯ
อตฺตานํ  สุเขติ  ปีเณตีติ  อิมินา  ปฐเมน  ฐาเนน  ปาสํโส  ฯ  สํวิภชติ
ปุญฺญานิ   กโรตีติ   อิมินา   ทุติเยน  ฐาเนน  ปาสํโส  ฯ  อยํ  คามณิ
กามโภคี   อิมินา   เอเกน   ฐาเนน  คารโยฺห  อิเมหิ  ทฺวีหิ  ฐาเนหิ
ปาสํโส ฯ
     [๖๓๗]   ตตฺร   คามณิ   ยฺวายํ  กามโภคี  ธมฺมาธมฺเมน  โภเค
ปริเยสติ   สาหเสนปิ   อสาหเสนปิ   ธมฺมาธมฺเมน  โภเค  ปริเยสิตฺวา
สาหเสนปิ   อสาหเสนปิ   น   อตฺตานํ  สุเขติ  น  ปีเณติ  น  สํวิภชติ
น   ปุญฺญานิ   กโรติ   ฯ   อยํ   คามณิ   กามโภคี  เอเกน  ฐาเนน
ปาสํโส   ตีหิ   ฐาเนหิ   คารโยฺห   ฯ   กตเมน   เอเกน   ฐาเนน
ปาสํโส   ฯ   ธมฺเมน  โภเค  ปริเยสติ  อสาหเสนาติ  อิมินา  เอเกน
ฐาเนน   ปาสํโส   ฯ   กตเมหิ  ตีหิ  ฐาเนหิ  คารโยฺห  ฯ  อธมฺเมน
โภเค   ปริเยสติ   สาหเสนาติ  อิมินา  ปฐเมน  ฐาเนน  คารโยฺห  ฯ
น  อตฺตานํ  สุเขติ  น  ปีเณตีติ  อิมินา  ทุติเยน  ฐาเนน  คารโยฺห  ฯ
น  สํวิภชติ  น  ปุญฺญานิ  กโรตีติ  อิมินา  ตติเยน  ฐาเนน  คารโยฺห ฯ
อยํ   คามณิ   กามโภคี   อิมินา   เอเกน   ฐาเนน   ปาสํโส  อิเมหิ
ตีหิ ฐาเนหิ คารโยฺห ฯ
     [๖๓๘]   ตตฺร   คามณิ   ยฺวายํ  กามโภคี  ธมฺมาธมฺเมน  โภเค
ปริเยสติ   สาหเสนปิ   อสาหเสนปิ   ธมฺมาธมฺเมน  โภเค  ปริเยสิตฺวา
สาหเสนปิ   อสาหเสนปิ   อตฺตานํ   สุเขติ   ปิเณติ   น   สํวิภชติ  น
ปุญฺญานิ   กโรติ   ฯ   อยํ   คามณิ  กามโภคี  ทฺวีหิ  ฐาเนหิ  ปาสํโส
ทฺวีหิ   ฐาเนหิ   คารโยฺห   ฯ   กตเมหิ   ทฺวีหิ  ฐาเนหิ  ปาสํโส  ฯ
ธมฺเมน   โภเค   ปริเยสติ   อสาหเสนาติ   อิมินา   ปฐเมน  ฐาเนน
ปาสํโส   ฯ   อตฺตานํ   สุเขติ   ปีเณตีติ   อิมินา   ทุติเยน   ฐาเนน
ปาสํโส   ฯ   กตเมหิ   ทฺวีหิ  ฐาเนหิ  คารโยฺห  ฯ  อธมฺเมน  โภเค
ปริเยสติ   สาหเสนาติ   อิมินา   ปฐเมน   ฐาเนน   คารโยฺห  ฯ  น
สํวิภชติ   น   ปุญฺญานิ  กโรตีติ  อิมินา  ทุติเยน  ฐาเนน  คารโยฺห  ฯ
อยํ    คามณิ   กามโภคี   อิเมหิ   ทฺวีหิ   ฐาเนหิ   ปาสํโส   อิเมหิ
ทฺวีหิ ฐาเนหิ คารโยฺห ฯ
     [๖๓๙]   ตตฺร   คามณิ   ยฺวายํ  กามโภคี  ธมฺมาธมฺเมน  โภเค
