บาลีพระไตรปิฎกเล่มที่ ๑๙ - พระสุตตันตปิฎกเล่มที่ ๑๑

     [๔๙๐]   ปญฺจิเม  ภิกฺขเว  อาวรณา  นีวรณา  เจตโส อุปกฺกิเลสา
ปญฺญาย   ทุพฺพลีกรณา   ฯ   กตเม   ปญฺจ   ฯ   กามจฺฉนฺโท  ภิกฺขเว
อาวรโณ   นีวรโณ   เจตโส   อุปกฺกิเลโส   ปญฺญาย   ทุพฺพลีกรโณ  ฯ
พฺยาปาโท   ภิกฺขเว   อาวรโณ  นีวรโณ  เจตโส  อุปกฺกิเลโส  ปญฺญาย
ทุพฺพลีกรโณ    ฯ    ถีนมิทฺธํ    ภิกฺขเว    อาวรณํ   นีวรณํ   เจตโส
อุปกฺกิเลสํ    ปญฺญาย    ทุพฺพลีกรณํ    ฯ    อุทฺธจฺจกุกฺกุจฺจํ    ภิกฺขเว
อาวรณํ    นีวรณํ    เจตโส    อุปกฺกิเลสํ   ปญฺญาย   ทุพฺพลีกรณํ   ฯ
วิจิกิจฺฉา   ภิกฺขเว   อาวรณา   นีวรณา  เจตโส  อุปกฺกิเลสา  ปญฺญาย
ทุพฺพลีกรณา    ฯ   อิเม   โข   ภิกฺขเว   ปญฺจ   อาวรณา   นีวรณา
เจตโส อุปกฺกิเลสา ปญฺญาย ทุพฺพลีกรณาติ ^๑- ฯ
@เชิงอรรถ: ^๑ ม. ยุ อิติสทฺโท นตฺถิ ฯ
     [๔๙๑]   สตฺติเม   ภิกฺขเว   โพชฺฌงฺคา   อนาวรณา   อนีวรณา
เจตโส   อนุปกฺกิเลสา   ภาวิตา   พหุลีกตา   วิชฺชาวิมุตฺติผลสจฺฉิกิริยาย
สํวตฺตนฺติ   ฯ   กตเม   สตฺต  ฯ  สติสมฺโพชฺฌงฺโค  ภิกฺขเว  อนาวรโณ
อนีวรโณ   เจตโส   อนุปกฺกิเลโส   ภาวิโต  พหุลีกโต  วิชฺชาวิมุตฺติผล-
สจฺฉิกิริยาย     สํวตฺตติ    ฯเปฯ    อุเปกฺขาสมฺโพชฺฌงฺโค    ภิกฺขเว
อนาวรโณ    อนีวรโณ    เจตโส   อนุปกฺกิเลโส   ภาวิโต   พหุลีกโต
วิชฺชาวิมุตฺติผลสจฺฉิกิริยาย   สํวตฺตติ   ฯ   อิเม   โข   ภิกฺขเว   สตฺต
โพชฺฌงฺคา    อนาวรณา   อนีวรณา   เจตโส   อนุปกฺกิเลสา   ภาวิตา
พหุลีกตา วิชฺชาวิมุตฺติผลสจฺฉิกิริยาย สํวตฺตนฺตีติ ฯ
     [๔๙๒]   ยสฺมึ  ภิกฺขเว  สมเย อริยสาวโก อฏฺฐิกตฺวา ^๑- มนสิกตฺวา
สพฺพเจตโส  ^๒-  สมนฺนาหริตฺวา  โอหิตโสโต  ธมฺมํ  สุณาติ  ปญฺจสฺส ^๓-
นีวรณา   ตสฺมึ   สมเย   น   โหนฺติ   สตฺต  โพชฺฌงฺคา  ตสฺมึ  สมเย
ภาวนาปาริปูรึ คจฺฉนฺติ ฯ
     [๔๙๓]   กตมสฺส  ^๔-  ปญฺจ  นีวรณา  ตสฺมึ  สมเย  น  โหนฺติ  ฯ
กามจฺฉนฺทนีวรณํ    ตสฺมึ    สมเย   น   โหติ   พฺยาปาทนีวรณํ   ตสฺมึ
สมเย  น  โหติ  ถีนมิทฺธนีวรณํ  ตสฺมึ  สมเย  น  โหติ  อุทฺธจฺจกุกฺกุจฺจ-
นีวรณํ  ตสฺมึ  สมเย  น  โหติ  วิจิกิจฺฉานีวรณํ  ตสฺมึ  สมเย น โหติ ฯ
ปญฺจสฺส นีวรณา ตสฺมึ สมเย น โหนฺติ ฯ
     [๔๙๔]   กตเม   สตฺต   โพชฺฌงฺคา  ตสฺมึ  สมเย  ภาวนาปาริปูรึ
@เชิงอรรถ: ^๑ ม. ยุ. อฏฺฐึกตฺวา ฯ เอวมุปริ ฯ  ^๒ ม. สพฺพํ ... ฯ เอวมุปริ ฯ  ^๓ สี. ม.
@ยุ. อิมสฺส ปญฺจ ฯ เอวมุปริ ฯ  ^๔ ม. ยุ. กตเม ฯ
คจฺฉนฺติ   ฯ   สติสมฺโพชฺฌงฺโค   ตสฺมึ   สมเย   ภาวนาปาริปูรึ  คจฺฉติ
ฯเปฯ   อุเปกฺขาสมฺโพชฺฌงฺโค   ตสฺมึ  สมเย  ภาวนาปาริปูรึ  คจฺฉติ  ฯ
อิเม สตฺต โพชฺฌงฺคา ตสฺมึ สมเย ภาวนาปาริปูรึ คจฺฉนฺติ ฯ
     [๔๙๕]   ยสฺมึ  ภิกฺขเว  สมเย  อริยสาวโก  อฏฺฐิกตฺวา  มนสิกตฺวา
สพฺพเจตโส    สมนฺนาหริตฺวา    โอหิตโสโต   ธมฺมํ   สุณาติ   ปญฺจสฺส
นีวรณา   ตสฺมึ   สมเย   น   โหนฺติ   อิเม   สตฺต  โพชฺฌงฺคา  ตสฺมึ
สมเย ภาวนาปาริปูรึ คจฺฉนฺตีติ ฯ

เนื้อความพระไตรปิฎกฉบับภาษาบาลี อักษรไทย เล่มที่ ๑๙ หน้าที่ ๑๓๓-๑๓๕. https://84000.org/tipitaka/read/pali_read.php?B=19&A=2528&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=19&A=2528&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=19&item=490&items=6 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=19&siri=110 ศึกษาอรรถกถานี้ได้ที่ :- https://84000.org/tipitaka/attha/attha.php?b=19&i=490 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=13&A=4751 The Pali Atthakatha in Roman :- https://84000.org/tipitaka/atthapali/read_rm.php?B=13&A=4751 สารบัญพระไตรปิฎกเล่มที่ ๑๙ https://84000.org/tipitaka/read/?index_19 https://84000.org/tipitaka/english/?index_19