ปริเยสติ   สาหเสนปิ   อสาหเสนปิ   ธมฺมาธมฺเมน  โภเค  ปริเยสิตฺวา
สาหเสนปิ   อสาหเสนปิ   อตฺตานํ   สุเขติ   ปีเณติ   สํวิภชติ  ปุญฺญานิ
กโรติ   ฯ   อยํ   คามณิ   กามโภคี   ตีหิ  ฐาเนหิ  ปาสํโส  เอเกน
ฐาเนน   คารโยฺห   ฯ   กตเมหิ   ตีหิ  ฐาเนหิ  ปาสํโส  ฯ  ธมฺเมน
โภเค   ปริเยสติ   อสาหเสนาติ  อิมินา  ปฐเมน  ฐาเนน  ปาสํโส  ฯ
อตฺตานํ  สุเขติ  ปีเณตีติ  อิมินา  ทุติเยน  ฐาเนน  ปาสํโส  ฯ  สํวิภชติ
ปุญฺญานิ   กโรตีติ   อิมินา   ตติเยน   ฐาเนน   ปาสํโส   ฯ  กตเมน
เอเกน  ฐาเนน  คารโยฺห  ฯ  อธมฺเมน  โภเค  ปริเยสติ  สาหเสนาติ
อิมินา   เอเกน   ฐาเนน  คารโยฺห  ฯ  อยํ  คามณิ  กามโภคี  อิเมหิ
ตีหิ ฐาเนหิ ปาสํโส อิมินา เอเกน ฐาเนน คารโยฺห ฯ
     [๖๔๐]   ตตฺร  คามณิ  ยฺวายํ  กามโภคี  ธมฺเมน  โภเค ปริเยสติ
อสาหเสน  ธมฺเมน  โภเค  ปริเยสิตฺวา  อสาหเสน  น  อตฺตานํ  สุเขติ
น   ปีเณติ   น   สํวิภชติ   น   ปุญฺญานิ   กโรติ   ฯ   อยํ   คามณิ
กามโภคี   เอเกน   ฐาเนน   ปาสํโส   ทฺวีหิ   ฐาเนหิ  คารโยฺห  ฯ
กตเมน    เอเกน   ฐาเนน   ปาสํโส   ฯ  ธมฺเมน  โภเค  ปริเยสติ
อสาหเสนาติ   อิมินา   เอเกน   ฐาเนน   ปาสํโส  ฯ  กตเมหิ  ทฺวีหิ
ฐาเนหิ  คารโยฺห  ฯ  น  อตฺตานํ  สุเขติ  น  ปีเณตีติ  อิมินา  ปฐเมน
ฐาเนน   คารโยฺห   ฯ   น   สํวิภชติ   น   ปุญฺญานิ  กโรตีติ  อิมินา
ทุติเยน   ฐาเนน  คารโยฺห  ฯ  อยํ  คามณิ  กามโภคี  อิมินา  เอเกน
ฐาเนน ปาสํโส อิเมหิ ทฺวีหิ ฐาเนหิ คารโยฺห ฯ
     [๖๔๑]   ตตฺร  คามณิ  ยฺวายํ  กามโภคี  ธมฺเมน  โภเค ปริเยสติ
อสาหเสน   ธมฺเมน   โภเค   ปริเยสิตฺวา  อสาหเสน  อตฺตานํ  สุเขติ
ปีเณติ   น   สํวิภชติ   น   ปุญฺญานิ  กโรติ  ฯ  อยํ  คามณิ  กามโภคี
ทวีหิ   ฐาเนหิ  ปาสํโส  เอเกน  ฐาเนน  คารโยฺห  ฯ  กตเมหิ  ทฺวีหิ
ฐาเนหิ   ปาสํโส   ฯ  ธมฺเมน  โภเค  ปริเยสติ  อสาหเสนาติ  อิมินา
ปฐเมน   ฐาเนน   ปาสํโส   ฯ   อตฺตานํ   สุเขติ   ปีเณตีติ   อิมินา
ทุติเยน   ฐาเนน  ปาสํโส  ฯ  กตเมน  เอเกน  ฐาเนน  คารโยฺห  ฯ
น  สํวิภชติ  น  ปุญฺญานิ  กโรตีติ  อิมินา  เอเกน  ฐาเนน  คารโยฺห ฯ
อยํ    คามณิ   กามโภคี   อิเมหิ   ทฺวีหิ   ฐาเนหิ   ปาสํโส   อิมินา
เอเกน ฐาเนน คารโยฺห ฯ
     [๖๔๒]   ตตฺร  คามณิ  ยฺวายํ  กามโภคี  ธมฺเมน  โภเค ปริเยสติ
อสาหเสน   ธมฺเมน   โภเค   ปริเยสิตฺวา  อสาหเสน  อตฺตานํ  สุเขติ
ปีเณติ   สํวิภชติ   ปุญฺญานิ   กโรติ   เต   จ  โภเค  คธิโต  มุจฺฉิโต
อชฺฌาปนฺโน   ๑-   อนาทีนวทสฺสาวี   อนิสฺสรณปญฺโญ  ปริภุญฺชติ  ฯ  อยํ
คามณิ   กามโภคี   ตีหิ   ฐาเนหิ  ปาสํโส  เอเกน  ฐาเนน  คารโยฺห
กตเมหิ  ตีหิฐา  เนหิ  ปาสํโส  ฯ  ธมฺเมน โภเค ปริเยสติ อสาหเสนาติ
อิมินา   ปฐเมน   ฐาเนน   ปาสํโส   ฯ   อตฺตานํ   สุเขติ   ปีเณตีติ
อิมินา   ทุติเยน   ฐาเนน   ปาสํโส   ฯ   สํวิภชติ   ปุญฺญานิ  กโรตีติ
อิมินา   ตติเยน   ฐาเนน   ปาสํโส   ฯ   กตเมน   เอเกน  ฐาเนน
คารโยฺห  ฯ  เต  จ  โภเค  คธิโต มุจฺฉิโต อชฺฌาปนฺโน อนาทีนวทสฺสาวี
อนิสฺสรณปญฺโญ      ปริภุญฺชตีติ      อิมินา      เอเกน      ฐาเนน
คารโยฺห   ฯ   อยํ   คามณิ   กามโภคี  อิเมหิ  ตีหิ  ฐาเนหิ  ปาสํโส
อิมินา เอเกน ฐาเนน คารโยฺห ฯ
     [๖๔๓]   ตตฺร  คามณิ  ยฺวายํ  กามโภคี  ธมฺเมน  โภเค ปริเยสติ
อสาหเสน   ธมฺเมน   โภเค   ปริเยสิตฺวา  อสาหเสน  อตฺตานํ  สุเขติ
ปีเณติ   สํวิภชติ   ปุญฺญานิ   กโรติ  เต  จ  โภเค  อคธิโต  อมุจฺฉิโต
อนชฺฌาปนฺโน    ๒-    อาทีนวทสฺสาวี    นิสฺสรณปญฺโญ   ปริภุญฺชติ   ฯ
อยํ   คามณิ   กามโภคี   จตูหิ   ฐาเนหิ   ปาสํโส  ฯ  กตเมหิ  จตูหิ
ฐาเนหิ   ปาสํโส   ฯ  ธมฺเมน  โภเค  ปริเยสติ  อสาหเสนาติ  อิมินา
ปฐเมน   ฐาเนน   ปาสํโส   ฯ   อตฺตานํ   สุเขติ   ปีเณตีติ   อิมินา
ทุติเยน   ฐาเนน   ปาสํโส   ฯ   สํวิภชติ   ปุญฺญานิ   กโรตีติ  อิมินา
@เชิงอรรถ:  ม. อชฺโฌปนฺโน ฯ   ม. อนชฺโฌปนฺโน ฯ
ตติเยน   ฐาเนน   ปาสํโส   ฯ   เต   จ  โภเค  อคธิโต  อมุจฺฉิโต
อนชฺฌาปนฺโน       อาทีนวทสฺสาวี       นิสฺสรณปญฺโญ      ปริภุญฺชตีติ
อิมินา    จตุตฺเถน   ฐาเนน   ปาสํโส   ฯ   อยํ   คามณิ   กามโภคี
อิเมหิ จตูหิ ฐาเนหิ ปาสํโส ฯ
     [๖๔๔]   ตโยเม  คามณิ  ตปสฺสิโน  ลูขชีวิโน  สนฺโต  สํวิชฺชมานา
โลกสฺมึ   ฯ   กตเม   ตโย  ฯ  อิธ  คามณิ  เอกจฺโจ  ตปสฺสี  ลูขชีวี
สทฺโธ     อคารสฺมา    อนคาริยํ    ปพฺพชิโต    โหติ    อปฺเปวนาม
กุสลํ    ธมฺมํ    อธิคจฺเฉยฺยํ    อปฺเปวนาม    อุตฺตริมนุสฺสธมฺมํ    ๑-
อลมริยญาณทสฺสนวิเสสํ      สจฺฉิกเรยฺยนฺติ     ฯ     โส     อตฺตานํ
อาตาเปติ   ปริตาเปติ  กุสลญฺจ  ธมฺมํ  นาธิคจฺฉติ  อุตฺตริมนุสฺสธมฺมํ  ๒-
อลมริยญาณทสฺสนวิเสสํ    น    สจฺฉิกโรติ    ฯ    อิธ   ปน   คามณิ
เอกจฺโจ   ตปสฺสี   ลูขชีวี   สทฺโธ   อคารสฺมา   อนคาริยํ   ปพฺพชิโต
โหติ     อปฺเปวนาม     กุสลํ    ธมฺมํ    อธิคจฺเฉยฺยํ    อปฺเปวนาม
อุตฺตริมนุสฺสธมฺมํ      อลมริยญาณทสฺสนวิเสสํ      สจฺฉิกเรยฺยนฺติ     ฯ
โส   อตฺตานํ   อาตาเปติ   ปริตาเปติ  กุสลํ  หิ  โข  ธมฺมํ  อธิคจฺฉติ
อุตฺตริมนุสฺสธมฺมํ อลมริยญาณทสฺสนวิเสสํ น สจฺฉิกโรติ ฯ
     {๖๔๔.๑}   อิธ   ปน   คามณิ  เอกจฺโจ  ตปสฺสี  ลูขชีวี  สทฺโธ
อคารสฺมา    อนคาริยํ   ปพฺพชิโต   โหติ   อปฺเปวนาม   กุสลํ   ธมฺมํ
อธิคจฺเฉยฺยํ        อปฺเปวนาม       อุตฺตริมนุสฺสธมฺมํ       อลมริย-
ญาณทสฺสนวิเสสํ    สจฺฉิกเรยฺยนฺติ    ฯ    โส   อตฺตานํ   อาตาเปติ
@เชิงอรรถ:  สี. ม. ยุ. สพฺพวาเรสุ อุตฺตริมนุสฺสธมฺมาติ ปาโฐ ทิสฺสติ ฯ
@ ม. อุตฺตริ จ มนุสฺสธมฺมา ฯ เอวมุปริปิ ฯ
ปริตาเปติ      กุสลญฺจ      ธมฺมํ      อธิคจฺฉติ     อุตฺตริมนุสฺสธมฺมํ
อลมริยญาณทสฺสนวิเสสํ สจฺฉิกโรติ ฯ
     [๖๔๕]   ตตฺร  คามณิ  ยฺวายํ  ตปสฺสี  ลูขชีวี  อตฺตานํ  อาตาเปติ
ปริตาเปติ      กุสลญฺจ      ธมฺมํ     นาธิคจฺฉติ     อุตฺตริมนุสฺสธมฺมํ
อลมริยญาณทสฺสนวิเสสํ    น    สจฺฉิกโรติ   ฯ   อยํ   คามณิ   ตปสฺสี
ลูขชีวี  ตีหิ  ฐาเนหิ  คารโยฺห  ฯ  กตเมหิ  ตีหิ  ฐาเนหิ  คารโยฺห  ฯ
อตฺตานํ  อาตาเปติ  ปริตาเปตีติ  อิมินา  ปฐเมน  ฐาเนน  คารโยฺห  ฯ
กุสลญฺจ   ธมฺมํ   นาธิคจฺฉตีติ   อิมินา   ทุติเยน  ฐาเนน  คารโยฺห  ฯ
อุตฺตริมนุสฺสธมฺมํ       อลมริยญาณทสฺสนวิเสสํ      น      สจฺฉิกโรตีติ
อิมินา   ตติเยน   ฐาเนน   คารโยฺห   ฯ  อยํ  คามณิ  ตปสฺสี  ลูขชีวี
อิเมหิ ตีหิ ฐาเนหิ คารโยฺห ฯ
     [๖๔๖]   ตตฺร  คามณิ  ยฺวายํ  ตปสฺสี  ลูขชีวี  อตฺตานํ  อาตาเปติ
ปริตาเปติ     กุสลญฺหิ    โข    ธมฺมํ    อธิคจฺฉติ    อุตฺตริมนุสฺสธมฺมํ
อลมริยญาณทสฺสนวิเสสํ    น    สจฺฉิกโรติ   ฯ   อยํ   คามณิ   ตปสฺสี
ลูขชีวี  ทฺวีหิ  ฐาเนหิ  คารโยฺห  เอเกน  ฐาเนน  ปาสํโส  ฯ  กตเมหิ
ทฺวีหิ  ฐาเนหิ  คารโยฺห  ฯ อตฺตานํ อาตาเปติ ปริตาเปตีติ อิมินา ปฐเมน
ฐาเนน    คารโยฺห    ฯ    อุตฺตริมนุสฺสธมฺมํ    อลมริยญาณทสฺสนวิเสสํ
น   สจฺฉิกโรตีติ   อิมินา   ทุติเยน   ฐาเนน   คารโยฺห   ฯ  กตเมน
เอเกน    ฐาเนน   ปาสํโส   ฯ   กุสลญฺหิ   โข   ธมฺมํ   อธิคจฺฉตีติ
อิมินา   เอเกน   ฐาเนน   ปาสํโส   ฯ   อยํ  คามณิ  ตปสฺสี  ลูขชีวี
อิเมหิ ทฺวีหิ ฐาเนหิ คารโยฺห อิมินา เอเกน ฐาเนน ปาสํโส ฯ
     [๖๔๗]   ตตฺร    คามณิ    ยฺวายํ   ตปสฺสี   ลูขชีวี   อตฺตานํ
อาตาเปติ   ปริตาเปติ   กุสลํ   จ   ธมฺมํ   อธิคจฺฉติ  อุตฺตริมนุสฺสธมฺมํ
อลมริยญาณทสฺสนวิเสสํ     สจฺฉิกโรติ    ฯ    อยํ    คามณิ    ตปสฺสี
ลูขชีวี  เอเกน  ฐาเนน  คารโยฺห  ทฺวีหิ  ฐาเนหิ  ปาสํโส  ฯ  กตเมน
เอเกน  ฐาเนน  คารโยฺห  ฯ  อตฺตานํ  อาตาเปติ  ปริตาเปตีติ  อิมินา
เอเกน   ฐาเนน   คารโยฺห   ฯ  กตเมหิ  ทฺวีหิ  ฐาเนหิ  ปาสํโส  ฯ
กุสลํ   จ   ธมฺมํ   อธิคจฺฉตีติ   อิมินา   ปฐเมน  ฐาเนน  ปาสํโส  ฯ
อุตฺตริมนุสฺสธมฺมํ      อลมริยญาณทสฺสนวิเสสํ     สจฺฉิกโรตีติ     อิมินา
ทุติเยน   ฐาเนน   ปาสํโส   ฯ   อยํ   คามณิ  ตปสฺสี  ลูขชีวี  อิมินา
เอเกน ฐาเนน คารโยฺห อิเมหิ ทฺวีหิ ฐาเนหิ ปาสํโส ฯ
     [๖๔๘]   ติสฺโส   อิมา   คามณิ   สนฺทิฏฺฐิกา  นิชฺชรา  อกาลิกา
เอหิปสฺสิกา    โอปนยิกา   ปจฺจตฺตํ   เวทิตพฺพา   วิญฺญูหิ   ฯ   กตมา
ติสฺโส    ฯ    ยํ   รตฺโต   ราคาธิกรณํ   อตฺตพฺยาพาธายปิ   เจเตติ
ปรพฺยาพาธายปิ   เจเตติ   อุภยพฺยาพาธายปิ   เจเตติ   ราเค  ปหีเน
เนว  อตฺตพฺยาพาธายปิ  ๑-  เจเตติ  น  ปรพฺยาพาธายปิ ๑- เจเตติ น
อุภยพฺยาพาธายปิ   เจเตติ   สนฺทิฏฺฐิกา  นิชฺชรา  อกาลิกา  เอหิปสฺสิกา
โอปนยิกา   ปจฺจตฺตํ   เวทิตพฺพา   วิญฺญูหิ   ฯ  ยํ  ทุฏฺโฐ  โทสาธิกรณํ
อตฺตพฺยาพาธายปิ   เจเตติ   ปรพฺยาพาธายปิ  เจเตติ  อุภยพฺยาพาธายปิ
@เชิงอรรถ:  ม. ยุ. ปิสทฺโท นตฺถิ ฯ
เจเตติ    โทเส    ปหีเน    เนว   อตฺตพฺยาพาธายปิ   เจเตติ   น
ปรพฺยาพาธายปิ      เจเตติ     น     อุภยพฺยาพาธายปิ     เจเตติ
สนฺทิฏฺฐิกา      นิชฺชรา      อกาลิกา     เอหิปสฺสิกา     โอปนยิกา
ปจฺจตฺตํ     เวทิตพฺพา    วิญฺญูหิ    ฯ    ยํ    มูโฬฺห    โมหาธิกรณํ
อตฺตพฺยาพาธายปิ        เจเตติ       ปรพฺยาพาธายปิ       เจเตติ
อุภยพฺยาพาธายปิ   เจเตติ   โมเห   ปหีเน   เนว   อตฺตพฺยาพาธายปิ
เจเตติ    น    ปรพฺยาพาธายปิ    เจเตติ    น    อุภยพฺยาพาธายปิ
เจเตติ    สนฺทิฏฺฐิกา    นิชฺชรา   อกาลิกา   เอหิปสฺสิกา   โอปนยิกา
ปจฺจตฺตํ   เวทิตพฺพา   วิญฺญูหิ  ฯ  อิมา  โข  คามณิ  ติสฺโส  สนฺทิฏฺฐิกา
นิชฺชรา    อกาลิกา    เอหิปสฺสิกา   โอปนยิกา   ปจฺจตฺตํ   เวทิตพฺพา
วิญฺญูหีติ   ฯ   เอวํ   วุตฺเต   ราสิโย   คามณี   ภควนฺตํ   เอตทโวจ
อภิกฺกนฺตํ   ภนฺเต   อภิกฺกนฺตํ   ภนฺเต   ฯเปฯ   อุปาสกํ   มํ   ภควา
ธาเรตุ อชฺชตคฺเค ปาณุเปตํ สรณงฺคตนฺติ ฯ ทฺวาทสมํ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๑๘ หน้าที่ ๔๐๖-๔๑๘. https://84000.org/tipitaka/read/pali_read.php?B=18&A=8270&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=18&A=8270&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=18&item=629&items=20              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=18&siri=278              ศึกษาอรรถกถานี้ได้ที่ :- https://84000.org/tipitaka/attha/attha.php?b=18&i=629              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=13&A=3721              The Pali Atthakatha in Roman :- https://84000.org/tipitaka/atthapali/read_rm.php?B=13&A=3721              สารบัญพระไตรปิฎกเล่มที่ ๑๘ https://84000.org/tipitaka/read/?index_18 https://84000.org/tipitaka/english/?index_18

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]